1, 2. Йеговӕ нӕ зин рӕстӕгути куд бафедар кӕнуй, удта нин ӕ Дзурди зӕрдӕ цӕмӕй ӕвӕруй?

БИЙНОНТӔ ка нӕма искодта, уӕхӕн ӕригон ӕнсувӕр сагъӕс кодта 1 Коринфӕгтӕмӕ 7:28 финст дзурдтӕбӕл, зӕгъгӕ, «бийнонтӕ ка ’скӕна, уонӕн сӕ царди фӕззиндзӕй нӕуӕг зиндзийнӕдтӕ». Ӕнсувӕр уой туххӕй, бийнонтӕ кӕмӕн ес, уӕхӕн хестӕр нӕлгоймаги бафарста: «Ами цӕхуӕн зиндзийнӕдти кой цӕуй ӕма сӕ сӕрти куд ӕнгъезуй хезун, бийнонтӕ ку искӕнон, уӕд?» Хестӕр нӕлгоймаг ин уайтагъд дзуапп нӕ равардта, фал ин загъта, цӕмӕй расагъӕс кодтайдӕ, апостол Павел ма никкидӕр ци загъта, уобӕл: Йеговӕ ӕй «уодӕнцойнӕдӕттӕг Хуцау» ӕма нин «уодӕнцойнӕ дӕттуй не ’гас зиндзийнӕдти дӕр» (2 Кор. 1:3, 4).

² Мах ӕй зонӕн, нӕ уӕларвон Фидӕ Йеговӕ нӕ берӕ ке уарзуй ӕма зин рӕстӕгути нӕ фарсмӕ ке фӕууй. Ӕвӕдзи, гъуди кӕнис, Йеговӕ дӕ ӕ Дзурди фӕрци куд бафедар кодта ӕма дӕ куд аразта, уӕхӕн рӕстӕгутӕ. Нӕ бон  ӕй федарӕй ӕууӕндун, рагидзаманти ӕ лӕггадгӕнгутӕн куд адтӕй, абони махӕн дӕр уотӕ ке ӕй ӕма нин ӕ зӕрдӕ ӕрмӕстдӕр хуарз ке зӕгъуй. (Бакӕсӕ Йереми 29:11, 12.)

3. Аци статьяй цӕхуӕн фарстатӕмӕ ӕркӕсдзиан?

³ Адӕймаг зиндзийнӕдтӕ цӕй туххӕй ӕвзаруй, уой ку фӕззонуй, уӕд ин сӕ сӕрти хезун ӕнцондӕр фӕууй. Мадта нӕуӕг бийнонтӕн зиндзийнӕдтӕ цӕмӕн фӕззиннуй? Рагидзаманти ка цардӕй, удта мах рӕстӕги ка цӕруй, еци лӕггадгӕнгути хабӕрттӕ нин уодӕнцойнӕ куд хӕссунцӕ? Ӕркӕсӕн аци фарстатӕмӕ ӕма базонӕн, нӕ бон куд ӕй зиндзийнӕдти сӕрти хезун.

4, 5. Нӕуӕг бийнонтӕн цӕхуӕн «нӕуӕг зиндзийнӕдтӕ» фӕззиннуй?

