1, 2. 1) ¿Toni kichiuas iTekiuajyo Dios? 2) ¿Keyej tikyekmatij ke nejon Tekiuajyot ualas?

ITECH primavera xiuit 31, keman Jesús moajsia itech se tepet tein amo uejka yetoya iuan xolal Capernaum, kinmachtij imomachtijkauan maj tajtanikan nejin itech netataujtil: “Maj uiki motekiuajyo” (Mat. 6:10, TNM). Itech nejin tonalmej, miakej omeyolouaj ox ualas nejon Tekiuajyot. Sayoj ke tejuan tikyekmatij ke nejon netataujtil monankilis.

² Jiova, ika iTekiuajyo, kinsentilis nochin ichankauan akin moajsij iluikak uan nikan taltikpak. Itanejnekilis Dios mochiuas (Is. 55:10, 11). Tein melauj, ¡Jiova mochiuakya Tekiuaj itech totonaluan! Tein mochiuani itech cien xiujmej tein semi techyolpaktia kinextia nejon. Dios kichiujtok uejueyi uan kualtsitsin tachiualismej tein ika kinpaleuia tel miakej itekitikauan akin amo kikauaj (Zac. 14:9; Apoc. 15:3). Maj Jiova mochiuani Tekiuaj, tel taman ika iTekiuajyo Dios tein Jesús kijtoj ke ualaskia. ¿Keyej taman uan keyej moneki tikitaskej ke moneki?

3. 1) ¿Kemanian uan kani peuak taixyekana Jesús kemej Tekiuaj? 2) ¿Keniuj tikonmelauaskia ke Tekiuajyot moixtalij itech xiuit 1914? (Xikonita nota.)

³ Kemej 20 xiujmej achto ke ajsiskia xiuit 1900, itekitikauan Dios peuak kiajsikamatij tein Daniel kijkuilojka 2,500 xiujmej achto: “Itech inintonaluan nejon tekiuanij, Dios akin nemi iluikak kitalis se tekiuajyot tein amo keman ixpoliuis” (Dan. 2:44).  Momachtianij ika Biblia miak xiujmej kiteixmatiltijkej ke itech xiuit 1914 mochiuaskia miak taman tein motelneki. Taltikpakneminij itech nejon tonalmej kiitayaj ke nochi kualtsin yeskia satepan. Se tajkuilojkej kijtoua: “Taltikpakneminij itech xiuit 1914 kipiayaj nechialis”. Sayoj ke satepan itech nejon xiuit, peuak Yekinika Neteuilis itech Nochi Taltikpak. ¡Tein Biblia achtook kijtojka mochiuak! Mayan, talolinilis uan kokolismej tein mochiuak satepan kinextij ke itech xiuit 1914 Jesucristo peuak taixyekana ompa iluikak kemej Tekiuaj itech iTekiuajyo Dios. * Keman Jiova kiixtalij iKonetsin kemej Tekiuaj, yejuatsin mochiuak Tekiuaj kemej amo mochiujtoya ijkon.

4. 1) ¿Toni yekinika taman kichiuak yankuik Tekiuaj? 2) ¿Akonimej Tekiuaj kinpaleuij satepan?

⁴ Yekinika taman tein kichiuak yankuik Tekiuaj yejua nejin: moteuij iuan Satanás, akin okachi kiixnamiki iTajtsin. Jesús uan iángeles kikalankixtijkej ne iluikak Satanás iuan iamokuali ejekauan. Nejin kichiuak maj ompa iluikak kipianij yolpakilis, sayoj ke nikan taltikpak peuak mochiua okachi ouijkayomej kemej amo keman ijkon panotoya (xikonixtajtolti Apocalipsis 12:7-9, 12). Satepan, Tekiuaj peuak kinpaleuia itatojtokakauan nikan taltikpak. ¿Keyej? Kinekia kinchipauas, kinmachtis, uan kinpaleuis keniuj okachi kuali tekitiskej uan ijkon kichiuaskej itanejnekilis Dios. Maj tikitakan keniuj techkauiliaj axkan se kuali neskayot keman kitakamatkej Tekiuaj itech nejin eyi taman.

