BABANGU va Artur, vainga vari mujaha anoda maningi Mwari, ngo iyo ndava vakava no cido co kuva mupostori wo gerejha Metodhista. Asi vakacinja murangariro wavo pavakaverenga mabhuku o Vajiji vo Bhaibheri zve votanga kusonganira navo. Mu gore ro 1914, pavainga no 17, vakabhabhatijwa. Mukati mo Hondo yo Kutanga yo Nyika Yese, vakasanwa kuti vaende ku usoca, asi vakaramba. Ngo kudaro, vakatongehwa gumi ro mweji vari mujeri ku kadheya yo Khingistoni, ku Ontario, Kanadhaa. Pavakasujunuhwa, vakava kolportori, madanijihwe aiizwa piyona kareko.

Mu gore ro 1926, vakacadha na Hazel Wilkinson. Mai wake vainga vakajija cokwadi mu gore ro 1908. Ndakabahwa mu njiku 24 ya Nyahwiriri wo 1931, zve ndakava mwana wo cipiri pa vana vavo varongomuna. Babangu vaida zve vaireremeja Bhaibheri, zve vakatijijisavo kuita kudaro. Kunamata Jehovha cainga ciro cinosisira maningi mu upenyu hwedu. Nguva jese taicumaera muzi ngo muzi, pamwepo inga mbhuri.—Maitiro o Vapostori 20:20.

Mu gore ro 1939, yakatanga Hondo yo Cipiri yo Nyika Yese. Pa gore rakazotevera, basa ro Zvapupu zva Jehovha ku Kanadhaa rakarambijwa. Vana vo kucikora vaidikana kukuja bandera no kuimba ino nasionari. Kazinji, vajijisi vaitendera kuti inini no hambzaji yangu Dorothy, tibude kunja pa nguva yazvaiitwa zvondhozvo. Asi njiku imweni, mujijisi wangu wakaeja kundipseruja ngo kundibvunja kuti ndiri mundhu anothya. Notapera kujija, vajiji doni vangu vazinji vakatanga kundirova no kundiwisira pasi. Izvi zvakaita kuti ndivange maningi pa civaringo cangu co “kutenda Mwari” kana kumuzwira inga mutongi “kupinda vandhu.”—Maitiro o vapostori 5:29.

Mu mweji wa Khunguru wo 1942, pandainga no makore 11, ndakabhabhatijwa mu tanki yaiwanika mu imwe ndau yairimwa mbeu no kurehwa zvinyama. Ndainga no mudakaro wo kushanda inga piyona pondaibuda feria ku cikora. Nyamasi uno upiyona uwu, unodanijwa upiyona wo besero. Gore rimweni, inini no hama jimweni ndhatu takaenda ka njikazi ko Ontario, ku ndau inotemehwa mathimba, kocumaera.

Pa njiku yokutanga yo mweji wa Mauwe wo 1949, ndakatanga upiyona wo nguva jese. Pakufamba ko nguva ndakakokwa kobesera pa basa ro kuvaka ku hofise yo cine yo ku Kanadhaa zve ndakazova umwe wo mbhuri yo Bheteri. Ndakagajwa kushanda mukudhindha mabhuku, ndimona mondakajijira kushanda no mucini wokudhindha. Ndinoceukijira kuti ndakapeja mabviki akawanda ndecishanda usiku hwese ndecibesera kudhindha taratadho yainanga ngo pamusoro po kuteverehwa ko vandhu va Jehovha ku Kanadhaa.

