Aña 2025 ta marca e di 100 aniversario predicando e bon noticia na Venezuela—un pais conoci pa su beyesa natural y gran diversidad, refleha tanto den su paisahe como den su hendenan. E obra di Reino a cuminsa na 1925 ora un ruman di Trinidad a wordo asigna pa bishita e stadnan grandi di Venezuela. E aña ey, The Watch Tower a informa cu e ruman a distribui mas o menos 35.000 ehemplar di literatura biblico den henter e pais, cu a pone e base pa e crecemento cu a sigui.

Casi un decada despues, ruman Kate Goas y su yiu muher, Marion, di Texas, E.U., a skirbi sede mundial pa pidi un asignacion den un pais cu ta papia Spaño. Na 1936, nan a yega na e capital Caracas cu barco y a cuminsa predica. Despues di dies aña di esfuerso incansabel, e prome Venezolanonan a batisa dia 10 di april 1946. E ocasion ey tabata hopi memorabel, pasobra e bautismo a tuma luga den un piscina natural na pia di un waterval durante un bishita di ruman Nathan Knorr y Frederick Franz di sede mundial.

Dos luna despues, na juni 1946, ruman Donald Baxter y Walter Wan a yega despues di a gradua di e di cinco klas di e Scol Biblico di Galaad di Watchtower. Na september, e prome oficina di sucursal a habri. Na e momento ey tabatin un total di 19 publicador activo na Venezuela. Desde cu ruman Baxter y Wan a yega, casi 140 misionero a sirbi yen di entusiasmo na Venezuela, loke a contribui na un crecemento remarcabel. Awe tin mas o menos 139.000 ruman ta sirbi na Venezuela. Ademas di Spaño y Lenguahe di Seña Venezolano, nan ta comparti berdadnan biblico den 13 idioma indigena, incluyendo Pemon, Piaroa, Warao, Wayuunaiki y Yukpa

Nos ta alegra di mira con Jehova a bendiciona nos rumannan na Venezuela ricamente durante e ultimo 100 añanan, demostrando asina cu e ta cu tur esnan cu ta ”anuncia bon noticia tocante e Reino.”—Echonan 8:12.