5. ¿Toni tachipaualis itech taueyichiualis mochiuak itech xiuit 1914 hasta ipeujyan 1919?

⁵ Satepan ke Tekiuaj kichipauak iluikak keman kinkalankixtij Satanás uan iamokuali ejekauan, Jiova kinauatij maj kiita keniuj taueyichiujtoyaj itekitikauan nikan taltikpak uan maj kinchipaua. Tanauatijkej Malaquías kimelauak ke nejin tekit yeskia kemej se tachipaualis itech inintaueyichiualis (Mal. 3:1-3). Tein panouani kinextia ke nejin mochiuak itech xiuit 1914 hasta ipeujyan 1919. * Komo tiknekij tipouiskej iniuan ichankauan Jiova akin moajsij iluikak uan taltikpak moneki tiyeskij tichipaujkej, tiyektikej (1 Ped. 1:15, 16). Moneki maj totaueyichiualis amo momanelo ika taneltokalis tein amo melauak uan taltikpaktekiuajyot.

6. 1) ¿Itechkopa akoni tikseliaj tamachtilis tein kitemaka Biblia? 2) ¿Keyej moneki tikitaskej ke tamachtilis tein kitemaka Biblia motelneki?

⁶ Satepan Jesús kikuik tanauatil kemej Tekiuaj uan kiixtalij se “takeual takuaujtamach uan tamatkej”. Nejin takeual nochipa kinmakaskia kuali tamachtilis tein kitemaka Biblia nochin akin pouij itech ‘se sen oloch yetolis de iichkauan’ Jesús akin kinyekpia (Mat. 24:45-47, TNM; Juan 10:16). Itech xiuit 1919, seki tokniuan taixpejpenalmej akin amo miakej peuak kichiuaj ika nochi ininyolo nejin ueyi tekit uan kintamakanij “okseki takeualmej”. Nejin tamachtilis tein takeual techmaka kichikaua totakuaujtamatilis uan okachi tikixtaliaj timoajsiskej tichipaujkej itech totaueyichiualis, totachiualis, totanemilil, tonakayo uan nochi tein toaxka. No techmachtia keniuj tikchiuaskej tekit tein okachi moneki tein mochiujtok noyampa taltikpak: tanojnotsalis. ¿Tikseliaj nochi nejin tamachtilis?

7. 1) ¿Toni tekit tein motelneki kipeualtij Jesús keman yetoya nikan taltikpak? 2) ¿Hasta kemanian mochiujtos nejon tekit?

⁷ Keman Jesús kipeualtij itanojnotsalis nikan taltikpak, kijtoj: “Moneki nitetapouitiuj kuali tanauatilmej ika itekiuajyo Dios, porin yejua ika nechualtitankej” (Luc. 4:43, TNM).  Itech eyi xiuit uan tajko, tanojnotsalis katka tekit tein Jesús kitayekanaltij itech inemilis. Uan kinnauatij imomachtijkauan maj no ijkon kichiuanij: “Keman nanyaskej, xitanojnotsakan ijkon: ‘Iluikaktekiuajyot moualtokijya’” (Mat. 10:7, TNM). Satepan ke moajokuik, Jesús kijtoj ke itatojtokakauan kiteixmatiltiskiaj nejin tanauatil “nochi senmanauak” (Hech. 1:8). Uan motenkauak iniuan ke kisentokaskia tapaleuijtoskia itech nejin tekit tein motelneki hasta itamian tein mochiujtok itech taltikpak (Mat. 28:19, 20).

8. ¿Keniuj Tekiuaj kinolinij itatojtokakauan nikan taltikpak maj tanojnotsakan?

