Chivumbuluso chomwe Yohani adatambira 5:1-14
5 Patsogolo pake nidawona mpukutu womwe udanembewa mbali zose,* uli mudjanja yamakulu ya Mulungu yemwe adakhala pa mpando wachifumu. Mpukutu muyo adaumata maninge na vidindo 7 vomatira.
2 Ndipo nidawona mngelo wamphanvu ankulengeza na mawu yokuwa yakuti: “Ni mbani ali woyenerera kumatula vidindo vomwe amatira mpukutu moyu nkuufungula?”
3 Koma penze palibe aliyese peno kudzulu, padziko yapasi panango pasi padothi, yemwe adakwanisa kufungula mpukutu muyo panango kunyang’anamo na kuuwerenga.
4 Pamwapo nidalira maninge ndawa palibe kugumanika aliyese woyenerera kufungula mpukutu muyo panango kunyang’anamo nkuuwerenga.
5 Koma m’bodzi pa akulu wale adaniuza kuti: “Nyamala. Ona! Mphondolo ya dzinza ya Yuda, muju wa Davide, idawina nkhondo mwakuti ni yoyenerera kumatula vidindo 7 vomwe amatira mpukutu muyo nkuufungula.”
6 Patsogolo pake nidawona Mwanawankhosa yemwe ambawoneka ninge waphewa, ali imirire pakati pa mpando wachifumu na angelo 4 wale komasoti pakati pa akulu wale. Iye wenze na nyanga 7 komasoti maso 7. Maso mwaya yankuimira mizimu 7 ya Mulungu, yomwe yatumiziwa padziko yose yapasi.
7 Nthawe mwiyoletu iye adayenda kukatenga mpukutu womwe wenze kudjanja yamakulu ya Mulungu yemwe wenze khale pampando wachifumu.
8 Padatenga mpukutu muyo, angelo 4 na akulu 24 wale adagwada nkujolima pamaso pa Mwanawankhosa. Aliyese wa iwo wenze na zeze komasoti mbale ya golide yodzadza na vofukiza. (Vofukiza mwivo vinkuimira mapemphero ya ochena.)
9 Iwo ambaimba nyimbo inyowani yakuti: “Imwepo ndimwe woyenera kutenga mpukutu muyo na kumatula vidindo vake vomatira, ndawa mudaphewa ndipo na magazi yanu mudagula wanthu kuti atumikire Mulungu. Wanthu mwawo ni wochokera mu dzinza iriyose, chiyankhulo chirichose, khaindi iriyose na dziko iriyose.
10 Ndipo mudawaikha kuti akhale mafumu na antsembe wa Mulungu wathu, mwakuti adzakhale mafumu yotonga dziko yapasi.”
11 Patsogolo pake nidawona na kubva mawu ya angelo azinji ali zungulire mpando wachifumu pabodzi na angelo 4 komasoti akulu wale. Iwo enze azinji maninge* ndipo chiwerengero chawo chimbawerengekalini.
12 Iwo ambanena mokuwa kuti: “Mwanawankhosa yemwe adaphewa ni woyenerera mphanvu, chuma, nzeru, ulemu, ulemerero na madaliso.”
13 Ndipo cholengewa chirichose chakudzulu, padziko yapasi, pasi pa dothi, panyanja, na vinthu vose va mumo, nidavibva vikunena kuti: “Mulungu yemwe wakhala pampando wachifumu komasoti Mwanawankhosa, atamandiwe, atambire ulemu, ulemerero komasoti mphanvu mpakana kalekale.”
14 Manje angelo 4 wale ambanena kuti: “Ame!” Ndipo akulu wale ambagwada nkujolima na kutumikira Mulungu.