⁴ Йеговӕ фиццаг силгоймаги ку сфӕлдиста, уӕд ӕй нӕлгоймагмӕ ӕрбакодта, ӕма иссӕй ӕ бийнойнаг. Ӕма уӕд Йеговӕ загъта: «Адӕймаг ниууадздзӕй ӕ фидӕ ӕма ӕ мади ӕма байеу уодзӕй ӕ уоси хӕццӕ, ӕма дууемӕй уодзӕнцӕ еу бауӕр» (Райд. 2:24). Абони еугурӕйдӕр ӕнӕнхӕст ан (Ром. 3:23). Уомӕ гӕсгӕ дессаг дӕр нӕй, силгоймаг ӕма нӕлгоймаг сӕ цард ку байеу кӕнунцӕ, уӕд син цӕхуӕндӕр зиндзийнӕдтӕ ке фӕззиннуй. Зӕгъӕн, кизгӕ цалинмӕ киндзи нӕма ӕрцӕуй, уӕдмӕ фегъосуй ӕрмӕстдӕр ӕ ниййергутӕмӕ. Фал Хуцауи Дзурди куд финст ӕй, уомӕ гӕсгӕ кизгӕ киндзи ку ӕрцӕуй, уӕд ӕ лӕг исуй ӕ сӕрихецау (1 Кор. 11:3). Фиццӕгти нӕлгоймагӕн дӕр зин фӕууй ӕ бийнойнагӕн хуарз сӕрихецау ун. Удта уосӕн дӕр ӕнцон нӕ фӕууй фиццагидӕр ӕ лӕгмӕ игъосун, ӕ ниййергутӕмӕ нӕ, фал. Уомӕй уӕлдай ма дууӕ адӕймаги сӕ цард ку байеу кӕнунцӕ, уӕд сӕ хеуӕнттӕй раидард унцӕ, ӕма син е дӕр фӕлварӕн исуй.

⁵ Лӕг ӕма уосӕ хъӕбӕр фӕццийнӕ кӕнунцӕ, сувӕллон син ке уодзӕй, уой ку базонунцӕ, уӕд. Фал тухсгӕ дӕр уотӕ фӕккӕнунцӕ, уомӕн ӕма фӕссагъӕс кӕнунцӕ, мадӕ цалинмӕ сувӕллон хӕссуй, уӕдмӕ куд уодзӕй, уобӕл, удта сувӕллони ӕнӕнездзийнадӕбӕл дӕр. Уомӕй уӕлдай ма ’й фӕллӕдӕрунцӕ, сӕ хӕрзтӕ дӕр ке фӕффулдӕр уодзӕнцӕ, удта сувӕллон ку райгура, уӕд сӕ цард дӕр хъӕбӕр ке раййевдзӕй. Мадӕн ӕ фулдӕр рӕстӕг ӕ сувӕллонбӕл ке рандӕ уй, уомӕ гӕсгӕ лӕг ӕма уосӕн кӕрӕдземӕн уойбӕрцӕ рӕстӕг нӕбал уодзӕй. Фидӕн дӕр фулдӕр ихӕстӕ фӕззиндзӕй, уомӕн ӕма архайдзӕй, цӕмӕй ӕ бийнойнаг дӕр ӕма сувӕллон дӕр цох мацӕмӕй уонцӕ.

6–8. Лӕг ӕма уосӕн сувӕллӕнттӕ ку не ’нтӕса, уӕд син е куд фӕууй?

⁶ Еуӕй-еу бийнонтӕ ба ӕндӕрхузи зиндзийнӕдтӕбӕл исӕмбӕлунцӕ. Сувӕллон сӕ хъӕбӕр фӕгъгъӕуй, фал син нӕ фентӕсуй. Уӕхӕн гъуддаг силгоймагӕн берӕ маст ӕрхӕссуй (Ӕмб. 13:12). Рагидзаманти силгоймагӕн ӕнӕ цӕуӕтӕй байзайун хъӕбӕр устур бӕллӕхбӕл нимад адтӕй. Ӕма Иакови уосӕ Рахил дӕр уотӕ хъӕбӕр уомӕн тухстӕй, ӕма ин сувӕллӕнттӕ не ’нтӕстӕй, ӕ хуӕрӕн куд ӕнтӕстӕй, уотӕ (Райд. 30:1, 2). Абони дӕр берӕ бӕстити адӕн уӕхӕн гъудибӕл хуӕст ӕнцӕ. Еци бӕстити миссионертӕй ка лӕггадӕ кӕнуй, уони арӕх фӕффӕрсунцӕ,  сувӕллӕнттӕ син цӕмӕннӕ ес, уобӕл. Ӕма син ӕй кӕд балӕдӕрун кӕнунцӕ, уӕддӕр еуӕй-еуетӕ ба уотӕ ракӕнунцӕ: «Ма тухсетӕ, Хуцаумӕ ковдзиан сумах туххӕй!»

