1, 2. Haitʼéego Jiihóvah nihaa joobaʼ?

JIIHÓVAH éí bee aa hojoobaʼ. Tʼáá ałtso nihee dahólónígíí dóó tʼáá ałtsoní yáʼádaatʼéhígíí éí Jiihóvah bitsʼą́ą́dę́ę́ʼ. Bí binahjįʼ tʼáá ałtso áyiilaaígíí dahiiná. (Psalm 104:​13-15; Haggai 2:8) Łahda bidineʼé yíká análwoʼgo, Jiihóvah ádayiilaaígíí choyoosʼįįd. Díí Diyin Bizaad bitsʼą́ą́dóó bídahwiidiilʼááł.

² Ízrel dineʼé honoojíidi 40 nááhai tázhdínéehgo Jiihóvah éí chʼiyáán mána wolyéii dóó tó yichʼįʼ kwííłʼı̨́ı̨́ ńtʼééʼ. (Exodus 16:35) Éí biniinaa doo bídį dajílı̨́į da ńtʼééʼ. (Nehemiah 9:​20, 21) Jiihóvah éí halneʼii Iiláísha adziilii yee nílá. Áko éí binahjįʼ Iiláísha éí asdzą́ą́ bąąh áhásdįįdii beʼoodląʼ niłdzilígíí akʼah ałchʼı̨́ı̨́dí yę́ę ląʼí áyiilaa. Jiihóvah haʼníláhígíí éí yee háká eelwod. Hąąh hadaazʼáhígíí bee nizhdoolééł dóó hó dóó haʼáłchíní béeso  biʼohígíí náásgóó bee chodajoołʼı̨́į doo. (2 Kings 4:​1-7) Jiihóvah éí Jesus chʼiyáán dóó béeso yee yíká eelwod ałdóʼ.—Matthew 15:​35-38; 17:27.

3. Haʼátʼíí baa nídadíitʼįįł?

³ Jiihóvah tʼáá haʼátʼíí shı̨́ı̨́ choyoołʼı̨́įgo, éí bee ádayiilaaígíí yee yíká análwoʼ. Bá ndaalʼaʼígíí ííłní, tʼáá ní nínízingo naanish bee shidineʼé bíká anánílwoʼ. (Exodus 36:​3-7; Proverbs 3:9 yíníłtaʼ.) Haʼátʼíísh biniinaa nihił ílínígíí Jiihóvah nátʼą́ą́ʼ baa nídiilyéełgo nayókeed? Ałkʼidą́ą́ʼ haitʼéego Jiihóvah bá ndaalʼaʼígíí bí binaanish yee yíká anídaalwoʼ? Dííshjı̨́įdi, Jiihóvah bidineʼé béeso yee yíká anídaalwoʼii haitʼéego chodayoołʼı̨́? Díí nihił bééhodoozįįł.

4. Jiihóvah binaanish bá íilʼı̨́įgo, haʼátʼíí bichʼįʼ ííshjání ííníilzin?

⁴ Jiihóvah ayóóʼádeíníiʼní dóó baa ahééh daniidzin biniinaa baa diilyééł. Jiihóvah tʼáá átʼé yee nihíká análwoʼígíí baa nitsíikeesgo éí nihijéí yéigo nayiiłná. Naatʼáanii David éí kin biiʼ sohodizin Jiihóvah bá ánídoolníiłgo yaa nitsízkééz. Tʼáá ałtso nihee hólónígíí éí Jiihóvah bitsʼą́ą́dę́ę́ʼ, dóó haʼátʼíí shı̨́ı̨́ Jiihóvah baa nídiilyéłígíí éí tʼáá íídą́ą́ʼ nihainílá.—1 Chronicles 29:​11-14 yíníłtaʼ.

