1, 2. Ntakhara heeni Muluku aamukhooca Sawuli? (Moone eruku yoopacerya.)

ELUKULUKU Yehova aamuthanlileiye Sawuli okhala mwene, owo aari awiiyeviha. (1 Samuwele 9:1, 2, 21; 10:20-24) Nyenya amanle okhala mwene, owo aahikhala awiisoona. Mu ekwaha emoha, macikhwi a Afilisti yaarwa wi ewane ni Aisarayeli. Mulipa a miririmu Samuwele aahimuleela Sawuli wi aahaala orwa wi avahe mukucho wa Yehova. Nyenya, Samuwele ahaakumve ophiya, Aisarayeli yaanoova nave ancipale yaamuhiya Sawuli. Opwaha onweherya Samuwele, owo aahivaha mukucho. Sawuli haarino ophwanelela weerano yeeyo, nave Yehova haasiveliwe.—1 Samuwele 13:5-9.

² Vaavaa Samuwele aaphin’yeiye, aamuthoriha Sawuli woona wi haamwiiwelenle Yehova. Nyenya Sawuli huupuwenle wi aapaka echu yoonanara. Owo aaheererya wiisaakiha, nave aaphiyerya owootherya akina yoocheka awe. (1 Samuwele 13:10-14) Ovinyerya vaavaa, Sawuli aanapaka ichu sincipale sooniherya wiisoona. Mwawiihiiha Yehova aamukhooca okhala mwene. (1 Samuwele 15:22, 23) Okumi wa Sawuli waapacenrye  mwaphaama nave waakuchunwe moothananiha.—1 Samuwele 31:1-6.

3. (a) Tiheeni achu ancipale anuupuwelaaya vooloca sa wiiyeviha? (b) Makoho taani nnahaalaahu waakhula?

³ Achu ancipale olelo anoona wi hanawerya okhala awiiyeviha nave mu elukuluku emohamoha ekhumelele phaama mookumini. Anniirumiha wi taphaama waapwaha akina. Ntoko yootakiherya, mulamuleli mmoha aaloca: “Wiiyeviha tahi echu enaphariheleya wa miyaano mmukhalelo vyakala—kinoona wi herwa yeereya.” Vano, ntakhara heeni wiiyeviha ti wookhweleya wa Mukristu? Wiiyeviha tiheeni, nave ohiiyeviha tiheeni? Mmwaha yoola, nnahaala waakhula makoho yaala. Nave onacharela, nnahaala woona mukhalelo nneeraahu ntitelele okhala awiiyeviha vaavaa onakhalaaya woovila weerano.

4. Wiisoona tiheeni?

⁴ Piipiliya onnooniherya wi wiisoona onnavuhana ni wiiyeviha. (Mwaalakhanye Masiposipo 11:2.) Tavite amveka Yehova: “Mulapeli anyu ahikhale awisona.” (Salumu 19:14) Wiisoona tiheeni? Weera echu nihilamuleliwaahu opaka, akhweya nthowa na ohivilela naari wiirumiha. Ikwaha ikina oothene ahu ninnapaka echu mwawiisoona woona wi naachu oohiphaameya. Nyenya ntoko nihusenryaahu orweela wa yootakiherya ya Mwene Sawuli, wakhala wi yookhovelelaahu, Yehova harwa ahakalala. Salumu 119:21 olonce wi Yehova onahaala ‘owopopiha atxhu awisòna.’ Ntakhara heeni onneerano hiiha?

5. Ntakhara heeni wiisoona yoocheka etokotoko?

⁵ Yoopacerya, wakhala wi noopaka echu mwawiisoona, hinnooniherya ncicimiho wa Yehova, Muluku ni Mulamuleli ahu. Yanawiili, vaavaa nnapakaahu echu nihiraahuno ophwanelela, nnahaala otannya owanawana ni akina. (Masiposipo 13:10) Nave yaneeraru, nnahaala okhala ntoko mulolo vaavaa akina eneeraaya esuwele wi noopaka echu mwawiisoona. (Luka 14:8, 9) Chiryene, nohoona ntakhara heeni Yehova onachuneiye wi nikhale awiiyeviha.

