Can You Trust Religion Regarding War?
Ko Alberto ko e kautau ne teitei ke hogofulu e tau. Manatu e ia: “Ne fakamonuina he akoako a mautolu, he pehē, ‘Kua fakalataha e Atua mo mutolu.’ Ka e manamanatu au, ‘Ko e fano au a ē ke kelipopo tagata, ka e pehē e Tohi Tapu ke “aua neke kelipopo tagata a koe.”’”
Ko Ray ne fano a ia he togatau he Felakutaki II he Lalolagi. Ne lagataha e hūhū a ia ke he akoako: “Na hau a koe ke he toga ke liogi ma e tau kautau mo e ke kautū. Ai kia taute pihia foki he fī?” Ne tali he akoako na gahuahua e Iki ke he tau puhala galo.
Ka nakai makona a koe he tali ia, nakai ko koe ni ne pihia.
KO E HEIGOA NE FAKAAKO HE TOHI TAPU?
Pehē a Iesu ko e taha he tau poakiaga ne mua he Atua ko e “kia fakaalofa atu a koe ke he tagata ne katofia a mua, kia tuga a koe kia koe ni.” (Mareko 12:31) Fakakaupā kia e Iesu e fakaalofa ke he katofia ha tautolu he fakavē ke he nofoaga po ke motu ha lautolu? Nakai. Tala age a ia ke he tau tutaki haana: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:34, 35) To kehe lahi mahaki e feofanaki ha lautolu ti eke e mena ia mo fakamailoga. Kua mautali a lautolu ke foaki e tau momoui ha lautolu ma e taha ka e nakai utakehe e moui he taha.
Ne momoui fakatatau e tau Kerisiano fakamua atu ke he tau kupu ha Iesu. Pehē mai The Encyclopedia of Religion: “Ko e tau mamatua fakamua he lotu, fakalataha ai a Tertullian mo Origen, ne fakamau kua puipui mai e tau Kerisiano he utakehe e moui he tagata, ko e matapatu fakaakoaga ne leveki mai a lautolu he fakalataha ke he kautau Roma.”
FĒFĒ E TUAGA HE TAU FAKAMOLI A IEHOVA?
Ha kua teitei nonofo e Tau Fakamoli a Iehova he tau motu oti, ti nonofo falu he vahāloto he ua e matakau ne fetotokoaki e tau motu. Ka kua eketaha a lautolu ke fakatumau e fakamailoga he fakaalofa.
Fakaako nakai he tau takitaki lotu e fakaalofa faka-Kerisiano mooli?
Ma e fakatai, he 1994 ne latau e tau Hutu mo e tau Tutsi i Ruanata, ne tu uho katoatoa e Tau Fakamoli a Iehova. Ne fufū he Tau Fakamoli he taha matakau e Tau Fakamoli he taha matakau, ti fa fakahagahaga kelea e tau momoui ha lautolu. Mogo ne moua e tokoua e Fakamoli Hutu ne fufū e tau matakainaga Tutsi ha laua, ne pehē e kautau he Hutu Interahamwe, “To tamate a mua ha kua lagomatai e mua e tau Tutsi ke fehola.” Momoko ai, ne tamate tokoua e Tau Fakamoli Hutu.—Ioane 15:13.
Fēfē e manatu haau: Kua lautatai nakai e tau gahua he Tau Fakamoli a Iehova mo e tau kupu ha Iesu hagaao ke he fakaalofa foaki noa?