5. Nihee aa joobaʼgo aa diilyééł haitʼéego Diyin Bizaad ílı̨́įgo yee nanihinitin?

⁵ Jiihóvah baa nídiilyéełgo éí łaʼ ákótʼéego bá nideilʼaʼ. Yilʼaadii John bił áhoodzaago éí yáʼąąshdi Jiihóvah yá ndaalʼaʼí ádadííniidígíí yidiiztsʼą́ą́ʼ: “Diyin God nihiBóhólníihii, ayóó éʼétʼé áádóó ił ídlı̨́ índa óhólnííh bą́ą́h nílı̨́, háálá tʼáá ałtsoní íinilaa, éí íinínízinii bee ádaalyaago dahólǫ́.” (Revelation 4:11) Jiihóvah éí ayóó éʼétʼé dóó ił ídlı̨́ bí, áko éí wołíbee íitʼı̨́į doo. Jiihóvah éí Mózes choyoosʼįįdgo, éí Ízrel dineʼé tʼáá nináháháahgo táadi áłah nídaʼołeeh yiłní. Díí áłah nídaʼadleehígi, Jiihóvah yichʼįʼ náádaʼiiłniih éí bedaʼoodląʼ deidísin bił ahídéétʼiʼ. Diné éí díí bił dahóoneʼ: “Bóhólníihii binááł náádahaniihii doo tʼáágééd nídaahkah da doo.” (Deuteronomy 16:16) Dííshjı̨́įdi, niheʼoodląʼ ílı̨́įgo dadíníilzingo éí nihee aa joobaʼgo aa diilyééł. Díigi átʼéego, Jiihóvah bá nideilʼaʼgo nihił danilı̨́ dóó áká anéiilwoʼgo ííshjání ádeíníilzin.

6. Haʼátʼíísh biniyé aa diilyéłígíí nihá yáʼátʼééh? (Áłtsé eelkidígíí níníłʼı̨́.)

⁶ Tʼáadoo aa níchįʼí, éí ná yáʼátʼééh. Tʼáadoo náánáłahdę́ę́ʼ shaa doolyééł tʼéí níníziní. (Proverbs 29:21 yíníłtaʼ.) Ashkii yázhí baa nitsíníkees. Éí tʼáadoo leʼé áda néidiyoolnih biniyé bizhéʼé doodaiiʼ bimá béeso baa yííʼááh. Díí haitʼéego bizhéʼé dóó bimá yaa nitsékees? Kʼad ániid naagháhígíí pioneer éʼéłʼínígíí baa nitsíníkees. Éí bizhéʼé dóó bimá yił bighan dóó chʼiyáán doodaiiʼ chidí yikʼeh nidaʼiilé yiniyé béeso yaa yiinííł. Azhą́ shı̨́ı̨́ doo dayókeed da ndi, haʼátʼíísh biniinaa azhéʼé dóó amá danilíinii  éí aa doolyéłígíí nídeidiilá? Éí ashiikéhígíí bizhéʼé dóó bimá tʼáá ałtso bá ádeiłʼínígíí biniinaa yaa ahééh nízin. Tʼáá ákótʼéego Jiihóvah bił bééhózingo, nihił daʼílínígíí aa diilyéełgo nihá yáʼátʼééh.

7. Ałkʼidą́ą́ʼ Jiihóvah bidineʼé íiyisíí binaanishígíí haitʼéego yee adaaswod?

⁷ Diyin Bizaad biiʼdę́ę́ʼ, Jiihóvah bidineʼé binaanish yee yíká anídaajah éí tʼáadoo leʼé bee dahólónígíí chodayoosʼįįd. Łahda bídį hóyéeʼii biniyé aa doolyééł. Mózes éí Ízrel dineʼé níbaal biiʼ hodílzinii ádadoohłííł biniyé áká anáhjah doo, yiłní. Áádóó Naatʼáanii David kin biiʼ sohodizin ííléehgo ałdóʼ tʼáá ákótʼéego áátʼįįd. (Exodus 35:5; 1 Chronicles 29:​5-9) Naatʼáanii Jiihóʼash hooʼáałgo, náádaʼiiłniihii éí béeso baa dahaasnil yę́ę chodayoosʼįįd kin biiʼ sohodizin hashtʼedayiilaa. (2 Kings 12:​4, 5) Ałkʼidą́ą́ʼ łaʼ Jiihóvah bidineʼé éí Judíyadi dahodichin hazlı̨́įʼgo yaa ádahoniizı̨́ı̨́ʼ. Hakʼisóó Judíyadi kéédahatʼínígíí bídin dahóyééʼ bił béédahozin, áko tʼááłáʼí jinítínígo tʼáá bídazhneelʼánígo bee áká adeeshwoł dazniizı̨́ı̨́ʼ.—Acts 11:​27-30.

