Tau Hūhū he Tau Tagata Totou

Ko e heigoa e kakano ha Iesu he magaaho ne pehē ko e fekafekau fakamooli haana nukua “loto matala”?

Ne talahau e Iesu e hūhū: “Ko hai foki e fekafekau fakamoli mo e loto matala, kua kotofa he hana iki ke pule ke he hana tau fekafekau mo e age kia lautolu e tau mena kai ke he tau magaaho?” (Mataio 24:45) Kua fa fakakite he Ko e Kolo Toko mai he tau Tohiaga Tapu ko e “fekafekau” ne foaki e ‘tau mena kai’ fakaagaaga ko e fakapotopotoaga he tau Kerisiano ne fakauku he agaaga. Ko e ha ne ui e Iesu a lautolu kua loto matala? *

Maeke ia tautolu ke maama mitaki lahi mai he tau fakaakoaga ha Iesu e kakano haana ke he kupu “loto matala.” Ma e fakatai, he magaaho ne tutala a ia hagaao ke he “fekafekau fakamoli mo e loto matala,” ne tala age e Iesu e tala fakatai ke he tau tamafine tote tokohogofulu ne aala ke fakatali ka hau e kitofaihoana. Kua fakamanatu mai he tau tamafine tote ki a tautolu e tau Kerisiano fakauku ato hoko ke he 1914 ne amaamanaki lahi ke he hau he Kitofaihoana ne mua, ko Iesu Keriso. Mai he tau tamafine tote tokohogofulu, tokolima ne nakai lahi e vala lolo he hoko mai e kitofaihoana, ti nakai o atu a lautolu ke he taonaga. Ne loto matala e tokolima ne toe. Ne lahi e vala lolo ha lautolu ne uta ke maeke ia lautolu ke fakamaama atu ke he kitofaihoana he hoko mai ti fakaatā a lautolu ke he taonaga.​—Mataio 25:10-12.

Magaaho ne pule ai a Iesu ke he haana Kautu he 1914, ne tokologa e tau Kerisiano fakauku ne amanaki ke fakalataha fakamafiti mo ia he lagi. Pete ia, kua lahi agaia e gahua ma lautolu ke taute he lalolagi, ti kua nakai amanaki e falu ma e mena ia. Ke tuga e tau tamafine tote goagoa, ne nakai fakamalolō fakaagaaga tuai e lautolu a lautolu, ti nakai mautauteute a lautolu ke tumau ko e tau tagata ne gahua ke fakamaama. Ka e tokologa kua gahua loto matala​—he pulotu mo e kitia tuai—​ti kua fakamalolō fakaagaaga. Magaaho ne iloa e lautolu kua lahi agaia e gahua kua fakatoka mai mua, ne taute fiafia ai e lautolu. Ko e mena ia ati eke ai a lautolu mo “fekafekau fakamoli mo e loto matala.”

Manamanatu foki ke he fakaaogaaga ha Iesu he kupu “loto matala” he Mataio 7:24. Ne pehē a Iesu: “Ka fanogonogo taha ke he haku a tau kupu nai, mo e eke ai e ia, to fakatai e au a ia ke he tagata loto matala ne fakatu e ia hana fale i luga he mena patu.” Ko e tagata loto matala ne ta e fale he mena patu, he manamanatu neke tō e afā. Kehe ai, ko e tagata goagoa ne fakatū hana fale he oneone ti malona ai. Ti ko e tutaki loto matala ha Iesu kua kitia tuai e ia e tau fua matematekelea he muitua ke he pulotu he tagata. Ko e manamanatuaga haana mo e fifiliaga hako kua takitaki a ia ke fakavē mauokafua e tua, tau gahua, mo e tau fakaakoaga haana he tau mena ne fakaako e Iesu. Kua gahua pihia foki e “fekafekau fakamoli mo e loto matala.”

Mailoga foki e fakaaogaaga he kupu “loto matala” he tau tohi loga he tau Tohiaga Tapu Heperu. Ma e fakatai, ne kotofa e Farao a Iosefa ke pule ke he tau mena kai ha Aikupito. Ko e vala anei he fakaholoaga ha Iehova ke foaki e tau mena kai fakaagaaga ma e tau tagata haana. Ko e ha ne fifili ai a Iosefa? Ne tala age a Farao ki a ia: “Nakai fai tagata ke [“loto matala,” NW] mo e iloilo tuga na koe.” (Kenese 41:33-39; 45:5) Pihia foki, ne pehē e Tohi Tapu ko Apikaila ne “loto manamanatu hifo mitaki.” Ne foaki e ia e tau mena kai ki a ia ne fakauku e Iehova, ko Tavita, mo e haana tau tagata. (1 Samuela 25:3, 11, 18) Lata foki a Iosefa mo Apikaila ke talahau kua loto matala kakano kua maama ia laua e finagalo he Atua ti kua taute ai mo e kitia tuai mo e fifiliaga mitaki.

Ko e mena ia, magaaho ne fakamaama e Iesu hagaao ke he fekafekau fakamoli nukua loto matala, ne fakakite e ia ko lautolu ne hukui e fekafekau ia to fakakite e loto manamanatu, kitia tuai, mo e fifiliaga mitaki kakano kua fakavē e tua, tau gahua, mo e tau fakaakoaga ha lautolu ke he Kupu he Atua ne kua mooli.

[Matahui Tala]