KUITIRA MAJAHA NO VASIKANE
11: Kushanda ngo Simba
KUNOREVENYI?
Vandhu vanoshanda ngo simba avarembi-rembi pa kushanda. Kusiyapo zvondhozvo, ivona vanotodakara ngo kushanda kwavo no simba kuti vakwanise kujisapota no kubesera vamweni. Ivona vanotoita zvondhozvo, pikija basa rakona aritoshamaisi maningi.
NGENYI ZVINOSISIRA?
Mu upenyu itusu tinodikana kushanda. Vandhu vakawanda avadakariri kushanda ngo simba. Asi kudari muri mundhu anoshanda ngo simba zvinozomubesera.—Mucumaeri 3:13.
“Ndakavona kuti, kudari ukashanda ngo simba, unodakara no kuva wakagajana. Izvi ndizvona zvakandibesera kuti ndidakarire kushanda. Kuva mundhu anoshanda ngo simba, kunozomubesera kuti muve no zina rakanaka.”—Reyoni.
BHAIBHERI RINOTI: “Mu mixando yese muno kubeswa.”—Mazwi Akangwara 14:23.
ZVICINYI ZVAMUNGAITA?
Kuita zviro zvinoteverari kunozomubesera kuti muve mundhu anodakarira basa.
Jijanyi kuita ushoni zviro. Azvinenyi dangani muri kubasa, muri kuita basa ro pa muzi kana ro kushikora, zviitenyi ngo mwoyo wese. Pamunonga makwanisa kuita basero, psakanyi manera okuriita ushoni kamare kana ngo kukasika. Pamunonga makwanisa kamare kuita basero, munozoridakariravo maningi.
BHAIBHERI RINOTI: “Vonai mundhu anozwisisa basa rake! Anozopuwa basa ro kuxandira mambo; aazoxandiri vandhu vadoko.”—Mazwi Akangwara 22:29.
Vonanyi kuti basa renyu rinobesera vamweni. Pamunoita ushoni basa renyu, kazinji vandhu vakawanda vanobesereka. Inga muezaniso, pamunoita ushoni basa ro pamuzi, munoita kuti vamweni vatame kuva no basa rakawanda.
BHAIBHERI RINOTI: “Kupekeja kunoviisa mudakaro mukuru kupinda kuashira.”—Mabasa o Vapostori 20:35.
Itanyi zvizinji kupinda zvamavhunjwa kuita. Mukaita kudaro, munonga mecitatija kuti munoziva zvamuri kuita nokutizve amuripi kuita zvakawanda ngokuti mavhunjwa kuti itanyi. Asi ngokuti ndimwi munonga masana mwega.—Mateu 5:41.
BHAIBHERI RINOTI: “Mabasa ako akanaka umaite ngokuda kwako kuciripi ngo kuvangirijwa.”—Firimoni 14.
Ivanyi makaezanana. Vandhu vanoshanda ngo simba avana nungo nee avaitivo ngo kujiuraya ngo ndava yokushanda. Vanodakajihwa ngo kushanda asi veciwanavo nguva yokuzorora.
BHAIBHERI RINOTI: “Bziri nane kuva no njimba mu nyara, no kuzorora; kuciripi kuva no bziro bzizinji, no kutambujika, kweciteverera mbhepo.”—Mucumaeri 4:6.
