Negligencia y Maltrato di Hende Grandi

ANOCHI ora e bewaker a sali haci su control, e no tawata prepara pa e esena horibel cu tawata ward’e. Cerca di un compleho di apartamento luhoso, el a topa dos curpa sin bida. Tawata trata aki di un pareha casa di edad avansa cu a bula for di bentana di nan apartamento na di ocho piso. Nan suicidio a causa gran consternacion, pero e motibo di nan acto tawata mas impactante ainda. Un nota cu a ser haya den saco di e homber a bisa: “Nos ta pone fin na nos bida pa motibo di e maltrato y hostigamento constante di nos yiu homber y nuera.”

Kisas e incidente riba su mes no ta cos cu ta pasa tur dia, pero e causa fundamental si ta alarmante ya cu el a bira masha comun. En berdad, maltrato di hende di edad ta un problema cu tin practicamente rond mundo. Considera e siguiente informenan:

• Den un estudio, 4 porshento di hende grandi Canades a conta cu nan a bira victima di maltrato of manipulacion—por lo general door di un miembro di famia. Sinembargo, hopi hende grandi tin mucho berguensa of mucho miedo pa papia tocante nan situacion penoso. Segun expertonan, e cifra real por ta casi 10 porshento.

• “India, cu su fachada di lasonan fuerte di famia, ta cayendo den otro debi na un cantidad creciente di hende grandi cu ta ser rechasa door di nan yiunan”, segun e revista India Today.

• Di acuerdo cu e mihor calculonan disponibel, “entre 1 pa 2 miyon Mericano di 65 aña di edad of mas a sufri entre otro lesion, maltrato, y manipulacion na man di un persona cu nan tawata depende ariba pa cuido of proteccion”, segun e Centro Nacional pa Maltrato di Hende Grandi. Un fiscal substituto na San Diego, California, ta yama maltrato di hende grandi “un di e problemanan di mas serio cu autoridadnan ta confrontando awe.” El a agrega: “Mi ta premira cu pa e proximo par di añanan e problema aki ta bai aumenta.”

• Na Canterbury, Nueva Zelandia, tin e precupacion creciente cu hende di edad ta birando victima di nan mes famia—particularmente di esnan cu tin problema cu droga, alcohol of gamblemento. E cantidad di casonan di maltrato di hende grandi cu ta wordo raporta na Canterbury a aumenta drasticamente di 65 na 2002 pa 107 na 2003. E ehecutivo principal di un organisacion cu a ser estableci pa preveni e tipo di maltrato aki a bisa cu probablemente e cantidad aki ta representa djis un fraccion chikito di e totalidad.

 • E Federacion Japones di Asociacionnan di Bar a recomenda pa “victimanan di edad avansa ricibi asta mas atencion cu victimanan di maltrato di mucha of otro violencia domestico”, segun The Japan Times. Pakico? Wel, e corant a bisa cu un di e motibonan ta cu “compara cu maltrato di mucha of di casa, maltrato di hende grandi tin tendencia di tuma mas tanto tempo pa sali na cla. Esaki ta entre otro debi cu hende grandi ta sinti nan responsabel ora e maltrato a ser causa door di nan yiunan y tambe debi cu gobierno y autoridadnan local te asina leu no a haya un manera eficas pa trata cu e problema.”

E par di ehempelnan aki di loke ta sosodiendo rond mundo ta pone nos puntra: Pakico asina tanto hende grandi ta ser neglisha y maltrata? Tin speransa cu cosnan lo drecha? Ki consuelo tin pa hende grandi?