8. Ałkʼidą́ą́ʼ Jiihóvah bidineʼé éí bí binaanishígíí haitʼéego yee adaaswod?

⁸ Jiihóvah bidineʼé éí hastóí yikʼidadéezʼı̨́ʼígíí baa dajiizhjaaʼ. Bee hazʼáanii Mózes baa deetʼánę́ę bikʼeh dahóółʼįįdgo, Líívai dineʼé éí kéyah doo daabíiʼ da, azhą́ náánáłaʼ dineʼé bee dahólǫ́. Áko Ízrel dineʼé éí Líívai dineʼé neeznáá hahoodzogo éí tʼááłáʼígo kéyah siʼą́ yaa deizʼą́. Éí binahjįʼ Líívai dineʼé dabidziilígíí chodayoosʼįįdgo kin biiʼ sohodizingi yee yindaashnish. (Numbers 18:21) Sáanii yee aa dajoozbaʼ, éí Jesus dóó bił tádíkáhígíí binaalyeʼé yaa deiznil yee yíká adaaswod.—Luke 8:​1-3.

9. Háísh éí béeso aa dayiinííł ńtʼééʼ?

⁹ Haʼátʼíí shı̨́ı̨́ bee dahólónígíí yaa deideezʼą́. Ízrel dineʼé éí daʼílínígíí Ííjipdę́ę́ʼ nídeizhjaaʼ yę́ę yee adaaswod áko níbaal biiʼ hodílzinii nideizʼą́. (Exodus 3:​21, 22; 35:​22-24) Péntekast 33 C.E. bikéédóó, łaʼ éí bidádaʼakʼeh doodaiiʼ bighan baa nidahaazniiʼ dóó daalʼaadii béeso yaa deiznil. Brothers dóó sisters yídį danilínígíí, éí daalʼaadii béeso chodayoosʼįįd yee yíká adaaswod. (Acts 4:​34, 35) Jesus bikééʼ nidaakaiígíí bibéeso hashtʼeʼ nidayiiznil áko Jiihóvah binaanishígíí yee áká adaaswod. (1 Corinthians 16:2) Dabibéeso ląʼígíí dóó dabibéeso ádaałchʼı̨́dígíí éí aa dayiinííł.—Luke 21:​1-4.

10. Ałkʼidą́ą́ʼ Jiihóvah bidineʼé yee aa dajoobaʼígíí haitʼéego bedaʼiilʼı̨́?

¹⁰ Dííshjı̨́įdi éí haitʼéego áká anéijah? Bił áłah nídeidleehígíí éí Kingdom Hall ániidígíí łaʼ ánáádeidleʼ daatsʼí. Doodaiiʼ  Kingdom Hall dóó branch office nizhónígo hashtʼénídeedleʼ daatsʼí. Áádóó tágí jı̨́ áłah náʼádleehígíí bá béeso bee anéiilwoʼgo átʼé. Doodaiiʼ łaʼ nihibrothers nitsihonídéelgo dóó yídin danilı̨́įgo bíká anídeijahgo daatsʼí. Missionary danilínígíí, special pioneer danilínígíí, circuit overseer danilínígíí béeso bee bíká anídeijah. Áádóó tʼáá náhwiistʼą́ą́ ńtʼééʼ headquartersdi dóó branch officedi nidaalnishígíí ałdóʼ béeso bee bíká anídeijah. Assembly Halls dóó Kingdom Halls bee ádaalneʼ biniyé nicongregation béeso yee anídaalwoʼ.