6, 7. Wiiyeviha onavolowela eheeni?

⁶ Muchu awiiyeviha haniisoona, nyenya onawoona akhweiye ntoko atokweene ompwaha yoowo. (Filipi 2:3) Muchu awiiyeviha onnacicimiherya phaama osuwela ni saweera sawe, onnasuwela soocheka sawe, nave onneemererya sooleeliherya ni miruku mivyaani. Mwawiiyeviha onnamuhakalaliha Yehova.

⁷ Mpiipiliyani, wiiyeviha tho onataphulela okhalano ncicimiho noophwanelela vooloca sa hiyo ni osuwela okotakota wahu. Mu elocelo yoopacerya vooloca sa nsu nenla, echu enacicimiheryiwa ori mukhalelo wa osuwela onaphwanela ovolowela meecelo ahu vooloca sa akina.

8. Wi ntitelele okhala awiiyeviha, muupuwelo taani nnaphwanelaahu osepa?

⁸ Mweeparipari nnampacerya wiikusererya naamwi nihisuwelaka. Eyo eneereya hai? Akhweya nnampacerya woona wi nri  ookhweleya waapwaha akina nthowa nawi hiyaano naari yaale naasuwenlaahu phaama aakhalano mirici mmulokoni. (Aroma 12:16) Naari nnampacerya wiicicimiha vancipale. (1 Timóteo 2:9, 10) Akhweya nnampacerya waaleela akina echu anaphwanelaaya opaka ni ohipaka.—1 Korinto 4:6.

9. Ntakhara heeni akina yaahikhala a wiisoona? Mvahe yootakiherya

⁹ Nnampacerya wooniherya meecelo a wiisoona wakhala wi hinnavareryela soochuna sahu soonanara. Ancipale yaahikhala awiisoona nthowa nawi yaachuna ocicimihiwa, waakhalela akina nrima, naari hiyaavareryela esara aya. Echu yeela yaaheereya ni akina yaawo analociwa Mpiipiliyani, ntoko Apsaloni, Osiya, ni Napukotonosori. Yehova aahooniherya vanlakani wi yaaphwanela okhala awiiyeviha.—2 Samuwele 15:1-6; 18:9-17; 2 Matharihelo 26:16-21; Daniyeli 5:18-21.

10. Ntakhara heeni hinnaphwanela othoriha moonelo wa akina? Mvahe yootakiherya.

¹⁰ Anamukhalavo mathowa makina anaweeriha achu ohikhala awiiyeviha mu ikwaha ikina. Nkuupuwelani sootakiherya vooloca sa Apimeleki ni Petro. (Maphatxuwelo 20:2-7; Mateu 26:31-35) Apwanne alopwana yaala yaari awiisoona? Naari wi awo hiyaasuwela soothene saavolowela naari yenreno ehipacenrye wuupuwelela? Woona wi hinnawerya osuwela murima, hiyaano hinnaphwanela othoriha moonelo wa achu akina.—Mwaalakhanye Tiyako 4:12.

11. Tiheeni nnakhwelaahu wiiwexexa?

¹¹ Muchu awiiyeviha onniiwexexa murici awe mmarehereryo a Muluku. Yehova, Muluku ooreheryeya. Onnamvaha murici muchu ti muchu a mmulokoni. Oothene ahu naachu ookhweleya. Yehova onnamvaha muchu ti muchu a hiyo samahala soohiyana, mavyakelo, osuwela, naari meerelo, nave onnaneemererya othanla mukhalelo wa opharihela. Wakhala wi nri awiiyeviha, nnahaala opharihela soovaha seiyo mmukhalelo Yehova onachuneiye wi nipharihele. (Aroma 12:4-8) Noosuwela wi Yehova onaweherya wi nipharihele samahala seiyo wi nimucicimihe yoowo ni waakhaviherya akina.—Mwaalakhanye 1 Petro 4:10.

