1, 2. (a) Icipo capi cinoshamisa caakatipa Jehovha? (b) Jehovha wakatipenyi kuti tive no upenyu unodakajisa?

JEHOVHA wakatipa cipo cinoshamaisa maningi. Cipo ici upenyu. (Genesi 1:27) Iyena anoda kuti tive no upenyu unodakajisa. Ngokudaro Jehovha wakatipa ndhungamiriro jinotijijisa kuti tingatemesa kudini zvivaringo zvakanaka. Tinodikana kushandisa ndhungamiriro iji kuti jitibesere kusianisa “bzauxoni nokuti bzakaxata.” (Vaheberi 5:14) Ngo ndhungamiriro iji, Jehovha anotijijisa kuti tirangarire ngo manera akajeka. Kudari tikapona mukuzwirana no ndhungamiriro ja Mwari zve tovona manera ajinobesera upenyu hwedu, tinozonasa kuzwisisa kuti ijona jinosisira maningi.

² Upenyu ungava unonesa maningi. Pangamuka mugariro wo kuti Bhaibheri arina mutemo wakanasa kujeka wo zvatingadikana kuita. Inga muezaniso, mungadikana kutema zvivaringo ngo pamusoro po marapihwe anobatanija kushandisa ngazi. Tingatemesa kudini zvivaringo zvinozosiya Jehovha akadakara? Asi Bhaibheri rino ndhungamiriro jinotijijisa kuti Jehovha anovona kudini ngo pamusoro po upenyu no ngazi. Tinodikana kuzwisisa ndhungamiriro iji kuti tikwanise kutema zvivaringo  zvaushoni zve zvinotiita kuti tive no hana yakacena. (Mazwi Akangwara 2:6-11) Wari ngativone ndhungamiriro jimweni.

3, 4. (a) Ngazi inorevenyi? (b) Ngoapi mavonero a Mwari ngo pamusoro po ngazi?

³ Bhaibheri rinojijisa kuti ngazi yakacena zve inoreva upenyu. Upenyu hunosisira maningi kuna Jehovha. Izvi tinozvivona apo Kaini paakapera kuuraya hama yake, Jehovha wakamuvhunja kuti: “Ndinozwa izwi ro ngazi yo munukuna wako riri kumimira kondiri kubva mu mabvu!” (Genesi 4:10) Ngazi ya Abheri yaireva upenyu hwake; ngokudaro Mwari paakananga ngo ngazi ya Abheri, iyena wainangira upenyu wake.

⁴ Pakupera ko Ndambi yo munjiku ja Nowa, Mwari wakavhunja vandhu kuti vahe zvinyama. Iyena wakati: “Mucadoha—nyama no mwiha—bzinoti no ngazi.” (Genesi 9:4) Mutemo uwu wakazoshandavo kumubarihwana wese wakazotevera sure ka Nowa, kubatanijavo na itusu. Izvi zvinojekesa kuti kuna Jehovha ngazi inoreva upenyu. Zve itusu tinodikanavo kuvona ngazi ngo maitiro akaezana.—Nduyo 36:9.

5, 6. Mutemo wa Mosi waikhombijisa kudini mavonero a Jehovha ngo pamusoro po upenyu no ngazi?

⁵ Pa Mutemo wakapuwa Mosi, Jehovha wakati: “Mulsraeli wese . . . anoha ngazi, mufumbo uriwese wo ngazi, ndinozonyangajihwa ndi yena, ndozomupeja pakati po vandhu vake. Ngokuti kurarama ko muviri kuri mu ngazi.”—VaLevi 17:10, 11.

⁶ Mutemo wakapuwa Mosi wainanga kuti kudari mundhu akauraya cinyama kuti ahe, waidikana kudururira  pasi ngazi yo cinyameco. Izvi zvaikhombija kuti upenyu hwo cinyameco wahwirijwa ku Musiki waco, Jehovha. (Deuteronòmio 12:16; Ezekieli 18:4) Asi Jehovha aacaiveterepi kuti Vaiziraeri vabudise ngazi yese yo cinyameco. Kudari vakabudisa ngazi mbhera pavaikwanisa, vaizoha nyameyo no hana yakacena. Ngo kuvonesa nderemejo ku ngazi yo cinyama, ivona vaikhombija nderemejo kuna Jehovha, wakatipa upenyu. Mutemo waivhunjazve Vaiziraeri kuti vapire mupiro wo zvinyama kuti varengerehwe zvishaishi.—Vonanyi Masoko o Kupejisira, n.° 19 na 20.

