Jiihóvah a God éí tsʼídá átséedi hastiin dóó asdzání ałhainínil. Diyin Bizaad áníigo éí God asdzání áłtsé áyiilaaígíí hastiin “yichʼįʼ yił níʼáázh.” Ádam yéigo baa hoł hóozhǫǫdgo ájíní: “Kʼad díí shitsʼinígíí bitsʼą́ą́dóó tsʼin áádóó shitsįʼígíí bitsʼą́ą́dóó atsįʼ jílı̨́.” (Genesis 2:22, 23) Dííshjı̨́įdi tʼáá ákótʼéego Jiihóvah éí ahastiin dóó eʼasdzą́ą́ dajílínígíí hoł dahózhǫ́ǫ doogo há yinízin. Díí naaltsoos biiʼ, “ahéʼéskéegi” nínígíí éí bee hazʼáanii bikʼehgo ahéʼéskéhígíí binaaltsoos hwee hólǫ́ǫgo áhyiłní.

Ajiiyehgo tʼáá ałtsoní yáʼátʼééh doo jinízin łeh. Tʼáá aaníigo éí ahastiin dóó eʼasdzą́ą́ azhą́ shı̨́ı̨́ ayóíʼáhizhdóʼníi ndi, bee achʼįʼ nidahwiiʼnáanii dahólǫ́ǫ doo. (1 Corinthians 7:28) Díí naaltsoos biiʼdóó éí Diyin Bizaad binahjįʼ naʼnitinígíí yaa halneʼ. Éí bikʼeh honíłʼı̨́įgo ahísółkéegi dóó nighan hazʼą́ągi nihił dahózhǫ́ǫ doo.​—Psalm 19:8-11.

DIYIN BIZAAD KÓNÍ: Ahastiin éí hooghan hazʼą́ągi bá atsiiʼ jílı̨́.​—Ephesians 5:23.

Ahastiin nílı̨́įgo éí neʼasdzą́ą́ hazhóʼó baa nitsíníkeesgo baa áhólyą́ą doogo Jiihóvah nił nayólí. (1 Peter 3:7) Neʼasdzą́ą́ éí tʼáá ákónéehee níká análwoʼ doo biniyé Jiihóvah ná áyiilaa. Nił nilı̨́įgo ayóóʼííníʼníi doo ałdóʼ nóʼní. (Genesis 2:18) Neʼasdzą́ą́ ayóóʼííníʼníigo bí yinízinígíí áłtsé bá baa nitsíníkees.​—Ephesians 5:25-29.

Eʼasdzą́ą́ nílı̨́įgo nahastiin yéigo nił nilı̨́įgo łahdóó bíká anánílwoʼ doogo Jiihóvah nił nayólí. (1 Corinthians 11:3; Ephesians 5:33) Nahastiin bikééʼ sínízı̨́ dóó hazhóʼó tʼáá ałtsojįʼ bíká anánílwoʼ. (Colossians 3:18) Ákónítʼı̨́įgo éí nahastiin dóó Jiihóvah nizhónígo éí yee ninéłʼı̨́į doo.​—1 Peter 3:1-6.

DÍÍ BIKʼEH ÁDÍÍNÍÍŁ:

• Haash yitʼéego éí achʼooní yáʼátʼéhígíí nishłı̨́į doo ahidohʼníigo bínaʼahídółkid. Áádóó hazhóʼó ahíísínółtsʼą́ąʼgo biʼoh nohłínígíí binaałnish

• Ahił haʼíínóhdlí. Tʼáá ánółah ahił honohshǫ́ǫgo ahíínósingi bíhwiidoołʼáałgo átʼé

DIYIN BIZAAD KÓNÍ: Nichʼooní yídį nilínígíí dóó nił nilı̨́įgo bá baa nitsíníkees. (Philippians 2:3, 4) Shą́ą́ʼ Jiihóvah bá ndaalʼaʼígíí díí yá yee nihodeetʼą́, éí “diné tʼáá ałtso bichʼįʼ há áhwiinítʼı̨́ doo.” (2 Timothy 2:24) “Łaʼ diltłish aa aalgeedígíí nahalingo yáłtiʼ, nidi diné hóyáanii bizaad éí chánah ánáʼoodlííł.” Éí biniinaa nizaad hazhóʼó bee yáníłtiʼ. (Proverbs 12:18) Jiihóvah biníłchʼi diyinii níká análwoʼgo ajoobaʼ dóó ayóóʼóʼóʼní bee yáníłtiʼ doo.​—Galatians 5:22, 23; Colossians 4:6.

DÍÍ BIKʼEH ÁDÍÍNÍÍŁ:

• Niʼdiiłʼáhígíí nichʼooní tʼahdoo bee bichʼįʼ hanidziihgóó, éí hazhóʼó bił baa nídéeshtʼįįł diníigo bíká sodidíílzįįł

• Ádidííniiłgi hazhóʼó baa ntsídííkos

DIYIN BIZAAD KÓNÍ: Ajiiyehgo éí hachʼooní bił “atsʼíís tʼááłáʼí jidooleeł.” (Matthew 19:5) Ákótʼéii ndi tʼahdíí éí nidinołtʼé dóó ałąąʼ átʼéego nitsóhkees. Éí biniinaa nitsáhákeesgi dóó aa aʼááh hwiindzingi łáʼí nohłı̨́įgo bíhoołʼaah. (Philippians 2:2) Nahatʼáagi łáʼí ídlı̨́įgo éí íiyisí yáʼátʼééh. Diyin Bizaad ání: “Nahatʼá baa hwiinítʼı̨́įgo hazhóʼó hashtʼedaalneʼ.” (Proverbs 20:18) Diyin Bizaad ánínígíí bikʼeh honołʼı̨́įgo éí hazhóʼó nahatʼá nihee hólǫ́ǫ doo.​—Proverbs 8:32, 33.

DÍÍ BIKʼEH ÁDÍÍNÍÍŁ:

• Nichʼooní éí doo tʼóó haneʼ tʼéiyá bee bił hólneʼ da doo. Íiyisíí níniʼ yisʼánígíí ałdóʼ bee bił hólneʼ doo

• Haʼátʼíida tʼahdoo bee lą́ íłeehgóó áłtsé nichʼooní bił hodíílnih