Entre 1999 y 2015, testigonan di Jehova a construi mas cu 5.000 Salon di Reino den Sur America * y Mexico. Y ainda tin mester di mas cu 700 Salon di Reino pa acomoda e 1 miyon Testigonan y tur otro hende cu ta asisti na nos reunionnan den e region aki.

Den pasado, congregacionnan den e parti di mundo aki tabata haya dificil pa construi luganan di adoracion. Por ehempel, na Mexico mayoria Testigo tabata reuni den cas di famia. Dicon? Un di e motibonan tabata cu pa hopi aña ley no tabata permiti pa organisacionnan religioso ta doño di tereno. Pero na aña 1990 e ley a cambia y testigonan di Jehova a cuminsa construi hopi Salon di Reino. Toch e construccion di cada salon a dura mayoria biaha lunanan largo.

Aworaki e proceso ey ta bay hopi mas lihe. Na aña 1999 nan a start un programa nobo caminda Gruponan di Construccion di Salon di Reino a cuminsa construi Salonnan di Reino den paisnan di menos recurso incluso Mexico y e shete paisnan di Centro America. Desde 2010, e sucursal na Mexico ta supervisa e trabou di construccion den henter e region ey.

E sirbidornan di construccion tin retonan grandi ora di construi Salon di Reino den areanan isola. Esaki tabata e caso cu algun sirbidor na Panama cu mester a biaha den boto pa mas o menos 3 ora pa por a yega na un proyecto di construccion. Y den e estado Mexicano di Chiapas, e grupo di construccion mester a uza un avioneta pa hiba e materialnan di construccion na un luga aisla.

Te hasta hendenan cu no ta Testigo tin biaha ta ansioso pa wak un Salon di Reino nobo den nan comunidad. Por ehempel, un homber di Honduras a bisa cu prome cu e Testigonan a traha un Salon di Reino den su bario, otro hende kier a uza e tereno pa un nightclub. Esey si e no tabata kier. Ora testigonan di Jehova a bis’e cu nan tin plania pa traha un Salon di Reino eynan, el a grita: “Esta un bendicion!”

Den hopi pais e hendenan ta keda impresiona pa e trabou duro di e trahadornan. Un homber di Guatemala a bisa: “Den nos cultura mayoria di biaha hende muher ta traha den cushina so. Pero e hende muhernan akinan ta haci e mesun trabou cu e hende hombernan. Mi ta keda asombra di mira hende muher haci e trabou di las y pleister muraya. Esaki ta impresionante!” Algun di e bisiñanan te hasta a sinti nan motiva pa cumpra cos di come y bebe pa e trahadornan aki.

Hopi hende ta aprecia tambe e diseño di nos Salonnan di Reino. Na Nicaragua un ingeniero a bisa e alcalde di un stad cu e Salon di Reino eynan ta un edificio bunita, traha di materialnan di bon calidad. De echo, el bisa cu e edificio aki ta di calidad mas halto cu cualkier otro edificio den e stad ey.

Ta claro cu testigonan di Jehova mes ta contento pa tin luganan apropia pa adora Dios. Nan a ripara cu e studiantenan di Bijbel ta mas dispuesto pa asisti na e reunionnan di congregacion despues cu un Salon di Reino ser construi. Miembronan di un congregacion na Mexico cu a yuda e sirbidornan di construccion den traha un Salon di Reino, tabata hopi agradecido y a bisa: “Nos ta gradici Jehova pa e privilegio cu nos tabatin di construi un Salon di Reino cu ta duna honor y gloria na su nomber.”