1, 2. 1) ¿Toni tikonuelitaskia tikonchiuas itech Xochital? (Xikonita taixkopin ipeujyan tamachtilis.) 2) ¿Toni okseki taman okachi techyolpaktis itech Xochital?

TATITANIL Pablo kijtoj ke moneki timochikauaskej tikchiuaskej nochi tein tiueliskej tein techpaleuis maj tikselikan nemilis nochipa (xikonixtajtolti 1 Timoteo 6:12, 19). Tel miakej itekitikauan Dios kichiaj nemiskej nochipaya itech Xochital. Komo tejuatsin tikonpia nejon nechialis, tikyekmatij ke tikonchia ika nochi moyolo tionnemis ompa. ¿Ueli tionmonemilia keniuj yeski keman mojmostaj tionmeuas ika yolpakilis, amo teyi mitsonkokos uan tionyolseujtos? (Is. 35:5, 6.) Xikonnemili keniuj tel kualtsin yeski keman tionyetos iniuan mochankauan uan motasojikniuan, sekin yeskij akin moajokuiskej (Juan 5:28, 29; Hech. 24:15). Uan no, tikonpias tel miak tonalmej keman tionmomachtis tikonchiuas okseki miak taman. Kemej neskayot, uelis okachi tionmomachtis tein momachtiaj  tamatinij, tiontatsotsonas oso tikonchijchiuas mochan kampa tionnemis.

² Sayoj ke onkas okseki taman tein okachi techyolpaktis. ¿Katiyejua? Se, yejua ke nochin taltikpakneminij kipoujkaitaskej itokay Jiova tein yektik uan sayoj yejuatsin kitakamatiskej (Mat. 6:9, 10). Okse, yejua ke itech taltikpak sayoj moajsiskej taltikpakneminij akin amo kipiaskejok tajtakol, ijkon kemej Jiova nochipa kinekik. Uan no, yolik timochiujtiyaskej tiyektikej uan okachi kuali timouikaskej iuan Dios (Sal. 73:28; Sant. 4:8).

3. ¿Keyej moneki tikchiuaskej axkan tein moneki?

³ Tikyekmatij ke Jiova kichiuas nochi nejin. ¿Keyej? Porin Biblia kijtoua ke “Dios uelis nochi kichiuas” (Mat. 19:25, 26). Pablo kijtoj ke moneki timochikauaskej tikchiuaskej nochi tein tiueliskej tein techpaleuis maj tikselikan nemilis nochipaya. Yejua ika moneki tiknextiskej ika totachiualisuan ke tikneltokaj ke tamilis amo uejkaua ejkos. Komo tiknekij tinemiskej itech Xochital, moneki axkan tikchiuaskej tein moneki tein techpaleuis keman tinemiskej ompa. Maj tikitakan keniuj uelis tikchiuaskej.

4. ¿Toni uelis tikchiuaskej axkan tein moneki tein techpaleuis keman tinemiskej itech Xochital? Xikonijto se neskayot.

⁴ ¿Keniuj uelis tikchiuaskej axkan tein moneki tein techpaleuis keman tinemiskej itech Xochital? Xiontanemili itech nejin neskayot. Keman aksa kiixtalia mokaltalitiuj itech okse ueyi altepet, ¿toni kichiua achto? Mochikaua nemis kemej yeskia ompa moajsiskiaya. Kemej neskayot, uelis peuas momachtis tajtol tein ompa mokui uan kiixmatis keniuj nemij. Xa no uelis kiyekojtiyas takual tein ompa kichiuaj. No ijkon, tejuan uelis tikchiuaskej tein moneki tein techpaleuis keman tinemiskej itech Xochital komo timochikauaj tinemiskej kemej yeskia ompa timoajsiskiajya. Maj tikitakan seki taman tein uelis tikchiuaskej.

5, 6. ¿Keyej moneki maj axkan nochipa tiktakamatikan tein moixtalis itech inechikol Jiova?