11. God biNahatʼaʼ bá nanilnishgo, haitʼéego nijéí nayiiłná?

¹¹ Nihodoogááł bichʼįʼ hoolzhishgo, tʼáá áníiltso éí Jiihóvah dóó bá nidaalnishígíí áká anéiijahgo átʼé. Háiida béeso anídeiʼniłígíí doo nihił béédahozin da. Kingdom Halldi doodaiiʼ jw.org onlinegi béeso anídeiʼniłgo, béeso kónéelą́ą́ʼ bee eeshwod doo diiʼniid da. Łahdaásh tʼóó áłchʼídígo bee eeshwod nínízin? Ląʼí diné éí áłchʼídígo béeso bee anáʼáwoʼígíí éí bee Jiihóvah bidineʼé łáʼí ídlı̨́įgo dah yikahígíí baa hindééh. Masedóniyadi ałkʼidą́ą́ʼ Jiihóvah bidineʼé éí “bitédaʼaʼı̨́ʼígíí” ndi bikʼisóó yíká adoojah danízin. Ląʼígo yíká ííjééʼ! (2 Corinthians 8:​1-4) Dííshjı̨́įdi nihibrothers tʼáá áłchʼı̨́dígo béeso bee dahólǫ́ǫ ndi tʼáá ákótʼéego áká anídaajah.

12. Jiihóvah bidineʼé łáʼí ídlı̨́įgo dah yikahígíí béeso yee adaaswodígíí haitʼéego choilʼı̨́?

¹² Hastóí Alą́ąjįʼ Daʼéeʼéshígíí béeso éí baʼahódlíigo dóó hóyą́ągo chodayoołʼı̨́. (Matthew 24:45) Haitʼéego béeso choidooʼįįłígíí yíká sodadilzįįh dóó hazhóʼó yaa nitsídaakees. (Luke 14:28) Ałkʼidą́ą́ʼ, hastóí bedaʼoodląʼ daniłdzilígíí yikʼidadéezʼı̨́įʼgo, éí béeso, Jiihóvah bá naʼalʼaʼgi tʼáá éí tʼéiyá biniyé chodayoołʼı̨́ı̨́ ńtʼééʼ. Ézra Jerúsalemgóó nádzáago, Pérzha dineʼé binaatʼáanii éí tʼóó ahayóí óola, béésh łigai dóó daʼílínígíí éí bee yígı̨́. Díí daʼílínígíí éí dííshjı̨́įdi $100 million (U.S.) dóó baʼaan bą́ą́h ílı̨́. Díí béeso yee adaaswodígíí éí Jiihóvah yaa deezlá nahalingo, yaa nitsídaakees. Áko hastóí yikʼidadéezʼı̨́ʼígíí éí, díí béeso baa ádahołyą́ą dóó niʼanaʼí kéédahatʼı̨́ı̨́ góneʼ disoohkai. (Ezra 8:​24-34) Tʼóó ahayóí nááhai bikéédóó, Judíyadi brothers yídį danilı̨́. Yilʼaadii Paul éí béeso áłah yaa ádayiilaa. Béeso dayiijahígíí hazhóʼó yaa ádahalyą́ągo, dóó díí dabiʼdooʼniid: “Doo Bóhólníihii binááł tʼéiyá da, nidi diné ałdóʼ binááł haʼátʼíhída ił nilı̨́ nilíinii bidadiilkaal.” (2 Corinthians 8:​18-21 yíníłtaʼ.) Dííshjı̨́įdi, Jiihóvah bidineʼé łáʼí ídlı̨́įgo dah yikahígíí éí Ézra dóó Paul yedaʼałʼı̨́ dóó béeso bee anéiilwoʼígíí hazhóʼó choilʼı̨́.

