Mu aminutu oopacerya makhumi mathanu nammoha nikwiya nikhumme va nrupo nooyara, enakhala elukuluku yookhweleya ya wiikhoveleliha. Ntakhara heeni? Nthowa nawi nimakelo nenlo asimai anakhalaayano ni makwiyaaya variyari va aminutu yaala ookhweleya ennakhaviherya vancipale okhala phaama ni wunnuwa wa anaaya. *

Tiheeni enamweeriha mai osivelasa nikwiya nawe? Muhusiha amwaamuthiyana a esikola ya vasulu Jeannette Crenshaw, yoowo orino mavyakelo awaathokororya areca, olonce wi, muthiyana amanle oyara, onnakhalavo waaceereryeya wa hormônio oxitocina yoowo “onatannya miyoonelo sa asimai elukuluku mai onatannyeiye, onooneiye ni onaamwiheiye nikwiya nawe.” Hormônio mukina onakhumelela mu elukuluku yeeyo, “onnamukhaviherya mai opwacha nikwiya nawe” nave onnaaceererya waataana wawe ni mwanawe. Ntakhara heeni ela eryaaya yookhweleya?

Nimakelo noolipa variyari va mai ni nikwiya muteko wa Mpatusa ahu oosivela, Yehova Muluku. * Mwene Tavite oolonce wi ti Muluku, ‘omvihale mmirimani mwa amannya’ nave amukhapelela phaama mmiwononi mwa amannya. Owo aahivekela: “Kiri annyu ovinya mmirimani mwa amai; ovinya mmirimani mwa amai, nyuwo mwa Muluku aka.”— Salumu 22:9, 10.

NKUUPUWELANI: Muluku oopatuxa nimakelo noolipa variyari va mai ni nikwiya nawe, eerihaka wi mai amusiveleke mwanawe, ampwacheke nave amukhapeleleke. Mwa yeeyo, nnaphwanela ororomelatho wi Muluku onnamuthokororya mmoha ti mmoha a hiyo; woona wi nri “óyariwa ti Muluku.”— Saweriwa T’arummwa 17:29, NN.

Yesu yoowo omusuwenle phaama Mpatuxa opwaha muchu mukina, ooloca: “Hinakulihiwa ipalame pili ni ikhorowa vakhani? Nto hiyavo epalame emoha mano enawereya omorela vathi, Atithinyu ehikhwenle. Ennakhalatho mìhi a mmuruni mwanyu àhalikhanyiwa. Vawi hiha muhòveke, wona wi nyuwo munnakhweleya opwaha ipalame sawatxa.”—Mateu 10:29-31.

Achu vakhaani tanathokororya epalame ti epalame ekhaani anoonaaya. Nave hanasuwela wakhala wi emoha ya yeeyo yoomorela vachayani. Nyenya Tiithi ahu awirimu onnathokororya emoha ti emoha! Nave wa Muluku, achu tookhweleyasa opwaha ipalame sincipale. Nihusiheryo ti nookwakwaleya: muhikhwe minikwa wi Muluku onnoothokororyaani wa yeeyo munahoolelaanyu. ‘Muhoove’, Muluku onnoothokororyaani vancipale!

 Piipiliya onnanroromeliha

• “Apwiya annona mapuro othene, annona miteko s’atxhu òrèra murima ni ònanara murima.”—MASIPOSIPO 15:3.

• “Mitho a Apwiya àrukunuwela wa awokololowa; iwaru saya sinnawiriyana okhuwela waya.”—SALUMU 34:15.

• “Kinnahakalala ni kinnatxhapa mukhararini mwanyu; nyuwo mohona ohitxa waka, mòsuwela othanana waka.”—SALUMU 31:7.

Apwanne yookhala enatorokeya osuwela wi Muluku onnanthokororya, onnanisivela nave onnampwacha mmoha ti mmoha a hiyo? Mweeparipari yookhala! Muthiyana mmoha oniichaniwa Hannah, * o Inklatera, onnathariha:

“Ikwaha sincipale, koona wi Yehova haakisivela nave wi mavekelo aka hiyaakhuliwa. Kuupuwela wi eyo yeereya hiiha nthowa nawi kaarino nroromelo vakhaani. Koona wi nkaari ookhweleya wa Muluku, mwa yeeyo owo aanakilaka nave aanakihiya okhwipi. Koona wi Muluku haakipwacha.”

Vano Hannah onnaroromela wi Muluku onnamusivela nave onnampwacha. Ntakhara heeni otoronkeiye moonelo awe? Owo onnathariha: “Vakhaani vakhaani kootoroka mukhalelo aka wa wuupuwela. Kinnuupuwela mwaha wa Piipiliya kiiwalaaka iyaakha sincipale muculi vooloca sa mukucho wa woopola opakiwe ni Yesu. Mwaha owo wootannya murima aka nave wookikhaviherya ororomela wi Yehova onnakisivela. Nave vaavaa mavekelo aka yaakhuliwaaya, ikwaha sincipale kaanapacerya winla, woona wi eyo yaanooniherya wi chiryene Yehova aanakisivela. Ohiya yeeyo, omuhuserya Piipiliya ni oya mmithukumano Seekristu moohihiyererya yookikhaviherya ohuserya sincipale vooloca sa Yehova, mikhalelo sawe ni moonelo awe vooloca sa hiyo. Vano kinnasuwela mookwakwaleya wi mweeparipari Yehova onnanisivela nave onnachuna vancipale omuthokororya mmoha ti mmoha a hiyo.”

Yeeyo Hannah olonceiye ennatannya murima ahu. Nyenya muni muroromele hai wi Muluku onniiwexexa miyoonelo sanyu nave wi onnathokororya? Mwaha onacharela onahaala waakhula nikoho nenla.