⁵ Miakej taltikpakneminij itech nejin tonalmej tanemiliaj kemej Satanás. Kemej neskayot, miakej kinemiliaj ke amo moneki se kitakamatis Dios uan ke uelis se kichiuas tein se kinekis. ¿Toni kiualkuini nejon? Ke taltikpakneminij semi tajyouiaj uan amo yolpakij (Jer. 10:23). Sayoj ke tejuan tikmatij ke Jiova se taixyekankej tetasojtakej. Yejua ika tiktakamatij. Uan itech Xochital, nemilis okachi kuali yeski porin nochin taltikpakneminij kitakamatiskej Dios.

⁶ Komo tiknekij tikchiuaskej tein moneki tein techpaleuis keman tinemiskej itech Xochital, moneki maj axkan nochipa tiktakamatikan tein moixtalis itech inechikol Jiova. ¿Keyej? Porin itech Xochital technauatiskej keniuj monekis titapaleuiskej maj taltikpak mochiua takualtsinkan uan keniuj tikinpaleuiskej akin moajokuiskej maj kiixmatikan Jiova. Onkas tel miak tekit. Yejua ika moneki timotajtaniskej: “Komo itech inechikol Jiova nechtajtaniaj maj nikchiua teisa tein amo nechpaktia, ¿nitatakamatis uan nikchiuas ika nochi noyolo?”.

7, 8. 1) ¿Keyej moneki axkanya tikchiuaskej ika yolpakilis tein moixtalia itech inechikol Jiova? 2) ¿Toni tekit kinmakanij seki tokniuan? 3) ¿Keniuj timomachiliskej itech Xochital?

⁷ Techpaleuis keman tinemiskej itech  Xochital komo tiyolpakij ika tein moixtalis maj tikchiuakan uan titapaleuiaj. Kemej neskayot, keman itech inechikol Jiova techmakaj okse taman tekit, timochikauaj titapaleuiskej uan tiyolpakiskej. Komo axkan nochipa tikchiuaj tein moixtalia itech inechikol Jiova, okachi amo ouij techkisas titapaleuiskej itech Xochital (xikonixtajtolti Hebreos 13:17). Maj tiknemilikan tein kinpanok israelitas keman ajsikej itech tal tein Jiova motenkaujka kinmakas. Yejuan amo uelik kiixpejpenkej kani nemiskiaj, ta sejsemej kiniluijkej kani nemiskej (Núm. 26:52-56; Jos. 14:1, 2). No ijkon, itech Xochital xa amo uelis tikixpejpenaskej kani tinemiskej. Sayoj ke komo nochipa tikchiuaj tein moixtalia itech inechikol Jiova, tiyolpakiskej tiktekitiliskej kampa yeski moixtalis maj tinemikan itech nejon tonalmej.

⁸ Yeski se ueyi tatiochiualis tiktekitiliskej Dios itech Xochital keman taixyekantos. Yejua ika, axkanya tikchiuaj ika yolpakilis tein moixtalia itech inechikol. Sayoj ke kemansa no uelis technauatiskej maj tikchiuakan okse taman tekit. Kemej neskayot, seki tokniuan akin tekitiaj itech sucursal tein moajsi Estados Unidos kintitankej okseko maj tapaleuitij. Uan seki tokniuan takalpanouanij kinixtalijkej maj kichiuakan tekit kemej precursor especial porin xiuejkejya oso kipanotokej okseki taman. Nochin nejin tokniuan kinyolpaktia tein kichiuaj, uan Jiova semi kintatiochiuijtok. Komo tejuan no tiknekij tiyolpakiskej uan maj Jiova techtatiochiui, ¿toni moneki tikchiuaskej? Moneki tiktajtaniskej Jiova maj techpaleui, tikchiuaskej nochi tein tiueliskej itech itekiyo uan tiyolpakiskej ika tein yeski tekit tein kiixtaliskej maj tikchiuakan (xikonixtajtolti Proverbios 10:22). Uan komo itech Xochital tiknekij tinemiskej kampa okachi tikuelitaj, sayoj ke itech inechikol Dios techiluiaj maj tinemikan okseko, tikyekmatij ke amo semi techtekipachos kani tinemiskej oso toni tekit tikpiaskej, ta semi tiktasojkamatiliskej Jiova porin techkauak maj tinemikan itech Xochital (Neh. 8:10).

