1. Tiri kuda kunangenyi patinoshandisa gama ro kuti “cokwadi”?

“MAKAZIVISA kudini cokwadi?” “Makabarihwa mu cokwadi here?” “Muno makore mangana muri mu cokwadi?” Zvingathuka zvaita kuti makambovhunjiswavo kudaro kana kuti imwimwi makamboitiravo ari wese muvhunjo iji. Tiri kuda kunangenyi ngo gama ro kuti “cokwadi”? Kazinji, tinoshandisa gama iri tecida kubhuya ngo pamusoro po zvatinotenda, manera atinonamata Mwari no manera atinorarama. Vandhu vari “mu cokwadi” vanozviziva zvinojijiswa ngo Bhaibheri, cimwenizve vanorarama mukuzwirana no ndhungamiro jaro. Inga muviyo, vanosujunuhwa ku manyepo o zviyara zve vano upenyu unodakajisa hwo kuti mundhu acizivi kukwana anohuwana.​—Johani 8:32.

2. Mukuzwirana na Johani 13:34, 35, zvicinyi zvinoita kuti mundhu adakarire maningi cokwadi?

² Zvicinyi zvakamuita kuti mudakarire cokwadi? Kangaije wainga mugariro wakanaka wo Zvapupu zva Jehovha. (1 Pedru 2:12) Kana kuti wainga rudo hwavanahwo umwe kuno umweni. Vazinji vakapsaswa maningi, asipi ngo zviro zvinojijiswa ku musongano, asi ngo rudo hwo vakavona wo hama. Izvi azvitikahamaji, ngokuti Jesu wakananga kuti vajiji vake vaizozivikanwa ngo rudo hwavanahwo ku umwe na umwe wavo. (Verenganyi Johani 13:34, 35.) Asi rudo andiwopi unoita kuti rutendo hwedu huvange, asi pano zvimweni.

3. Zvicinyi zvingaitika kudari rutendo hwedu kuna Mwari wakacijikira basi pa rudo hwatinahwo no hama?

³ Rutendo hwedu auvhiri kuva wakacijikira pa rudo hwo ciKristu uri pakati po vandhu va Mwari. Ngenyi? Amborangariranyi basi hama iri mu ungano kangaije iri mukuru kana piyona yoita cishaishi cikuru. Kana umwe wo mu ungano yenyu  wo munyangajisa kana hama yosiya kutenda yonanga kuti atina cokwadi, maizoitenyi? Kunanga kuti maizokhugunyika, mosiya kushandira Jehovha here? Zvinosisira maningi kuceujira zviro izvi: Kuva no rutendo takacijikira pamusana po vamweni kuciripi pa ushamwari hwedu na Jehovha, rutendo hwedu auzovi wakavanga. Mazwiro amunova nawo ngo pamusoro pa Jehovha no vandhu vake anozomundundira kuti musakurire rutendo mbhera pakati kuti. Asi ciro cimweni cinosisirazve maningi, ngo co kunasa kujija Bhaibheri, kuzwisisa zvamunojijaro no kupsakisisa kuti muve no cokwadi co kuti zvamuri kujijaro ngo pamusoro pa Jehovha ndizvona. Imwimwi munodikana kujikhohwesa kuti Bhaibheri rino cokwadi ngo pamusoro pa Jehovha.​—VaRoma 12:2.

4. Mukuzwirana na Mateu 13:3-6, 20, 21, zvicinyi zvinoitikira vandhu vamweni pavanoejwa rutendo hwavo?

⁴ Jesu wakabhuya ngo pamusoro po vandhu vaizoashira cokwadi ngo “kudakara,” asi vaizoruza rutendo hwavo pavaizoejwa. (Verenganyi Mateu 13:3-6, 20, 21.) Zvingaita kuti ivona avazivi kuzwisisa kuti kutevera Jesu kunobatanija kuhwisana no zvineso. (Mateu 16:24) Kangaije ivona vairangarira kuti upenyu hwo muKristu aucaizova no matambujiko kana kuti Mwari aacaizotendera kuti ivona vasangane no zvineso. Asi mu nyika iyi icizivi kukwana, tese tinozosongana no zvineso. Cinjo jimweni jinotiitikira mu upenyu hwedu, jinotiita kuti tiruze mudakaro pa mukuvo wakati kuti.​—Nduyo 6:6; Mucumaeri 9:11.

