Niyolik itech xolal Montreal, okachi ueyi xolal tein moajsi kampa motatokaytia Quebec ompa Canadá. Totatuan techiskaltijkej ika netasojtalis eyi nokniuan uan nejua ompa Rosemont kampa tiyolseujkanemiaj. Semi kualtsin ompa tinemiaj.

 Keman katka nikonetsin, nikuelitaya nikixtajtoltis Biblia. Nikelnamiki ke, keman nikpiaya 12 xiujmej, nikixtajtoltiaya kampa ika tajtoua inemilis Jesús uan semi nechpaktiaya. Nikmoujkaitaya netasojtalis uan teiknelilis tein kinextiaya uan niknekia nimochiuas kemej yejua. Sayoj ke, nejon tanejnekilis poliuik ijkon kemej nimoskaltijyajki uan peuak nimouika iniuan akin amo nechpaleuiayaj.

 Nopopaj kitsotsonaya saxofón uan amo sayoj nechkauilij isaxofón ta, ijkon kemej yejua, no nikyolnejnekik nitatsotsonas. Yejua tein tayekantoya itech nonemilis. Semi nikuelitaya, yejua ika niman niuelik niktsotsona guitarra. Satepan, nikinyoleuak notasojikniuan maj nouan tatsotsonanij rock uan tiyajtinenkej titatsotsonatij. Seki akin kichiuaj grabación ika tatsotson nechixmatkej uan nechiluijkej ke ueliskia kichiuaskej grabación ika notatsotson. Nikchajkuiloj amat tein ika nimotenkauak ke nitekitis iniuan nejon uejueyi tekitinij ika grabación. Notatsotson semi moixmatik uan semi mokakia itech radio ompa Quebec.

 Moitaya ke nikpiaya nochi. Katka nitelpoch, nimotelixmatia uan niktania miak tomin keman nikchiuaya tein okachi nikuelitaya. Tonayan, niyaya gimnasio, nimoajsia kampa nimoteixmatiltiaya, niktemakaya autógrafos uan nikisaya itech televisión. Itech youak, nikisaya nitatsotsonati uan niyaya iluimej. Kemej niknekia nitaxikos porin nochin kinekiaj nechixmatiskej, yekinika peuak nitayi tayil tein teuintij uan satepan peuak nikui drogas. Niauilnemia uan amo nechtekipachouaya maj nechpano tein amo kuali.

 Miakej kinekiaj kipiaskej nonemilis porin moitaya ke niyolpakia. Sayoj ke tein melauj, amo niyolpakia, okachiok keman nimoajsia noselti. Nimotayokoltiaya uan nimotekipachouaya. Uan keman okachi kuali yajtoya tein nikchiujtoya, omen akin kichiuayaj grabación ika notatsotson momikilijkej ika sida. Amo uelia nikneltokaya. Maski nechpaktiaya tatsotson, tein mochiua ompa nechtajyaltiaya.

 Maski nimochiujka se kuali tatsotsonkej, nikitaya ke itech taltikpak mochiujtok tein tel amo kuali. ¿Keyej semi moitaya teikamauiltilis? Nimotajtaniaya keyej Dios amo teyi kichiuaya. Tein melauj, niktataujtiaya porin niknekia nikmatis. Se tonal, keman amo nitatsotsonato, oksepa peuak nikixtajtoltij Biblia. Maski amo semi nikajsikamatia, nikmatik ke tamilis amo uejka yetok.