⁷ Ӕркӕсӕн ӕндӕр хабармӕ. Английӕй еу хуӕри сувӕллон хъӕбӕр гъудӕй. Фал ин аци дуйней ке нӕ уодзӕй, уой ку балӕдӕрдтӕй, уӕд ӕ зӕрдӕ хъӕбӕр ӕрмӕгур ӕй. Ӕма ӕ лӕги хӕццӕ исфӕндӕ кодтонцӕ седзӕр сувӕллон райсун. Фал уӕддӕр еци хуӕрӕ загъта: «Гъеуӕддӕр мӕ зӕрди рист нӕ сабур кодта. Зудтон ӕй, еске сувӕллон хе сувӕллони адӕ ке некӕд искӕндзӕй».

⁸ Библий финст ес: «Силгоймаг зӕнӕг ку рауадза, уӕд ӕй е гъӕуай кӕндзӕй» (1 Тим. 2:15). Фал е уобӕл дзорӕг нӕй ӕма ин ӕносон цард зӕнӕги фӕрци уодзӕй. Мадта аци дзурдтӕ куд лӕдӕргӕ ’нцӕ? Силгоймаг ӕ сувӕллӕнттӕ ӕма ӕ хӕдзари сагъӕс ку фӕккӕнуй, уӕд ӕй нӕбал фӕййевдӕлуй еске фудкой кӕнунмӕ кенӕ ӕхе еске гъуддӕгти цӕвунмӕ (1 Тим. 5:13). Фал ин уотемӕй дӕр ӕ бийнонти медӕг минкъий зиндзийнӕдтӕ нӕ фӕууй.

9. Бийнонтӕ ма цӕхуӕн зиндзийнадӕбӕл исӕмбӕлунцӕ?

⁹ Бийнонтӕ ци зиндзийнӕдтӕбӕл исӕмбӕлунцӕ, уонӕй ма еу ӕй цардӕмбали мӕлӕт. Кӕд беретӕбӕл уӕхӕн хабар ӕнӕнгъӕлти ӕрцӕуй, уӕддӕр сӕмӕ хъауритӕ раззиннуй еци зин рӕстӕг бафӕразунмӕ. Киристӕнттӕ федарӕй ӕууӕндунцӕ, ка рамардӕй, етӕ ке райгас уодзӕнцӕ, уобӕл, ӕма син е устур уодӕнцойнӕ хӕссуй (Иоан. 5:28, 29). Нӕ уӕларвон Фидӕ Йеговӕ нин ӕ Дзурди зӕрдӕ ӕвӕруй, зин рӕстӕгути нӕ фарсмӕ ке уодзӕй. Мадта ӕркӕсӕн, Йеговӕ ӕ лӕггадгӕнгутӕн уодӕнцойнӕ куд лӕвардта ӕма син е куд ӕнхус кодта, уомӕ.

10. Аннӕ уодӕнцойнӕ куд иссирдта? (Кӕсӕ хузӕмӕ статьяй райдайӕни.)

¹⁰ Ӕркӕсӕн ма Анни хабармӕ дӕр. Ӕ сӕрихецау ӕй берӕ уарзта. Фал Аннӕ маст кодта, зӕнӕг ин ке не ’нтӕстӕй, уобӕл. Елхъани дуккаг уосӕ Феннанӕн ба адтӕй берӕ сувӕллӕнттӕ. (Бакӕсӕ 1 Самуили 1:4–7.) Уомӕй уӕлдай ма ин Феннанӕ е ’хсилкъӕ дзубандитӕй ӕ мастбӕл цӕнхӕ кодта. Цума Аннӕн уодӕнцойнӕ ци ’рхаста? Йеговӕмӕ ке кувта, е. Еухатт ковӕндони ку адтӕнцӕ, уӕд Аннӕ Йеговӕн хъӕбӕр фӕллигъстӕ кодта, цӕмӕй ин фурт равардтайдӕ ӕма ӕппундӕр нӕ дузӕрдуг кодта ке ин банхус кӕндзӕй, уобӕл. Кувди фӕсте ин дзӕвгарӕ фенцондӕр ӕй ӕма «ӕ цӕсгон дӕр раздӕри хузӕн ӕнкъард нӕбал адтӕй» (1 Сам. 1:12, 17, 18). Аннӕ ’й зудта, Йеговӕ ин ӕ кувд ӕнӕргъудийӕй ке нӕ ниууадздзӕй ӕма ин кенӕ фурт ратдзӕй, кенӕ ин ӕ зӕрдӕ ӕндӕр ескуд ке ӕрсабур кӕндзӕй.

