Yikipia chikome xiuitl, sejse xiuitl itech Kali kanin tekitij iTlaixpantijkauan Jehová itech ueyi altepetl México kiseliaj se certificado tlen itoka Industria Limpia.

Itech tonal 26, metstli septiembre, xiuitl 2012, tekiua itech ueyi altepetl México okinmakak iTlaixpantijkauan Jehová se certificado, pampa kintlasojkamatiliskej “mochijchikauaj kimaluiaj tlen onka itech Tlaltikpak”.

Ika programa Industria Limpia kinpaleuiaj empresas ma kimaluikan nochi tlen onka itech Tlaltikpak. Maski itech Kali kanin tekitij iTlaixpantijkauan Jehová amo kitlanij tomin, sejse xiuitl noijki ijkon kichiuaj. Se tlakatl tlen tekiti itech non kali okijto: “Pampa tikseliskej cerificado Industria Limpia moneki kiteititis nochi tlen tikchiuaj uan ken tikchiuaj kuali kajki itech nin chikome tlamantli: ejekatl, atl, residuos urbanos, residuos peligrosos, timomaluiskej, energía eléctrica uan timomachtiaj ken tikmaluiskej tlen onka itech Tlaltikpak. Maski itech nin programa amo ikaj kichiualtiaj ma mokalaki, tejuan ijkon tikchiuaj pampa tiknekij”.

Itech nochi Tlaltikpak iTlaixpantijkauan Jehová mochijchikauaj pampa kimaluiskej tlen onka itech Tlaltikpak pampa kipatioitaj.