5. Ngenyi tingananga kuti hama zinji no hambzaji ajikani-kani kuti jawana cokwadi?

⁵ Hama zinji no hambzaji jedu avakani-kani kuti vawana cokwadi. Ngenyi tingananga kudaro? Ngokuti apana cingaphingaija kukhohwa kwavo, pikija Mukristu akavanyangajisa kana akaita zviro zvicikadikani kuitwa ngo MaKristu. (Nduyo 119:165) Ciejo ciri cese cinosangana no hama iji cinoita kuti rutendo wo hama iji urambe wecivanga. (Jakobo 1:2-4) Zvicinyi zvingamubesera kuti rutendo hwenyu huvangevo kudaro?

6. Rutendo hwo Makristu okutanga waicijikira papi?

⁶ Rutendo hwo maKristu okutanga wainga wakacijikira pa “bzokadi bzo vangeri,” kana kuti waicijikira mu uzivi wovainga nahwo wo matahwa no jijiso ja Kristu. (VaGalàsia 2:5) Cokwadi ici, cinoumbhwa ngo zvese zvinotendiwa ngo MaKristu, kubatanijavo no muripo wa Jesu Kristu no kumuswa kwake. Mupostori Pauro, wainga no cokwadi co kuti jijiso ijo jainga jokadi kamare. Ngenyi? Ngokuti iyena waishandisa matahwa kuti avonese kuti ngo pamusoro po zvainga zvakatahwa ‘Kristu waidikana kutambujika no kumuka mu kufa.’ (Maitiro o Vapostori 17:2, 3) MaKristu okutanga aitendera jijiso iji, cimwenizve iwona aithemba besero ro mujimu mucena kuti vazwisise Soko ra Mwari. Ivona vaijija kuti vave no cokwadi co kuti jijiso iji jainga jakacijikira mu Matahwa. (Maitiro o Vapostori 17:11, 12; Vaheberi 5:14) Rutendo hwo Makristu aya aucaicijikira pa mazwiro, cimwenizve ivona avacaishandira Jehovha ngokuti vaidakarira maningi kuva no vashandiri vamweni va Mwari. Kusiyapo izvo, rutendo hwavo wainga wakacijikira “mu uzivi [hwokadi] hwa Mwari.”​—VaKolosi 1:9, 10.

7. Kuva no rutendo wakacijikira mu Bhaibheri zvinozotibesera kuti tiitenyi?

⁷ Cokwadi co Bhaibheri acizocinji. (Nduyo 119:160) Inga muezaniso, cokwadi acizocinji, kudari mundhu mu ungano akatinyangajisa kana akaita cishaishi cikuru. Pikija patinosongana no zvineso, icona acizocinji basi. Ngokudaro, tinodikana kuziva ushoni jijiso jo Bhaibheri no kukhohwa kuti ijona ngo jokadi. Rutendo wakacijikira mu Bhaibheri unozotibesera kucijikira patinosongana no muejo.  Ihwona unozoita inga nanga inoita kuti ngarava irambe yakacijikira panonga paciitika dutu. Zvicinyi zvamungaita kuti muengejere kukhohwa kwenyu kuti muno cokwadi?