13. Jiihóvah bidineʼé łáʼí ídlı̨́įgo dah yikahígíí haʼátʼíísh biniinaa łah átʼéego ánídaalyaa?

¹³ Hooghan hazʼą́ągi éí béeso hazhóʼó chodeiyoołʼı̨́į doo. Éí bichʼįʼ nidahasyeʼgo dóó yee nidaʼiiłniihgo béeso hazhóʼó chodayoołʼı̨́. Hooghan hazʼą́ągi Jiihóvah aláahdi yá ádaʼałʼı̨́ áko haitʼéego béeso hashtʼe nídadiitʼáałgo yaa nitsídaakees. Jiihóvah bidineʼé łáʼí ídlı̨́įgo dah yikahígíí éí ałdóʼ ákótʼé. Naanish bóhoneedlínígíí ląʼí hanootʼą́. Łahda  béeso biʼoh chʼínánídah ndi bílááh ánéelą́ąʼ chodayoosʼįįd. Jiihóvah bidineʼé łáʼí ídlı̨́įgo dah yikahígíí éí haitʼéego béeso hashtʼe nídeidooʼááł dóó haitʼéego naanishígíí doo nantłʼagóó yee ádeidoolííł. Díí yáʼátʼéehgo áʼdiilnííł áko béeso hazhóʼógo chodeilʼı̨́.

14-16. (a) Bee áká análwoʼígíí haitʼéego chodayoołʼı̨́? (b) Díí yindaalnishígíí haitʼéego níká análwoʼ?

¹⁴ Jiihóvah ląʼí nááhai yá ndaalʼaʼígíí éí ádaaníigo: “Jiihóvah bidineʼé łáʼí ídlı̨́įgo dah yikahígíí tʼóó ahayóí nihaa dayiinííł.” Kʼad éí jw.org dóó JW Broadcasting nihee dahólǫ́. Áádóó New World Translation of the Holy Scriptures tʼóó ahayóí saad ałʼąą átʼéhígíí bee ádaalyaa. 2014 dóó 2015 biiʼ yihahígíí “Keep Seeking First God’s Kingdom!” Kéyah Daʼníłtsʼą́ą́ʼdę́ę́ʼ Nitsaago Áłah Náʼádleehígíí éí tʼáá náhwiistʼą́ą́ ńtʼééʼ 14 kin dashijaaʼígíí ayóó áhoníłtsogo biiʼ áłah náʼádleeh. Tʼáá ałtso akǫ́ǫ́ nidaaskaígíí bił dahózhǫ́!

¹⁵ Tʼóó ahayóí Jiihóvah bidineʼé łáʼí ídlı̨́įgo dah yikahígíí baa daasyáhígíí éí yaa bił dahózhǫ́. Łaʼ naakigo Asiadi naalʼaʼí áʼjiilaa: “Kin doo ląʼí dashijaaʼígi ákweʼé nideilʼaʼ. Áko łahda tʼáá sahdii neitʼaash nahalingo nihił hazʼą́, dóó łahda tʼáá ałtso Jiihóvah binaanish baa neiyiiʼnah. Ákondi JW Broadcasting níilʼı̨́įgo, díí bénéiilniih, tʼah ndi international brotherhood atah niidlı̨́. Áádóó nihibrothers dóó nihisisters JW Broadcasting nídeiníłʼįįhgo yaa bił dahózhǫ́. Łahda díí baa nídahodiitsʼı̨́ı̨́h, díí nidaniilʼįįhígíí bikéédóó éí Hastóí Alą́ąjįʼ Daʼéeʼéshígíí bił ahą́dí ádeíníilzin nahalin. Kʼad éí Jiihóvah bidineʼé łáʼí ídlı̨́įgo dah yikahígíí yaa ahééh danízin dóó yaa bił dahózhǫ́ǫgo atah danilı̨́.”

