Alberto, akin katka se soldado kemej majtakti xiuit, kijtoua: “Akin taixyekana itech taneltokalis techtiochiuak ika nejin tajtolmej: ‘Dios yetok namouan’. Sayoj ke nimotajtaniaya: ‘¿Keyej nejua nitemiktiti komo Biblia kijtoua: “Amo xitemikti”?’”.

Ray moajsik itech barco tein kikuikej keman mochiuak Ojpatika Neteuilis itech Nochi Taltikpak. Se tonal kitajtanij akin kinixyekanaya itech taneltokalis: “Tejuatsin tiontejko itech tobarco uan tikontataujtia Dios maj kinpaleui soldados maj tatanikan. Sayoj ke ¿amo no ijkon kichiuaj taixnamikinij?”. Nejon tayekankej tanankilij ke iojuan toTajtsin amo ueli se kimelaua.

¿Tikonnemilia ke amo taixejekol nejon tanankilil? Amo xionmotekipacho, amo sayoj tejuatsin ijkon tiontanemilia.

Jesús kijtoj ke semej tanauatilmej tein okachi motelneki yejua nejin: “Xiktasojta mokniu ijkon keme tejua timotasojta” (Marcos 12:31). ¿Xe kijtoj ke moneki tiktasojtaskej sayoj akin pouij itech toaltepeuj? Amo. Kiniluij imomachtijkauan: “Komo namejuan nanmoyoltasojtatinemij, ijkuakon nochi in taltikpakuani kajsikamatiske ke melau nannomomachtijkauan” (Juan 13:34, 35). Moteixmatiltiskiaj porin kinextiskiaj ueyi netasojtalis. Amo kinekiskiaj temiktiskej, uan amo sayoj yejua, ta no tapaleuiskiaj maski uelis kipoloskej ininnemilis.

Uan yejua nejon tein kichiujkej. Se amaix kijtoua: “Yekinika tayekananij itech taneltokalis, kemej Tertuliano uan Orígenes, kijtouayaj ke itatojtokakauan Cristo amo ueliaj temiktiayaj, yejua ika amo ueliaj tapaleuiayaj kemej se soldado romano” (The Encyclopedia of Religion).

Miakkan itech taltikpak moajsij itaixpantijkauan Jiova. Keman mochiua se neteuilis, kampa yeski itech taltikpak, yejuan akin ojkan moajsij, mochikauaj kinextiskej netasojtalis tein mopialiaj.

Kemej neskayot, itech xiuit 1994 keman kipiayaj neteuilis hutus uan tutsis ompa Ruanda, itaixpantijkauan Jiova senkis amo tapaleuijkej. Keman tateuianij Interahamwe kinkitskijkej ome itaixpantijkauan Jiova hutus tein kintatijkaj seki tutsis tein no katkaj itaixpantijkauan Jiova, kiniluijkej: “Nejon namechpanoua porin nankinpaleuiaj tutsis”. Uan omen kinmiktijkej (Juan 15:13).

¿Keniuj tikonita? Kemej kichiujkej yejuan, ¿mouika iuan tein Jesús kijtoj ke monekia kinextiskej ueyi netasojtalis?