8. Mukuzwirana na 2 Timoti 3:14, 15, zvicinyi zvakakhohwesa Timoti kuti iyena wainga no cokwadi?

⁸ Timoti waikhohwa kuti wainga no cokwadi. Cicinyi cakamukhohwesa? (Verenganyi 2 Timoti 3:14, 15.) Icokwadi co kuti waiziva “matahwa a Mwari” ngo besero ra mai wake no ra mbiake. Asi atikani-kani kuti iyena waidikana kupeja nguva no simba rake kuti ajije matahwa aya. Inga muviyo, iyena ‘wakadavira’ kuti matahwa ainga o cokwadi. Pakufamba ko mukuvo, Timoti, mai wake na mbiake vakajijira ngo pamusoro po jijiso jo Cikristu. Pacina kukana-kana, zvingaita kuti Timoti wakashamaisika maningi ngo rudo wainga no vateveri va Jesu, zvokuti waitoda kugara no hama jo Cikristu no kujibesera. (VaFilipi 2:19, 20) Zvakaita kuti rutendo hwa Timoti huvange asipi mazwiro aainga naiwona ku vandhu, asi ijijiso jokadi jakamukhohwesa kuti ave shamwari ya Jehovha. Pamunoverenga Bhaibheri, nasanyi kurangarijisisa ngo zvamajija ngo pamusoro pa Jehovha. Izvi zvinozomubesera kuti zviya zvarinojijisa ngo pamusoro pa Jehovha ngo zvokadi.

9. I zvokadi zvapi zvitatu zvinotiita kuti tikhohwe?

⁹ Cokutanga, ivanyi no zvokadi zvinokwana kuita zvitatu zvinomukhohwesa. Cokutanga: Jehovha Mwari, Musiki wo zviro zvese. (Exodo 3:14, 15; Vaheberi 3:4; Apokalipsi 4:11) Cocipiri: Bhaibheri, karata inovha kuna Mwari kuitira vandhu. (2 Timoti 3:16, 17) Cocitatu: Jehovha ano cikwata co vanamati vakarongeka vanotungamirihwa ndi Kristu, cikwata ici ndi Zvapupu zva Jehovha. (Isaia 43:10-12; Johani 14:6; Maitiro o Vapostori 15:14) Kuti mukhohwe ngo zvokadi zvitatu izvi, azvinangi kuti munodikana kuziva zvese ngo pamusoro po Bhaibheri. Cinangwa cenyu cinodikana kuva co kuda kushandisa murangariro wenyu kuti muve munokhohwa kuti imwimwi muri mu cokwadi.​—VaRoma 12:1.

10. Pasure po kukhohwa ngo cokwadi, ngozvapi zvatinodikana kuita?

¹⁰ Pakupera kukhohwa ngo zvokadi zvitatu ngo pamusoro pa Mwari, po Bhaibheri no vandhu vake, ngozvapi zvatinodikana kuita? Tinodikana kushandisa Bhaibheri kuti tikhohwese vamweni ngo pamusoro po zvokadi izvi. Ngenyi? Inga Makristu, tino mutoro wo kujijisa vamweni zvokadi zvotakajija. * (1 Timoti 4:16) Patinoeja kukhohwesa vamweni cokwadi ici co Bhaibheri, rutendo hwedu hunoenderera mberi wecivanga.

11. Tinotevejeresa kudini Pauro patinojijisa ari wese?

¹¹ Mupostori Pauro paaijijisa vamweni, iyena waipsaka kuvakhohwesa ngo “njio ya Jesu, ngo mazwi o mupango wa Mosi no Matahwa o vaporofeti.” (Maitiro o Vapostori 28:23) Tingatevejeresa kudini Pauro? Patinonga tecijijisa, tinodikana kuita zvizinji kupinda kuvavhunja basi zvinonangwa ngo Bhaibheri. Tinodikana kubesera vajiji vedu vo Bhaibheri kuti varangarijisise zviri mu Matahwa. Atidi kuti ivona vatendere cokwadi ngokuti vanotireremeja. Itusu tinoda kuti ivona vakhohwe pacavo kuti zvavanojija ngo pamusoro pa Mwari wo rudo ngo zvokadi kamare.