7. Dhavhidhi wakatatijisa kudini kuti waireremeja ngazi?

⁷ Tingavona kusisira ko ngazi ngo muezaniso wakapa Dhavhidhi paaihwisana no Vafiristi. Masoca a Dhavhidhi akavona kuti iyena wainga no nyota maningi, ngokudaro, vakadira upenyu hwavo pa ngozi ngo kunghwina mu akampamento yo vavengi kuti vacere kumwa. Asi pavakapa kumwa iya Dhavhidhi, iyena wakaramba kuimwa “woipopomeja ngo kureremeja Tenji Mwari.” Dhavhidhi wakati: “Tenji Mwari ngaanditambuje kudari ndikamwa kumwa ii: I ngazi yo vandhu vakaponera pa rusio hwo kufa kwavo!” Dhavhidhi waizwisisa kuti upenyu no ngazi zvinosisira maningi kuna Mwari.—2 Samueli 23:15-17.

8, 9. Makristu anovona kudini ngo pamusoro po ngazi?

⁸ Mu nguva jo vapostori, Makristu aacaidikanazve kuita mupiro jo zvinyama. Asi aidikana kureremeja mativi amweni o Mutemo, akadari inga mutemo ngo pamusoro po ngazi. “Muregere kuha . . . rubende,” uwu, wainga divi ro mutemo wa Jehovha waakavhunja vandhu kuti vauteveje. Izvi zvaisisira maningi zvokuti zvaiezaniswa no kutama kuita zvo uhure pomwe no kumamata zvithombi.—Maitiro o Vapostori 15:28, 29.

 ⁹ Izvi ndizvonavo zvinoitwa ngo Makristu mazuva ano. Inga Makristu, tinoziva kuti Jehovha ndiyena Musiki zve zviro zvese zvino upenyu zvinovha kwaari. Tinozivazve kuti ngazi yakacena zve inoimirira upenyu. Ngo kudaro, tinodikana kureremeja ndhungamiriro jo Bhaibheri patinotema zvivaringo ngo pamusoro po marapihwe anobatanija kushandisa ngazi.

10, 11. (a) Zvapupu zva Jehovha zvinovona kudini ngo pamusoro po ngazi kana mativi marongomuna makuru? (b) Ngozvapi zvinodikana kukhetwa ngo Mukristu umwe nga umwe?

¹⁰ Zvapupu zva Jehovha zvinoziva kuti ‘kuregera kuha . . . rubende,’ kana ngazi zvinoda kureva zvizinji kupinda kuha no kumwa. Zvinoreva kutama kudira ngazi mu muviri wedu ngo njira iri yese, zve zvinobatanijazve kutama kupa ngazi kana kuviga ngazi yedu kuti tizoishandisezve pa nguva imweni. Ngo divi rimweni zvinobatanija kutama kuashira mativi aya marongomuna o ngazi: Maserura o kupsuka, maserura o kucena, mapraketa no prasma.

¹¹ Mu marapihwe amweni, mativi marongomuna aya o ngazi anopauhwa-pauhwa kuita zvimativi zvidoko. Mukristu anodikana kushandisa hana yake kuti akhete kuti anotendera mativi awo kana haiwa. Izvi zvinoreva kuti umwe nga umwe anodikanavo kukheta kuti anotendera marapiwe akadari inga, hemodiálise, hemodiluição, recuperação sanguínea, marapiro anoda kuti pashandiswe ngazi yake mundhu kamare, kudari icikazivi kutanga yavigwa.—Vonanyi Masoko o Kupejisira, n.° 21.

12. (a) Ngenyi Jehovha ano basa no zvatinokheta zvakacijikira pa hana jedu? (b) Tingatemesa kudini zvivaringo zvaushoni ngo pamusoro po kurapwa?