⁸ Itech xiuit 1919, “kuali tanauatilmej ika tekiuajyot” peuak okachi kiteixmatiltiaj (Mat. 24:14, TNM). Tekiuaj taixyekantoyaya ompa iluikak uan kinsentilijka itech taltikpak amo miakej itatojtokakauan akin kinchipaujkaya. Nejin itatojtokakauan kitakamatkej ika yolpakilis tein kinnauatij: kiteixmatiltiskej noyampa taltikpak kuali tanauatilmej ika Tekiuajyot tein moixtalijkaya ne iluikak (Hech. 10:42). Kemej neskayot, itech se ueyi nechikol kampa mosentilijkej akin kayomej itech okseki uejueyi altepemej tein mochiuak Cedar Point (Ohio, Estados Unidos) itech metsti septiembre xiuit 1922, mosentilijkej kemej veinte mil taltikpakneminij. Maj tiknemilikan keniuj tel yolpakkej keman tokniuj Rutherford itech se tanojnots tein motokaytij “El Reino”, kijtoj: “¡Xikitakan, Tekiuaj taixyekantok! Namejuan nankiteixmatiltiaj. Yejua ika, xikteixmatiltikan, xikteixmatiltikan, xikteixmatiltikan Tekiuaj uan itekiuajyo”. ¿Keniuj tanankilijkej akin ompa moajsiaj? Ome mil kiskej kampa mochiuak ueyi nechikol uan yajkej tanojnotsatoj uejka kemej 70 kilómetros. Nejon tonal kitokaytijkej “Día de Servicio”. Se tokniuj takat kijtoj: “¡Amo keman nikelkauas keman techyoleujkej maj tikteixmatiltikan Tekiuajyot uan yolpakilis tein kimachilijkej nochin akin ompa moajsiaj!”. Miakej no ijkon kimachilijkej.

9, 10. 1) ¿Toni mochiuani uan ijkon uelis kinmachtiskej akin kiteixmatiltiaj Tekiuajyot? 2) ¿Keniuj mitsonpaleuiani nejin tamachtilis tein motemaka?

⁹ Itech xiuit 1922 moajsiaj panoua diecisiete mil tanojnotsanij akin kiteixmatiltiayaj Tekiuajyot itech 58 altepemej. Sayoj ke monekia okachi momachtiskej. Itech yekinika siglo, Jesús, akin mochiuaskia Tekiuaj, kinmatiltij imomachtijkauan toni ika tanojnotsaskej, kani uan keniuj (Mat. 10:5-7; Luc. 9:1-6; 10:1-11). No ijkon axkan, Jesús kiita maj nochin akin kichiuaj nejin tekit kimatikan keniuj kichiuaskej uan toni kitekitiltiskej uan ijkon kuali tanojnotsaskej (2 Tim. 3:17). Kinmachtia keniuj tanojnotsaskej itech nechikol kampa kichiuaj kemej Cristo. Se taman tein ika kinpaleuia yejua Escuela tein Techmachtia iTekiyo Dios, tein kinpaleuia tokniuan akin moajsij itech panoua ciento once mil nechikolmej tein moajsij itech nochi taltikpak. Ika nejin tamachtilis, panoua siete millones tanojnotsanij kimatij keniuj kinojnotsaskej uan  kimachtiskej “cada taman [...] tagat” (xikonixtajtolti 1 Corintios 9:20-23).

¹⁰ Uan no, itech inechikol Dios no moixtalianij escuelas kampa kinmachtiaj tayekananij, akin kichiuaj tekit kemej precursor, tokniuan takamej akin ininselti, namikuanij, akin taixyekanaj itech sucursal uan ininnamik, tokniuan takalpanouanij uan ininnamik, uan misioneros. * Seki tokniuan akin kipiakej Tamachtilis ika Biblia tein kiseliaj Tokniuan Namikuanij kijtojkej: “Tel kuali tamachtilis tein tikselijkej kichiuak maj okachi tiktasojtakan Jiova uan techmachtij keniuj okachi uelis tikinpaleuiskej oksekin”.

11. ¿Keyej itatojtokakauan Jesús ueli kisentokaj tanojnotsaj maski Satanás taixnamiki?

