NTAKHARA HEENI TI YOOCHUNEYA: Ekaarata ya 1 Korinto ti emoha ya ikaarata khumi naxexe sa murummwa Paulo seiho aarepenleiye Akristu akhwaawe wi aalipihe. Ekaarata ennamweeriha mulipa oorepa othanla mweephoole masu awe, nave eyo enanwerya waalakhanyiwa wiiliwiili ni yoole aakhenle. Ikaarata mukhalelo waphaama wa olaleerya wa amusi naari asuweli. Iho tho sinnakhaviherya ovaha onamoona wa yaale nihinaweryaahu ochekulano ethoi ni ethoi. Ntoko yootakiherya, akhweya muchu ohooniherya nchuno nyenya ti woovila omphwanya vaate vawe. Akina mu ekulucu ahu, onnakhala woovila olocano nthowa na okhala mmapuro oorakameela. Tiheeni nnaphwanelaahu okhalano mmuupuweloni, xaxaxa vaavaa nnarepaahu ekaarata wa muchu nihimusuwenlaahu?

MUKHALELO WA WEERANO:

• Murepe yeeyo mwaahaalaanyu oloca waakhanle wi mookumanano. Mpacerye orepa nsina nanyu, munakhalaanyuwo, nave muloce ntakhara heeni munarepaanyu ekaarata eyo. Akhweya mpake nikoho wi uupuweleleke, nave mmuleele esaiti ahu. Mmuleele marehereryo a omuhuserya Piipiliya owannyawe, nave muloce miyaha sinaphwanyeya mu soolaleeryiwa sahu sa omuhuseryano Piipiliya. Mpuwa mwa ekaarata eyo, muhelemo emoha sa soolaleeryiwa sahu ntoko, kartau a JW.ORG, nwopelo, naari etrataatu.

• Ekhale yookhuveya, wi mulipa awaalakhanya ahikomeno.—Moone yootakiherya ya ekaarata.

• Muhiheseke masu mwaarepaka. Mpharihele masu ookhweya waalakhanya, oonthamwene, ni a ncicimiho. Nwale phaama envelopi anyu.