12, 13. Tiheeni nnaphwanelaahu wuupuwela wakhala wi ninnakumana ni matorokelo mu omurumeela wahu Yehova?

¹² Yeeyo nnapakaahu mmuteko wa Yehova moovira wa elukuluku enamutorokeya. Ntoko yootakiherya, nkuupuwelani matorokelo mancipale Yesu aakumanneiyeno. Woopaceryani, aari meekheiye ni Tiithi awe. (Masiposipo 8:22) Voocharela, aamukhaviherya Yehova waapaka ankeelo, erimu, elapo yavathi, ni achu. (Kolosi 1:16) Ohoolo waya, aamurumiha veelaponi yavathi. Aayariwa ntoko mwaana oomuchu nave unnuwa. (Filipi 2:7) Amanle okhwa, Yesu aakookela wirimu, nave mu 1914 aahikhala Mwene a Omwene wa Muluku. (Ahebri 2:9) Nave omwaahiyu, amaliha olamulelo awe wa iyaakha ncikhwi nimoha, Yesu onahaala omukookiherya Yehova Omwene, nave “Muluku onamukhala sothene mwa othene.”—1 Korinto 15:28.

¹³ Hiyaanotho nnamukumanano matorokelo mancipale muukumini mwahu. Ikwaha ikina mirici sahu inamutorokeya nthowa na soolakelela sahu. Ntoko yootakiherya, akhweya na aciye nave voocharela nnamulakelela othela, ni okhalano anamwane. Vakina vaya nnamulakelela opaka matorokelo wi niwerye omurumeela Yehova mmuteko  wa elukuluku yoothene. Ikwaha ikina mirici sahu inamutorokeya nthowa na mikhalelo sahu. Nnanwerya opaka sincipale mmuteko wa Yehova, naari opaka vakhaani. Nyenya moohipwacha naakhanle amiravo naari awunnuwelavo, naarino ekumi yaphaama naari hooye, Yehova oosuwela mukhalelo muchu ti muchu ahiyo oneereiye amurumeele owo phaama. Yehova hanaweherya sincipale wa hiyo opwaha nnaweryaahu opaka. Nave onnatepa ohakalala wa yeeyo nnapakaahu ntakhara yoowo.—Ahebri 6:10.

14. Wiiyeviha oni onikhaviherye hai oohakalala ni murici vyakala?

¹⁴ Yesu aanahakalala ni mirici soothene Yehova amvaheiye, nave hiyaanotho nnaphwanela okhala oohakalala ni mirici sahu. (Masiposipo 8:30, 31) Muchu awiiyeviha onnahakalala ni mirici sawe mmulokoni. Owo hanateteiwa ni yeeyo akina anapakaaya. Opwaha yeeyo, onnahakalala ni murici awe mmarehereryo a Muluku. Onnasuwela wi murici awe onarweela wa Yehova. Muchu awiiyeviha tho onnaacicimiha akina nave onnasiveliwa waakhaviherya. Onnasuwela wi Yehova onnaavaha tho murici.—Aroma 12:10.

15. Tiheeni nnahuseryaahu wa yootakiherya ya Kiteyoni?

¹⁵ Kiteyoni yootakiherya yaphaama ya wiiyeviha. Vaavaa Yehova aamurummeiye wi awoopole Aisarayeli wa Amitiya, Kiteyoni aaloca: “Nloko naka ti nomaliherya veri va maloko a Manasse, nave miyano kiri òyeva a vetxhekoni ya atithi aka.” (Amuthoriha 6:15) Nyenya Kiteyoni aahimuroromela  Yehova nave aaheemererya murici. Voocharela aaheeravo echu wi iwexexe yeeyo Yehova aachuneiye wa yoowo nave aamveka Yehova ohoolela. (Amuthoriha 6:36-40) Kiteyoni aari akuru ni oolipa murima, nyenyatho aari amiruku ni awiikasopa. (Amuthoriha 6:11, 27) Ohoolo waya, vaavaa achu yaachunaaya wi akhale muhooleli aya, owo aakhooca. Amanle opaka yeeyo Yehova aamvenkeiye wi apake, aacimula aya akhala owannyawe.—Amuthoriha 8:22, 23, 29.