¹¹ Satanás kiita ke timochikauaj titanojnotsaskej uan titamachtiskej tein Tekiuajyot kichiuas. Kineki maj amo mochiuaok nejin tekit, yejua ika kitemoua keniuj kinixnamikis akin tanojnotsaj. Sayoj ke tein kichiua amo kualtias. Jiova kiixtalij iKonetsin “ma kinyekantinemi nochi tataman [...] tayekanani [...,] tekiuani [...,] chiuanime uan [...] tanauatiani” (Efes. 1:20-22). Jesús kikui itanauatil tein kipia kemej Tekiuaj uan ijkon kinyekpia uan kinyekana imomachtijkauan. Ijkon kiita maj itanejnekilis iTajtsin mochiua. * Kuali tanauatilmej kisentoka moteixmatiltia, uan tel miakej taltikpakneminij akin kipiaj kuali ininyolo kiixmattokej Jiova. ¡Se ueyi tatiochiualis titapaleuiskej maj mochiua nejin tel ueyi tekit!

12. Ijkuak moixtalij Tekiuajyot uan satepan, ¿toni seki taman mopatani itech inechikol Dios?

¹² Ijkuak moixtalij Tekiuajyot itech xiuit 1914, Tekiuaj peuak kiyektalia kemej kichiuaj tekit itatojtokakauan akin amo kikauaj uan ijkon mochiuas itanejnekilis iTajtsin (xikonixtajtolti Isaías 60:17). Itech xiuit 1919 moixtalij itech sejse nechikol se tokniuj akin yeskia director de servicio tein kiixyekanaskia tanojnotsalis. Seki xiujmej satepan, itech xiuit 1927, moixtalij motanojnotsas kajkalpan itech tonal domingo. ¡Uan xa semi kinyolchikauak tokniuan keman itech xiuit 1931 kiselijkej tokayit itaixpantijkauan Jiova tein kisa itech Biblia! (Is. 43:10-12.) Itech xiuit 1938, amo kiniluiayajok akin monechikouayaj maj kijtouanij akonimej kinixpejpenayaj maj mochiuanij tayekananij. Ijkuak, peuak kinixtaliaj komo kichiujtoyaj tein Biblia tajtani. Itech xiuit 1972, kiyekpiaskiaj nechikol se oloch tayekananij uan amo sayoj se tokniuj akin moixmatik kemej siervo de congregación. Nochin akin kichiujtoyaj tein Biblia kintajtania takamej akin kinekij mochiuaskej tayekananij uan tapaleuianij, kinyolchikaujkej maj tapaleuikan maj kinyekanakan “itaneltokakauan de  Dios” (1 Ped. 5:2). Itech xiuit 1976, Oloch Taojtokaltianij moxeloj itech chikuasen comités. Ijkon kiixyekanaskiaj tanojnotsalis itech nochi taltikpak. Kemej tikitaj, Tekiuaj akin Jiova kiixtalij kisentoka kinpaleuia itatojtokakauan keniuj okachi kuali kichiuaskej tekit ijkon kemej Jiova kineki.

13. ¿Keniuj mitsonpaleuiani tein Tekiuajyot kichiuani itech yekinika cien xiujmej?

¹³ Xiontanemili itech nochi tein Tekiuaj Mesías kichiuani itech yekinika cien xiujmej itech itaixyekanalis. Kinchipauani se oloch taltikpakneminij uan ijkon kiteixmatiltiskej itokay Dios. Kiixyekanani tanojnotsalis itech 239 altepemej uan kinpaleuiani tel miakej taltikpakneminij maj kiixmatikan Jiova. Kinsentiliani panoua chikome millones itatojtokakauan, akin motemakaj ika yolpakilis kichiuaskej itanejnekilis toTajtsin (Sal. 110:3). ¿Melauj ke tein Jiova kichiuani ika iTekiuajyo tein moajsi imako Mesías semi uejueyi uan kualtsitsin? ¡Uan miak taman tikitaskejok!

14. 1) ¿Toni tiktajtaniaj Dios keman timotataujtiaj: “Maj uiki motekiuajyo”? 2) ¿Katiyejua texto moixpejpenak mokuis itech nejin xiuit 2014, uan keyej kitelnamiki?

