1, 2. Ngenyi munorangarira kuti mukumbiro i cipo cinosisira, zve ngenyi tinodikana kuziva zvinojijisa Bhaibheri ngo pamusoro pawo?

TIKAEZANISIRA zviro zvese zvakaithwa ndi Mwari, pasi pano padoko maningi. Jehovha paanosota pasi pano, vandhu vese vo majinja ese vanoita inga dondhojwe rimwe ro kumwa rabva mu bhagedhi. (Nduyo 115:15; Isaia 40:15) Pikija zvakadaro itisu tiri citotori maningi tikaeza­niswa no zviro zvese, Nduyo 145:18, 19 inoti: “Ari phedo po vese vanomudanija, po vese vanomudanija ngo mwoyo wese. Anoita bzo vanoda vaya vanomuthya, anozwa kukhuwa kwavo, no kuvaponesa.” Rudakajiso hwakadini hwatinahwo! Jehovha Musiki Mukuru-kuru, anoda kuti ave phedo na itusu, zve anoda kupurutana mukumbiro jedu. Zvokadi mukumbiro i rudakajiso, cipo cikuru ca Jehovha kwatiri tese.

² Asi Jehovha anozotizwa kudari basi tikabhuya naye mu njira yaanotendera. Tingazviitisa kudini? Imanyi tivone kuti Bhaibheri rinonangenyi ngo pamusoro po mukumbiro.

3. Ngenyi munodikana kuita mukumbiro kuna Jehovha?

³ Jehovha anoda kuti muite mukumbiro, kana kubhuya nae. Tinozvizivisa kudini izvi? Tapota verenganyi VaFilipi 4:​6, 7. Rangariranyi mukoka uwu basi. Imwi­mwi muri kudakarihwa ngo Mutongi wo zvese zve anoda kuti mu mubvunje mazwiro enyu no zvineso zvenyu!

4. Kuita mukumbiro nguva jese kuna Jehovha kunovangisisa kudini ushamwari hwenyu nae?

⁴ Mukumbiro unotiita kuti tive no ushamwari hwo  phedo na Jehovha. Shamwari no shamwari pavanoga­ra vecibhuisana ngo zvavanorangarira, zvavanoda, no zvavanozwa, ushamwari hwavo hunovanga maningi. Zvakafananavo no kuita mukumbiro kuna Jehovha. Iyena anoshandisa Bhaibheri kuti amubvunje zvaanorangarira no zvaanozwa kwamuri, zve anomubvunja zvaanozoita kumbejiyo. Mungatomubvunjavo mazwiro enyu o mukati-kati kamare ngo kubhuya nae nguva jese. Pamunoita izvi, ushamwari hwenyu na Jehovha hunozovanga maningi.​—Jakobo 4:8.

5. Tinozvizivisa kudini kuti Jehovha aazwi mukumbiro jese?

⁵ Jehovha anozwa mukumbiro jese here? Haiwa, aazwi. Mu nguva jo muporofeti Isaia, Jehovha wakabvunja vaIziraeri kuti: “Nokunyati mukaengejera munamato, andizomuzwi. Nyara jenyu jakazara ngo ngazi.” (Isaia 1:​15) Asi tikatama kungwarira, tingathuka taita zvingatidira ndhambo na Jehovha, zvoitisa kuti atame kuzwa mukumbiro jedu.

6. Ngenyi rutendo hunosisira maningi? Munokhombijisa kudini kuti muno rutendo?

 ⁶ Kuti Jehovha azwe mukumbiro jedu, tinodikana kuva no rutendo kwaari. (Marco 11:24) Mupostori Pauro wakadurujira kuti: “Pacina rutendo, apana anodakarisa Mwari. Ndiani anokhwedera kuna Mwari, anodikana kutenda kuti ariyo, no kuti ndiyena anopa mupocero vandhu vanomupsanga.” (Vaheberi 11:6) Asi azvikwani basi kunanga kuti tino rutendo. Tinodikana kuvonesa rutendo hwedu kamare ngo kuzwira Jehovha njiku jese.​—Verenganyi Jakobo 2:26.

