¿Keniuj kiitaya Jesús política?

ITECH Biblia kampa ika tajtoua Jesús, kijtoua ke ijkuak kichiujtoya itekiyo Dios, kiixnamikik seki tachiualismej tein techmatiltia keniuj kiitaya política. Kemej neskayot, tepitsin satepan ke moauij keman kipiaya kemej 30 xiujmej, Satanás kimakasnekia taixyekanalis itech taltikpak. Keman panok tonalmej, miakej taltikpakneminij kinekiaj kitekiuajtaliskej. Satepan, taltikpakneminij kinekiaj kichikaujkauiskej maj mokalaki itech tachiualismej tein mouika iuan política. ¿Toni kichiuak Jesús keman kipanok nejin tachiualismej?

Tayekankej itech taltikpak. Tein ijkuiliujtok itech Biblia kampa ika tajtoua Jesús, kijtoua ke Satanás kimakasnekia “nochi in pueblojme kampa tayekanaj ueyi chiuanime de nikan taltikpak”. Xikonnemili tein Jesús ueliskia kichiuaskia tein ika kinpaleuiskia taltikpakneminij komo kiseliskia nejon taixyekanalis. Sayoj ke Jesús amo kinekik kiselis tein Satanás kimakaya. Se taltikpaknenkej tein kinemilia ke tekiuanij uelis kinpaleuiskej taltikpakneminij, amo kiixtopeuaskia nejon taixyekanalis kemej kichiuak Jesús (Mateo 4:8-11).

Tekiuaj. Itech itonaluan Jesús, miakej kitelnekiaj kipiaskej se tekiuaj tein ueliskia kinyekixyekanaskia uan kitamiskia tatasojtilis. Uan kemej Jesús kichiuaya miak taman tein kimoujkaitayaj, yejua ika kinekiaj maj mokalakiani itech política. ¿Toni kichiuak Jesús? Tajkuilojkej Juan kijtoj: “Jesús kajsikamatik ke in tagayot semi moijsiuilijtoyaj ya para kikitskiske Jesús uan kitayekankaketsaske keme ninrey [...]. Ika ya nojon ya Jesús majchiuak [...] uan yajki kampa ne tepeyo” (Juan 6:10-15). Oksepa Jesús amo kinekik mokalakis itech política.

Maj mokalaki itech política. No ijkon panok seki tonalmej achto ke Jesús momikiliskia. Sekin taltikpakneminij tein katkaj inintatojtokakauan fariseos, uan amo kinekiajok maj kinyekana Ueyi Tekiuajyot tein pouia Roma, ijkon kemej sekin tein kipaleuiayaj itaixyekanalis Herodes, akin kemaj kiseliayaj maj kinixyekana nejon tekiuajyot, tajtotoj iuan Jesús. Yejuan kinekiaj kichikaujkauiskej maj mokalaki itech política, yejua ika, kitajtanijkej ox judíos monekia kiixtauaskej impuestos tein tajtania Roma.

Marcos kijkuiloj keniuj tanankilij Cristo: “¿Keye nankinekij nechichtakauiske ika nijin tanemililis? Xinechualkuilikan se tomin”. Yejuan kiuikilijkej se tomin uan Jesús kiniluij: “¿Akoni nijin [...] ten ixnesi nikan? Uan, ¿akoni nijin tokay ten ijkuiliutok?”. Yejuan tanankilijkej: “Yejua ya in rey César”. Jesús kinnankilij: “Xikmaktilikan César ten  kinamiki xikmaktikan César, uan xikmaktikan Dios ten kinamiki xikmaktikan Dios” (Marcos 12:13-17). Ika nejin tanankilil, amaix Teología Moral kijtoua: “Yejua yekmelauj katka Mesías, sayoj ke nejin ‘mesías amo mokalakiaya itech política’ kemej yejuan [judíos] kinemiliayaj. [...] Jesús kitemakak se tamachtilis tein kinextia ke taneltokalis uan política amo mouikaj”.

¿Kijtosneki ke Jesús amo kitekipachouaya tatasojtilis uan nochi kuejmolmej tein kipiayaj taltikpakneminij? Amo, ta Biblia kinextia ke yejua kinikneliaya keman kinitaya tajyouiayaj (Marcos 6:33, 34). Maski ijkon, Jesús amo mosentilij iniuan taltikpakneminij tein kitemouayaj kitamiskej kuejmolmej itech nejon tonalmej, maski sekin kichikaujkauiayaj.

Ika nejin neskayomej, moita ke Jesús amo keman kinekik mokalakis itech política. Sayoj ke, ¿toni moneki kichiuaskej itatojtokakauan axkan?