Kalata Yaciŵili ya Petulo 2:1-22
2 Olo n’tetyo, pakati pa Aisiraeli, ŵanthu ayakine enkhala aneneli awenye. Molingana na izi, pakati panu pakankhale soti aphunzisi awenye. Ŵanthu aŵa akayambishe mwacisinsi tumagulu toononga twampatuko ndipo akakane olo Ambuye ŵao amene eŵagula. Cifukwa cocita izi, ove akaonongewe kamangu ngako.
2 Kuyangizhyila apo, ŵanthu anyinji akatolele nkhalidwe yocitisha nsoni ya aphunzisi aŵa awenye ndipo ŵanthu akolaŵila monyoza njila ya cendi cifukwa ca aphunzisi aŵa.
3 Ndipo cifukwa ca dyela, ove akoseŵenzesha mau acinyengo na colinga cakuti akulyeleni masuku pa mutu. Koma cilango cecikonzelatu Mulungu kale-kale kuti azeŵapase, cikuza kamangu ndipo cionongeko cao cifwike mphela.
4 Ndipo Mulungu aliyolekelele angelo ŵala amene ecimwa osaŵapasa cilango. Koma eŵaponya mu Tatalasi noŵamanga mu mfinzi ikulu ngako, poyembekezela kuti akaŵaweluze.
5 Mulungu aliyolekelele calo cila cakale osacipasa cilango, koma epulumusa Nowa wamene enzolalikila zokhuza cilungamo ca Mulungu. Emupulumusa pamozi na ŵanthu ayakine 7, pecileta cigumula pa calo ca ŵanthu osayopa Mulungu.
6 Eononga soti mizinda ya Sodomu na Gomora mwa kuishoka na mulilo mpaka kunkhala milota. Ecita izi kuti inkhale cenjezo kuli ŵanthu amene oyopa lini Mulungu yokhuza vinthu vati vikaŵacitikile msogolo.
7 Koma epulumusa Loti wamene enze munthu wolungama. Loti enzovutika ngako mu mtima cifukwa ca nkhalidwe yocitisha nsoni* yeenzocita ŵanthu amene enzophwanya malamulo.
8 (Munthu uyu wolungama enzovutika mu mtima siku iliyonse, cifukwa ca vinthu veenzoona na kumvwa peenzonkhala pakati pa ŵanthu aipa. Yove enzovutika mu mtima cifukwa ca vocita vao vosamvwila malamulo.)
9 Izi zuonesha kuti Yehova oziŵa kupulumusa ŵanthu ozipeleka kuli yove ngati okumana na mayeselo. Koma ŵanthu osalungama oŵasunga kuti akaŵaononge pa siku yopeleka ciweluzo,
10 makamaka ŵanthu amene osakila ŵanthu ayakine na colinga cakuti aŵaipishe mwa kulalana nao koma soti amene onyoza olamulila.
Ŵanthu aŵa oyopa lini ciliconse ndipo akumvwa zao zeka. Ove ocita lini wowa kulaŵila vinthu vonyoza ŵanthu amene Mulungu waŵapasa ulemelelo.
11 Koma angelo olo kuti ni amphamvu ngako, oneneza lini aphunzisi aŵa awenye na mau onyoza, cifukwa angelo aŵa olemekeza Yehova.
12 Ndipo ŵanthu aŵa, molingana na nyama ziliye nzelu zamene zucita vinthu mwacibadwa koma soti zuvyalika kuti zikakatiwe noonongewa, olaŵilila mau aipa vinthu vaasaziŵa. Ŵanthu aŵa akaonongewe cifukwa ca vocita vao viipa,
13 ndipo okumana na mavuto monga mphoto ya vocita vao viipa.
Ove oona kuti kucita vinthu vokhutilisha vilakolako va miŵili yao n’kosangalasa olo kuti ovicita mzuŵa. Ŵanthu aŵa ali monga ni maŵanga na lito yothimbilila pakati panu. Ndipo osangalala mopitilila malile ngati okuphunzisani vinthu vawenye paakulya namwe pamozi.
14 Ove ofunishisha ngako kucita cigololo* koma soti okangiwa kupewa cimo ndipo okopa ŵanthu amene aliye cikhulupililo cotang’a. Ali na mtima wadyela. Ove ni ŵana otembelelewa.
15 Asoŵeshewa cifukwa esiya njila yasiteleti. Akonkha njila ya Balamu mwana wa Beori, wamene ecita vinthu viipa cifukwa cofunishisha kulandila mphoto,
16 koma ezuzuliwa cifukwa cokangiwa kucita vinthu vabwino. Bulu, camene ni cinthu cisalaŵila, elaŵila monga ni munthu nokangisha vocita vosokonezeka va mneneli uyu.
17 Ŵanthu aŵa ni nyenje ziliye manzi koma soti mikumbi yamene yutoleka na mphepo yamphamvu ndipo aŵasungila malo a mfinzi ikulu ngako.
18 Olaŵila molikuzhya koma vakulaŵila ni vatyalatyala. Ndipo oseŵenzesha vilakolako va muŵili koma soti nkhalidwe yocitisha nsoni* pokopa ŵanthu amene eleka lombapano kukatizhyana na ŵanthu ocita vinthu viipa.
19 Olo kuti oŵalonjeza ufulu, ove ni akapolo a nkhalidwe iipa. Cifukwa aliyense wamene wagonjesewa na munthu muyakine, onkhala kapolo wa munthu wamugonjesa.*
20 Kulaŵila cendi, ngati epulumuka ku voipisha va m’calo ici cifukwa coziŵa molondola Ambuye wamene ni Mpulumusi wasu Yesu Khristu, koma noyamba soti kucita vinthu vala mpaka kugonjesewa navo, minkhalidwe yao yunkhala iipa ngako kupambana poyamba.
21 Sembe zenze bwino kuti enze aliyoziŵe njila ya cilungamo molondola, kusiyana na kuiziŵa bwino koma pavuli pake noleka kukonkha malamulo atuŵa yecipasiwa.
22 Mwambi ula wacendi wakwanilishiwa pali ove, wamene ukamba kuti: “Imbwa yawelela ku malusi ŵake ndipo nkhumba yamene yenze yasambikiwa, yaluta soti kuyonyaya m’matika.”
Mau a m'nyansi
^ M’Cigiriki ni a·selʹgei·a.
^ Mau ŵake ŵeneŵene, “menso yao ni yozula na cigololo.”
^ Kapena kuti, “koma soti vocita vao vamene vuonesha minkhalidwe yocitisha nsoni.” M’Cigiriki ni a·selʹgei·a.
^ Kapena kuti, “amene agonjesewa na cinthu ciyakine, onkhala akapolo a cinthu camene ico.”
