Mika 3:1-12

  • Atsogoleri na aneneri adatsuuliwa (1-12)

    • Mika adapasiwa mphanvu na mzimu wa Yahova (8)

    • Antsembe ambapfunzisa kuti agumane kobiri (11)

    • Yerusalemu adzakhale matongwe (12)

3  Inepano nidati: “Bveserani imwe atsogoleri wa mbadwa za YakoboKomasoti imwe olamulira wa nyumba ya Izirayeli. Ko mufunikalini kudziwa chilungamo?  2  Koma muzonda vinthu vabwino ndipo mukonda vinthu voipa. Mupfenda khanda ya wanthu wangu nkuchosa m’nyompfu pa mabonzo yawo.  3  Mukudya pomwe m’nyompfu wa wanthu wangu,Ndipo mupfenda pomwe khanda yawo. Mubadula mabonzo yawo nkuyaphwanyaphwanya. Ninge vinthu vomwe vaphikiwa mum’phika* komasoti ninge nyama yomwe iri mum’phika.  4  Panthawe mwiyo adzachemere Yahova kuti awathandize,Koma adzawadawirelini. Adzawabisire nkhope yake panthawe mwiyo,Ndawa ya vochita vawo voipa.  5  Ivi ni vomwe Yahova wanena vomwe vidzachitikire aneneri omwe akusokeresa wanthu wa ntundu wangu. Omwe anena kuti: ‘Ntendere!’ Uku ankuluma na manu yawo.* Koma munthu akaleka kuikha chakudya nkamwa mwawo, akonzekera kukamenyana naye:  6  ‘Usiku udzakufikireni, koma mudzawonelini masomphenya. Kumbadzakhale mdima, koma imwepo mudzanenelini pomwe vakutsogolo. Aneneri mwawa dzuwa idzawachomere. Ndipo mdima udzawafikire masikati.  7  Owona masomphenya adzachitisiwe manyazi,Ndipo onena vakutsogolo adzakhumudwe. Wose mwawa adzabise ndebvu zawo zapakamwa,*Ndawa Mulungu adzawadawirelini.’”  8  Koma inepano napasiwa mphanvu na mzimu wa Yahova. Ndipo ndine wokonzeka kuchita chilungamo komasoti kuwonesa mphanvu,Kuti niuze mbadwa za Yakobo va kupanduka kwawo, komasoti Izirayeli va chimo yake.  9  Bveserani ivi imwepo atsogoleri wa nyumba ya YakoboKomasoti imwepo olamulira wa nyumba ya Izirayeli,Omwe muzondana na chilungamo komasoti muphonyesa vinthu vose vabwino, 10  Imwepo omwe mukupha wanthu kuti mumange Ziyoni komasoti muchita vinthu viribe chilungamo kuti mumange Yerusalemu. 11  Atsogoleri wa muthaundi mumo aweruzalini akanati atambira chifunga pakamwa,*Wantsembe wake apfunzisa kuti agumane malipiro,Ndipo aneneri wake anena vakutsogolo kuti agumane kobiri. Koma iwo anena kuti athemba Yahova ndipo anena kuti: “Yahova ali nase,Ndipo tsoka idzatigwerelini.” 12  Ndipomwapa ndawa ya wanthu imwe,Ziyoni adzalimiwe ninge munda,Yerusalemu adzakhale matongwe. Ndipo phiri ya nyumba* ya Mulungu idzakhale ninge mitunthu ya n’thengo yokosa maninge.*

Mawu ya m’nyantsi

^ Panango kuti: “mum’phika wa kukamwa kukulu.”
^ Mabaibolo yanango adati: “pomwe ali na chakudya chakuti atampfune.”
^ Panango kuti: “adzabise pakamwa pawo.”
^ Panango kuti: “bobobo.”
^ Panango kuti: “phiri ya kachisi.”
^ Panango kuti: “theketa.”

Bukhu mweyi niyotetezewa na ufulu wa zamalamulo