 Itech Biblia no nimomachtij ke Jesús mosauak ome poual tonal keman yetoya taluakyan (Mateo 4:1, 2). Niknemilij ke, komo no ijkon nikchiuaya, xa Dios no monextiskia noixpan, yejua ika nikixtalij tonal keman nipeuaskia. Ome semana achto ke nipeuaskia, ome itaixpantijkauan Jiova nechkalpanotoj, uan nikinyoleuak maj kalakikan kemej yeskia ipa nikinchixtoya. Nikixitak takat akin motokaytia Jacques, uan nikiluij: “¿Keniuj uelis tikyekmatiskej ke tinemij itech tonalmej keman tamis tein mochiujtok?”. Kitapoj Biblia uan kiixtajtoltij 2 Timoteo 3:1-5. Nikinchiuilij miak netajtanilmej. Semi nikmoujkakakik tein nechnankilijtiyajkej porin katka taixejekol uan semi teyolseuiaj, uan nochi kikixtijkej itech Biblia. Seki tonalmej satepan ke oksepa nechkalpanojkej, nikajsikamatik ke amo monekia maj nimosaua.

 Peuak nikselia se nemachtil ika Biblia iniuan itaixpantijkauan Jiova. Satepan, niktekik notson uan peuak niyouj nochi nechikolmej itech Kali kampa Mosentiliaj iTaixpantijkauan Jiova. Kuali nechseliayaj itech nechikolmej, uan nejon okachi nechajsikamatiltij ke nikajsikaya tamachtilis tein melauak.

 Monekik nikpatas miak taman itech nonemilis uan ijkon ueliskia nimonejnemiltis kemej nimomachtijtoya. Kemej neskayot, monekik nikauas drogas uan auilnemilis. No monekia amo sayoj notech nitanemilis ta, monekia nimotekipachos ininka oksekin. Uan kemej noselti nikiniskaltijtoya ome nokoneuan, monekik nikitas keniuj nikiniskaltiskia kemej kuali yetoskiaj uan maj ueliskiaj motokiskiaj iuan Dios. Yejua ika nikauak tatsotsonalis uan peuak nitekiti itech se fábrica kampa amo nechyektaxtauiayaj.

 Tein melauj, nechouijmakak nikpatas nonemilis. Keman nimochikauaya nikauas drogas, kemansa oksepa niuetsia itech nejon tajtakol porin nonakayo nechtajtaniaya (Romanos 7:19, 21-24). Tein okachi nechouijmakak nikauas yejua auilnemilis. Uan no, yankuik tekit tein nikpiaya semi nechsioujtiaya uan tepitsin tomin tein niktania amo nechajsia. Nechuikiliaya eyi metsti niktanis tomin tein achto niktania itech sayoj ome hora keman nitatsotsonaya.

 Netataujtil nechpaleuij maj nikpata nejon tein semi ouij. No semi nechpaleuij nochipa nikixtajtoltis Biblia. Nikelnamiki seki taxelolmej tein semi nechyolchikaujkej. Semej yejua 2 Corintios 7:1, kampa kinyolchikaua akin kichiuaj kemej Cristo maj ‘chipaukanentinemikan uan amo teyika ma mokalakijtinemikan tech in tajtakolnemilis’. Okse taxelol tein nechajsikamatiltij ke ueliskia nikauas nejon tachiualismej tein amo kuali yejua Filipenses 4:13 kampa kijtoua: “Itech nochi taman nikpia chikaualis itechkopa akin nechmaka chikaualis”. Jiova kinankilij nonetataujtiluan uan nechpaleuij maj nikajsikamati Biblia uan maj nikchiua tein tamachtia. Nejon necholinij maj nimotemaktiani iuan Dios (1 Pedro 4:​1, 2). Itech xiuit 1997, nimoauij kemej itaixpantijkauj Jiova.

 Senkis nikyekmati ke komo niksentokaskia ninemia kemej achto, axkan amo niyoltoskiaok. Sayoj ke, axkan yekmelauj niyolpaki. Nosiuatsin Elvie, nikitani kemej se itatiochiualis Dios. Axkan, tiomen techyolpaktia tikteixmatiltiskej iTajtol Dios miak tonalmej. Semi niyolpaki uan kuali nimomachilia. Senkis niktasojkamatilia Jiova maj nechpaleuiani maj nimotoki iuan (Juan 6:44).