Ipantsin 60 % itech tokniuan akin tlajtolkuepaj nemij ipan Kaltin kampa notlajtolkuepa (ORT), xnemij ipan sucursales. ¿Kenon tepaleuiya yejuin tlen yonochiuj? ¿Tlenon noneki kipiyaskej ipan se ORT tokniuan akin tlajtolkuepaj? ¿Kenon kinpaleuiya akin tlajtolkuepaj pampa nemij ipan ORT?

 Pampa ORT onka kampa tlajtouaj intlajtol tokniuan akin tlajtolkuepaj, yejuamej más kuajli tlajtolkuepaj. Karin, akin kitlajtolkuepa bajo alemán, techijlia: “Desde ijkuak otopatlakej ipan ORT, ne Cuauhtémoc, Chihuahua (México), opeuj nochipa titlajtouaj bajo alemán. Xsan titlajtouaj ika totlajtol iuan akin titekitij noso imiuan akin tikinnextiaj kampa titenojnotsaj, noijki titlajtouaj ijkuak tontlakouaj. Melak kuajli pampa tichantij kampa tlajtouaj yejuin tlajtojli. Tikinkakij tlajtoltin tlen nion xtikinkakiyaj. Aman itikmatstokej kenon tlajtouaj akin ompa chanti”.

 James, akin chanti ne Ghana niman tlapaleuiya kampa notlajtolkuepa ika tlajtojli frafra, kijtoua ika kintemoua tokniuan akin nemij Betel. San ika, noijki kijtoua: “Melak nikuelita ninemis ipan ORT. Nechyolpaktia nikitas kenon tlaltikpakchanejkej kuelitaj nechkakiskej ijkuak nikinnojnotsa ika intlajtol”.

 ¿Kenon kitejtemouaj kampa notlalis se ORT? Joseph, akin tlapaleuiya ipan Grupo akin Kiyekana Diseño niman Construcción ipan nochi Tlaltikpaktli ne Warwick (Nueva York), kijtoua: “Kemantika ouijtika tikitaj tiknextiskej kampa uelis onias se ORT, pampa ipan seki kalpamej xonka atl, luz niman xmás kuajli internet, tlen notekitiltia para kitemoltiskej tlen notlajtolkuepas. Yejua ika, melak kuajli tiktejtemouaj kanon uelis tiktlaliskej se ORT, noijki tikitaj tla kampa tiktlaliskej tlajtouaj on tlajtojli tlen notlajtolkuepas”.

 Yotikitakej ika más kuajli niman xmás patioj kisa tla ORT notlalia ipan Kajli kampa tosentlaliaj noso ipan kajli kampa chantij misioneros. Yejuin itlaj tlen noijki kinpaleuiya tokniuan akin tlajtolkuepaj pampa xkintekiyomaka ajsiskej. San ika, tla xueli ompa notlalia, kuakon tokniuan kitejtemouaj oksekan kampa uelis notlalis noso kikouaj se kajli kampa uelis notlalis ORT, niman ijkon akin tlajtolkuepaj uelis ompa tekitiskej niman chantiskej. Niman, tla itlaj nopatla, yejon kajli uelis nonemakas para tomin oksekan uelis notekitiltis.

 Ipan xiuitl 2020 onopopolo 13 millones de dólares para kuajli maoniakan ORTs. Akin tlajtolkuepaj noneki kinpiyaskej computadoras, programas tlen kinpaleuiya, tlen ika kinchiuaskej grabaciones, internet niman okseki tlemach. San xnemilikan, noneki 750 dólares para nokouas se computadora tlen uelis kitlaliliskej seki programas tlen ika tekitiskej yejuin tokniuan. Niman, akin tlajtolkuepaj noneki kipiyaskej Watchtower Translation System, tlen kinpaleuiya kuajli makichiuakan intekiyo niman noijki makalakikan ipan seki documentos tlen noneki kintlajtolkuepaskej.

 Akin tlajtolkuepaj kinmakaj equipos tlen ika kinchiuaskej grabaciones kampa tekitij. Yejuin equipos melak okinpaleui ijkuak opeuj kokolistli COVID-19, pampa miyekej akin tlajtolkuepaj ouel okimitkikej inchan, niman ijkon ok kinchiuaskiaj grabaciones itech toamatlajkuiloluan niman videos.

 Sekimej tokniuan kitaj ika tlen onotlajtolkuep kuajli manasikamati, oksekimej kiyektlaliaj niman kichipauaj yejon kajli para kuajli maonia. Cirstin, se tokniuj akin tekiti ipan Kajli Kampa notlajtolkuepa ika tlajtojli afrikáans ne Ciudad del Cabo (Sudáfrica), kijtoua: “Miyekej tokniuan akin tenojnotsaj niman precursores regulares uelis tlapaleuiskej ika tlen yejuamej ueli kichiuaj”.

 Tokniuan melak kuelitaj tlapaleuiskej. Se tokniuj kijtoua ika titlapaleuis ipan se ORT yeskia kentla “kampa nopaleuilo ijkuak ajakakiyaui”. Sekimej tokniuan akin nisiuj chantij melak tepaleuiyaj ijkuak kichiuaj grabaciones. Juana, akin tlajtolkuepa ika tlajtojli totonaco ne Veracruz (México), kijtoua: “Aman ika tichantij nisiuj kampa tlajtouaj yejon tlajtojli tlen ika titlajtolkuepaj, miyekej tokniuan ueli uajlauej ijkuak nochiuaj seki grabaciones itech toamatlajkuiloluan niman videos”.

 San ika, ¿yemelak tepaleuiyaj ORTs más kuajli manotlajtolkuepa? Miyekej akin kinamapouaj toamatlajkuiloluan kijtouaj ika kema. Cédric, akin tekiti ipan se equipo tlen tlajtolkuepa ika tlajtojli congo, ne República Democrática del Congo, techijlia: “Miyekej kijtouayaj ika titlajtolkuepayaj ika tlajtojli ‘Congo de Betel’, pampa xmás kasikamatiyaj tlen tiktlajtolkuepayaj. San ika, aman techijliaj ika más kuajli ken titlajtolkuepaj, pampa nasikamati niman notekitiltia on tlajtojli tlen mojmostla yejuamej ika tlajtouaj”.

 Andile, akin tlajtolkuepa ika tlajtojli xhosa kijtoua ika ne Sudáfrica, noijki ijkon opanok: “Miyekej kijtouaj ika tlen aman titlajtolkuepaj más nasikamati. Noijki miyekej kokonej akin achto kipouayaj Amatl Tekakistilijketl ika inglés aman kipouaj ika xhosa. Melak kuelitaj yenkuik Biblia itech Traducción del Nuevo Mundo ika tlajtojli xhosa, pampa más kuajli kasikamatij”.

 Nochi on tomintsin tlen nopopoloua ipan se ORT kampa notlajtolkuepa niman para tokniuan akin ompa tlapaleuiyaj makipiyakan tlen kinpoloua, nokixtia ipan donaciones tlen kitemakaj iteixpantijkauan Jehová ipan obra mundial niman noijki tlen nochiua ipan donate.jw.org.