Со ԥэнэнпэ андэ Библия

 Кажнонэ манушэстэ исин пэско алав. Кала и мануша общяюца, вонэ взвинпэ ек каринг ек па алавэстэ. Ай кай о Дэл хэба на трэбуй тэ авэл алав? Если амэ камас тэ авас май пашэ каринг о Дэл, амэнди трэбуй тэ ӷанас, сар лэс ақарэн.

 Андэ Библия о Дэл ԥэндя пала пэстэ: «Мэ о Иегова. Када мэрно алав» (Исайя 42:8). Каринг лэстэ можно тэ взвиспэ кацавэ алавэнца: «Само Зорало Дэл», «Всевышнё Ӷосподо» и «Создателё», но во стодя патив пэ пэстирэ мануша и дя лэнди возможность тэ взвинпэ каринг лэстэ па алавэстэ (Бытие 17:1; Деяния 4:24; 1 Петра 4:19).

 Андэ бут библейски переводоря лэ Дэвлэско алав пистромэ андо Исход 6:3. Котэ ԥэнэнпэ: «Мэ авелэмас сар Само Зорало Дэл каринг о Авраамо, каринг о Исаако и каринг о Иаково, но пала пэско алав Иегова на росԥэндэм лэнди».

 Дэсавэ учони, кала дэн дума пала лэ Дэвлэско алав, май часто ԥэнэн «Яхве». Но ужэ най ек шэл бэрш бут разно миро ӷанэн о алав «Иегова» и кай кадя ақарэн лэ Дэвлэс. Пэрво ла Библиятири часть сас пистромэ най пэ романи и най пэ русско шыб, ай пэ дэлмутни еврейско шыб, андэ сави и алава пистронпэ справа налево. Пэ кадэя шыб лэ Дэвлэско алав пистройпэ штарэ буквэнца. Пэ романи шыб кадэла штар буквы пистронпэ сар ЙХВХ, и пэр лэндэ ԥэнэн тетраграмматон.