¹² Kureva kuti Jehovha ano basa no zvatinokheta zvakacijikira  pa hana jedu? Hina, ano basa nazvo. Jehovha anobatikana ngo zvatinazvo mu murangariro no mu mwoyo. (Verenganyi Mazwi Akangwara 17:3; 24:12.) Ngokudaro, tingatemesa kudini zvivaringo zvaushoni ngo pamusoro po kurapwa? Ngo kukumbira ndhungamiriro ja Jehovha, no kupsakisisa zve kushandisa hana yedu yakarovejwa ngo Bhaibheri kuti titeme zvivaringo. Atizogari tecivhunjisa vamweni kuti vaizoitenyi ngo pamusoro pedu. Zve atidikani kuvangirijwa ngo vamweni patinotema zvivaringo. Ngokuti Mukristu umwe nga umwe “anodikana kuthwara muthwaro wake.”—VaGalàsia 6:5; VaRoma 14:12.

13. Tinojijenyi ngo mutemo no ndhungamiriro ja Jehovha ngo pamusoro po ngazi?

¹³ Zvese zvinotivhunja Jehovha zvinotatija kuti iyena anotida zve anoda kuti tigare ushoni. (Nduyo 19:7-11) Asi atizwiri mutemo iji ngo kuti jinotibesera basi. Tinojizwira ngo kuti itusu tinomuda. Rudo kuna Jehovha hunotindundira kuti titame kudihwa ngazi. (Maitiro o Vapostori 15:20) Kuita izvi kunojivirira uhomi hwedu. Vandhu vazinji nyamasi, vanoziva kuti kudihwa ngazi kunoviisa ngozi ku uhomi, zve varapi vazinji vari kuvona kuti kuceka peresau vacikashadisi ngazi ndiona marapiro akanaka maningi mazuva ano. Izvi zvinojekesa kuti Jehovha ndi Baba vano rudo zve mukuvo wese anoziva zviro zvingatibesera.—Verenganyi Isaia 55:9; Johani 14:21, 23.

14, 15. (a) Ngowapi mutemo wakapa Jehovha kuno vandhu vake kuti avajivirire? (b) Mungatatijisa kudini kuti munoreremeja upenyu?

¹⁴ Nguva jese Jehovha anoneseka ngo vandhu vake.  Izvo tinonasa kuzvivona pa mutemo waakapa vaIziraeri kareko. Inga muezaniso, mutemo umweni wainanga kuti nyumba jaidikana kuva no rusosa pa nyezuru kuitira kuti kutame kuwa mundhu. (Deuteronòmio 22:8) Mutemo umweni waidikana kuitwa no zvinyama. Wainanga kuti mundhu ano n’gombe ino ushungu waidikana kuingwarira kuti itame kukhuvaza mundhu no kumuuraya. (Exodo 21:28, 29) Kudari muIzirari ari wese akatama kureremeja mutemo uu zve mundhu wofa, iyena waizova no ndava yo ngazi.

¹⁵ Ngo mutemo uu tingavona kuti upenyu unosisira maningi kuna Jehovha. Ngozvapi zvatinojija nga izvi? Tinodikana kukhombija kuti tinoreremeja upenyu ngo manera atinotaja muzi wedu no mafambisiro anotinoita karu yedu pomwe no mabungaijo edu. Vandhu vamweni vanoita zviro zvinodira upenyu hwavo pa ngozi ngo kuti vanonanga kuti apana cakashata cinozoitika navo. Asi Jehovha aadi kuti tiite zviro zvakadaro. Iyena anoda kuti titaje upenyu inga ciro cinosisira maningi—izvo zvinobatanija upenyu hwedu no wo vamweni.—Mucumaeri 11:9, 10.

16. Jehovha anovona kudini kuvhisa mimba?

¹⁶ Upenyu wo mundhu umwe nga umwe unosisira maningi kuna Jehovha. Kubatanija upenyu wo mwana aciri mundani. Pamutemo wakapuwa Mosi, kudari mundhu ariwese akakhuvaza mwanakaji ano mimba, mwanakaji kana mwanewo wofa, kuna Jehovha mundhuwo wainga no ndava yo kuuraya. Pikija no zvicikazivi kuitika ngo cabomo, mundhuwo wauraya, ngo kudaro waidikana kuripa uhomi ngo uhomi. (Verenganyi Exodo 21:22, 23.) Kuna Mwari, mwana aciri mundani i upenyu.  Izvi zvinoreva kuti kuvhisa mimba kwakashata. Jehovha anozwa kudini paanovona zviuru no zviuru zvo vana zvecifa ngo ndava yo kuvhiswa ko mimba gore ngo gore?

