1-2. Acts 8:​27-31, 35, 36, 38 bikʼehgo éí Iithiyópiya dineʼé haʼátʼíí bidiisnáaʼgo baptize ályaa?

CHRIST bá naashʼaʼ doo nínízingoósh baptize áshidiʼdoolnííł nínízin? Ayóóʼóʼóʼní áádóó ahééh hwiindzingo ląʼí ákotʼéego éí binahjįʼ baptize ádaalyaa. Iithiyópiyadóó queen nilı̨́įgo yá naalʼaʼí nilı̨́ı̨́ ńtʼéeʼgo baa haneʼgi dadíníilʼįįł.

² Iithiyópiya dineʼé jílı̨́įgo éí tʼáá bééhóziní Diyin Bizaad ayóóʼájóʼní. Jiihóvah jidósin biniyé Jerúsalemgóó nijiyá. Díí hastiin éí oodląʼ bee biyaa hooʼaʼígíí bitsʼázh níyáago tʼááłaʼí diné dah yinéłígíí tʼáá aaníinii Diyin yaa ádaʼdeestʼáanii bizhdiiyá. Chariot hoł yilwołgo Aizéíyah biiʼdóó naaltsoos jółtaʼ. Jesus há áátʼįįdgi Philip yee hoł hoolneʼgo baa ahééh jiniizı̨́ı̨́ʼ. Áko díí Iithiyópiya dineʼé jílínígíí éí bóhojiiłʼą́ʼígíí tʼáá akǫ́ǫ́ tsı̨́įłgo biʼjiilaa. (Acts 8:​27-31, 35, 36, 38 yíníłtaʼ.) Éí haʼátʼíí hodiisnááʼ? Jó, tʼáá íídą́ą́ʼ éí Jiihóvah ayóóʼájóʼní. Áko ayóóʼájóʼnínígíí biniinaa éí baptize áshiʼdidooníiłgo Jesus bá naashʼaʼ dooleeł jiniizı̨́ı̨́ʼ.—Matt. 28:19.

3. Łaʼda baptize ádoolníiłgi haʼátʼíí bitsʼą́ą́ʼ neinółtłʼah doo? (“ Nijéí éí Haitʼéhígíí Átʼé?” níníłʼı̨́.)

³ Jiihóvah ayóóʼííníʼníigo éí nániiłnáago baptize ánidiʼdoolníiłgo átʼé. Ndi haʼátʼíí shı̨́ı̨́ ayóóʼájóʼníigo yitsʼą́ąjįʼ kóhósin dooleełgo átʼé. Éí haitʼéego? Jó éí kódaatʼéii, nikʼéí doo Jiihóvah Yá Halneʼé danilíinii áádóó nikʼisda ayóóʼííníʼníigo éí baptize áshiʼdiilyaago dashijoołxáa doo nínízingo bąąh níniʼ doo. (Matt. 10:37) Doodaiiʼ habits  ádaatʼéii Diyin yijoołxáhígíí ayóóʼííníʼní, áko éí bitsʼą́ąjįʼ kódiiʼníiłgi ayóó ná nantłʼa. (Ps. 97:10) Doodaiiʼ doo tʼáá aaníinii oodląʼ bił nidahaztʼiʼii baa daʼeeldéehii atah celebrate íʼíłʼı̨įgo niyaa hooʼaʼ. Éí atah celebrate ánáʼiinilʼįįh yę́ęgi baa nił hózhǫ́ǫgo béénílniih. Áko biniinaa Jiihóvah yijoołxáii neʼ ádíílíiłgi ná nantłʼa. (2 Cor. 6:17) Áko díí baa nitsíníkees doo: “Haʼátʼíí doodaiiʼ háísh aláahdi ayóóʼóóshʼní?”