11. Кувд нин уодӕнцойнӕ кӕд ӕрхӕсдзӕй?

¹¹ Сайтани дуйней ке цӕрӕн ӕма ӕнӕнхӕст ке ан, уомӕ гӕсгӕ ма зиндзийнӕдтӕбӕл ӕмбӕлдзиан (1 Иоан. 5:19). Фал мах бон дӕр ӕй «уодӕнцойнӕдӕттӕг Хуцау» Йеговӕй ӕнхус корун. Аннӕ Йеговӕн радзурдта цидӕриддӕр ӕй тухсун кодта, уой ӕма ин лигъстӕ кодта, цӕмӕй ин банхус кодтайдӕ. Мах дӕр уӕззау рӕстӕгути Йеговӕн нӕ зиндзийнӕдти туххӕй  уӕлӕнгай нӕ дзордзиан. Гъӕуама ин радзорӕн, нӕ зӕрди цидӕриддӕр ес ӕма нӕ ци тухсун кӕнуй, уой, удта ин лигъстӕ кӕнӕн, цӕмӕй нин банхус кӕна (Фил. 4:6, 7).

12. Аннӕ кӕд берӕ зинтӕ бавзурста, уӕддӕр амондгун цӕй фӕрци адтӕй?

¹² Ка ’й зонуй, нӕ зӕрдӕ ресуй, сувӕллӕнттӕ нин ке нӕййес кенӕ нӕ уарзон хеуӕнттӕй еске ке рамардӕй, уобӕл. Фал уӕхӕн уавӕри дӕр нӕ бон ӕй уодӕнцойнӕ иссерун. Ӕргъуди кӕнӕн, Йесой рӕстӕги ка цардӕй, еци еузӕрдон силгоймаг Анни. Ӕ лӕги хӕццӕ авд анземӕй ӕндӕр нӕ рацардӕй, уотемӕй ин рамардӕй, удта Библий некӕми финст ес, зӕнӕг син ке адтӕй, е дӕр. Цума Аннӕн еци зин рӕстӕгути ци ӕнхус кодта? Лукай 2:37 финст ӕй: «Аннӕ ӕдзох адтӕй ковӕндони». 84 анзи ибӕл ку цудӕй, уӕд дӕр ма ковӕндонӕмӕ ӕрбацӕуидӕ. Уоми Йеговӕмӕ ке кувта ӕма ин ке лӕггадӕ кодта, е ин устур уодӕнцойнӕ хаста ӕма уой фӕрци адтӕй амондгун, кӕд берӕ зинтӕ бавзурста, уӕддӕр.

13. Нӕ хуарз ӕмбӕлттӕ нин уодӕнцойни хуасӕ куд исунцӕ нӕ хеуӕнттӕй ку фӕффудӕнгъӕл уӕн, уӕд? Ӕрхӕссӕ цӕветтон.