17. Kudari mwanakaji wakambovhisa mimba acito aziva ngo zva Jehovha angava no cokwadi capi?

¹⁷ Waro zvakadini mwanakaji wakambovhisa mimba acito ajijira cokwadi ngo pamusoro pa Jehovha? Iyena angava no cokwadi co kuti Jehovha angamuregerera ngokuti Jesu wakafira zvishaishi zvedu. (Luka 5:32; VaEfeso 1:7) Kudari mwanakaji wakambovhisa mimba kareko zve wakhauya ngo mwoyo wese ngo zvaakaita, iyena aadikani kuzvipa ndava. “Tenji Mwari wakazara ngo usizi no unaki . . . Inga kumabvazuva kuri ndhambo no kumavirira, ngokudaro anoreesa kotiri bzokuposa bzedu.”—Nduyo 103:8-14.

18. Ngenyi tinodikana kuita zvese zvatinokwanisa kuti tivhite kuzonda?

¹⁸ Kureremeja cipo co upenyu cinovha kuna Mwari zvinobatanija mazwiro atinawo ngo pamusoro po vamweni. Mupostori Johani wakatara kuti: “Ndiani anonyenya hama yake, muurai.” (1 Johani 3:15) Tikatama kungwarira mugariro uu tingaguma pa kuva no cizondo. Kuzonda kungaita kuti mundhu atame kureremeja umweni, kunanga manyepo ngo pamusoro pake kana kutoda kuti afe. Jehovha anoziva zviri mu mwoyo mwedu. (VaLevi 19:16; Deuteronòmio 19:18-21; Mateu 5:22) Kudari tikavona kuti tiri kunyenya ariwese, tinodikana kuita zvese zvatinokwanisa kuti tivhite kuzonda.—Jakobo 1:14, 15; 4:1-3.

19. Ngoapi mavonero a Jehovha ngo pamusoro po ugevenga?

 ¹⁹ Kuno njira imweni yotingatatija ndiyona kuti tinoreremeja upenyu. Pana Nduyo 11:5, Bhaibheri rinonanga kuti Jehovha “anonyenya vaya vanodisa kujipa [kana ugevenga.]” Kudari tikabungaija ngo zviro zvo ugevenga, zvinokhombija kuti tinodisa ugevenga. Atidi kuzaja murangariro wedu ngo magama no mafoto o zviro zvo ugevenga. Kusiapo izvo, tinoda kuzaja murangariro wedu ngo zviro zvakacena zve zvinomusijira runyararo.—Verenganyi VaFilipi 4:8, 9.

20-22. (a) Ngoapi mavonero a Jehovha ngo pamusoro po nyika ya Sathana? (b) Vandhu va Jehovha vangatatijisa kudini kuti avaiti divi ro “nyika”?

²⁰ Nyika ya Sathana aireremeji upenyu, ngo iyo ndava kuna Jehovha nyika iyi ina ndava yo ngazi. Mu makore akawanda, mautongi akauraya vandhu vakawanda maningi, kubatanija no vashandiri va Jehovha. Bhaibheri rinoezanisira mautongi aya no zvinyama zvinothyisa. (Danieli 8:3, 4, 20-22; Apokalipsi 13:1, 2, 7, 8) Nyamasi uno, kutengeswa ko nvuti kuri kupa mare yakawanda maningi. Vandhu vanokhupuka ngo kutengesa nvuti jinouraya zviuru no zviuru zvo vandhu. Izvokadi kuti, “nyika yese yo pasi iri mu nyara ya Sathana.”—1 Johani 5:19.

²¹ Asi Makristu okadi aaiti divi ro “nyika.” Vandhu va Jehovha avanghwiniri mu zvomatongehwe o nyika pomwe no hondo. Zvecivoneka kuti avaurayi vamweni, ivona avabeserivo masangano anouraya vandhu. (Johani 15:19; 17:16) Makristu paanoteverehwa, aahwirijiri ngo zvakashata kana ngo ugevenga. Jesu wakananga kuti  tinodikana kuda vavengi vedu.—Mateu 5:44; VaRoma 12:17-21.