4. Haʼátʼíí íiyisíí biniyé baptize áhodiʼdoolnííł?

⁴ Tsʼídá tʼóó ahayóígóó tʼáadoo leʼé ayóóʼóʼóʼní dóó baa ahééh hwiindzinii dahólǫ́. Éí Jiihóvah Yá Dahalneʼé Diyin Bizaad tʼah doo yee nídahoołʼaah yę́ędą́ą́ʼ éí shı̨́ı̨́ tʼáá íídą́ą́ʼ Diyin Bizaad ayóó baa ahééh nínízin. Áádóó Jesus shı̨́ı̨́ ayóóʼííníʼní. Áko kʼad éí Jiihóvah Yá Dahalneʼé bił ahéédahosinilzįįdgo bił ahínéiikahgo baa nił hózhǫ́. Ndi tʼáá díidi tʼéí binahjįʼ Jiihóvah baa ázhdidootʼááł áádóó baptize áhodiʼdoolnííł jinízingo éí doo bíighah da. Diyin Jiihóvah ayóóʼájóʼníigi éí íiyisíí biniyé baptize áhodiʼdoolnííł. Tsʼídá Jiihóvah tʼéiyá ayóóʼájóʼníigo bá naʼaʼaʼ dooleełgi tsʼídá doo łaʼda éí doodaiiʼ haʼátʼíí shı̨́įda doo yitsʼą́ąjįʼ kóhodoolíił da. Áko Jiihóvah ayóóʼájóʼníigo éí baptize áhodiʼdoolnííł jidínóozįįł áádóó hachʼą́ą́h anítʼiʼ nahalingo Jiihóvah bá naʼaʼaʼ beʼatiin góneʼ joogáał doo.

5. Haʼátʼíí baa nídadíitʼįįł?

⁵ Jesus éí nihijéí, tʼáá sizı̨́ı̨́ ńtʼééʼ, nihíniʼ, áádóó niheʼadziil tʼáá átʼé bee Jiihóvah ayóóʼádeínóhʼní nihiłní. (Mark 12:30) Áko ni éí haitʼéego Jiihóvah ayóóʼóʼóʼní índa nił nilı̨́į doo? Jiihóvah ayóóʼánihóʼníigi baa nitsíikeesgo éí nihí ałdóʼ ayóóʼííníiʼníi doo. (1 John 4:19) Áko Jiihóvah kótʼéego ayóóʼííníʼníi dooleełgo áádóó baptize ánidiʼdoolníiłgi kodóó díí baa nídadíitʼįįł.

6. Romans 1:20 bikʼehgo Jiihóvah éí haitʼéego hazhóʼó bééhodíísįįł?

⁶ Jiihóvah ádayiilaii binahjįʼ éí Bí hazhóʼó bééhodiilzįįł. (Romans 1:20 yíníłtaʼ; Rev. 4:11) Chʼil nidaniseʼii áádóó naaldlooshii baa hódzą́ągo hadilyaagi baa nitsíníkees. Áádóó nitsʼíís hadilyaagi ałdóʼ baa nitsíníkees. (Ps. 139:14) Áádóó jóhonaaʼéí tsʼídá ayóó bidziilgo ályaagi éí dóʼ baa nitsíníkees. Jó, éí sǫʼ tsʼídá tʼóó ahayóígíí tʼáá éí łaʼ átʼé. * (Isa. 40:26) Kódaatʼéii baa nitsíníkeesgo Jiihóvah ayóó átʼéego nił nilı̨́į doo. Áko Jiihóvah éí hódząʼ áádóó adziilii bee hólǫ́ǫgi hoł bééhoozingo éí bił kʼéʼahizhdiʼníigi bee háátʼiʼ doo. Áko Jiihóvah tsʼídá yéigo ayóóʼííníʼníi doogo éí ląʼígóó baa íhoołʼaah.

7. Jiihóvah ayóóʼííníʼníi doogo haʼátʼíí yinídlą́ą doo?

⁷ Jiihóvah ayóóʼánóʼníigi yinídlą́ą doo. Yáʼąąshii índa nahasdzáán Áyiilaii éí honílǫ́ǫgi áádóó naa aʼááh nízingi yinídlą́ą dooleełgiísh ná nantłʼa? Kótʼéego nitsíníkeesgo éí “tʼááłáʼí niitínígo nihitsʼą́ądi doo nízaadi hojílǫ́ǫ” daígi bénéiilniih doo. (Acts 17:​26-28) Éí “ajéí tʼáá átʼé haisííd,” áádóó “hánítʼı̨́įgo bikʼídíínááł.” (1 Chron. 28:9) Áko Diyin Bizaad biniyé bóhoołʼaahgi éí Jiihóvah ánínígi átʼéego éí ‘ádíchʼįʼ kóniishłaa,’ nihiłní. (Jer. 31:3) Jiihóvah ná áátʼįįdgi  yéígo baa ahééh nínízingo ayóóʼííníʼníi doo.

