Tau Hūhū he Tau Tagata Totou

Fai hui nakai e gata ne tutala ki a Eva?

Tuga ne fakamau he Kenese 3:14, ne hagaao a Iehova ko e Atua ke he gata ne fakavaia a Eva he kaina ko Etena. Ne pehē e Atua: “Ha kua eke e koe e mena nai, ko e mena ia ke mua ai hau a malaia ke he tau manu huifa oti he kaina, katoa mo e tau manu huifa oti he vao; to totolo a koe ke he manava hau, mo e kai efuefu e koe ke he tau aho oti he moui hau.” Ne nakai talahau fakamahino he Tohi Tapu ko e manu ne fakaaoga ke kamatamata a Eva nukua fai hui he magaaho fakamua ka e nakai fai he magaaho fakamui. Ko e puhala ne tohi aki e Kenese 3:14 kua liga taute falu ke manamanatu pihia, ti nakai lata ia tautolu ke fakahiku aki ko e mena fai hui e gata ato hoko e fakamalaia nei. Ko e ha ne nakai lata ai?

Kakano ni ha ko e matapatu mooli he fakafiliaga ha Iehova kua taute ki a Satani​—ko e mena moui fakaagaaga nakai kitia ne fakaaoga fakahehē e manu fakateaga na. Kua fakamaama he Tohi Tapu a Satani ko e “matua he pikopiko” mo e “gata tuai.” Ko e tau talahauaga ua nei ne liu ni hagaao ki a Satani ne fakaaoga e manu, ko e gata, mo gutuvagahau ke fakaohooho a Eva ke liuliu ke he poaki he Atua.​—Ioane 8:44; Fakakiteaga 20:2.

Ne tufugatia he Atua e tau gata, ti maaliali kua fitā he fakahigoa e Atamu e tau gata ato fakaaoga e Satani ke fakavaia. Ti ko e gata ne nakai fai lotomatala ne tutala ki a Eva kua nakai lata ke tuku aki e kelea. Ne liga nakai iloa he gata ko Satani ne fakaohooho ai, ti liga nakai maama e fakafiliaga ne age he Atua ke he tau matakau ne liuliu.

Ko e ha mogoia ne hagaao e Atua ke he tuaga tokolalo he gata? Ko e aga he gata he takatakai pauaki haana ko e totolo he manava mo e fakatelotelo e alelo ke tuga ko e epo he tau efu, kua felauaki tonu e fakatai ke he tuaga kelea ha Satani. Ne olioli fakamua e ia e tuaga tokoluga ko e taha he tau agelu he Atua, ka kua ta atu a ia ke he tuaga tokolalo ne hagaao e Tohi Tapu ki ai ko e Tatarusi.​—2 Peteru 2:4, NW.

Lafi ki ai, tuga ni ka fakapakia he gata mooli e muihui he tagata, ko Satani he tuaga tokolalo haana ne ‘tatuki e muihui’ he [“tega,” NW] he Atua. (Kenese 3:15) Ko e matapatu vala he tega ia ko Iesu Keriso, ne mamahi fakakū he tau lima he tau hukui ha Satani. Ka e he fakahikuaga, ko e ulu he gata fakatai to taholi tukulagi he Keriso mo e haana tau hoa Kerisiano ne fakauku kua liu tutū mai. (Roma 16:20) Ti, he hagaao fakatonu atu he Atua e fakamalaia ke he gata kua liga felauaki ke fakatai ke he kelea mo e moumouaga fakahiku he “gata tuai” ne nakai kitia, ko Satani ko e Tiapolo.