Diné aʼohgo ádaʼdólzinígíí éí ayáhígo ádaʼdólzin. Doo éí tʼáá naʼníleʼdii nidaakai da, doodaiiʼ doo éí shí alááh áníshtʼé danízin da. Ayáhígo ádaʼdólzinígíí diné bił nilı̨́ dóó yitsʼą́ą́dóó íhoołʼaah.

Łaʼ aʼohgo ádaʼdólzinígíísh doo bá hodzódlíígóó baa nitsáhákees? Ndagaʼ. Éí diné bee bééhoʼdílzin dóó yíneelʼánígíí baa ákohwiindzin.

• Aʼohgo ízhdólzin éí kʼé hwiindzin bił nítʼiʼ. “Ákondi, aʼohgo ádaʼdólzinígíí doo bá nantłʼagóó diné yił kʼé daʼahidiʼní,” ní naaltsoos The Narcissism Epidemic. Nááná ałdóʼ, diné “doo bá nantłʼagóó ałchʼįʼ yádaałtiʼ dóó ahił dandlı̨́.”

• Aʼohgo ízhdólzin éí neʼawééʼ náasdi yikʼehgo iiná íidoolííł. Kʼad neʼawééʼ aʼohgo íʼdólzin bee nanitingo naanish hainitáago doo bá nantłʼa da doo. Dr. Leonard Sax ání, “Nooséłí tʼáá bí tʼéí ádaa nitsékeesgo naanish yókeedgi doo yishjaʼdoolíił da.” Áádóó ání, “Łaʼ nooséłí naanish yókeedígíí bił nílı̨́įgo naanish shóidoołtʼeeł.” *

Naʼáłchíní tʼáadoo tʼáá bí tʼéí ádaa nitsékeesí bee nanítin.

BINAHJĮʼ NAʼNITINII: “Diné tʼáadoo nilíní da nidi ayóó áníshtʼé nízinii, éí ádinaʼadloʼgo átʼé.”—Galatians 6:3.

• Tʼáadoo saad tʼááłáʼígíí hááhiiłtʼéhé. Kóháʼnínígíí, “Bídin nilínígíí tʼáá aaníi ná ákótʼée doo” índa “Tʼáá ni bíká íinízinígíí beʼdíílííł” bóhoneedlínígíí nahalin, ákondi díí átʼéego nitsáhákeesígíí doo tʼáá aaníi átʼée da. Naʼáłchíní binaanish łaʼ yidoolíiłgo átʼé yíká átʼínígíí bééhózingo índa yéigo yíká naalnishgo éí shóidoołtʼeeł.

• Ááníłígíí bee baa ákonínízin. Nihaʼáłchíní tʼóó “yáʼátʼééh” bidiiʼníigo, doo aʼohgo ádólzin yíhwiidoołʼáał da. Hazhóʼó bił hólneʼ dóó nanítin.

• Naʼáłchíní social media choyoołʼínígíí baa ákonínízin. Social media éí wódahgo ádaa nitsáhákees bił ahídéétʼiʼ. Díí doo aʼohgo ízhdólzin bił aheełtʼée da.

• Naʼáłchíní tʼáá tsxı̨́įłgo kʼé dadiiʼnííł dadohní. Naʼáłchíní doo ákwii dzaagóó, hazhóʼó doo ákótʼée da bididííniiłgo yikʼidaʼdidootı̨́ı̨́ł.

 Ahééh hwiindzin bee naʼnitin.

BINAHJĮʼ NAʼNITINII: “Ahééh danohsin.”—Colossians 3:15.

• Jiihóvah ádayiilaaígíí baa ahééh nínízin. Áłchíní Jiihóvah áyiilaaígíí tʼáá ałtso yaa ahééh nízin doo, yinahjįʼ yisdádoogááł. Níłchʼi bee náhidiidziih, tó doodlı̨́ı̨́ł, dóó chʼiyáán tʼáá ałtso niidzin. Naʼáłchíní bee naʼnítin, áko yaa ahééh nízin doo. Nahasdzáán bikááʼgóó nizhónígo nahazʼánígi yaa ahééh nízin doo.

• Bílaʼashdlaʼii bił nílı̨́į doo. Naʼáłchíní hazhóʼó nanítin áko doo oołchʼı̨́įd da, náánáłaʼ ádaʼoolʼįįł yitsʼą́ą́dóó íhwiidoołʼááł.

• Ahééh nínízin. Naʼáłchíní “ahéheeʼ” bidiʼníigo bee nanitin. Doo saad tʼéiyá da ndi, tʼáá íiyisíí bijéí tłʼááhdę́ę́ʼ yaa ahééh nízin doo. Ahééh hwiindzin aʼohgo nitsáhákees yee nihíká adoolwoł.

Naʼáłchíní łaʼda áká análwoʼgo bá yáʼátʼééh bee nanítin.

BINAHJĮʼ NAʼNITINII: “Aʼohgo nitsáhákees bee náánáłaʼ nihiláahdi ádaatʼéego baa nitsídaahkees. Tʼáá ádíighahígo tʼáadoo leʼé tʼáadoo ádá baa nitsídaahkeesí, nidi tʼááłáʼí nootínígo náánáłaʼ yídaneedlíinii ałdóʼ bá baa nitsídaahkees.”—Philippians 2:​3, 4.

• Naʼáłchíní hooghangi áká análwoʼgo bee bá hosíníłʼą́. Hooghangi áká análwoʼ tʼóó bitsʼąą bééʼíłniihgo, áká adoolwoł doo bił nílı̨́į da doo. Hooghan hashtʼe hólzin áłtsé, áádóó daanéʼé akéeʼdi. Áká análwoʼígíí hazhóʼó bichʼįʼ ííshjání íinisin, áko náánáłaʼ yaa ahééh danízin doo.

• Bił hólneʼ, áká aníjílwoʼgo éí yáʼátʼééh. Áká análwoʼgo éí náásgóó hóyą́ągo dínísééh. Áko, naʼáłchíní náánáłahjįʼ áká adoolwołgi háidéezʼı̨́ı̨́ʼ. Haitʼéego áká adoolwołgi bił hólneʼ. Naʼáłchíní bá bínindlı̨́ dóó áká análwoʼígíí yáʼátʼéehgo áníłʼı̨́ bidiní.