¹⁴ Maski Jiova kiixtalij iKonetsin kemej Tekiuaj Mesías itech xiuit 1914, ayamo motaminankilia netataujtil “Maj uiki motekiuajyo” (Mat. 6:10, TNM). Itech Biblia moijtojka ke Jesús ‘kinextijtiyaskia taixyekanalis inintatajkoyampa akin kitauelitaj’ (Sal. 110:2). Axkan taltikpaktekiuajyomej akin kinixyekana Satanás kisentokaj kiixnamikij Tekiuajyot. Keman titajtanij maj uiki Tekiuajyot, tein melauj tiktajtanijtokej Dios maj Tekiuaj Mesías uan 144,000 akin tekiuajtiskej iuan maj kintamikij taltikpaktekiuajyomej uan akin kiixnamikij Tekiuajyot. Ijkuak mochiuas tein kijtoua Daniel 2:44, kampa kijtoua ke Tekiuajyot “kikuechos uan kitalis itamilis nochi nejin tekiuajyomej”. Kemaj, kinixpolos nochin taltikpaktekiuajyomej akin kiixnamikij (Apoc. 6:1, 2; 13:1-18; 19:11-21). Nejin amo uejkaua mochiuas. Itech xiuit 2014, iTekiuajyo Dios kiajxitia yekinika cien xiujmej keman moixtalij ne iluikak. ¡Kitelnamiki maj nejin xiuit texto tein moixpejpenak mokuis yejua Mateo 6:10: “Maj uiki motekiuajyo”!

15, 16. 1) ¿Toni tein tel kualtsin mochiuas itech iTekiuajyo Cristo tein uejkauas Mil Xiuit? 2) Kemej Tekiuaj Mesías ¿toni kichiuas Jesús tein ika tamisya? 3) ¿Keniuj ijkon mochiuas itanejnekilis Jiova tein kipialia nochi tein kichijchiuak?

¹⁵ Keman Tekiuaj Mesías kinixpolosya akin kitauelitaj Dios nikan taltikpak, kinpankajkauas Satanás uan iamokuali ejekauan itech se ueyi taltekoch kampa yetoskej mil xiujmej (Apoc. 20:1-3). Keman kinijkuaniskej, Tekiuajyot peuas kichiuas maj taltikpakneminij kinpaleui inemilis Jesús tein kitemakak uan kijkuanis tein itajtakol Adán kiualkuik. Tekiuaj kinajokuis tel miakej akin momikilijkej uan kiixtalis maj motamachti noyampa taltikpak uan ijkon uelis kiixmatiskej Jiova (Apoc. 20:12, 13). Taltikpak mochiuas se xochital, ijkon kemej katka xochital Edén. Uan nochin taltikpakneminij akin tatakamatiskej amo kipiaskejok tajtakol.

¹⁶ Keman tamis iTekiuajyo Cristo tein uejkauas Mil Xiuit, itanejnekilis Jiova mochiuasya. Ijkuak Jesús kimakas iPopaj Tekiuajyot (xikonixtajtolti 1 Corintios 15:24-28). Amo monekisok maj onka aksa akin techtajtouis iixpan Jiova. Nochin ikoneuan Dios itech taltikpak uan iluikak mouikaskej iuan toTajtsin kemej ichankauan.

17. ¿Toni tikixtaliaj tikchiuaskej uan ijkon tikpaleuiskej iTekiuajyo Dios?

¹⁷ Nochi tein kualtsin tein mochiuani itech yekinika cien xiujmej ika itaixyekanalis Jesús, kiyeknextia ke Jiova taixyekantok uan itanejnekilis tein kipialia taltikpak kemaj mochiuas. Yejua ika, maj tiksentokakan tiktekitilikan uan maj nochipa tikteixmatiltikan Tekiuaj uan iTekiuajyo. ¡Tikyekmatij ke Jiova amo uejkaua kinankilis tonetataujtil tein tikchiuaj ika nochi toyolo: “Maj uiki motekiuajyo”!