Makupa a Nikhami. Nikhami nnakawanyeya mmakupa maxexe oopacerya—ikolopulo soophilivila, ikolopulo saweela, ipalaketa, ni epalasma. Ntoko yootakiherya, ikolopulo soophilivila yookhalano eproteina eniichaniwa hemoglobina. Ichu sinakhalano hemoglobina enarweela wa achu naari axinama sinnaphariheliwa wi elooliweno areca awiipelana naari muchu oyeleenle nikhami

Epalasma—erino 90 porsento a maahi—yookhalano macikhwi a hormônios, ichu ihirino ikumi, enzimas, ni ichu sinavaha nikhami, ophitaanyerya minerais ni suukari. Epalasma tho yookhalano (coagulação) ichu sinarehererya nikhami, eproteina, ntoko albumina ni ifrasau sinawaniha ireca. Wakhala wi muchu ookhalano ereca vyakala, akhweya alipa a murece anammurepela wi ahommwe ni enxesau ya gamaglobulina oviihiwe mu Epalasma ya achu ahirino ireca. Ikolopulo Saweela sinnawerya okhala mathipelo a interferons ni interleucinas sinaphariheliwa wi ilooliweno ireca sa ovarihana ni kanser.

Apwanne Akiristu annaphwanela weemererya olooliwa onavolowela makupa a nikhami? Piipiliya hanathariha mookwakwaleya, mwawiihiiha muchu onaphwanela opaka yoolakelela awe vamiithoni va Muluku mwawiiwanana ni yawuupuxerya-ya-murima awe. Ancipale annalakelela okhooca makupa oothene a nikhami, yuupuwelelaka wi nlamulo na Muluku wa Isarayeli naanaloca wi awo yaaphwanela ‘oyeeheryaka vatxhayani’ nikhami  nikumihiwe mu mwaaxinama. (Malamulo 12:22-24, BNM) Akina naamwi eweryaka okhooca ovahiwa nikhami noothene naari makupa a yaawo, akhweya anneemererya ovahiwa mirece sinavolowela nikhami. Awo akhweya annuupuwela wi nikhami nimanle okawanyiwa ninnahiya weemelela okumi wa muchu naari wa mwaaxinama.

Vaavaa munapakaanyu yoolakelela vooloca sa makupa a nikhami, muthokororye makoho anacharela: Kinneemererya wi okhooca makupa oothene a nikhami enataphulela oheemererya mirece sinaphitaanyerya nikhami wi kilooleno ereca naari okhaviherya orehererya wa nikhami wi kimalihe okhuma nikhami? Kinahaala osuwela othariha ntakhara heeni kihinachunaaka opharihela makupa a nikhami?

Meerelo a Othaliwa. Enaphitaanyerya hemodiluição ni recuperação intra-operatória de células. Mu hemodiluição, nikhami ninnakumihiwa mmwiilini, nave nraceelihiwa ni expansores de volume (echu enakhapelela nikhami) nave voocharela nikookiheryiwa wa mureca. Mu Recuperação intra-operatória de células nnakuxiwa nikhami nnayeeheya variyari va othaliwa vookuchula nikookiheryiwa wa mureca. Mmukhalelo yoola ninnakuxiwa nikhami nnarweela va nikhwaca naari makupa makina a mwiili, neelihiwe naari nri naphaama vano nikookiheryiwe wa mureca. Woona wi mukhalelo wa opharihela malakiheryo yaala toohiyana wa totoro ni totoro, Mukiristu onaphwanela osuwela vooloca sa yeeyo owo onuupuweleiye.

Vaavaa munapakaanyu yoolakelela vooloca sa makhalelo yaala, mwiikohe: ‘Wakhala wi nikhami nooveihiwamo mmwiilini mwaka  nave nookukuciwa weeceeca, yawuupuxerya-ya-murima aka enahaala okeemererya woona nikhami nlo ntoko naaka, ohikhala woochuneya ‘oyeeherya vatxhayani’? (Malamulo 12:23, 24, BNM) Apwanne yawuupuxerya-ya-murima aka evyakihiwe ni Piipiliya yaahaala okihooxa wakhala wi variyari va ovareryiwa ni mulipa a murece nikhami naka nooveihiwamo, nreheryiwa nave nikookiheryiwa mmwiilini mwaka? Kinnasuwela wi okhooca makhalelo anavolowela nikhami naka kinnakhooca wiiwelela  ovareryiwa wa nikhami ni oloola ntoko hemodiálise naari maakina a murima ni masaso?’

Mukiristu onaphwanela olakelela mukhateiye mukhalelo nikhami nawe nnahaalaaya ophariheliwa variyari va othaliwa. Emohamoha ennaphariheliwa wa ovareryiwa ni totoro ni olooliwa wahiihaanoru onavolowela ovihiwamo nikhami vakhaani, akhweya nreheryiwaka mmukhalelo mukina, nave nikookiheryiwa woorweela wa esirinka.