Pasure pazvo, ndakazoshanda ku Bauhwa ro Basa. Ndakagajwa kuti ndibvunjise mapiyona aienda kooshanda ku Kebheki, kwainga kweciteverehwa maningi Zvapupu. Umwe wo mapiyona ondhoo wainga Mary Zazula waibva ku Edhimontoni, Arbherta. Vabari vake vainamata Gerejha Ortodhokso. Mary na nyavanji wake pavakaramba kuregera kujija Bhaibheri, vabari vavo vakagogomera pa muzi. Vovaviri vakabhabhatijwa mu mweji wa Nyaonga wo 1951, zve nopapera mweji mutatu vakatanga kuita basa ro upiyona. Pandainga ndeciita mubvunjo Mary, ndakakwanisa kuvona kuti iyena waida maningi Jehovha. Ndicaceukija pandainga ndecirangarira kuti iyena wainga musikane wandaizoda kurovora. Pasure po mweji mutandhatu, takaita mucadho mu njiku 30 ya Zvita wo 1954. Nopapera bviki rimwe no tarovorana, takakokwa kuti tiende korovejwa mu basa ro kufambira ndharaundha. Pa makore maviri akazotevera, takashanda mu basa ro kufambira ndharaundha ku Ontario.

 Basa ro kucumaera parainga recienderera mberi pasi pese, kwaidiwa mamisionario akawanda. Inini na Mary takarangarira kuti kudari inga zvataikwanisa kurarama ku Kanadhaa, mu nguva yo kutondhora zve kwainga no mutunga jinonyangajisa mu cirimo, waro taizorarama pa mugariro uri wese, wo kotaizotumihwa. Takaenda kojija pa turma yo ci 27 yo Cikora co Giriadhi zve takapeja mu mweji wa Khunguru wo 1956. Mu mweji wa Cikowe tainga taa ku muzi wedu mupsa—ku Bharaziri.

Patakaguma ku Bharaziri, takatanga kujijira ciPutukezi. Takatanga ngo kujija njira jakareruka jokutangisa mabhuyo. Tevere, takadira mu musoro magama o kucumaera ko kuezanisira no marevhista. Perepo, takaenda kocumaera tosongana no mwanakaji wakadakarira masoko edu. Tainga takasunga kuti kudari ariwese akakhombija kudakarira, taizomuverengera vhesi imwe inonanga ngo upenyu pasi po Umambo hwa Mwari. Ngo kudaro, ndakaverenga Apokalipsi 21:3, 4—pasure pazvo ndakazirika! Ndainga ndicizivi kurovejana no mugariro wo kupisa. Kupisa kwakaramba kuri cineso kwandiri.

Tainga takagajwa kushanda inga mamisionario ku dhorobha ro Kampos. Wari uno, kondhono kwaano ungano 15. Asi patakagumeyo kwainga no cikwata cimwe basi caizvivonerera cega pomwe no muzi umwe wo mamisonario wainga no hambzanji murongomuna: Esther Tracy, Ramona Bauer, Luiza Schwarz, na Lorraine Brookes (wari wodanijwa Lorraine Wallen). Basa rangu pa muzi wo masionario, rainga ro kubesera kupaja no kupsaka huni. Pa cimwe ciposa co usiku, notapeja Jijo yo Murindiri, Mary wainga akakwatama pa sofaa akacamira mucago. Taitobhuya hedu ngo mafambiro akaita njiku yedu. Mary paakandomuka kudari, pakabuda nyoka kubva pasi po mucago wiya! Nyoka iya yakava vizita yaticaivetera, yakatikanjamusa maningi zvokuti ndakajipana nayo, mbhera kakuiuraya.

No papera mweji ndecijija ciPutukezi, takatanga basa ro kufambira ungano. Takashanda mu ndharaundha jicainga no marujhu. Taivatira pa zvitheve zve taifamba ngo mahaci no ngoro. Bvaza imweni takapakira citima kwenda ku dhorobha rimweni raiwanika ku matundhu, kuitira kocumaera ndharaundha imweni yo ndhambo. Notaguma takarugari kwaratu. Hofise yo cine yakatitumira 800 o marevhista kuti tishandise mu basa ro kucumaera. Takafamba bvaza jakawanda kwenda kwaakagumiraro kuitira komathwara.

