Rute 2:1-23
2 Penze munthu munango wolemera maninge yemwe wenze wachibale wa mwamuna wake wa Naomi. Dzina yake wenze Boazi ndipo wenze wa kubanja ya Elimeleki.
2 Rute nkazi wa ku Mowabu ule adauza Naomi kuti: “Tani niyende nikachite mashanga balere m’munda mwa aliyese yemwe anganikomere ntima?” Ndipo Naomi adamudawira kuti: “Yenda mwana wangu.”
3 Pamwapo Rute adanyamuka nkuyenda ndipo adakangena m’munda unango nkuyamba kuchita mashanga m’mambuyo mwa wanthu okolola. Manje vidandochitika kuti munda muyo wenze wa Boazi, wa kubanja ya Elimeleki.
4 Kanthawe pang’ono, Boazi adafika kuchokera ku Betelehemu ndipo adamonisa okolola mwawo kuti: “Yahova akhale namwe.” Ndipo iwo adadawira kuti: “Yahova akudaliseni.”
5 Patsogolo pake Boazi adabvunza mulumbwana yemwe ambanyang’anira okolola mwawo kuti: “Ko mtsikana moyu ni wa kubanja iponi?”
6 Mulumbwana muyo adadawira kuti: “Mtsikana moyu ni wa ku Mowabu, adabwera pabodzi na Naomi kuchokera ku Mowabu.
7 Pawafika wakumbira kuti: ‘Nimbati nichiteko mashanga. Nimbalokote balere womwe unkukhalira m’mambuyo mwa wanthu omwe ankukololawa.’ Ndipo wakhala ankuchita mashanga kuyambira machibese mpakana manjemanje apa pomwe wakhala pa nthunzi kuti apumule pang’ono.”
8 Pamwapo adauza Rute kuti: “Bvesera mwana wangu, ayi kuyenda ku munda unango kukachita mashanga. Ayi kuchoka kuyenda kunango, umbakhale pafupi na azinyabasa wangu atsikana awa.
9 Umbandonyang’ana mbali yomwe ankukolola ndipo umbawalondole. Alumbwana awa nawalamula kuti osati akubonerese.* Ukabva nyota, umbayende kukamwa madzi yomwe yali m’mitsuko yomwe alumbwana awa atunga.”
10 Padabva vimwevi adagwada nkujolima mpakana nkhope yake pasi, nkunena kuti: “Vakwanisika tani kuti muniganizire na kunikomera ntima tene, pakuti ndine mulendo?”
11 Boazi adamudawira kuti: “Nabva vose vomwe wachitira apongozi wako kundochokera pomwe mwamuna wako adamwalira. Nabva pomwe kuti udasiya ababa wako na amayi wako komasoti dziko ya kwanu nkubwera kuno kwa wanthu omwe uwadziwalini.
12 Yahova akupase malipiro ndawa ya vomwe wachita, ndipo Yahova Mulungu wa Izirayeli akulipire* mokwana pakuti wathawira m’maphaphiro mwake kuti ugumane chitetezo.”
13 Rute padabva vimwevi adati: “Mwanikomera ntima mbuya wangu. Mwanilimbikisa komasoti mwayankhula monilimbisa ntima podiya kuti ndinelini nyabasa wanu.”
14 Pa nthawe ya chakudya, Boazi adauza Rute kuti: “Bwera kuno udzadye nkate, ungambasaize pomwe mu vinyu uyu wowawasha.” Pamwapo Rute adayenda nkukakhala pasi pabodzi na okolola. Pamwapo Boazi ambamupasa balere wokazinga ndipo iye adadya nkukhuta mpakana unango udakhalira.
15 Padamaliza kudya, adanyamuka nkukapitiriza kuchita mashanga. Boazi adalamula alumbwana wake kuti: “Mumbamubvumize kuchita mashanga balere* ndipo ayi kumuboneresa.
16 Komasoti mumbasolole balere munango pa mitolo nkumbamusiya pasi kuti iye achite mashanga ndipo ayi kumulambiza kuchita mashanga.”
17 Pamwapo Rute adapitiriza kuchita mashanga m’munda muyo mpakana kumaulo. Padamaliza kupula balere womwe adachita mashanga, udakwana pafupifupi mpimo ubodzi wa efa.*
18 Padateno, adanyamula balere muyo nkubwerera kumuyi, ndipo apongozi wake adaona balere womwe adachita mashanga. Patsogolo pake Rute adatenga chakudya chidakhala chile nkuwapasa apongozi wake.
19 Manje apongozi wake adamubvunza kuti: “Ko lero wakachitira kuponi mashanga? Adalisiwe muyo yemwe wakuganizira.” Pamwapo iye adauza apongozi wake wale va munda womwe adakachita mashanga. Iye adawauza kuti: “Munda womwe nakachita mashanga lero, anikachiro ni a Boazi.”
20 Padateno Naomi adauza mulowola wake muyo kuti: “Yahova yemwe alibe kusiya kuonesa chikondi chokhulupirika kwa wa moyo na wakufa, amudalise munthu muyo.” Ndipo Naomi adapitiriza kuti: “Munthu muyo ni wachibale wathu ndipo ni m’bodzi wa wotiwombola.”
21 Pamwapo Rute nkazi wa ku Mowabu adati: “Mwakuti adaniuza pomwe kuti: ‘Ayi kuchoka, umbakhale pafupi na azinyabasa wangu awa mpakana adzamalize kukolola.’”
22 Naomi adauza Rute mulowola wake kuti: “Vingakhaledi bwino mwana wangu, umbayende pabodzi na atsikana wake mwawo, kusiyana nakuti akakuchite chinthu choipa ku munda unango.”
23 Pamwapo Rute adapitiriza kukhala na anyabasa wachitsikana wa Boazi mpakana pomwe adamaliza kukolola balere na tirigu. Ndipo ambapitiriza kukhala pabodzi na apongozi wake.
Mawu ya m’nyantsi
^ Panango kuti: “osati akuphatephate.”
^ Panango kuti: “akupagali.”
^ Mabaibolo yanango yadati: “mitolo ya balere.”
^ Kuthamangira malitru 22. Onani vakumapeto B14.