7. (a) Ngenyi tinodikana kuva vanojidodokesa zve no nderemejo patinoita mukumbiro kuna Jehovha? (b) Tingakhombijisa kudini kuti tiri kubhuya ngo mwoyo wese patinoita mukumbiro?

⁷ Tinodikana kuva vanojidodokesa zve no nderemejo patinoita mukumbiro kuna Jehovha. Ngenyi? Kudari tecida kubhuya na mambo kana prezidhenti, tinozviita ngo nderemejo. Jehovha ngo Wo Masimba-ese, waro aticaidikanepi kukhombijiravo nderemejo no kujidodokesa kukuru maningi here? (Genesi 17:1; Nduyo 138:6) Tinodikana kuita mukumbiro wokadi kamare touita ngo mwoyo wese, kuciripi kuphinda no kuphinda masoko ondhowo.​—Mateu 6:​7, 8.

8. Patinoita mukumbiro ngo pamusoro po ciri cese tinodikana kuitenyi?

⁸ Pakupejisira, patinoita mukumbiro ngo pamusoro po ciro tinodikana kuita mukuzwirana no zvatakumbira. Inga muezaniso, tikambhera ngo kukumbira Jehovha zvatinoda zvo njiku no njiku, atidikani kugarira nyara tecivetera kuti Jehovha atipekeje zvese zvatinoda kasike tinokwanisa kucishandira. Tinodikana kushanda ngo simba totendera mushovo wese wo basa ratinokwanisa kuita. (Mateu 6:​11; 2 VaTesalònika 3:​10) Kana kudari tikakumbira Jehovha kuti atibesere ­kuregera kuita  zvakashata, tinodikana kutiza mugariro uri wese ungatidira muciejo. (VaKolosi 3:5) Imanyi tipopore mubvunjo jinoithwa maningi ngo pamusoro po mukumbiro.

9. Tinodikana kukumbira ani? Johani 14:6 inotijijisenyi ngo pamusoro po mukumbiro?

⁹ Tinodikana kukumbira ani? Jesu wakajijisa vateveri vake kuti vaite mukumbiro kuna “Baba wedu muri nyezuru.” (Mateu 6:9) Iyena wakanangazve kuti: “Ndini gwanja, bzokadi no uhomi. Apana anokwanisa kuenda kuna Baba acikapindi ndini.” (Johani 14:6) Ngo kudaro tinodikana kuita mukumbiro kuna Jehovha basi ngo zina ra Jesu. Kuita mukumbiro ngo zina ra Jesu zvinorevenyi? Kuti Jehovha adavire mukumbiro jedu, tinodikana kureremeja cigaro cinosisira ca Jesu caakapekejwa ndi Jehovha. Inga zvatakajija, Jesu wakaviya pasi pano kuzotiponesa kubva mucishaishi no rufu. (Johani 3:16; VaRoma 5:12) Jehovha wakagajazve Jesu inga Mupiri Mukuru zve Mutongi.​—Johani 5:22; Vaheberi 6:20.

10. Tinodikana kuva no magariro amwe basi patinoita mukumbiro here? Sananguranyi.

¹⁰ Tinodikana kuva no magariro amwe basi patinoita mukumbiro here? Haiwa, Jehovha aatikumbiri kuti tigwadame, tigare pasi, kana tiime patinoita mukumbiro. Bhaibheri rinotijijisa kuti tingabhuya na Jehovha tinomagariro o kureremeja. (1 Kronike 17:16; Neemia 8:6; Danieli 6:10; Marco 11:25) Zvinosisira maningi kuna Jehovha, kubhuya naye no cido cakanaka, kuciripi magariro edu patinoita mukumbiro. Tingaita mukumbiro ngo izwi guru, cinyararire, kuri kwese kwatinonga tiri, zve panguva iri yese, usiku no masikati. ­Patinoita  mukumbiro kuna Jehovha, ngatithembe kuti iyena anotizwa pikija pacina no mundhu ari wese anokwanisa kutizwa.​—Neemia 2:1-6.

