Mambo Nebhukadhinezari paakatora vatungamiriri vo ciJudha kwenda Bhabhironia, iyena wakatumira mukuru wo pamutemo waidanijwa Ashipenazi kuti avangwarire. Nebhukadhinezari wakabvunja Ashipenazi kuti apsake majaha akavanga zve ano uhomi waushoni. Majaha wondhowo aidikana kurovejwa ko makore matatu. Kurovejwa uku kwaizovaita kuti vakwanise kushanda inga vakuru vo utongi wo Bhabhironia. Majaha wondhowo, aidikana kujija kuverenga, kutara no kuvereketa ndumi yo ku Bhabhironi. Vaidikanazve kuha zvese zvaihiwa ndi mambo no vatungamiriri vake. Majaha marongomuna aingaro akasanwa, kwainga na Dhanieri, Hananiya, Mishaeri na Hazaria. Ashipenazi wakavapa mazina amweni o kuBhabhironi, aizwi, Bheteshazari, Shadhereki, Misheki na Abhedhenego.  Kureva kuti jijo iyo yaizovaita kuti vatame kunamata Jehovha?

Vanarume varongomuna ava vainga vakasunga kuzwira Jehovha. Vaizviziva kuti vainga vacikafaneri kuha zvokuha zva mambo ngokuti Mutemo wa Jehovha wainanga kuti azvicainga zvakacena. Ngokudaro ivona vakati kuna Ashipenazi: ‘Tapota mucatiita kuti tihe zvokuha zva mambo.’ Ashipenazi wakavabvunja kuti: ‘Kudari mukatama kuha zve mambo womuvona inga kuti muri kuhwara, iyena anozondiuraya!’

Dhanieri wakava no zano raushoni. Iyena wakati ku nduna iya: ‘Tapota tipekejenyi murivo wo masakani no kumwa inokwana kuita gumi ro njiku basi. Kuperapo tiezanisenyi no majaha anoha zvokuha zva mambo.’ Mutungamiriri wakatenderana nazvo.

Pa kupera ko njiku gumi, Dhanieri no shamwari jake ndhatu ivona vainga no uhomi hwakanaka unopinda vanarume vese. Jehovha wakadakara maningi ngokuti vainga vamuzwira. Iyena wakabva wapekeja uzivi Dhanieri wokuzwisisa civoniso zve no hope.

Apo pavakapera kurovejwa, Ashipinazi wakaendesa vanarume kuna Nebhukadhinezari. Mambo wakaenda kovereketa navo zve wakavona kuti Dhanieri, Hananiya, Mishaeri pomwe na Hazariya vainga vano ungwaro kupinda majaha ese. Ngokudaro wakasana majaha o marongomuna kuti ashande inga nduna pa utongi wake. Mambo waitodikana kukumbira mazano kovari pa zviro zvinosisira maningi. Jehovha wakavaita kuti vave vakangwara kupinda majimambo ese pomwe no vaya vaita zvo masaramuso.

Pikija zvakadaro ivona vainga mu nyika mwavo, Dhanieri, Hananiya, Mishaeri zve na Azariya avazivi kukanganwa kuti vainga va Jehovha. Munoramba mecizwira Jehovha, pikija kuti vabari venyu avaripi pondhopo na imwimwi?