Uthenga Wabwino Wolembewa na Yohane 21:1-25
21 Pavuli pa izi, Yesu eonekela soti kuli ophunzila ŵake ku Nyanja ya Tiberiyo.* Yove eonekela teti:
2 Kwamene uko, kwenze Simoni Petulo, Thomasi (wamene enzoitiwa kuti Didimo), Natanayeli wa ku Kana wa ku Galileya, ŵana a Zebedayo na ophunzila ayakine aŵili.
3 Simoni Petulo elaŵila kuti: “Neo nikuyokasha nsomba.” Ayakine elaŵila kuti: “Tikuya nawe.” Ove eluta kuyokwela boti, koma usiku wamene uyo, aliyokasheko nsomba iliyonse.
4 Koma pekwenzokuca, Yesu epanama m’mbali mwa nyanja koma ophunzila aŵa aliyomuzindikile kuti enze Yesu.
5 Pavuli pake, Yesu eŵakonsha kuti: “Ŵanamwe, kansi muli na cakulya ciliconse?”* Ove eyankha kuti: “Tiliye!”
6 Yove eŵauzhya kuti: “Ponyani neti kumalendi kwa boti ndipo mukasheko.” Tetyo, ove eponya cendi neti iyi koma aliyokwanishe kuidonsela mu boti cifukwa ca kupaka kwa nsomba.
7 Pavuli pake, wophunzila weenzokonda Yesu euzhya Petulo kuti: “Ni Ambuye!” Simoni Petulo peecimvwa kuti ni Ambuye, evwala covwala cake cakunja cifukwa enze aliyovwale mokwanila ndipo elumphila m’nyanja.
8 Koma ophunzila ayakine eluta na kaboti katontho apo n’kuti odonsa neti yamene yenze yozula na nsomba, cifukwa enze lini patali na ku mtunthu. Enze tyala pa msenga wa mamita pafupifupi 90.
9 Pecifwika ku mtunthu, eona mulilo wa malasha ndipo penze nsomba koma soti eona buledi.
10 Yesu eŵauzhya kuti: “Letankoni nsomba ziyakine zamwakasha.”
11 Tetyo, Simoni Petulo eloŵa mu boti umu nodonsela ku mtunthu neti yamene yenze yozula na nsomba zikulu-zikulu zokwanila 153. Koma olo kuti mwenze nsomba zinyinji teti, neti iyi iliyong’ambike.
12 Yesu eŵauzhya kuti: “Welani muzalye cakulya ca m’mawa.” Paliye wophunzila olo m’mozi wamene etang’a mtima kuti amukonshe kuti: “Kansi nimwe ŵani?” cifukwa enzoziŵa kuti ni Ambuye.
13 Yesu etola buledi noŵapasa ndipo ecita soti cimozimozi na nsomba.
14 Uyu wenze ulwendo wacitatu pamene Yesu eonekela kuli ophunzila ŵake pavuli pakuti waukishiwa kwa akufwa.
15 Pecisilizhya kulya cakulya ca m’mawa, Yesu ekonsha Simoni Petulo kuti: “Simoni mwana wa Yohane, kansi unikonda kupambana izi?” Yove emuyankha kuti: “Eee, Ambuye, namwe muziŵa kuti nukukondani ngako.” Yove emuuzhya kuti: “Lyeshela ŵana ŵangu a mbelele.”
16 Pavuli pake, emukonsha soti kaciŵili kuti: “Simoni mwana wa Yohane, kansi unikonda?” Yove emuyankha kuti: “Eee, Ambuye, namwe muziŵa kuti nukukondani ngako.” Yove emuuzhya kuti: “Ŵetela ŵana ŵangu a mbelele.”
17 Emukonsha soti kacitatu kuti: “Simoni mwana wa Yohane, kansi unikonda ngako?” Petulo ecimvwa cisoni cifukwa cakuti emukonsha kacitatu kuti: “Kansi unikonda ngako?” Tetyo, yove elaŵila kuti: “Ambuye, mweo muziŵa vinthu vonse, muziŵa soti bwino kuti nukukondani ngako.” Yesu emuuzhya kuti: “Lyeshela ŵana ŵangu a mbelele.
18 Kulaŵila cendi, nukuuzhya kuti pewenze wacilumbwana, wenzovwala weka noluta kulikonse kwawafuna. Koma ukayokulukazhya, ukatambulule manja ŵako ndipo munthu muyakine akakuvwalike nokunyamula, kuluta nawe kwausafuna.”
19 Elaŵila izi pofuna kuonesha mtundu wa imfwa yeenze kuzolemekeza nayo Mulungu. Pecilaŵila izi, emuuzhya kuti: “Pitilizhya kunikonkha.”
20 Petulo ecunguluka noona wophunzila wamene Yesu enzomukonda apo n’kuti oŵakonkha. Wophunzila uyu ni ula wamene pa cakulya ca m’cingulo, enze esamila pa nganga pa Yesu nomukonsha kuti: “Ambuye, kansi ni ŵani ofuna kukupelekani?”
21 Tetyo pecimuona, Petulo ekonsha Yesu kuti: “Ambuye, nanga uyu n’cinji cati cikamucitikile?”
22 Yesu emuuzhya kuti: “Ngati kuti nufuna kuti munthu uyu apitilizhye kunkhala na moyo mpaka pati nikawele, kansi weo zukukhuza tyani? Pitilizhya kunikonkha tyala.”
23 Tetyo, mbili yewanda pakati pa ophunzila kuti wophunzila uyu akafwe lini. Koma Yesu aliyomuuzhye kuti akafwe lini. M’malomwake, elaŵila kuti: “Ngati nufuna kuti munthu uyu apitilizhye kunkhala na moyo mpaka pati nikawele, kansi weo zukukhuza tyani?”
24 Wophunzila uyu niye ocitila umboni vinthu ivi. Yove niye elemba vinthu ivi ndipo tuziŵa kuti umboni wakupeleka ni wacendi.
25 Pali soti vinthu viyakine vinyinji vecicita Yesu. Kuti vonse velembewa, nuona kuti sembe mipukutu iyi iliyokwane m’calo.