12-13. Vabari vangabeseresa kudini vana vavo kuti vaenderere mberi vari mu cokwadi?

¹² Kudari imwimwi muri baba kana mai, pacina kukana-kana munoda kuti vana venyu varambe vari mu cokwadi. Kangaije mungarangarira kuti, kudari vana venyu vakawana shamwari jaushoni mu ungano ivona vangazoenderera mberi ku divi ro umwari. Shamwari jaushoni ajikwani kuti jikhohwese vana venyu kuti ivona vari mu cokwadi. Ivona vanodikana kuva no ushamwari na Mwari, cimwenizve, vokhohwa kuti zvavanojija mu Bhaibheri i zvokadi.

¹³ Vabari vanodikana kuita zvizinji, kuciripi basi kujijisa vana vavo cokwadi ngo pamusoro pa Mwari. Munodikana kugaja muezaniso wo kuva vajiji vaushoni vo Bhaibheri. Vabari vanodikana kuwana mukuvo wo kurangarijisisa ngo zvese zvavanojija. Vakaita izvi, vanozokwanisa kujijisa ushoni vana vavo. Vabari vanodikana kujijisa vana vavo mashandisire avangaita mathurusi o kujija Bhaibheri inga zvovaizoita no vajiji vavo vo Bhaibheri. Vakaita kudaro, vanozobesera vana vavo kuti vade Jehovha no kugonda njira yaanoshandisa kuti tiashire zvokuha zvokumujimu, “muranda wakagondeka no wakangwara.” (Mateu 24:45-47) Vabari, munodikana kuita zvizinji kuciripi basi kujijisa vana venyu zviro zvakareruka zvo Bhaibheri. Vajijisenyivo zviro ‘zvakajika zva Mwari,’ mukuzwirana no makore ovanawo no zvavanokwanisa kuita. Mukaita kudaro, munonga mecivabesera kuti rutendo hwavo huvange.​—1 VaKorinto 2:10.

14. Ngenyi tinodikana kujija ngo zviporofita zvo Bhaibheri? (Vonanyivo bhokiso rinoti: “ Munokwanisa Kusanangura Zviporofita Izvi?”)

¹⁴ Zviporofita zvo mu Bhaibheri i divi rinosisira maningi ro Soko ra Mwari. Izvona zvinoita kuti rutendo hwedu kuna Jehovha urambe wakavanga. Zviporofita zvapi zvinovangisa maningi rutendo hwenyu? Kangaije mungakasika kurangarira ngo pamusoro po ciporofita cinobhuya ngo pamusoro po “njiku jokupejisira.” (2 Timoti 3:1-5; Mateu 24:3, 7) Asi zviporofita zvapi zvimweni zvakakwanirisika zvingavangisa rutendo hwenyu? Inga muezaniso, mungakwanisa kusanangura manera ozvakakwanirisa no manera o zviri kukwanirisika zviporofita zvinowanika mu bhuku ra Danieli cipauko 2 na Danieli cipauko 11? * Rutendo hwakacijikira mu Bhaibheri wakavanga maningi. Amborangariranyi ngo muezaniso wakasiiwa ngo hama jo ku Aremanya jakateverehwa pa Hondo yo Cipiri yo Nyika Yese. Ivona avacainasa kuzwisisa ushoni zviporofita zvo Bhaibheri zvinobhuya ngo pamusoro po njiku jo kupejisira, asi ivona vainga no rutendo hwakavanga mu Soko ra Mwari.

15-17. Tinozvizivisa kudini kuti jijo yo Bhaibheri yakavangisa hama jedu jaingaya jakasungwa ngo vanazista?

