Faigi nösi

Faigi ba menu sekunder

Samaduhu’ö Yehowa

Nias

Hadia Lafaso Niha Ira Samaduhu’ö Yehowa Ena’ö Findra Agama?

Hadia Lafaso Niha Ira Samaduhu’ö Yehowa Ena’ö Findra Agama?

Lö’ö. No irai mafatunö da’a ba mbuku Manuriaigö nifazökhima, ”Fasala na tafaso niha ena’ö findra ira moroi ba agamara.” * So mbörö wa lö omasi ndra’aga mafaso niha. Datafaigi atö:

  • Lö irai ifaso niha Yesu ba wanema’ö famaha’önia. Aboto ba dödönia wa lö ato zotema ya’ia. (Matai’o 7:13, 14) So ösa niha si lö omasi tobali nifaha’önia, börö me lö fao dödöra wamaha’ö si no ibe’e. Hiza’i, lö irai ifaso ira Yesu ena’ö la’o’ö ia.Yohane 6:60-62, 66-68.

  • No ifaha’ö göi Yesu ndra nifaha’önia ena’ö böi lafaso niha findra agama. Tobali, lö göi irai lafaso niha ena’ö lafondro-ndrongo duria somuso dödö nifa’emara sanandrösa ba Mbanua Lowalangi. Ha niha somasi mamondro-ndrongo ni’aluira.Matai’o 10:7, 11-14.

  • Zaya-zaya gölö wa findra agama na tenga soroi ba dödö, börö me da’ö zomasi Lowalangi ha niha samosumange ya’ia soroi ba dödö.V Moze 6:4, 5; Matai’o 22:37, 38.

Hadia da’ö mbörö wa möiga manuriaigö ena’ö labulö’ö agamara?

Maturiaigö Daromali Lowalangi ”irugi ba wondrege danö”. Mafalua halöwö fanuriaigö andre ”föna niha sato hegöi ba nomo misa” (NW) simane niwa’ö Zura Ni’amoni’ö. (Halöwö Zinenge 1:8; 10:42; 20:20) Simane niha Keriso meföna, itaria laböbögö khöma zi lö duhu wa mafaso niha findra agama, irege lafotöi ndra’aga solawa huku. (Halöwö Zinenge 18:12, 13) Hiza’i, fasala niwa’öra andrö. Lö irai mafaso niha ena’ö la’o’ö hadia zi no mafaduhusi tödö. Faduhu dödöma wa moguna aboto ba dödö niha hadia niwa’ö Zura Ni’amoni’ö ena’ö lahalö gangetula samösa molo’ö hadia zi no aboto ba dödöra.

Lö mafaso niha ena’ö findra agama. Tenga da’ö mbörö wa mafalua halöwö fanuriaigö andre mo’amakhaita ia ba politik mazui mafabu’u khöra wame’e fanolo hegöi kefe ena’ö möi ira ba agamama. Fabö’ö ndra’aga moroi ba niha Keriso tanö bö’ö, lafalua zi lö tefaudu khö Keriso. *

Hadia tola ifili hezo agama somasi ia si samösa niha?

Iröi agama ndra tuania Gaberahamo

Tola. I’ombakha’ö khöda Sura Ni’amoni’ö wa tola ifili hezo agama somasi ia si samösa niha. Tola ta’ila ba Zura Ni’amoni’ö haniha manö niha si no irai findra agama ba lafosumange Lowalangi sindruhu. Duma-dumania, Aberahamo, Ruti, ba so göi ösa niha Natena hegöi Faulo (Yosua 24:2; Ruti 1:14-16; Halöwö Zinenge 17:22, 30-34; Galatia 1:14, 23) Aefa da’ö, no tesura ba Zura Ni’amoni’ö wa so göi niha sangai angetula wondröi agama sindruhu hewa’ae angetula nihalönia andrö fasala.1 Yohane 2:19

Molo’ö Deklarasi Universal Hak Asasi Manusia tola ifili agama somasi ia si samösa niha. Fao dödö Perserikatan Bangsa-Bangsa ba Deklarasi da’a tobali ”dasar hukum internasional untuk hak asasi manusia.” Imane Deklarasi andrö wa si samösa niha ”tola findra agama mazui ifabö’öni zi faduhu dödönia” ba ”wangalui, ba wanema, hegöi ba wanutunö turia si no irongo”, hegöi zi faduhu dödönia sanandrösa ba agama. * Tatu manö, fefu niha moguna la’osinangegö hadia nifaduhusi tödö zi samösa niha hegöi na latimbagö wangera-ngera si lö tefaudu ba dödöra.

Na findra agama zi samösa niha, hadia i’osinangegö zi to’ölö ifalua ösi nomonia?

Tatu manö moguna i’osinangegö. Ifarou ita Sura Ni’amoni’ö ena’ö tafosumange fefu niha gofu hadia agamania. (I Fetero 2:17) Baero da’ö, ira Samaduhu’ö Yehowa la’o’ö niwa’ö Zura Ni’amoni’ö ena’ö lafosumange zatuara hewa’ae no fabö’ö agama si so ya’ira.Efeso 6:2, 3

Hiza’i, lö fefu niha fao dödöra ba wamaha’ö si so ba Zura Ni’amoni’ö. Samösa ndra alawe si so ba Zambia sanguma’ö, ”Ba mbanuama, niha si findra agama . . . lafotöi ira niha si no faröi ba nösi nomo hegöi ba mbanua.” No irai alua khönia da’a me ono alawe ia me ibörögö ifaha’ö ia ba Zura Ni’amoni’ö khö ndra Samaduhu’ö Yehowa ba ihalö gangetula wa findra agama ia. Imane, ”Asese lawa’ö ira satuagu wa lö omasi ira khögu ba afatö sibai dödöra. Omasido na fao dödöra ba gangetula nihalögu andre. . . . Na lö faröi ndra’o khö Yehowa ba lö fao ndra’o ba zi to’ölö lafalua agama bö’ö, tenga da’ö geluahania faröi ndra’o ba nösi nomogu.” *

^ par. 2 Faigi ba mbuku Menara Pengawal 1 mbaŵa si Sara, 2002 nga’örö 12, ngenoli si 15.

^ par. 8 Duma-dumania, me döfi 785 M, ibe’e fareta Charlemagne ena’ö labunu niha so timbagö famayagö idanö tobali niha Keriso ba Saxony. So göi Perjanjian Perdamaian Augsburg niteka niha si fa’udu ba Imperium Romawi Suci me döfi 1555 M. Imane ba Perjanjian andrö wa fefu niha samatörö ba mbanuania ena’ö niha Katolik Roma mazui Lutheran, ba fefu nono mbanuania ena’ö lafaogö ira ba agama andrö. Niha si lö omasi ena’ö laheta ira moroi ba mbanua andrö.

^ par. 11 Hak-hak simane da’ö no lafaduhu’ö ba Piagam Afrika tentang Hak Asasi Manusia dan Bangsa, Deklarasi Amerika tentang Hak dan Kewajiban Manusia, Piagam Arab tentang Hak Asasi Manusia 2004, Deklarasi Hak Asasi Manusia ASEAN (Perhimpunan Bangsa-Bangsa Asia Tenggara), Konvensi Eropa Mengenai Hak Asasi manusia, dan Perjanjian Internasional tentang Hak-Hak Sipil dan Politik. Hewa’ae simanö, so göi soi si no mo’akui perjanjian-perjanjian da’a ba lö lafalua molo’ö huku si no mube’e andrö.

^ par. 14 Yehowa da’ö döi Lowalangi si no tesura ba Zura Ni’amoni’ö.