²² Zviara zviri kubeseravo kufa ko vandhu vakawanda. Bhaibheri rinonanga kudari ngo pamusoro po Bhabhironi Guru: “Moriri makawanika ngazi yo vaporofiti no vacena mwoyo, no yo vese vakapihwa mu nyika yo pasi.” Wari makwanisa kuzwisisa kuti ngenyi Jehovha anotivhunja kuti: “Vandhu vangu, budanyi moriri.”? Vaya vanonamata Jehovha avaiti divi ro ciara co kunyepa.—Apokalipsi 17:6; 18:2, 4, 24.

23. Zvinoda kurevenyi ‘kubuda’ mu Bhabhironi Guru?

²³ Kuti mundhu ‘abude’ mu Bhabhironi Guru, anodikana kujekesa kuti aacaiti divi ro ciara co kunyepa. Inga muezaniso, kangaije zvingatodikana kuenda ku ciara cedu co kare zve tovavhunja kuti vavhise zina redu. Kusiapo izvo kuno zviro zvimweni. Tinodikana kunyenya zviro zvakashata zvinoitwa ngo zviara zvo manyepo. Ciara co manyepo cinokukumijira uhure, kubatana no zvomatongehwe o nyika no kuita ciri cese kuti mundhu ave mukhupuki. (Verenganyi Nduyo 97:10; Apokalipsi 18:7, 9, 11-17) Ko makore, zviuru zvo vandhu zvakafa ngo ndava yazvo.

24, 25. Mu njira yapi kuziva Jehovha kungativiisira runyararo no hana yakacena?

²⁴ Ticito taziva Jehovha umwe na umwe wedu waibesera zviro zvakashata zvinoitwa ngo nyika ino ya Sathana. Asi wari itusu tacinja. Takatendera muripo zve topira upenyu hwedu kuna Jehovha. Ngo kudaro, ‘tinozokungurihwa.’ Tinozova no runyararo pomwe no hana yakacena, ngokuti tinozviziva kuti tiri kudakajisa Mwari.—Maitiro o Vapostori 3:19; Isaia 1:18.

²⁵ Zvingaita kuti kareko, taibesera rimwe ro sangano ricikareremeji  upenyu, asi Jehovha angatiregerera ecishandisa muripo. Tinoreremeja maningi upenyu, cipo cinovha kuna Jehovha. Tinotatija kubongesera kwedu ngo kubesera vamweni kuti vazive Jehovha, vabude mu nyika ya Sathana zve vova shamwari ja Mwari.—2 VaKorinto 6:1, 2.

26-28. (a) I basa rapi rakapuwa Ezekieri ndi Jehovha? (b) Jehovha anoda kuti tiitenyi nyamasi uno?

²⁶ Mu Iziraeri yo kare, Jehovha wakavhunja muporofita Ezikieri kuti angwaje vandhu, kuti Jerusarema raizoparajwa ngo kukasika, zve no kuvavhunja zvovaidikana kuita kuti vapone. Kudari Ezekieri naakaregera kuzivisa vandhu, iyena waizova no ndava kuna Jehovha ngo pamusoro po upenyu wo vandhuvo. (Ezekieli 33:7-9) Ezikieri wakatatija kuti waireremeja upenyu ngo kuita zvese zvaikwanisa kuti azivise vandhu vondhovo.

²⁷ Mu njira yakafanana, Jehvoha wakatipa basa ro kungwaja vandhu kuti ngo kukasika nyika ino ya Sathana inozoparajwa, zve no kuvabesera kujijira ngo pamusoro pa Jehovha kuti vazopone mu Paradhiso. (Isaia 61:2; Mateu 24:14) Tinoda kuita zvese zvatinokwanisa kuti ticumaere masoko aya ku vamweni. Tinovetero yo kunanga zvakanangwa ndi mupostori Pauro: “Andina ndava [yo ngazi] no ariwese wenyu angazopsejeka, ngokuti andizivi kuhwirira sure ndecitokotesa komuri kuda kwese ka Mwari.”—Maitiro o Vapostori 20:26, 27.

²⁸ Kuno mativi amweni o upenyu atinodikana kuva takacena. Pa cipauko cinotevera tinozovona kuti tingavisa kudini vakacena pa meso pa Mwari.