Ise wa Mboni za Yahova tichayesesa kukhala na mabanja yakulimba komasoti tichathandiza wanthu anango kuti akhale na mabanja yakulimba. Tichadziwa kuti Mulungu ndiye adayambisa banja. (Genesis 2:21-24; Aefeso 3:14, 15) Kudzera m’Baibolo, Mulungu adapereka mpfundo zomwe zathandiza wanthu pa dziko yose kukhala na mabanja yakulimba komasoti yokondwa.

Momwe wa Mboni za Yahova achathandizira kuti mabanja yakhale yakulimba

 Tichayesesa kutewedza malangizo ya m’Baibolo ndawa yachatithandiza kuti tikhale amuna, akazi komasoti makolo yabwino. (Miyambo 31:10-31; Aefeso 5:22–6:4; 1 Timoteyo 5:8) Malangizo ya m’Baibolo yachathandiza olo mabanja ya wanthu wa vipembedzo vosiyana kuti yambafambe bwino. (1 Petulo 3:1, 2) Onani vomwe wanthu anango womwe ni wa Mbonilini adanena va amuna na akazi wawo womwe ni Mboni:

•   “Kwa magole 6 kuchokera pomwe tidalowolana timbondokhalira kushupana. Koma nkazi wangu dzina yake Ivete pomwe adakhala wa Mboni za Yahova, angachita vinthu mwachikondi komasoti moleza moyo kusiyana na kalekale. Vimwevi vidachitisa kuti banja yathu ilibe.”—Clauir, wa ku Brazil.

•   ““Mwamuna wangu, Chansa, padayamba kupfunzira Baibolo na Mboni za Yahova ningamulambiza ndawa nigaganiza kuti wa Mboni achamalisa mabanja ya wanthu. Koma nidawona kuti mwamuna wangu pomwe adayamba kupfunzira Baibolo, banja yathu idayamba kufamba bwino maninge.”—Agness, wa ku Zambia.

 Tikambalalikira, tichaonesa wanthu momwe kuphatisira basa malangizo ya m’Baibolo kungawathandizire kuti

•   Asalule mwanzeru munthu yemwe angalowolane naye

•   Apfunzire kumalisa mabvuto yomwe wanthu wolowolana achagumana nayo mu gole yoyamba ya ukwati

•   Ambabverane na apongozi wawo

•   Asiye kukangana

•   Ambakhululukirane

•   Ambapfunzise bwino wana wawo

Ko m’banja muchakhala mabvuto munthu akachinja chipembedzo?

 Nthawe zinango yachakhalapo. Mwakulinganiza, mu gole ya 1998 lipoti yomwe kampani inango yochita kafukufuku idanena kuti pa mabanja 20 yaliyose yomwe m’bodzi ni wa Mboni za Yahova, banja ibodzi idagumanako na mabvuto yakulu pa nthawe yomwe munango adayamba kupfunzira na wa Mboni. Sofres

 Yesu adaneneratu kuti wanthu womwe adzakhale ateweri wake, nthawe zinango angatsutsiwe na wanthu wa m’banja mwawo. (Mateyu 10:32-36) Katswiri munango wa mbiri yakale dzina yake Will Durant, adanena kuti mu Ufumu wa Roma, “Chikhrisitu chimbagawanisa mabanja,” a ndipo masiku yano, wanthu anango achanena kuti wa Mboni za Yahova achapasula mabanja. Ko vimwevi vikutanthauza kuti wa Mboni ni womwe achachitisa kuti mabanja yambamale?

 Pakutonga mulandu wakuti wa Mboni za Yahova achachitisa kuti mabanja ya wanthu yambamale, telebunali yowona va ufulu wa wanthu ya ku Ulaya idalewa kuti wanthu wa m’banja ya wanthu womwe ni wa Mboni, nthawe zizinji achayambisa mikangano ndawa yakuleka “kubvuma komasoti kulemekeza ufulu wa chipembedzo cha abale wawo pakuchita vinthu va chipembedzo chake.” Telebunali mweyi idanenasoti kuti: “Bvuto mweyi ichakhalapo m’mabanja yose yomwe wanthu ni wosiyana vipembedzo osati mabanja ya wa Mboni za Yahova wokha.”  bWa Mboni za Yahova akambadzudziwa ndawa ya chipembedzo chawo nthawe zose achayesesa kutewedza malangizo ya m’Baibolo yakuti: ‘Lekani kubwezera choyipa pa choyipa. . . . Ngati ni vokwanisika, khalani pa ntendere na wanthu wose, ninge momwe mungakwanisire.’—Aroma 12:17, 18.

Ndawa chani wa Mboni za Yahova achakhulupirira kuti achadekana kulowolana na wanthu wa chipembedzo chawo chokha?

 Wa Mboni achatewedza lamulo ya m’Baibolo yakuti munthu alowole ‘mwa Ambuya,’ vomwe vichatanthauza kulowolana na munthu yemwe achakhulupirira vinthu vobverana na vawo. (1 Akorinto 7:39) Lamulo mweyi ni ya m’Baibolo komasoti ni yothandiza maninge. Mwakulinganiza, nkhani yomwe idabula mu gole ya 2010 mu gazini inango idalewa kuti, ‘wanthu wolowolana akakhala kuti wose ni wa chipembedzo chibodzi,’ achabverana maninge. Journal of Marriage and Family. c

 Koma, wa Mboni achauzalini wanthu wa chipembedzo chawo kuti amalise ukwati vikakhala kuti mwamuna panango nkazi wawo ni wa Mboni lini. Baibolo ichati: ‘Ngati pali m’bale yemwe anankazi yemwe ni wosakhulupirira, ndipo nkazi muyo akubvuma kukhala naye, ayi kuti amusiye nkazi muyo. Ndiposoti ngati nkazi yemwe mwamuna wake ni wosakhulupirira, koma mwamuna muyo ankubvuma kukhala naye, ayi kuti amusiye mwamuna wake muyo.’ (1 Akorinto 7:12, 13) Wa Mboni za Yahova achatewedza lamulo mweyi.