8. Jiihóvah bibee ayóóʼóʼóʼní haitʼéego baa ahééh nínízin?

⁸ Jiihóvah ayóóʼííníʼníi doogo éí bichʼįʼ sodílzin doo. Nidaʼdiłʼáii índa ná áátʼįįdgi baa ahééh nínízingi bee bił hólneʼgo ayóóʼííníʼníigi dínóosééł. Nisodizin ná néidiitsʼįįhgo baa ákonínízingo éí Jiihóvah nikʼis nilı̨́įgi bidziil doo. (Ps. 116:1) Áádóó índa ayóó shaa ákonízin lá nínízingo yinídlą́ą doo. Ákondi Jiihóvah áhánígo bił nilı̨́į dooleełgo éí Bí yaa nitsékeesjíígíí baa ákonínízin doo. Áádóó haʼátʼíí shı̨́ı̨́ nił nayólíii nił bééhózingo yáʼátʼéeh doo. Diyin Bizaad bóhoołʼaahgo tsʼídá ákotʼéego tʼéí nił bééhodoozįįł.

9. Haitʼéego éí Diyin Bizaad baa ahééh nínízin doo?

⁹ Diyin Bizaad baa ahééh nínízin. Tsʼídá Diyin Bizaad tʼéiyá tʼáá aaníigo Jiihóvah índa ná yinízinii biiʼ baa haneʼgo ályaa. Diyin Bizaad baa ahééh nínízingo éí tʼáá ákwíí jı̨́ yííníłtaʼ, Diyin Bizaad bóhoołʼaahgi biniyé hashtʼéédinitʼįįh, áádóó bóhoołʼaahígíí bikʼehgóó áánííł. (Ps. 119:​97, 99; John 17:17) Tʼáá ni Diyin Bizaad yííníłtaʼgo, éísh bá náhoołʼaah? Diyin Bizaad tʼáá ákwíí jı̨́ yíníłtaʼ doo biniyé, díísh bikʼehgóó íʼíłʼı̨́?

10. Diyin Bizaad éí haʼátʼíí tʼáá aaníigo yaa halneʼ?

¹⁰ Diyin Bizaad biiʼdę́ę́ʼ Jesus áátʼįįd yę́ęgi diné dabináłígíí yaa dahalneʼgo dabikááʼ. Éí biyiʼdę́ę́ʼ Jesus ná áátʼįįdgi tʼáá aaníigo yaa halneʼ. Jesus áátʼįįdgi índa hahasdzííʼ yę́ęgi baa íhołʼaahgo éí tʼáá bééhózinígo áhánígo nikʼis doo.

11. Haitʼéego Jiihóvah ayóóʼííníʼníi doo?

¹¹ Jesus ayóóʼííníʼníigi bóhoołʼaah, áádóó Nizhéʼé Jiihóvah ałdóʼ ayóóʼííníʼníi doo. Háálá Jesus éí Bizhéʼé yee átʼéii tsʼídá nizhónígo yéłtʼé. (John 14:9) Áko Jesus ląʼígóó baa íhoołʼaahgo éí Jiihóvah hazhóʼó bééhodíisįįłgo nił nilı̨́įgo baa nitsíníkees doo. Jesus aa aʼááh nízin ńtʼéeʼgi baa nitsíníkees, háálá baa dahojoobaʼíii, bitah dahoneezgaii, áádóó  doo dabidziilii tʼáá íiyisíí doo yáʼátʼéehgo baa nitsídahakees ńtʼééʼ. Áádóó nááʼałdóʼ éí kótʼéego neʼiiná yíłtʼih doo níigo naʼneeztą́ą́ʼ, éí bikʼeh ánítʼéego neʼiiná yáʼátʼéeh doo.—Matt. 5:​1-11; 7:​24-27.

