1-2. Tiheeni nnahaalaahu othokororya mmwaha yoola?

MU ILUKULUKU ikina, nnaphwanela wuupuwela eparipari yawi ekumi ahu ti ya ‘mahiku vakhaani ni awuukhuwa.’ (Yobi 14:1) Mwawiihiiha, ninnawerya wiiwexexa wi ilukuluku ikina ninnakhala awuukhuwa. Alapeli a Yehova ancipale a ilukuluku sakhalai yaahikhala awuukhuwa. Ophiyerya wi akina yaanachuna okhwa. (1 Mam. 19:2-4; Yobi 3:1-3, 11; 7:15, 16) Nyenya wiiliwiili, Yehova—Muluku yoowo yamuroromelaaya aahaahakararya ni waalipiha yaawo. Saweereya saya soorempwa wi inihakararye ni onihusiha.—Aro. 15:4.

² Mmwaha yoola, nnahaala waathokororya alapeli a Yehova yaawo yaavilenle ni saweeha sawuukhula, ntoko yootakiherya, mwaana a Yakopo Yosefe, naamukhweli Nawomi ni pwiyamwana awe Rute, Muleevi yoowo omurempe Salumu 73, ni murummwa Petru. Yehova aalipinhe hai yaawo? Nave muchu ti muchu a hiyo tiheeni onaphwaneleiye ohuserya orweela wa sootakiherya saya? Maakhulo a makoho yaala annanihakararya osuwela wi “Apwiya [Yehova] ari vakhiviru va yaawo ookhulumuwa,” nave tho “annaavulusha yaawo oothanana.”—Sal. 34:18.

3-4. Tiheeni yeeren’ye ni Yosefe elukuluku aareiye mmiravo?

³ Yosefe aarino iyaakha 17 vaavaa aareiyeno sooloha piili nave sooloha soopiili saarweela wa Muluku. Sooloherya iho saataphulela wi Yehova aahaala omweeriha Yosefe okhala muchu oochuneya ni oocicimihiwa veemusini. (Map. 37:5-10) Nyenya mweelukuluku vakhaani Yosefe amanle waakhela sooloherya seiha mu elukuluku yeele asinnawe hiyaamuciciminhe. Mwawiihiiha, yaahimutumiha ntoko kapuro wa mutokweene mmoha o Yikuputu awiichaniwa Potifare. (Map. 37:21-28) Mu elukuluku vakhaani, okumi wa Yosefe waahitorokeya, owo aahikhala ocai wa atiithi awe yaawo  yaamusivela, nave aakhala kapuro vaate wa muchu yoowo ahaamusuwela Yehova o Yikuputu.—Map. 39:1.

⁴ Nave voocharela makacamiho a Yosefe yamvira yaacaka. Mwaara a Potifare aahimootherya Yosefe wi aachuna okona ni yoowo. Ahaavyanvye osuwela mathowa ene, Potifare aamukeriha Yosefe mukariposo, mwemmo aakhalihiweiye moonanara. (Map. 39:14-20; Sal. 105:17, 18) Yosefe aari mmiravo. Mwaanyiherye mukhalelo Yosefe oonneiye vaavaa ootheriweiye wi aachuna omukoniha mwaara a pwiyawe. Nyenya mwaanyiherye ichu soonanara achu yaahaalaaya oloca ntakhara nsina na Yehova vaavaa yiiwalaaya yeela. Mweeparipari, Yosefe aahikhalano mathowa a okhala awuukhuwa!

5. Tiheeni Yosefe aapankeiye wi ahikhale awuukhuwaxa?

⁵ Vaavaa aareiye kapuro nave voocharela awaleliwa mukariposo, Yosefe haahaala owerya opaka ichu wi atoroke mikhalelo sawe. Tiheeni yaamukhavihenrye otitelela okhalano moonelo woophwanelela? Owo haatikitheryen’ye mu ichu seiyo ahaahaaleiye owerya opaka, nyenya anapaka miteko seiyo aavahiweiye ophiyerya aawereleiyevo. Opwaha soothene, Yosefe anamuhela Yehova mu nipuro noopacerya mookumini mwawe. Wa nthowa na yeeyo Yehova aanareeliha ichu soothene Yosefe aapakeiye.—Map. 39:21-23.