¹³ Устур уодӕнцойнӕ ма нин хӕссунцӕ, ӕмбурди нин ци хуарз ӕмбӕлттӕ ес, етӕ (Ӕмб. 18:24). Полӕбӕл фондз анзи ку цудӕй, уӕд ӕ мадӕ рӕстдзийнадӕ ниууагъта. Уой туххӕй Полӕ хъӕбӕр ӕнкъард кодта. Фал ибӕл цӕйбӕрцӕдӕр рӕстӕги фӕсте еу пионер-хуӕрӕ, Энн, зӕгъгӕ, зӕрдиагӕй батухстӕй ӕма ’й бафедар кодта. Полӕ зӕгъуй: «Кӕд мин Энн тогӕй неци хӕстӕг адтӕй, уӕддӕр мӕбӕл зӕрдиагӕй тухстӕй ӕма мин е хъӕбӕр банхус кодта, цӕмӕй идарддӕр Йеговӕн лӕггадӕ кодтайнӕ». Полӕ абони уӕнгӕ дӕр Йеговӕн еузӕрдонӕй лӕггадӕ кӕнуй. Уомӕй уӕлдай ма ӕ мадӕ дӕр нӕуӕгӕй ӕмбурдтӕмӕ цӕун райдӕдта ӕма уобӕл дӕр хъӕбӕр цийнӕ кӕнуй. Эннӕн ӕхецӕн дӕр хъӕбӕр ӕхцӕуӕн адтӕй, Полӕн ке банхус кодта ӕма рӕстдзийнади ке ӕрфедар ӕй.

14. Иннетӕн уодӕнцойнӕ ку хӕссӕн, уӕд нин е ци пайда ӕрхӕсдзӕй?

 ¹⁴ Ести хуарз гъуддӕгти ку фӕййархайӕн, уӕд ни арӕх нӕ зиндзийнӕдтӕ дӕр байронх унцӕ. Киндзицуд хуӕртӕн дӕр ӕма ӕнцуд хуӕртӕн дӕр хъӕбӕр устур цийнӕдзийнадӕ хӕссуй, Хуцауи Паддзахади туххӕй иннетӕн ке фӕдздзорунцӕ ӕма Йегови хӕццӕ ӕмгуст ке кӕнунцӕ, е. Уотемӕй ӕнхӕст кӕнунцӕ Хуцауи фӕндон. Алке бон дӕр ни ӕй хуарз хабар игъосун кӕнун, ӕма уотемӕй ӕвдесун, адӕнбӕл ке тухсӕн, уой. Удта нӕ хуӕртӕ ма не ’нсувӕртӕн дӕр хуарздзийнадӕ ку кӕнӕн, уӕд сӕ хӕццӕ никки хъӕбӕрдӕр балимӕн уодзиан (Фил. 2:4). Апостол Павел дӕр уотӕ архайдта.  Иннетӕбӕл тухстӕй, «мадӕ ӕ бӕдолӕбӕл» куд фӕттухсуй, уотӕ. Уомӕй уӕлдай ма ӕнсувӕрти федар кодта ӕма син уодӕнцойнӕ хаста, «фидӕ ӕ бӕдӕлттӕн куд фӕууй», уотӕ. (Бакӕсӕ 1 Фессалоникӕгтӕмӕ 2:7, 11, 12.)

15. Сувӕллӕнттӕ ахур кӕнуни ихӕс Йеговӕ кӕбӕл исӕвардта?

¹⁵ Нӕ бон куд ӕй не ’мбурди бийнонтӕн ӕнхус кӕнун? Еуӕй-еухатт нин, ӕрӕги донаргъуд ка райста, еци хуӕртӕ ӕма ӕнсувӕртӕй еске фӕззӕгъуй, цӕмӕй ӕ сувӕллӕнтти хӕццӕ Библи ахур кӕнӕн. Библи куд зӕгъуй, уомӕ гӕсгӕ, сувӕллӕнттӕ ахур кӕнуни ихӕс Йеговӕ ниййергутӕбӕл исӕвардта (Ӕмб. 23:22; Еф. 6:1–4). Ке зӕгъун ӕй гъӕуй, кӕцидӕр уавӕрти иннети ӕнхус дӕр багъӕуй, фал е уобӕл дзорӕг нӕй, ӕма нур ниййергутӕ сӕ сувӕллонӕй фенӕсагъӕс ӕнцӕ. Ниййергутӕн хъӕбӕр ӕхсидзгӕ ӕй сӕ сувӕллӕнтти хӕццӕ ӕдзох дзорун.