11. Ngozvapi zvatingabhuya na Jehovha?

¹¹ Tinodikana kukumbirenyi? Tingakumbira ciri cese cinodavihwa ndi Jehovha. Bhaibheri rinoti: “Tikamukumbira ciro, ngo kuteveja kuda kwake, Yena anotipurukira.” (1 Johani 5:14) Tingakumbira zviro zvatinoda here? Hina. Kuita mukumbiro kuna Jehovha zvakaita inga kubhuya no shamwari yo phedo. Tinobvunja Jehovha ciri cese ciri mu murangariro no mu mwoyo mwedu. (Nduyo 62:9) Tingamukumbira kuti atipekeje simba ro mujimu mucena wake kuti utibesere kuita zvakanaka. (Luka 11:13) Tingakumbira Jehovha uzivi hwo kuti tiite zvisungo zvakanaka, zve tingakumbira vangiso yo kuhwisana no zvineso. (Jakobo 1:5) Tingakumbira Jehovha kuti aregerere zvishaishi zvedu. (VaEfeso 1:​3, 7) Tinodikana ku kumbiriravo vamweni, kubatanijavo mbhuri yedu no hama no hambzaji jedu jo pa ungano.​—Maitiro o Vapostori 12:5; VaKolosi 4:​12.

12. Ngozvapi zvinodikana kuva zvinosisira maningi mu mukumbiro jedu?

¹² Ngozvapi zvinodikana kuva zvinosisira maningi mu mukumbiro jedu? Jehovha no kuda kwake. Tinodikana kumubonga ngo mwoyo wese ngo zvese zvaanotiitira. (1 Kronike 29:10-​13) Tinozviziva ngo kuti Jesu paainga pasi pano, iyena wakajijisa vateveri vake makumbirire avaidikana kuita. (Verenganyi Mateu 6:​9-​13.) Iyena wakavabvunja kuti vaidikana kutanga kukumbira kuti zina ra Mwari riceneswe. Perapo Jesu wakavonesa kuti tinodikana kukumbira kuti Umambo hwa Mwari huviye zve kuda ka Jehovha kuithwe pasi pano pese. Pakupera kukumbira zvese izvi, Jesu ngo paakazonanga  kuti tinodikana kukumbira zvatinodavo itisu. ­Tikadira Jehovha no kuda kwake pakutanga mu mukumbiro jedu, tinokhombija kuti izvi ngo zvinosisira maningi kwatiri.

13. Mukumbiro jedu jinodikana kurebesa kudini?

¹³ Mukumbiro jedu jinodikana kurebesa kudini? Bhaibheri arinangi. Mukumbiro jedu jingareba kana kufupika zvofira ku zvamunonga mecida. Inga ­muezaniso, tingaita mukumbiro wakafupika ticito tikaha asi ­tingaita  mukumbiro wakareba patinobonga Jehovha kana patinomubvunja zviro zviri kutinesa. (1 Samueli 1:​12, 15) Atidikani kuita mukumbiro wakareba maningi ngo kuvonehwa inga zvaiita vandhu vamweni mu njiku ja Jesu. (Luka 20:46, 47) Jehovha aadadi ngo mukumbiro jakadari. Cinosisira maningi kuna Jehovha kuita mukumbiro ngo mwoyo wese.

14. Tinodikana kukumbira kangana, zve izvi zvinotijijisenyi ngo pamusoro pa Jehovha?

¹⁴ Tinodikana kukumbira kangana? Jehovha anotikoka kuti tibhuye nae mukuvo wese. Bhaibheri rinonanga kuti “namatanyi mucikazorori.” (Mateu 26:41; VaRoma 12:12; 1 VaTesalònika 5:​17) Nguva jese Jehovha aripo kuti atipurutane. Tingamubonga njiku jese ngo rudo hwake pomwe no kukova. Tingakumbirazve  ndhungamiro jake, vangiso no nyarajo. Kudari tecireremeja rudakajiso hwo kuita mukumbiro kuna Jehovha, tingashandisa mukana uri wese kuti tibhuye nae.

