Itech Biblia ixnesij sekin taltikpakneminij akin ininka mauiltijkej akin amo ueliaj mopaleuiayaj. Kemej neskayot, tekiuaj Acab, akin taixyekanak Israel itech majtaktika siglo achto itech totonaluan, kinekik kikuis se uvajtal tein iaxka katka Nabot uan ikoneuan. * Inamik, akin motokaytij Jezabel kiixtalij kinmiktis yejuan uan ijkon kikuiskia nejon tal uan tekiuaj amo kitsakuilij nejon (1 Reyes 21:1-16; 2 Reyes 9:26). ¿Keyej Dios kikaua maj onka teikamauiltilis?

Se taman tein motelneki yejua porin Dios amo ueli takajkayaua (Tito 1:2). Sayoj ke ¿keniuj mouika nejon ika teikamauiltilis? Keman moajsikej yekinika takat uan yekinika siuat, Dios kinnejmachtij ke komo kiixnamikiskiaj momikiliskiaj uan ijkon mochiuak. Peuak keman taixnamikkej itech xochital Edén uan hasta axkan, taltikpaknenkej amo ueli kichiuani maj amo momikili. Tein melauj, yekinika taltikpaknenkej momikilij porin ika mauiltijkej: Caín kimiktij iikniuj Abel (Génesis 2:16, 17; 4:8).

Biblia kijtoua ke ijkuak uan hasta axkan, “taltikpaknenkej kiixyekanani taltikpaknenkej uan ijkon kitajyouiltia” (Eclesiastés 8:9). Kemej neskayot, Jiova kinnejmachtij israelitas akin katkaj ixolal ke kinpiaskiaj tekiuanij teikamauiltianij uan yejua ika kitsajtsiliskiaj yejuatsin maj kinpaleui (1 Samuel 8:11-18). Hasta tamatkej tekiuaj Salomón kinteltaxtaualtij israelitas (1 Reyes 11:43; 12:3, 4). Uan okseki tekiuanij okachi kichiujkej tein amo kuali, kemej Acab. Axkan xikonnemili nejin: komo Dios kichiuaskia maj amo ijkon teikamauiltikan, ¿amo yeskia se takajkayaualis tein kijtoj?

Uan no, Satanás kijtoua ke taltikpakneminij kitekitiliaj Dios porin kinekij kiseliskej tein kuali (Job 1:9, 10; 2:4). Komo Dios kitsakuiliskia maj amo ininka mauiltikan itekitikauan, ¿amo kinextijtoskia ke melauak tein kijtoua Satanás? Uan komo kitsakuiliskia maj amo teyi kinpano taltikpakneminij, kichiuaskia maj kineltokakan se okachi ueyi takajkayaualis: ke taltikpaknenkej ueli moixyekana iselti, uan amo moneki maj Dios kipaleui. Sayoj ke Biblia amo yejua kijtoua, ta kinextia ke amo ueli moixyekana iselti (Jeremías 10:23). Moneki maj uiki iTekiuajyo Dios; sayoj ijkon tamis teikamauiltilis.

¿Kijtosneki nejon ke Dios amo teyi kichiua? Amo; ta moajsi ome taman tein kichiujtok. Yekinika, kinextia ke amo kiyolpaktia teikamauiltilis. Kemej neskayot, iTajtol senkis kimelaua keniuj Jezabel kitemoj kijtakos Nabot. Biblia no kinextia ke moajsi se taixyekankej tel chikauak akin motatia uan taolinia maj mochiua nejon tein tel amo kuali (Juan 14:30; 2 Corintios 11:14). Biblia kinextia ke nejin yejua Amokuali Satanás. Keman Dios kiyeknextia nochi nejon tein amo kuali uan teikamauiltilis uan akoni taolinia maj mochiua, techpaleuia maj amo tikchiuakan tein amo kuali. Ika nejon, Jiova techpaleuia maj satepan ueli tikselikan tein kuali.

Ojpatika, Dios techyekiluia ke kitamis teikamauiltilis. Ijkon kemej kiyeknextij tein kichiujkej uan kijtoj tatsakuiltilis tein kiseliskiaj Acab uan Jezabel, uan oksekin tel miakej akin no ijkon monejnemiltijkej, senkis techpaleuia maj titakuaujtamatikan ke kintatsakuiltis nochin akin amo yolkualmej ijkon kemej motenkauani kichiuas (Salmo 52:1-5). Uan no kinyekiluia taltikpakneminij akin kitasojtaj ke amo uejkaua kichiuas maj oksepa amo onka tein amo kuali. * Kemaj, Nabot uan ikoneuan oksepa nemiskej uan ijkon kiitaskej keniuj taltikpak mochiuas se xochital kampa amo onkas teikamauiltilis (Salmo 37:34).