12. Jesus baa íhoołʼaahgo haitʼéego nidiyoołnááł?

¹² Nihibąąhági ádaatʼéii nihá yóóʼanáhiditʼaah doo biniyé Jesus beʼiinaʼ ninéidiníʼą́ągi tsʼídá yéígo baa nitsíníkeesgo ayóóʼííníʼníigo ándoolííł. (Matt. 20:28) Jesus ná nináʼádeetʼą́ągi baa ákonínízingo éí hazhóʼó tsíńdííkosgo Jiihóvah shá yóóʼanéidiyiiʼaah doo nínízingo nitsíníkees doo. (Acts 3:​19, 20; 1 John 1:9) Jesus dóó Jiihóvah ayóóʼííníʼní sínílı̨́įʼgo éí tʼáá bééhózin náánáłahdę́ę́ʼ tʼáá ákotʼéego nitsídaakeesígíí bił áhání nílı̨́į doo.

13. Jiihóvah éí haʼátʼíí ná niinílá?

¹³ Jiihóvah ayóóʼádabóʼnínígíí ayóóʼííníʼníigo bóhoołʼaah. Nikʼéí dóó nikʼis danilíinii doo Jiihóvah dayoodlą́ą daaígíí, éí biniyé Jiihóvah baa ádíínítʼą́ągi doo hazhóʼó yikʼidaʼdiitįįh da doo. Nikʼijįʼda danílı̨́į doo. Ndi Jiihóvah baʼáłchíní dah yikahígíí bidiniyáagi yee níká aalwod. Áhánígo bił nilı̨́įgo ayóóʼádanóʼníigo níká anájah doo. (Mark 10:​29, 30; Heb. 10:​24, 25) Nikʼéída tʼahádóó Jiihóvah bá naashʼaʼ doo dadínóozįįł áádóó yikʼehgo beʼiiná deíłtʼéeh doo.—1 Pet. 2:12.

14. Jiihóvah bikʼehgóó oodáałgi 1 John 5:3 haitʼéego ííshjání áyiilaa?

¹⁴ Jiihóvah bikʼehgo oodáałgi baa ahééh nínízin índa bikʼehgóó yínáałgo áʼdílnééh. Jiihóvah tʼah doo bééhoosįįh yę́ędą́ą́ʼ éí shı̨́ı̨́ tʼáá ni bikʼehgo yínáałii nee hólǫ́ǫ́ ńtʼééʼ. Ndi kʼad éí Jiihóvah bikʼehjígo oodáałgo yáʼátʼééh lágo baa ákoninizı̨́ı̨́ʼ. (Ps. 1:​1-3; 1 John 5:3 yíníłtaʼ.) Diyin Bizaad éí ahastiin, eʼasdzą́ą́, áádóó azhéʼé dóó amá ídlı̨́įgi índa áłchíní bee bichʼįʼ yádaatiʼii baa nitsíníkees. (Eph. 5:22–6:4) Díí bikʼeh honíłʼı̨́įgo nighan hazʼą́ągiísh yáʼátʼéehgo hooʼaʼ? Áko Jiihóvah bikʼehgo akʼis yáʼádaatʼéehii ádanileʼgo, éísh bee diné yáʼátʼéehii nilı̨́įgo ániilaa? Áádóó nił hózhǫ́ǫgoósh ániilaa? (Prov. 13:20; 1 Cor. 15:33) Díí shı̨́ı̨́ tʼáá aaníí ákótʼé nínízin.

15. Diyin Bizaad bikʼehgóó oodáał dooleełgi bee shíká aʼdoowoł nínízingo, haitʼéego áʼdíílííł?

¹⁵ Diyin Bizaad bikʼehgóó oodáałgi bóhoołʼaahígíí beʼdíílíiłgi łahda ná nantłʼa doo. Éí biniinaa Jiihóvah bidineʼé dah yikáhígíí choyoołʼı̨́įgo Diyin Bizaad binahjįʼ binaʼnitinii dahólǫ́, éí doo yáʼádaatʼéehii bee baa ákoniidzin doogo nihá yisnil. (Heb. 5:​13, 14) Áko éí naaltsoos ádaalyaaígíí yííníłtaʼ índa hazhóʼó baa íhoołʼaahgo éí bikʼeh ánítʼéego neʼiinaʼ hazhóʼó chʼííníłtʼiʼgo bee baa ákodíníizįįł. Áko éí binahjįʼ Jiihóvah bidineʼé dah yikáhígíí áhánígo bił honílǫ́ǫ doo.