16. Иннети сувӕллӕнттӕн ӕнхус кӕнгӕй нӕ зӕрдӕбӕл ци гъӕуама дарӕн?

¹⁶ Ниййергутӕй дин еске ку зӕгъа, цӕмӕй ин ӕ сувӕллони хӕццӕ Библи ахур кӕнай, уӕд ма иронх кӕнӕ, еци сувӕллонӕн ӕ ниййерӕг ду ке нӕ дӕ, уой. Еуӕй-еухатт Библи фӕййахур кӕнӕн, ӕ ниййергутӕ Ӕвдесӕнтӕ кӕмӕн нӕ ’нцӕ, уӕхӕн сувӕллони хӕццӕ. Уӕхӕн уавӕри хуарз уайдӕ, цӕмӕй ма хӕдзари ӕ ниййергутӕй еске, кенӕ ӕндӕр фӕлтӕрдгун Ӕвдесӕн уа кенӕ ба ахур рауадзун адӕн кӕми ес, уӕхӕн бунати. Уотемӕй нӕхе лӕгъуз цъухтӕй багъӕуай кӕндзиан. Фӕстӕдӕр ба, ка ’й зонуй, ниййергути сӕхе бафӕнддзӕй сӕ сувӕллони ахур кӕнун.

17. Ӕригӕнтти бон ци ӕй кӕнун, цӕмӕй сӕ ниййергутӕн уодӕнцойнӕ хӕссонцӕ?

¹⁷ Ӕцӕг Хуцауи ка базудта ӕма ин ӕ унаффитӕмӕ гӕсгӕ ка архайуй, еци ӕригӕнтти бон дӕр ӕй сӕ бийнонтӕн уодӕнцойнӕ хӕссун. Цума кутемӕй? Сӕ ниййергути ку нимайонцӕ ӕма син ӕхцай гъуддаги дӕр ку ӕнхус кӕнонцӕ, уӕд. Ӕригӕнттӕ Йеговӕбӕл еузӕрдон ку уонцӕ, уӕд уомӕй дӕр сӕ бийнонти хъӕбӕр федар кӕндзӕнцӕ. Дони хъиамӕти размӕ Йегови лӕггадгӕнӕг Ламех ӕ фурт Ноййи туххӕй загъта: «Ай фӕрци исуолӕфдзиан, Йеговӕ ке ралгъиста, еци зӕнхӕбӕл косгӕй ци хъиамӕт ӕма ци зинтӕ ӕвзарӕн, уонӕй». Аци дзурдтӕ исӕнхӕст ӕнцӕ, Дони хъиамӕти фӕсте Йеговӕ зӕнхӕй е ’лгъист ку исиста, уӕд (Райд. 5:29; 8:21). Абони дӕр Йеговӕбӕл еузӕрдон ка ӕй, еци ӕригӕнттӕн сӕ бон ӕй бийнонтӕн уодӕнцойнӕ хӕссун ӕма зин рӕстӕг бийнонти медӕг алкӕмӕндӕр ӕнхус кӕнун, абони дӕр ӕма федӕни дӕр.

18. Зиндзийнӕдтӕ исфӕразунмӕ нин ци банхус кӕндзӕй?

¹⁸ Абони Йегови адӕн уодӕнцойнӕ иссерунцӕ, Йеговӕмӕ ку фӕкковунцӕ, Библий финст хабӕрттӕбӕл ку фӕссагъӕс кӕнунцӕ ӕма ӕмбурди хуӕртӕ ӕма ӕнсувӕрти хӕццӕ рӕстӕг ку ферветунцӕ, уӕд. (Бакӕсӕ Псалом 145:18, 19.) Мах ӕй зонӕн: Йеговӕ нин алкӕддӕр уодӕнцойнӕ дӕтдзӕй ӕма цийфӕнди зиндзийнӕдтӕ ма ӕвзарӕн, уӕддӕр нӕ некӕд ниууадздзӕй!