Kjrich es schrakjlich!
Eent von daut Schlemste, waut een Mensch beläwen kaun, es Kjrich ooda Orru. Oppe gaunze Welt haben Soldoten un uk aundre Menschen daut selfst must utfinjen.
SOLDOTEN
“Eena sitt en eentwajch, woo Menschen omjebrocht ooda schwoa velazt woaren. Eena feelt sikj kjeenmol secha” (Gary, Enjlaunt).
“Ekj kjrieech Kugels en mienen Rigjen un em Jesecht, un ekj sach, daut väle omjebrocht worden, uk Kjinja un elre Menschen. De Kjrich moakt eenem ennalich hoat” (Wilmar, Kolumbien).
“Wan doa wäa ver diene Uagen dootjeschoten woat, dan kaust du nich mea opphieren, doaraun to denkjen, woo dee lieden un stänen deed. Du kaust doa kjeenmol von vejäten” (Zafirah, Stäts).
AUNDRE MENSCHEN
“Ekj docht, ekj wudd kjeenmol mea kjennen schaftich sennen. Ekj haud Angst, daut ekj wudd dootjemoakt woaren un noch väl dolla, daut miene Famielje un miene Frind wudden dootjemoakt woaren” (Oleksandra, Ukranien).
“Wie musten von Klock 2 de Nacht bat Klock 11 zeowes enne Rieej stonen toom Äten kjeepen un hauden groote Angst, daut ons met eenst wudd een Kugel trafen” (Daler, Tadschikistan).
“Miene Elren worden em Kjrich omjebrocht. Ekj wort een Weisenkjint un doa wia kjeena, waut sikj om mie kjemren ooda mie treesten deed” (Marie, Ruanda).
Dise Menschen haben kunt ennalich Fräd finjen, wan dee uk em Kjrich väl Schrakjeljet beläwden. Un dee sent sikj secha, daut Kjrich un Orru boolt een Enj haben woat. Woo woat daut krakjt schaufen? En disen Woaktorm woa wie seenen, waut de Schreft doaräwa sajcht.