Mu gore ro 1962, kwakaizwa Cikora co Mushando wo Umambo mu ndau jakasiyana-siyana ku Bharaziri. Ndakagajwa kufamba ndeciitisa cikora ici pa mweji mutandhatu. Ndakajijisa ku Manaus, Bhereem, Fortareza, Resife, zve ku Sarvhadhori. Paindainga ku Manaus, ndakaronga gungano ro mutundhu raizoitihwa ku ndau imweni yaiitihwa mutambo, yainga no nduma maningi. Zvecivoneka kuti nvura yainga yecina maningi, kumwa yo kumwa yakacena yainga shoma maningi, zve akucainga no ndau yakanaka kuti hama no hambzaji jigare pa nguva yokuha. Ndakabhuya no umwe mutungamiriri wo masoca ngo pamusoro po cineso cedu. Ngo kunaka mwoyo, iyena wakatipekeja kumwa yo kumwa inokwana kuitira kushandisa pa gungano rese. Iyena wakatumiravo masoca kuti anasirire matende akazoshandiswa kuitira kubikira no kuhira.

 Nguva yandainga ndicipo, Mary wakacumaera ku ndau imweni yo kuti akuna waida kubhuya ngo zvo Bhaibheri. Kwaigahwa ngo vandhu vakabva Portugari kuviya ku Bharaziri koopsaka mare. Mary wakasuruvara maningi ndizvona wogumira pa kunanga kudari: ‘Nyika yandaida kupejisira kurarama pasi pano ndi Portugari.’ Nopadarika mukuvo mushomani, takaashira karata. Yainga yokutikoka kuti tiende koshandira Portugari, kondhono basa ro kucumaira rainga rakarambijwa. Mary wakakaruka maningi ndizvona! Asi takatendera kugajwa uku zve takacinja kwenda ku Portugari.

Takaguma Risbhowa, Portugari, mu mweji wa Katutu gore ro 1964. Maphorisa o cifishe-fishe ainesa maningi hama jedu kondhoyo. Ngo kudaro takavona kuva zvo ungwaru kutama kupsaka kuno Zvapupu zva Jehovha, pakutanga. Pa kutanga, takarungaru kwaratu. Patakawana maphaso o vanoraramira nyikanja, takarungari nyumba. Pasure po mweji mushanu, mugariro wakazotendera kuti tidavijane no hama ku hofise yo cine. Takadakara maningi ngo kuti tainga tokwanisa kwenda ku musongano.

Zvecivoneka kuti basa redu rainga recirambiswa, Nyumba jo Umambo jainga jakafungwa zve musongano jaiitihwa mujinyumba jo hama. Muzi jo hama nguva jese jaisecwa-secwa ngo maphorisa. Mazana o hama no hambzaji jedu jaitohwa kwenda ku maphorisa koitwa mubvunjo. Maphorisa aivashupa no kueja kuvavangirija kuti vadure mazina o hama jaitungamirira. Ngo kudaro kuitira kubvikirana umwe kuno umweni, hama jakasiya kudanijana ngo mazina o kupejisira joshandisa mazina okutanga basi.

Cido cedu cainga co kuva no gwinyiso ro kuti hama jedu jive no mabhuku aizojibesera kuramba jecicungirira. Mary waitara Murindiri pa umwe mukhaindi wo phepha. Phepha rondhoro rainga no maretera o kuti akapendwa, ocatihwa pa phepha rimweni aikhopa masoko osara phepha racatihwaro, ngokudaro raishandiswa kuitira kuita khopi jakawanda kuitira hama.

Mu mweji wa Nyaonga wo 1966, kwakatongwa ndhango inosisira maningi mu banje ku Risbhowa. Hama jese jo Ungano yo ku Fejó, jaikwana kuita 49 jakapumbhwa kuti jaiita musongano mu mamuzi mo vamweni. Jicito jahwisana no muejo uwu, ndakatanga ndajinasirira. Pa kunasirira kodhoko, inini ndaiita inga ndiri adhovogadho ari kueja kuvonesa kuti hama jiya jainga no ndava. Asi inga zvataivetera, takaruza razawe. Hama jese no hambzaji jaikwana kuita 49 jakapeja nguva yakawanda jiri mu jere, vamweni vakapeja 45 o njiku, vamweni vakapeja mweji mushanu no padoko. Asi muejo uwu wakapa ucapupu wakakura maningi. Zvokadi, adhivhogadho wedu wakatonanga magama a Gamarieri anonangwa mu Bhaibheri. (Maitiro o Vapostori 5:33-39) Pasure pazvo, vazivisi vo masoko vakatokotesa ndava yedu. Takadakara maningi patakavona adhovhogadho wedu paakatanga kujija Bhaibheri na itusu no kuviya ku musongano.