6. Yosefe aahakararyen’ye hai orweela mu sooloha sawe?

⁶ Woonaru Yosefe aahihakararyeya orweela wa wuupuwela sooloha piili soopacerya. Iho saathoonyerya wi aahaala owoona amusi awe wanaawiili nave wi mikhalelo sawe saahaala otorokeya. Nave eyo yaaheereya chiryene. Vaavaa Yosefe aareiyeno iyaakha 37, sooloha sawe saahipacerya waakhwanela mmukhalelo wootikhiniha!—Map. 37:7, 9, 10; 42:6, 9.

7. Mwawiiwanana ni 1 Pedro 5:10, tiheeni enahaala onikhaviherya ovilela ni makacamiho?

⁷ Yeeyo nnahuseryaahuvo. Yaweereya ya Yosefe ennanuupuxerya wi elapo ela enamvira enanaraka nave achu anamunikhaliha moohookololowa. Ophiyerya wi anna ni arokora ahu ananwerya  onikhaliha moohookololowa. Nyenya wakhala wi ninnamoona Yehova ntoko mwaako, naari voochawelavo vahu, hinni nikhale awuukhuwaxa naari omaala omurumeela yoowo. (Sal. 62:6, 7; mwaalakhanye 1 Pedro 5:10.) Muupuwele wi Yosefe aarino iyaakha 17 vaavaa Yehova aavanheiye sooloha piili. Tiyawooneya wi Yehova onnaaroromela amiravo ni asimwali yaawo anamurumeela yoowo. Olelo, amiravo ni asimwali ancipale ari ntoko Yosefe. Awo tho aakhalano nroromelo mwa Yehova. Akina a yaawo annakhalihiwa moohookololowa moorweela mwa owaleliwa mukariposo nthowa nawi hanachuna ohiya omwiiwelela Muluku.—Sal. 110:3.

8. Tiheeni yaamweerenle Nawomi ni Rute?

⁸ Nthowa na etala etokweene, Nawomi vamoha ni emusi awe yaahithaama o Yuta eya yakhala ntoko anamarwa o Mowape. Iyawe, Nawomi, Elimelike, aakhwa nave amuhiya owo vamoha ni anaawe aasilopwana apiili. Moovira weelukuluku, anamwane aasilopwana oopiili yaahaathela athiyana o Mowape, Rute ni Orpa. Ivinrevo iyaakha khumi, anamwane oopiili a Nawomi yaakhwa, nyenya woona wi hiyaarino anamwane, asaaraya tho yaahihala meekhaaya. (Rut. 1:1-5) Mwaanyiherye mukhalelo athiyana ala ooraaru yaaryaaya! Mweeparipari Rute ni Orpa yanwerya otheliwa wanaawiili. Vano taani aahaala omukhapelela Nawomi yoowo aari awuuluvala? Nawomi aari awiiniwa murima ophiyerya wi mweelukuluku ekina aahiloca ariki: “Muhikeereke Nawomi, nto mukeereke Maara, ntakhara Muluku a ikuru soothene tokiruhenle soohoosha.” Amanle ohoolela makacamiho yaala oovila, Nawomi aahilakelela okookela o Petelehemu, nave Rute aahichaana ni yoowo.—Rut. 1:7, 18-20.