15. Ngenyi tinodikana kunanga kuti “amen” pa kupera ko mukumbiro?

¹⁵ Ngenyi tinodikana kunanga kuti “amen” pa kupera ko mukumbiro? Gama ro kuti “amen” rinoreva kuti “zvokadi” kana “nga zvive zvakadaro.” Injira yo kuvonesa kuti taida kamare kubhuya zvatabhuya mu mukumbiro wedu zve zviri kubva mu mwoyo. (Nduyo 41:14) Bhaibheri rinotijijisazve kuti tingaita “amen” mucinyararire kana ngo izwi guru, pa kupera ko mukumbiro unoizihwa pa mbungano kuti tikhombije kutendera kwedu zvanangwaro.​—1 Kronike 16:36; 1 VaKorinto 14:16.

16. Jehovha anodaviradi kamare mukumbiro jedu? Durujiranyi.

¹⁶ Jehovha anodaviradi kamare mukumbiro jedu? Hina, anodavira. Bhaibheri rinonanga kuti iyena ‘anozwa munamato.’ (Nduyo 65:3) Jehovha anozwa zve anodavira mukumbiro jo zviuru no zviuru zvo vandhu vakanaka, zve iyena anozviita ngo njira yakasiyana-siyana.

17. Jehovha anoshandisisa kudini ngirozi no vashandiri vake pasi pano kuti apingure mukumbiro jedu?

¹⁷ Jehovha anoshandisa ngirozi no vashandiri vake pasi pano kuti adavire mukumbiro jedu. (Vaheberi 1:​13, 14) Kuno muezaniso jakawanda maningi jo vandhu vakaita mukumbiro kuti vazwisise Bhaibheri zve tevere umwe wo Zvapupu zva Jehovha wovabvakacira. Bhaibheri rinovonesa kuti ngirozi jinoitavo basa ro kuzivisa “vangeri” pasi pese. (Verenganyi Apokalipsi 14:6.) Zve tese takaita mukumbiro kuna Jehovha ngo pamusoro po cineso ciri cese kana zvataida zve perapo toashira besero  rataida kubva ku hama kana hambzaji yo ciKristu.​—Mazwi Akangwara 12:25; Jakobo 2:​16.

18. Jehovha anoshandisisa kudini mujimu mucena no Bhaibheri kuti adavire mukumbiro?

¹⁸ Jehovha anoshandisa mujimu mucena kuti adavire mukumbiro jedu. Patinokumbira besero kuti tihwisane no zvineso, iyena angashandisa mujimu mucena kuti utipekeje ndhungamiro no vangiso. (2 VaKorinto 4:7) Jehovha anoshandisazve Bhaibheri kuti adavire mukumbiro jedu zve kuti atibesere kuita zvisungo zvakanaka. Patinoverenga Bhaibheri, tingawana vhesi ingazotibesera. Jehovha angatoitisa kuti mundhu apekeje mupinguro pa musongano wonanga zviro zvataida kuzwa, kana mukuru ari wese pa ungano angatibvunja fundo rinobva mu Bhaibheri.​—VaGalàsia 6:1.

19. Ngenyi zvinoita inga kuti Jehovha aadaviri mukumbiro jedu?

¹⁹ Kangaije tingajibvunjisa kuti ‘Ngenyi Jehovha aadaviri mukumbiro wangu mbhera wari?’ Mucakanganwa kuti iyena anoziva nguva no madavirire aangaita mukumbiro jedu. Anoziva zvatinoda. Tinodikana kuramba tecikumbira kuti tivonese kuti tiri kunanga zvokadi kamare zve no kumutatija kuti tino rutendo kwaari kamare. (Luka 11:​5-​10) Nguva jimweni Jehovha anodavira mukumbiro jedu mu njira yaticikaveteri. Inga muezaniso, tingaita mukumbiro ngo pamusoro po cineso, asi kunja ko kubvisa cineso ici, iyena angamupekeja simba ro kucicungirira.​—Verenganyi VaFilipi 4:13.

20. Ngenyi tinodikana kuramba teciita mukumbiro nguva jese?

²⁰ Rudakajiso wakadini watinawo wo kuita mukumbiro kuna Jehovha! Ngative no cokwadi co kuti iyena anotizwa. (Nduyo 145:18) Tikaita nguva jese mukumbiro ngo mwoyo wese kuna Jehovha, ushamwari hwedu nae unokuravo maningi.