¹⁶ Tʼáá náhwiistʼą́ą́ ńtʼééʼ, kʼasdą́ą́ʼ 2,500 Kingdom Halls ánéelą́ąʼ ádaalneʼ  doodaiiʼ hashtʼe daalneʼ. Hondurasdi, łaʼ éí Kingdom Hall bá ádoolníił doo nidayólíi da ńtʼééʼ. Kʼad éí biKingdom Hall dahólǫ́! Díí ádaʼiilaa: “Jiihóvah bidineʼé daʼniitahgo baa nihił dahózhǫ́, dóó tʼáá náhwiistʼą́ą́ ńtʼééʼ łáʼí daniidlínígíí ałdóʼ baa nihił dahózhǫ́. Náánáłaʼ éí Diyin Bizaad dóó naaltsoos tʼáá bí bizaadígíí yaa bił dahózhǫ́. Áádóó brothers dóó sisters nitsihodínídéél bikéédóó yíká anídeiijahígíí ałdóʼ yaa bił dahózhǫ́. Doodaiiʼ hasłą́ą́góó dahojilneʼígíí yáʼátʼéehgo dabíistsʼą́ą́ʼ, éí ałdóʼ yaa bił dahózhǫ́.”

17. Dííshjı̨́įdi haitʼéego nihił bééhózin éí Jiihóvah yee nihíká análwoʼ?

¹⁷ Diné tʼáá bí béeso yee áká anídaalwoʼígíí ákweʼé chodaoʼı̨́įgo naanish nihaa nídaditʼááhígíí ałtso ánídeelʼįįh, áko Jiihóvah Yá Dahalneʼé łaʼ doo danílínígíí éí doo yikʼidadiitʼįįh da. Alą́ąjįʼ naanish yá naazínígíí łaʼ éí dahootsogóó bił nidahazʼánígíí nihaa níyáago kin biiʼ naaltsoos bikʼedaʼalchíí léiʼgi. Diné tʼáá átʼé deiyílníshígíí doo bichʼįʼ nidaʼiilyéeh da éí yikʼee deesyiz. Nihí éí doo béeso ádeiilʼı̨́į da biniyé áłah néiidleeh. Éí ání: “Díí naanish ayóó nanitłʼah ndi ádeiłʼı̨́.” Éí nihił bééhózingo Jiihóvah yee nihíká análwoʼ.—Job 42:2.

18. (a) Jiihóvah biNahatʼaʼ bee bíká anéiilwoʼgo, haitʼéego yee nihikʼihojidlíi doo? (b) Haitʼéego nihaʼáłchíní dóó ániid nihaa nídaakahígíí tʼáá ákótʼéego ádaʼałʼı̨́įgo nidaniitin?

¹⁸ Jiihóvah éí biNahatʼaʼ bá nideilnishgo yee nihá hoołʼaʼ. Éí baa diilyéełgo yee nihikʼihojidlíi doo. (Malachi 3:10) Jiihóvah ání, yee aa joobaʼgo aa doolyéeł áko nihikʼináhozhdoodliił. (Proverbs 11:​24, 25 yíníłtaʼ.) Éí ałdóʼ ání, aa yiilyéełgo baa nihił hózhǫ́ǫ doo. “Tʼáadoo leʼé azhʼníláii éí haa yílyáii bilááh átʼéego baa hózhǫ́.” (Acts 20:35) Áłchíní dóó ániid nihaa nídaakahígíí haitʼéego bí ałdóʼ naʼanishígíí bíká iilyeedgo bichʼįʼ ííshjání ádiilnííł. Nihił dahózhǫ́ǫgo danihiníłʼı̨́.

19. Haitʼéego díí bídahwiilʼą́ą́ʼígíí bee haʼíinilníi doo?

¹⁹ Tʼáá átʼé nihee dahólónígíí éí Jiihóvah bitsʼą́ą́dę́ę́ʼ. Nátʼą́ą́ʼ baa nídiilyéełgo, ayóóʼádeíníiʼní dóó baa ahééh daniidzin ííshjání ádeíníilzin. (1 Chronicles 29:17) Ízrel dineʼé níbaal biiʼ hodílzinii nideizʼą́ągo, éí “diné bił nidahoozhǫǫh nítʼééʼ, háálá tʼáá bí ádeinízingo doo naaki nilı̨́ı̨́góó biyódí Bóhólníihii yaa nídayiisʼnil.” (1 Chronicles 29:9) Nihí ałdóʼ Jiihóvah nihainíláhígíí nátʼą́ą́ʼ baa nídiilyéełgo baa nihił dahózhǫ́.