9. Mwawiiwanana ni Ruthi 1:16, 17, 22, Rute aamulipinhe hai Nawomi?

⁹ Echu yaamukhavihenrye Nawomi waari osivela woororomeleya. Ntoko yootakiherya, Rute aahimooniherya Nawomi osivela woororomeleya, moorweela wa otitelela okhala ni yoowo. (Mwaalakhanye Ruthi 1:16, 17, 22.) O Petelehemu Rute aanalapa mwakuru wi uurule soolya saahala mmacani ntakhara yene ni Nawomi. Wa nthowa na yeeyo, muchu ti muchu aanawerya woona wi Rute aari muthiyana aphaama nave tho aalapa mwakuru.—Rut. 3:11; 4:15.

10. Mmukhalelo taani Yehova ooniheryeiye osivela ntakhara alipa oohaawa ntoko Nawomi ni Rute?

¹⁰ Yehova aahaavaha Aisarayeli nlamulo nenlo nooniherya wi owo aari ooreera murima ntakhara achu oohaawa ntoko Nawomi ni Rute. Owo aahaaleela achu awe wi vaavaa yaahephaaya soolya mmacani, ehiyeke ikina sa seiyo wi alipa oohaawa yuuruleke. (Onam. 19:9, 10) Wa nthowa na nlamulo nenla, Nawomi ni Rute yaawerya okhalano yoolya. Awo yanawerya okhalano yoolya ehaavemke akina.

11-12. Powasi eerinhe hai wi Nawomi ni Rute ekhale oohakalala?

¹¹ Mwaneene a emaca yeeyo Rute uuruleiyewo soolya aari mulipa ooreela iichaniwa Powasi. Powasi aahitannyeya murima vaavaa ooneiye osivela woororomeleya yoowo Rute ooniheryeiye wa pwiyamwana awe Nawomi. Wa nthowa na yeeyo, Powasi aahimuthela Rute nave aahithuma wanaawiili imaca seiyo saari sa emusi ya Nawomi seiho sahaala okhala yoohiyeryiwa ya anamwane a Rute. (Rut. 4:9-13) Mutheli owo aahikhalano mwaana awiichaniwa Opeti, yoowo ohoolo waya aakhanle amunnawe Mwene Tavite.—Rut. 4:17.

¹² Mwaanyiherye ohakalala Nawomi aareiyeno vaavaa aamuteexeiye Opeti ari nikwiya, ni opaka nivekelo nookhumela vathi va murima amuthamalelaka Yehova! Nyenya echu yoophwanelela wa yaawo ti yeeyo enoorwa muhoolo. Vaavaa eneeraaya eviihiwe mookhwani, awo anahaala osuwela wi Opeti aari mmuyareriwo wa makholo a Mesiya, yoowo aalaiheryiwe, Yesu Kristu!

13. Echu taani yoochuneya nnaweryaahu ohuserya orweela mu yaweereya ya Nawomi ni Rute?

¹³ Yeeyo nnahuseryaahuvo. Vaavaa nnahoolelaahu makacamiho nnamukhala awuukhuwa ophiyerya wiiniwa murima. Akhweya nnanwerya  wuupuwela wi makacamiho ahu heni emale. Mweelukuluku ntoko seiha nnaphwanela omuroromela tiithi ahu a wirimu ni okhala awaacameleya wa anna ni arokora ahu a mmulokoni. Mweeparipari, Yehova hani aviihevo makacamiho ahu. Ntoko yootakiherya, Yehova haaviihale mookhwani iyawe Nawomi ni anamwane awe. Nyenya owo onahaala onikhaviherya ovilela, akhweya orweela wa osivela woororomeleya yoowo onooniheryiwa ni emusi ahu yoomunepani.—Masi. 17:17.