16. Jiihóvah éí bidineʼé haitʼéego dah yikahgo áyiilaa?

¹⁶ Jiihóvah bidineʼé dah yikáhígíí ayóóʼííníʼníigo bikééʼ sínízı̨́įgo áʼdílnééh. Jiihóvah bidineʼé éí congregation ádaalyaago dah yikah. Éí biYeʼ Jesus álą́ąjįʼ á sizı̨́įgo ályaa. (Eph. 1:22; 5:23) Jesus éí hastóí anoint ádaalyaaígíí tʼáá díkwíhígo éí naanish nihaidiníʼánígíí yee álą́ąjįʼ yá naazı̨́į doo yiniyé niinínil. Éí “baʼahódlíigo índa hóyą́ągo naalʼaʼí” yee yózhí. Naanish nidaazii bąąh niilyáago éí Diyin binaʼnitin yee naa ádahalyą́. (Matt. 24:​45-47) Łahgo yee aa ádahalyánígíí éí elders badaʼahódlíi yikʼidadiilniiʼgo nikʼi dadéezʼı̨́ı̨́ʼ. (Isa. 32:​1, 2; Heb. 13:17; 1 Pet.  5:​2, 3) Díí elders wołí bee ádaatʼı̨́įgo níká anájah, naa aʼááh danízin, áádóó índa Jiihóvah áhánígo bił nilı̨́į dooleełgi yee níká anájah. Náánáłaʼda Jiihóvah bee nidíníitı̨́įłgi íiyisíí yee níká anájah.—Eph. 4:​11-13.

17. Romans 10:​10, 13, 14 éí haʼátʼíí biniyé Jiihóvah baa nidahwiilneʼ doo ní?

¹⁷ Náánáłaʼda Jiihóvah ayóóʼáyóʼníi dooleełgi bee bíká adíílwoł. Jesus éí bikééʼ ndaakai yę́ę łaʼda Jiihóvah yééhodoosįįłgi bee nidaʼnohtin níigo yee yichʼįʼ haadzííʼ. (Matt. 28:​19, 20) Doo tʼóó áhoʼdiʼnínígíí bikʼehgóó ájítʼı̨́į da doo. Ndi Jiihóvah ayóóʼííníʼní áálíiłgo éí yilʼaadii Peter dóó John ádííniid yę́ęgi átʼéego nitsíníkees doo. Éí ání: “Níilʼı̨́įʼii áádóó disiitsʼą́ąʼii doo baa hodiilnihgóó tsʼídá doo bohónéedzą́ą da.” (Acts 4:20) Łaʼda Jiihóvah ayóóʼáyóʼníi dooleełgi bee bíká adiilwołgi éí łahgo bee ił hózhóonii átʼé. Nahalneʼii Philip éí Iithiyópiya dineʼé nilı̨́įgo tʼáá aaníinii yee neineeztą́ą́ʼ áádóó baptize ábiʼdiilyaagi, ayóó átʼéego baa bił hózhǫ́ǫ́ ńtʼéeʼgi baa nitsíníkees! Jesus nidaʼnohtin nihidííniidgi dóó Philip beʼíłʼı̨́įgo bee bééhózingo éí Jiihóvah Yá Halneʼé deeshłeeł díníizįįł. (Romans 10:​10, 13, 14 yíníłtaʼ.) Áko Iithiyópiya dineʼé ádííniid yę́ęgi átʼéego “baptize áshidiʼdoolníiłgi haʼátʼíí neinółtłʼah?” diníi doo.—Acts 8:36.

18. Díí bikééʼdóó haʼátʼíí baa nínáádadíitʼįįł?

¹⁸ Baptize áshidiʼdoolnííł ninizı̨́įʼgo éí tsʼídá yéigo ílíinii bee ádaa diniitʼáanii átʼé. Áko ákótʼéego baptize áshidiʼdoolnííł nínízingo tsʼídá yéigo hazhóʼó baa nitsíníkees. Baptize áhoʼdilʼįįhgo haʼátʼíí óolyé? Tʼah doo baptize áhoʼdilnééhgóó áádóó baptize áhoʼdilʼįįhgo haʼátʼíí ájooníił doo? Díí naʼídíkidígíí éí díí bikééʼdóó baa nídadíitʼįįł.