“Liga ahumate e Tohi Tapu ka nakai totou e koe mo e fiafia,” ne talahau he tama fuata mui ko Will.

Manako nakai a koe ke iloa e falu puhala ke fiafia e totouaga he Tohi Tapu? To lagomatai he vala tala nei a koe.

•  Fakaalaala e Tau Kupu he Tohi Tapu

•  Kumikumi!

•  Ko e heigoa ne talahau he tau kapitiga haau

Manamanatu ke he mena haau ne totou. Taute pehē:

1. Fifili e taha tala mai he Tohi Tapu ne manako a koe ke fakaako ki ai. Fifili e taha mena ne tupu he Tohi Tapu po ke taha vala mai he Evagelia.

2. Totou e Tala. Totou ni e koe po ke totou mo e tau kapitiga po ke falu he magafaoa. Taha e tagata ka totou e tala ka e igatia e falu mo e totou e tau vala he tau tagata he tala.

3. Taute taha po ke falu puhala lagomatai nei:

   • Tā e tau fakatino ke lata mo e tala. Po ke tā e tau fakatino mukamuka ne maeke ke talahau po ke fakakite e tau mena tutupu. Fakaaoga e tau kupu i lalo he fakatino ke fakamaama ko e heigoa ne talahau he tala.

   • Ka totou e koe e tala ke he taha tagata ne tua fakamooli, tohi hifo e tau mahani, tau gahua mo e tau monuina ne moua e ia.

   • Taute e tala ke tuga e talahau he nusi. Taute e tau vala he nusi tuga e “hūhū mo e tali” ke he tau tagata ne kitia e mena ne tupu.

   • Ka e taha he tau tagata he tala ne taute e fifiliaga ne nakai hako, manamanatu la ke he fakahikuaga ka taute e ia e fifiliaga ne hako. Tuga e fakatai kia Peteru ne pehē kua nakai iloa e ia a Iesu. (Mareko 14:66-72) Maeke fēfē a Peteru ke tali fakamooli he magaaho uka ia?

   • Fakaaoga e manamanatuaga haau ke tuga ko e tohi ni e koe e tala ne moua mai he taha talahauaga he Tohi Tapu. Tohi hifo foki e tau fakaakoaga mai he tala.​​—Roma 15:4.

Ka kumikumi fakamitaki e koe ti maeke ia koe ke moua e tau kupu pulotu he tala. He falu magaaho ko e taha po ke ua e kupu he tala he Tohi Tapu ne kua aoga lahi.

Ma e fakatai, totou a Mataio 28:7 mo Mareko 16:7.

•  Ko e ha ne tohi e Mareko to hau a Iesu ke he tau tutaki “mo Peteru”?

• Lagomatai: Nakai kitia e Mareko e tau mena ne tutupu; ti fakamooli he mena ia na moua mai e tau vala tala haana ia Peteru.

• Tau kupu pulotu: Ko e ha a Peteru ne fiafia he logona kua manako a Iesu ke liu feleveia mo ia? (Mareko 14:66-72) Fakakite fēfē e Iesu ko e kapitiga mitaki a ia ki a Peteru? Fakakite fēfē e koe he fifitaki kia Iesu ko e kapitiga mitaki a koe ke he falu?

Ka fakaalaala e koe e tau kupu he Tohi Tapu mo e kumikumi ke he tau vala tala, ti fiafia lahi a koe ke totou e Tohi Tapu haau!