14. Ntakhara heeni Muleevi mmoha aareiye ookhulumuwa?

¹⁴ Namarepa a Salumu 73, aari Muleevi. Mwawiihiiha, owo aahikhalano ekari ya orumeela mu nipuro nenlo Yehova aalapeliweiyemo. Naamwi hiihaa, mweelukuluku ekina owo aahikhala awuukhuwa mookumini. Ntakhara heeni? Owo ahipacerya waakhalela nrima achu oonanara murima, ni awiirumiha, ohiya nthowa na meecelo aya oonanara, nyenya nthowa nawi ichu saanaweecela phaama mookumini ompwaha yene. (Sal. 73:2-9, 11-14) Awo yooneya ntoko wi aakhalano ichu soothene—okumi woohakalaliha, muhakhu, okumi waphaama nave wi hiyaari awuukhuwa. Vaavaa Muleevi oonneiye yeela, owo aahikhala awuukhuwa nave aaloca wi: “Keelihale murima aka mahaleene, ni onyawiha matata oocheka!” Chiryene, ela yaahaala omweeriha omaala omurumeela Yehova.

15. Mwawiiwanana ni Salumu 73:16-19, 22-25, ti mwawiihai Muleevi omurempe Salimu yoola aareiye ookhulumuwaxa?

¹⁵ Mwaalakhanye Salumu 73:16-19, 22-25. Muleevi “aahivolowa mu empa ya Muluku.” Ari mu Empa ya Muluku, mummo aareiyemo ni alapeli a Yehova akina owo aahikhala oomaaleleya, uupuwela phaama, nave avekela vooloca sa mukhalelo awe. Ntoko yookhumelela, owo aahipacerya woona wi muupuwelo awe, waari woololo yoowo waahaala weeriha wi onanarihe onthamwene awe ni Yehova. Owo tho aahisuwela wi oonanara murima ‘anakuhiwa wootherenyavo’ nave tho wi anahaala “omalihiwa khuluwi ni sawoopiha.” Wi ahiye waakhalela akina nrima ni ohikhala ookhulumuwa, mulipa a masalumu Muleevi, aaphwanela woonaka ichu mmukhalelo Yehova onooneiye. Vaavaa owo eenreiyeno yeeyo, aahikhalano murecele wanaawiili, ni okhala oohakalala. Owo aaloca: “Kakhala ni [Yehova] nkinchunaru echu ekina mu elapo ya vathi.”

16. Tiheeni nnahuseryaahu orweela wa Muleevi mmoha?

 ¹⁶ Yeeyo nnahuseryaahuvo. Nihirwe naakhalele nrima achu oonanara murima yaawo onooneya wi ichu sinnaweecela phaama. Ohakalala waya ti wa elukuluku vakhaani; nave heni ekhale ni okumi okhala wookhala. (Ekle. 8:12, 13) Wakhala wi ninnaakhalela nrima yaawo nnamukhala ookhulumuwa nave tho nnahaala onanariha onthamwene ahu ni Yehova. Mwawiihiiha, wakhala wi munnoona wi munnaakhalela nrima achu oonanara murima, mweereno echu emohamoha yeeyo Muleevi eenreiye. Mwiiwelele ikano soosivela sa Muluku, nave mpake onthamwene ni yaale aneerano yookhwela ya Yehova. Vaavaa munamusivelaanyu Yehova opwaha echu vyakala munahaala okhalano ohakalala weeparipari. Nave munahaala ophwanya “okumi weeparipari.”—1 Tim. 6:19.

17. Mathowa taani yaamweeriha Petru okhala ookhulumuwa?

¹⁷ Murummwa Petru aari mulopwana akuru; nave mu ilukuluku ikina owo aanaakuvela oloca echu vyakala yeeyo yaarwa mmuupuweloni mwawe. Ntoko yookhumelela, ikwaha ikina owo aanapaka naari oloca echu yeeyo yaahaala omweeriha okhalano ekeerelani. Ntoko yootakiherya, vaavaa Yesu aaleenleiye arummwa wi aahaala ohooxeya ni okhwa, Petru aahimusamela ariki: “Yeyo herwa yophatxuwela.” (Mat. 16:21-23, BNM) Voocharela, Yesu aahimookolola Petru. Vaavaa muloko waaruulaaya wi omphare Yesu, Petru aahipaka echu ahuupuwelenle, akwasa naaru na kapuro a mutokweene a anamukucho. (Yoh. 18:10, 11) Wanaawiili, Yesu aahimookolola tho Petru. Mwawaaceererya, Petru aahiirumiha wi vaavaa arummwa yaahaalaaya omuhiya Yesu, owo haahaala weerano yeeyo! (Mat. 26:33) Nyenya wiiroromela wawe, waahimala moorweela wa owoova achu nave Petru aahimukhooca Pwiyawe mu ikwaha raru. Ari ookhulumuwa vatokovene, Petru “aaya okhwipi, ananla ni osoosiwa murima.” (Mat. 26:69-75) Owo aaniikoha waakhanle wi Yesu aahaala omulevelela yoowo.