Mu mweji wa Mbuji wo 1966, ndakagajwa inga muvonereri wo hofise yo cine, ndaipeja nguva yakawanda ndecishanda no shwiro jo zvo mutemo. Takaita zvese zvataikwanisa kuitira kuvonesa kuti, pa mutemo,  Zvapupu zva Jehovha zvaidikana kunamata zvakasujunuka ku Portugari. (VaFilipi 1:7) Pa kupejisira, mu njiku 18 ya Mbuji wo 1974, takatendehwa pa mutemo. Hama Nathan Knorr na hama Frederick Franz vakaviya kubva ku cine ro pasi pese kuviya kuzodakara nesu. Takava no mutengo wo vapurutani ucizivi kumbovonekazve ku Porto no ku Risbhowa wo 46.870 o vandhu.

Jehovha wakaitavo kuti basa ro kucumaera rigumire ku zvirundu zvaibhuiwa ciPutukezi, kwakadari inga Asores, Kabho Vherdhe, Madheira, zve Sau Tomee i Prinsipe. Mutengo wo Zvapupu zva Jehovha pawainga weciengejeka mu ndau iji, kwakava no dikano yo kuengejera cine. Norapera kuvakwa, Hama Milton Henschel vakaviya kuzoita hurukuro yo kupira pa njiku 23 ya Nyahwiriri wo 1988. Pakava no hama no hambzaji jaikwana kuita 45.522, kubatanijavo vamweni 20 vainga vakambova mamisionario ku Portugari asi vakaviyira musongano wondhowo.

Ko makore, inini na Mary zvokadi takajijira kubva ku muezaniso jo vakagondeka. Inga muezaniso, inini ndakamboshanda na Hama Theodore Jaracz, pa imwe vhizita yo zona, zve ndakajijira ciri cese. Pa cine rotakabvakaciraro painga no cineso cakakura maningi. Hama jo dare ro cine jainga jaita zvese zvajaikwanisa kuti jibesere. Jainga jicizivi kudakara ngo kuti ajizivi kukwanisa. Ngo kudaro hama Jaracz vakavatondhoja ngo kudananga kudari: “Wari i nguva yo kupa mukana mujimu mucena kuti ushande.” Zve andikanganwi magama akanangwa ndi Hama Franz pa makore akapinda, inini na Mary patakabvakacira ku cine ro pasi pese ku Brokrini. Vamweni pa cikwata cedu vakavakumbira zano, ivona vakatibvunja kudari: “Zano rangu nga iri: Rambanyi makabatana no sangano rinovoneka ra Jehovha mu nguva jakanaka no jakashata. Ndirona basi riri kuita basa rakapekeja Jesu vajiji vake ro kucumaera masoko akanaka o Umambo hwa Mwari!”

Kuita kudaro kwakaita kuti inini na Mary tive no mudakaro. Zve tino zvakawanda zvatiri kuceuja patainga tecibvakacira hofise jo cine kutendere pasi pese. Taidakarira maningi kusongana no vashandiri va Jehovha vo mupira jakasiyana-siyana no kuvavangisa kuti basa ravo rinoreremejwa maningi ndi Jehovha. Nguva jese taivavangisa kuti varambe vecishandira Jehovha.

Padarika makore akawanda maningi zve tovaviri tiri mukati mo 80 o makore. Mary anondoneseka-neseka. (2 VaKorinto 12:9) Zve takava no zvineso zvimweni. Asi izvona zviri kutovangisazve gonda redu no kutiita kuti titeme civaringo co kuramba takagondeka kuna Jehovha. Tikasota sure ko makore atakapeja tecishandira Jehovha, tinovona kuti iyena ari kutikomborera ngo unyasha hwake hucikatifaneri ngo njira jakawanda kamare. *—Vonanyi masoko o pasi.