16, 17. Muchu awiiyeviha onannuwa hai omunepani?

¹⁶ Wakhala wi muchu oheemererya murici muvyaani naari onnachuna opaka sincipale mmulokoni, eyo henataphulela wi owo tahi awiiyeviha. Piipiliya onaloca wi ti yaphaama kapuro a Yehova ochuna waarumeela annawe woopwahaxa ni wunnuwa omunepani. (1 Timóteo 4:13-15) Nyenya, apwanne nnachuna okhalano murici muvyaani wi nunnuwe omunepani? Hooye. Oothene ahu nnaphwanela otitelela orehererya omuchu ahu Weekristu ni mavyakelo Yehova onanivaheiye wi niwerye omurumeela phaama ni waakhaviherya akina.

¹⁷ Ahaakumve weemererya murici vyakala, muchu awiiyeviha onnasuwela yeeyo enahaala oweheryiwa wa yoowo. Onnavekela vooloca sa yeeyo nave onnuupuwelela waakhanle wi onahaala owerya opaka muteko owo. Apwanne onahaala okhalano elukuluku yoophwanelela ni ikuru wi apake ichu ikina sookhweleya? Wakhala wi hooye, apwanne aakhalavo achu akina anahaala opaka muteko onapakeiye? Muchu awiiyeviha, amanle wuupuwelela vooloca sa yeela onanwerya olakelela weemererya naari oheemererya murici muvyaani. Wakhala wi naachu awiiyeviha, onamuchuneya oloca hooye.

18. (a) Muchu awiiyeviha tiheeni onapakeiye vaavaa onavahiweiye murici muvyaani? (b) Aroma 12:3 onanikhaviherya hai okhala awiiyeviha?

¹⁸ Yehova onachuna wi ‘niyevihe vamithoni’ vawe. (Mikeya 6:8) Mwawiihiiha vaavaa nnavahiwaahu murici muvyaani, ninnaavya ohoolela wawe nave ninnamveka wi anikhaviherye, hiiha ntoko Kiteyoni enreiye. Nnaphwanela wuupuwelela mwawiiseela yeeyo Yehova onanleeleiye moorweela wa Piipiliya ni marehereryo awe. Hankooni nuupuwele wi echu vyakala nnaweryaahu opaka mmuteko awe tahi nthowa na mavyakelo ahu, nyenya nthowa nawi Yehova tawiiyeviha nave ori ooreheryeya wi anikhaviherye. (Salumu 18:36) Muchu awiiyeviha harwa ‘isona opwaha mukhalelo awe.’—Mwaalakhanye Aroma 12:3.

19. Ntakhara heeni ninnaphwanela okhala awiiyeviha?

¹⁹ Muchu awiiyeviha oosuwela wi Yehova meekheiye tonaphwanelela ncicimiho noothene, nthowa nawi Mpatusa ni Toowerya Woothene wirimu ni veelaponi yavathi. (Wupulula 4:11) Wakhala wi nri awiiyeviha, nnahaala ohakalala ni yeeyo nnapakaahu mmuteko wa Yehova. Nnahaala ocicimiha moonelo ni muupuwelo wa anna ni arokora ahu, nave ntoko yookhumelela oothene ahu nnahaala okhala awiiwanana. Muchu awiiyeviha onnuupuwela mwawiiseela ahaakumve opaka echu vyakala, nave mmukhalelo yoowo onnasepa opaka yoocheka etokotoko. Yehova onnahakalala vancipale ni yaale ari awiiyeviha. Ni mathowa yaala, wiiyeviha echu yookhweleyaxa wa achu a Muluku. Mmwaha onacharela, nnahaala woona mukhalelo nneeraahu ntitelele okhala awiiyeviha vaavaa onakhalaaya woovila weerano.