¹⁵ Mukuvo wo kuti Aremanya yaitongwa ngo vaNazista, zviuru zvo hama no hambzaji jedu vakaendeswa ku ndau inodihwa vasungwi. Hitler na chefi wo SS, Hainiriki Himura, vaivenga Zvapupu zva Jehovha. Hambzaji imweni yakananga kuti Himura wakavhunja hambzaji jimweni jainga ku ndau yo vasungwi, kuti: “Jehovha wenyuwo anotonga inoo, kudenga, asi pasi pano apa, panoti itusu! Wari tinoda kumukhombijira kuti ndiyani anozorarama pa mukuvo wakareba, ndimwi kana kuti ndisu!” Zvicinyi zvakabesera vandhu va Jehovha kuti varambe vakagondeka?

¹⁶ Vajiji ava vo Bhaibheri vaizviziva kuti Umambo hwa Mwari hwainga hwatanga kutonga mu gore ro 1914. Kuteverehwa kwiya akuzivi kuvakahamaja. Ivona vainga vano cokwadi co kuti akuna utongi hwo vandhu waizophingaija Jehovha kuti aite zvaanoda. Hitler aacaizopeja  kunamata kokadi, cimwenizve aacaizokwanisa kuumba utongi hwakavanga maningi kupinda Umambo hwa Mwari. Hama jedu jainga jino cokwadi co kuti, ngo njira iri yese, utongi hwa Hitler waizoguma kumbhiri.

¹⁷ Kuthemba ko hama no hambzaji jiya kaicijikira pari pese. Utongi wo nazista auzivi kutora mukuvo wakareba maningi ucitonga. Hainiriki Himura mwanarume wakanangaya kuti “pasi pano apa, panoti itusu” wakatodikana kutiza kuti aponese upenyu hwake. Paaitiza wakaenda kowanana no mundhu waaiziva: hama Lübke, avo vainga vakambosungwa. Himura ecizvivona kuti wanyiswa, wakavhunjisa hama Lübke kudari: “Waro mujiji wo Bhaibheri zvicinyi zvinozoitika?” Hama Lübke vakadavira kuti Zvapupu zva Jehovha zvaiziva kuti utongi hwo nazista waizonjaka zvokuti ivona vaizosujunuhwa. Himura, waingaya akabhuya zviro zvakashata ngo pamusoro po Zvapupu zva Jehovha wakatama co kunanga pa mukuvo wondhowo. Pasure po kusongana no hama iyi, Himura wakajikaka. Tinojijenyi? Tinojija kuti, kujija Bhaibheri, kubatanijavo zviporofita zvaro, zvingavangisa maningi rutendo hwedu no kutibesera kuti tirambe takavanga patinosongana no zvineso.​—2 Pedru 1:19-21.

18. Mukuzwirana na Johani 6:67, 68, ngenyi tinodikana kuva no “hwiru no uzivi [hwokadi]”?

¹⁸ Zvecivoneka kuti rudo i mugariro unotivonesa inga Makristu okadi kadi, tese tinodikana kuukhombija. Asi tinodikana kuva no “hwiru no uzivi [hwokadi].” (VaFilipi 1:9) Tikatama kudaro, atizonesehwi kutohwa ngo “mbhepo iriyese yo majijisiro, nokuti vandhu vakasungwa ngo urimbhwi nokuti ngo ungwaru hwo vandhu” kubatanijavo vapanduki. (VaEfeso 4:14) Mu zana ro kutanga ro makore, vajiji vamweni povakasiya kutevera Jesu, mupostori Pedhru wakananga no kuthemba kwese kuti Jesu wainga no “mazwi o uhomi hucingaperi.” (Verenganyi Johani 6:67, 68.) Pikija aacaizwisisa kamare kuti mazwi ao aibatanijenyi, Pedhru wakaenderera mberi wakagondeka ngokuti waizwisisa cokwadi ngo pamusoro pa Kristu. Ngo iyo ndava, vangisanyi kuthemba kwenyu ngo pamusoro po jijiso jo Bhaibheri. Mukaita kudaro, rutendo hwenyu unozokwanisa kucijikira muejo uri wese, cimwenizve, munozokwanisa kubesera vamweni kuti vavevo no rutendo hwakavanga.​—2 Johani 1, 2.