Diana, akin otikteneujkej ipan tlamachtijli tlen opanok, okimachili ika pampa melak najmanaya kichiujtoya ika melak matlauani. Biblia xkijtoua tla xuelis tikonis achijtsin alcohol, san ika, kema kijtoua: “Maka tinemis intsajlan akin temojti konij vino” (Proverbios 23:20). Tlauanilistli kichiua ika sekimej makualokan, maka sa manouikakan iuan oksekimej niman miyekej mamikikan nochi xiujtin. Tla tlaltikpakchanejkej kitlakamatiskiaj itlajtolpaleuilisuan Biblia, xkipiyaskiaj yejuin tlaueltin.

Diana ijkon okichiuj, niman aman kijtoua: “Onikitak ika nitlauanis xnechpaleuiaya manikyektlali tlen nechajmanaya. Oniktlakamat tlajtolpaleuilistli tlen uajnestiuj ipan Filipenses 4:6, 7, kampa kijtoua: ‘Ma ka itlaj xkomatstiakan, yej [...] xtlajtlanilikan Dios ikan tlaxtlauijli nochi tlen mechpoloua’. Nochipa ika yeuajli, ijkuak sa nitlanemilijtoya ipan notlaueluan, nikchiuiliaya teoyotl Jehová niman nikijliaya kenon ninomachiliaya: ika nikualantoya, ninoyolkokouaya, ninajmanaya... niman niktlajtlaniliaya manechpaleui kuajli manitlanemili. Uajmostla ninokojtiliaya xok ijkon nitlanemilis. Pampa nikchiuiliaya teoyotl Jehová nechpaleuiaya nitlanemilis itech tlen nikpiaya niman maka itech tlen xnikpiaya. Onikijto ika xok keman nitlauanis pampa yolseuilistli tlen yoniknextijka melak kualtsin katka niman xniknekiya nikpolos”.

Auilnemilistli melak teijtlako niman kuajkui miyek tlajyouilistli xijkon ken itlaj okse. San ika, tlajtolyekanalistin tlen kipiya Biblia uelis techpaleuis maka matikpiyakan yejuin tlajyouilistli, pampa tlajtoua itech seki tlen kipeualtia: ken ijkuak san titeixuetskilijtinemis noso tikitas auilnemilistli. Se telpochtli itoka Samuel okijto: “Xouijtika san titeixuetskilijtinemis... Kemantika akin ijkon nikchiuiliaya nion xnikuelitaya, san ika, ijkuak nikitaya ika nechuelitaya, nechpaktiaya ijkon nikchiuas”. Pampa nochimej okijlikej ika san teixuetskilijtinemiya, maski kemantika xyejon tlen kinekiya, Samuel okinemili ijkon kichiuas. San ika, yejon kajmanaya. Yejua okijto: “Melak teijtlako pampa kichiua ika se manokuepa nexikole”.

Samuel okipouj se tlamachtijli tlen kinpaleuiya telpokamej ipan página ipan Internet jw.org. Noijki otlanemili ipan Proverbios 20:11, kampa kijtoua: “Hasta se konetl [noso telpochtli] kixmatij ika tlen kichiua, tla noyekana chipauak niman melajki”. ¿Kenon okipaleui? Samuel okitak ika san titeixuetskilijtinemis, xchipauak niman xkuajli. Yejua aman kijtoua: “Oniuel ika telpochtli akin ijkon kichiua, xuelis yes se kuajli teueuentsin. Niman opeuj nitlanemilia itech kenon nomachiliskia akin yeskia nosiuauj tla kitaskia ika san nikixuetskilijtinemi okse siuatl. Onikitak ika san titeixuetskilijtinemis melak teijtlako. Xouijtika tikchiuas, san ika, xkijtosneki tla kema kuajli”. Samuel onopatlak. Pampa xok ijkon okichiuj okipaleui maka maauilnemi.

Antonio kipiaya se ueyi tlauejli: yejua nochipa kitaya auilnemilistli. Maski melak kitlasojtlaya isiuauj, xueliya kikajkauaya tlen kichiuaya. Yejua okijto ika melak okipaleui tlanemilis ipan 1 Pedro 5:8, kampa kijtoua: “Kuajli xnemilikan niman xtlachixtiakan, pampa nemotlauelikniu on diablo kineki mechxoxotonis. Yejua kistinemi ken itlaj león yejuan nanalkatinemi niman kitejtemojtinemi akinon kikuas”. Antonio kijtoua: “Nochiuiyan onka tlaixkopinaltin itech auilnemilistli niman yejuin uelis nokauaskej ipan totlamachilis. Yejon tlaxelojli pitentsin onechpaleui manitlanemili itech akinon ualeuaj yejon tlatlatalistin. Nonekiya nikchiuas ika notlamachilis makasikamati ika yejon tsokuiltikej tlaixkopinaltin ualeuaj itech Diablo. Aman nikmati ika Jehová uelis nechpaleuis maninochiua tlamachilise niman manitlatlachixto, ijkon uelis niktlajpiyas itech tlen uelis kijtlakos notlamachilis, noyojlo niman nonamiktilis”. Antonio okipaleuijkej niman ijkon ouel okikauj tlen xkuajli yonomatka kichiuas. Ipampa yejuin xok okipix uejueyimej tlaueltin.

Kuajli nesi ika Biblia kipiya tlajtolpaleuilistin tlen uelis techpaleuis maka matikpiyakan xkuakualtin tlaueltin. San ika ¿tlenon tikchiuaskej tla totlaueluan ueyiyaj niman xtikitaj kenon tikinyektlaliskej? Matikitakan kenon iTlajtol toTajtsin uelis techpaleuis matikinyektlalikan.