Daniel nemi itsajlan leones
Historia 79
Daniel nemi itsajlan leones
¡XKITA! Melak xkuajli kampa nemi Daniel. ¡San ika, leones xtlaj kichiuiliaj! ¿Tikmatstika tleka? ¿Akinon okontlajkal Daniel kampa nemij leones? Matikitakan.
Aman intekiuaj babilonios itoka Darío. Yejua kuelita ken nouika Daniel, pampa kuajli iyojlo niman tlamachilise, kuakon kitlalia kentla se ueyi tlanauatijketl ipan itekiuajyo. Ika yejon, oksekimej tlakamej kinexikolitaj Daniel niman kichiuaj yejuin:
Yauej kampa nemi Darío niman kijliaj: ‘Nochimej tiknekij, oh tekiuaj, xkijkuilo se tlanauatijli kampa makijto ika ipan se metstli xakaj kipiya ika kichiuilis teoyotl itajtsin noso se tlakatl, san tejua, oh tekiuaj. Tla yakaj xmistlakamati makontlajkalikan ijtik teostotl kampa nemij leones’. Darío xkimati tleka yejuin tlakamej kinekij manoijkuilo yejuin tlanauatijli. San ika, kinemilia ika kuajli yes, niman kijkuiloua tlanauatijli. Aman tlanauatijli xok uelis nopatlas.
Ijkuak Daniel kikaki yejuin, yauj ichan niman kichiua teoyotl ken nochipa. Tlakamej akin xkuakualtin kimatiyaj ika Daniel xkikajkauaskia kichiuilis teoyotl Jehová. Melak pakij, pampa nesi ika nochiuas tlen yejuamej kinekij, makimiktikan Daniel.
Ijkuak tekiuaj Darío kimati tlen panotika, yejua melak noyolkokoua. San ika, aman xok uelis kipatlas tlanauatijli, niman kipiya ika tlatitlanis makontlajkalikan Daniel ijtik teostotl kampa nemij leones. Tekiuaj kijlia Daniel: ‘Nikchia ika moTajtsin akin tiktekichiuilia mamitsmakixti’.
Darío melak najmana niman xueli kochi yejon yeuajli. Uajmostla notlaloua kampa onka teostotl. Nikan tikita kampa nemi. Yejua kontsajtsilia: ‘¡Daniel, itekipanojkauj toTajtsin akin yoltika! ¿Ouel omitsmakixti itech leones moTajtsin akin tiktekichiuilia?’
‘NoTajtsin okuajtitlan iiluikaktekitkauj’, kinankilia Daniel, ‘niman okinkamatsauk leones, ijkon xtlaj onexchiuilijkej’.
Tekiuaj melak yolpaki. Tlanauatia makikixtikan Daniel kampa nemi. Kuakon komintlajkalij kampa nemij leones yejon xkuakualtin tlakamej akin kinekiyaj kimiktiskej Daniel. Nion xiajsiyaj tlatsintlan ijkuak leones okinmasikej yejuin tlakamej niman okintotopochilijkej inomiuan.
Kuakon tekiuaj Darío kimijkuilouilia kampa nochiuiyan tlanauatia, niman yejuin tlen okijto: ‘Nochimej xtlakaitakan iTajtsin Daniel. Yejua kichiua uejueyimej milagros. Okimakixti Daniel, pampa xokikauili makikuakan leones’.
