MUNOIVONA kudini Njiku yo rutongeso? Vazinji vanorangarira kuti mamiriao no mamiriao o vandhu vanoenda kootongwa pamberi po dendemaro ra Mwari umwe nga umwe. Kondhoyo, rutongeso hunozoithwa ku mundhu umwe nga umwe. Vamweni vanozopocehwa ngo makomborero o mugore, zve vamweni vanozotongehwa kutambujwa kucikaperi. Asi, Bhaibheri rinopekeja murangariro wakati siyane padoko no mukuvo uwu. Soko ra Mwari rinonanga njiku iyi inga mukuvo wo vetero yo kumusijihwa, kuciripi wo kuthyisa.

Pana Apokalipsi 20:11, 12, tinoverenga masoko a mupostori Johani ngo pamusoro po Njiku yo rutongeso anoti: “Sure kwabzo, ndakavona dendemaro guru rakacena, no Mundhu waigara pa Nyezuru paro. Pambeji pake, denga no nyika bzakangara-ngara; akuzivi kuvonekabze ndau yabzo. Ndakavona vakafa: Vana vadoko no vakuru, vakaima panyasi po dendemaro. Mabhuku akabeuhwa; sure kwabzo robeuhwazve bhuku ro uhomi. Vakafa vakatongwa, ngo kuteveja maitiro avo akatahwa mu mabhuku.” Mutongi ari kunangwa pano ndiyani?

Jehovha Mwari ndi Mutongi mukuru-kuru wo vandhu vese. Ngo kudaro, iyena anogaja vamweni basa ro kutongero kamare. Mu kuzwirana no Maitiro o Vapostori 17:31, Mupostori Pauro wakananga kuti “wakasana njiku yo kuzotonga nyika yo pasi ngo urungami hwake, ngo mundhu wakasanwa ndiyena.” Mutongwi wakagajwari ndi Jesu Kristu wakamuswaya. (Johani 5: 22) Waro Njiku yo rutongeso inozotanga rini? Hunozotora mukuvo wakadini?

Bhuku ra Apokalipsi rinovonesa kuti Njiku yo rutongeso inotanga pa kupera ko hondo yo Armaghedhoni, mugariro wa Sathana pasi pano paunozonga waparajwa. * (Apokalipsi 16:14, 16; 19:19–20:3) Pasure po Armaghedhoni, Sathana no madhimoni ake, vanozofungihwa mu gomba rakajika ko makore anokwana ciuru. Mukati mo nguva iyi, 144.000 vagari vo utaka hwo kudenga, vanozova vatongi zve “votonga na Kristu, ciuru [1.000] co makore.” (Apokalipsi 14:1-3; 20:1-4; VaRoma 8:17) Njiku yo rutongeso asipi ciitiko cokukasika cinopera mu njiku kamare ino 24 o nguva basi. Njiku iyi, inopera mu ciuru co makore.

Mukati mo nguva iyi yo makore anokwana ciuru, Jesu Kristu “anozoza kotonga vapenye no vakafa.” (2 Timoti 4:1) “Vapenye” vanozova vo “uzinji hukuru” hunozopokonyoka pa Armagedhoni. (Apokalipsi 7:9-17) Mupostori Johani wakavona “vakafa . . . vaiima panyasi po dendemaro” ro rutongeso. Inga zvakagondeswa ndi Jesu, “vaya vari mu makuva vanozozwa izwi ra [Kristu]. . . . Vanozomuka.” Ngo kushandisa rumuko. (Johani 5:28, 29; Maitiro o Vapostori 24:15) Waro vese vanozotongwa ngo zvishaishi zvapi?

Mukuzwirana no civoniso ca mupostori Johani, “Mabhuku akabeuhwa,” zve “Vakafa vakatongwa, ngo kuteveja maitiro avo akatahwa mu mabhuku.” (Apokalipsi 20:12) Mabhuku aya ndiwona aitarihwa zvaiithwa ngo vandhu kareko here? Haiwa, rutongeso uhu auzoshandisi maningi zvakaithwa ngo mundhu acito afa. Tinozvizivisa kudini zvi? Bhaibheri rinoti: “Ndiani wafa, wasujunuhwa mu uxaixi.” (VaRoma 6:7) Ngo kudaro, vayani vanonga vamuswa vanozorarama vacina zvishaishi ngo kuti zvapera kubviswa. Hino, mabhuku aya, ari kunangira mutemo jimweni jinokumbihwa ndi Mwari. Kuti tirarame no kucingaperi, vese, vapokonyoki vo pa Armagedhoni na vayani vanozomuswa, vanozopurutana mupango ja Mwari, kubatanija no mutemo mupsa uri wese, Jehovha waangadira mukati mo ciuru  co makore. Hino, mundhu umwe nga umwe anozotongwa kubvira mu zviro zaacaita mukati mo Njiku yo rutongeso.

Njiku yo rutongeso iyi, inozopekeja mabhiriao o vandhu mukana wo kutanga wo kujija ngo pamusoro po kuda ka Mwari no kurarama mu kuwirirana nako. Izvi zvinoreva kuti kunozoithwa basa guru ro kujijisa. Zvokadi, “vagari vo nyika vanojija ururami.” (Isaia 26:9) Kaveta, asipi vese vanozodakarira kurarama mukuzwirana no kuda ka Mwari. Isaia 26:10 inoti: “Ngo bzokadi, kudari vakaxata vakaitihwa unyaxa, avazojiji ururami, nokunyati vecigara mu nyika yo ururami, vanozoita bzakaxata, vozoramba kumukuja” Jehovha. Vakashata ava vanozourawa kwenda no kwenda pa Njiku yo rutongeso.—Isaia 65:20.

Mukupera ko Njiku yo rutongeso, vandhu vanozopokonyoka vanozoraramazve zvakaperera inga vandhu vakakwana. (Apokalipsi 20:5) Hino, pa Njiku yo rutongeso, vandhu vese vanozomusijihwa kuti vave no magariro akakwana o kutanga. (1 VaKorinto 15:24-28) Perapo, kunozoviya muejo wo kupejisira. Sathana anonga abudiswa mu gunia zve anozotendehwa kuti aeje kupausa vandhu ko kupejisira. (Apokalipsi 20:3, 7-10) Vaya vanocungirira, vanozobusa kukwanirisika kwakakwana ko cigondiso co Bhaibheri cinoti: “Varurami vanozoita veno vo nyika, vanozogaremo mbhera narini.” (Nduyo 37:29) Hina, Njiku yo rutongeso inozova yo makomborero kuno vandhu vakagondeka!