18. Yesu aamukhavihenrye hai Petru ovootha okhulumuwa wawe?

¹⁸ Nyenya Petru, heemerenrye wi okhulumuwa  wawe, ommaalihe omurumeela Yehova. Imanle ovira soohesa seiha, owo aahititelela omurumeela Yehova. (Yoh. 21:1-3; Saw. 1:15, 16) Tiheeni yaamweerinhe okookela okhala oohakalala? Owo aahuupuwela wi Yesu aahivekela woopaceryani wi nroromelo na Petru nihiceecheye, nave Yesu aahimuceenyerya Petru wi akooke nave aalipihe asinnawe. Yehova aahaakhula nivekelo nenle nookhumela vathi va murima. Ohoolo waya, Yesu aahirwa wa Petru, moohikhwa minikwa wi amulipihe yoowo. (Luka 22:32; 24:33, 34; 1 Kor. 15:5) Arummwa emanle ototha ohiyu woothene ni okhala ooceecheya, Yesu aahirwa wa yaawo. Mu elukuluku yeele, Yesu aahimvaha Petru ekari ya omuleela ophiyerya mweeryo taani owo aamusiveleiye. Yesu aahimukhurumuwela nthamwene awe oosiveliwa nave aahimvaha muteko mukina.—Yoh. 21:15-17.

19. Salumu 103:13, 14 onanihusiha eheeni vooloca sa mukhalelo Yehova onooneiye soocheka sahu?

¹⁹ Yeeyo nnahuseryaahuvo. Mukhalelo Yesu aamukhalinheiye Petru ennooniherya wi owo ta ikharari, nave tho wi Yesu aahimutakiherya tiithi awe. Mwawiihiiha, vaavaa nnapakaahu soocheka hannaphwanela wiithoriha nuupuwelaka wi Yehova hani anikhurumuwele. Muupuwele wi Satana onachuna wi nikhaleno moonelo ntoko yoowo. Ohiya wiithoriha, nnaphwanela wuupuwela moopwacha mukhalelo Yehova onanisiveleiye, mukhalelo onaniwexexeiye, mukhalelo onanisiveleiye—nave wi onnachuna onikhurumuwela mwawiihiiha nnaphwanela omutakiherya yoowo vaavaa akina anannyeenyeihaaya.—Mwaalakhanye Salumu 103:13, 14.

20. Tiheeni nnahaalaahu othokororya mmwaha onacharela?

²⁰ Yootakiherya ya Yosefe, Nawomi ni Rute, Muleevi ni murummwa Petru ennanihakararya wi “Apwiya ari vakhiviru va yaawo oothanana.” (Sal. 34:18) Owo onneemererya wi nihooxeye ni makacamiho ni okhala ookhulumuwa mu ilukuluku ikina. Moohikhwa minikwa, vaavaa nnahoolelaahu makacamiho ni okhumelela phaama nnikhaviheryo na Yehova, nroromelo nahu ninnalipa. (1 Ped. 1:6, 7) Mmwaha onacharela, nnahaala othokororya mukhalelo Yehova onaakhaviheryeiye alapeli awe oororomeleya yaawo anakhulumuwa, akhweya nthowa na ohiphaameya waya naari nthowa na mikhalelo saya soovila.