Na ngoi mɛndó lo ge lɛ sese, Yezo fandó songo ti kpengbani na azi, lo lindó ni gba nvɛ̃ni ka tɛ azi mɛ awa yɛrɛ nga na awa pɛnɔ. (Matie 9:36) Lo hɛ̃ndó dungɔ lɛ ngɛ̃́ tɛ lo na lo ti nzɔ̃ kpale tɛ azi mɛndɛ̃. (Matie 20:28; Yoanɛ 15:13) Angbã yakere lo na fangɔ songo tɛ lo fãni mɛndɛ̃ na lo tɛ azi na ndenge mɛ lo na salelangɔ ngunu mɛ lo na ni ngama Gbia ti Lo-lengɔ Gbia tɛ Nzapa so onzingɔ yɛrɛ na ndo lɛ gigi zu.

 Ngbangɔ tɛnɛ ngaso na lo ti aye mɛ Yezo na lingɔ:

•   “Zia ya, lo du na mbage tɛ wa yɛrɛ, wa lo samba ngbanga na lo tɛ ala ka popo tɛ azi ti kɔdɔrɔ, zia ya lo so ayati awa yɛrɛ na kwá.”—Nzembo 72:4.

 Ngasia la elengbi ti hɛ̃ngɔ Yezo sia kɔli na lo ti aye mɛ lo li na lo tɛ e na aye mɛ lo na lingɔ na lo tɛ e nɛ? Kaya mbeti ti Luka 22:19, Yezo pandó hɛ̃ ava lo ya, ala ndo da bɛ la na bi ti kwá tɛ ni. Na lo ni la, na bulu olo, na landangɔ bi mɛndó lo kpi na ni, Atɛmwɛ tɛ Yehova ti ndo lɛ gigi zu na lingɔ bombi so dangɔ bɛ la na bi ti kwá tɛ lo. E ili mɔ na dengɔ bɛ zu ya, mɔ ga e li bombi ti dangɔ bɛ na bi ti kwá tɛ Yezo na bi nzɛ ti 24/03/2024.

Ba ndo mɛ e na dangɔ bɛ e na bi ti kwá tɛ Yezo