Mu mweji wa Setembro tinozovangisira maningi kuti tikoke vandhu vakawanda kuti vajije Bhaibheri nesu, tecishandisa bhurushura Mungadakara Kwenda no Kwenda! Vacumaeri vangasana kushanda inga piyona wo besero basi ngo kukwanirisa makumatatu o nguva. Waro, tingaitenyi kuti tibatikanevo pa fafanya iyi inosisira?

• Pakutanga Kusongana no Mundhu: Shandisanyi masoko ari pa pheji yokupejisira yo bhurushura iri kuti mumuse cidaka-daka co mundhuwo no kueja kutangisa jijo yo Bhaibheri. Mucakanganwa vaya vakakhombija kudakarira kareko kubatanija na vaya vamaiita hwiririro. Pikija vaya vakaramba kujija kareko, vangaguma pakudakarira manera mapsa atiri kujija tecishandisa bhurushura iri. Bhurushura iri aridikani kusiiwa mu nyumba jokuti ajina vandhu kana kuritumira mu karata kuno vandhu vokuti kareko avazivi kukhombija kudakarira. Komisau yo Basa yo Ungano yenyuyo, ingaita nasiriro jimweni kuitira mweji uu.

• Pa Mukana Jimweni: Kudari ungano yenyu inoshandisa cikarinya co mabhuku, mungadiravo bhurushura Mungadakara Kwenda no Kwenda! Vhunjanyi vese vanozodakarira bhurushura iri kuti pavanoashira bhurushura iri, ivona vangawanazve jijo yo Bhaibheri icikapagahwi. Mungavonesa ngo kukasika kuti jijo iyi inoitiswa kudini, kana mungaita nasiriro kuti muzviite pa nguva imweni. Muvonereri wo basa angaita nasiriro kuti vacumaeri vano ruzivo vaende mumabazari o mu ndima mavomo kuti vakoke vandhu vakawanda kuti vajije navo Bhaibheri. Imwimwi mungakokazve vadoni venyu vo ku basa, kana vandhu vamweni vamunoziva kana vamunosongana navo mu gwanja kuti vajije na imwimwi Bhaibheri.

Jesu wakativhunja kuti tiite vajiji no ‘kuvajijisa.’ (Mat. 28:19, 20) Asi fafanya iyi inosisira inozotibesera kuti tikwanirise cinangwa ici, asi tecishandisa bhurushura Mungadakara Kwenda no Kwenda!