9, 10. 1) ¿Keyej xa monekis amo tiyolijsiuiskej itech Xochital? 2) ¿Keniuj uelis tiknextiskej axkan ke amo tiyolijsiuij?

⁹ Itech Xochital xa kemansa monekis maj amo tiyolijsiuikan. Kemej neskayot, xa tikinitaskej keniuj yolpakij oksekin keman moajokuij ininchankauan uan inintasojikniuan. Sayoj ke tejuan xa monekis timochiaskej maj moajokuikan tochankauan uan totasojikniuan. Komo techpanoua nejon, ¿tiyolpakiskej iniuan oksekin uan amo tiyolijsiuiskej? (Rom. 12:15.) Komo axkan tikchiaj ika nejmachkayot maj Jiova kichiua tein motenkauak, no ijkon tikchiuaskej satepan (Ecl. 7:8).

¹⁰ No uelis tikchiuaskej tein moneki tein techpaleuis keman tinemiskej itech Xochital komo amo tiyolijsiuij keman mopata kemej momelauaya se tamachtilis ika Biblia. ¿Timomachtiaj ika nejmachkayot nejon tein momelaua uan amo tiyolijsiuij keman amo senkis tikajsikamatij? Komo axkan amo tiyolijsiuij, itech  Xochital okachi amo ouij techkisas amo tiyolijsiuiskej keman Jiova techmakas yankuik tanauatilmej (Prov. 4:18; Juan 16:12).

11. ¿Keyej moneki axkan tikmatiskej titetapojpoluiskej?

¹¹ Tikintapojpoluiskej oksekin no se taman tein techpaleuis keman tinemiskej itech Xochital. Keman Cristo taixyekantos 1,000 xiujmej, tinochin yolik timochiujtiyaskej tiyektikej, hasta akin moajokuiskej (Hech. 24:15). ¿Tikintapojpoluiskej oksekin uan tikinnextiliskej netasojtalis keman mopoloskej? Komo axkan titetapojpoluiaj, amo ouij techkisas kuali timouikaskej iniuan oksekin itech Xochital (xikonixtajtolti Efesios 4:2, 32).

12. ¿Keyej axkan moneki tiknextiskej kualneskayomej tein Jiova techmachtia?

¹² Itech Xochital monekis tiknextiskej kualneskayomej tein Jiova techmachtia axkan. ¿Keyej? Porin itech Xochital xa amo nochipa tikpiaskej nochi tein tiknejnekiskej. Uan xa monekis timochiaskej komo tiknekij tikpiaskej seki taman. Monekis tiyolpakiskej uan timotasojkamatiskej itech tein yeski taman tein tikpanotoskej. Komo tiknextiaj nejin kualneskayomej axkan, tiknextiaj ke tikchiujtokej tein moneki tein techpaleuis keman tinemiskej itech Xochital uan ke tiknekij tinemiskej kampa nochin kitakamatiskej Jiova (Heb. 2:5; 11:1).

13. ¿Toni tikitaskej ke okachi moneki tikchiuaskej itech Xochital?

¹³ Itech Xochital tikpiaskej nochi tein techpoloua tein ika tiyolpakiskej. Sayoj ke okachi tiyolpakiskej porin kuali timouikaskej iuan Jiova (Mat. 5:3, TNM). Tikitaskej ke okachi moneki tiktekitiliskej Jiova uan semi techyolpaktis tikchiuaskej nejon (Sal. 37:4). Yejua ika, komo tiknekij tikchiuaskej tein moneki tein techpaleuis keman tinemiskej itech Xochital, axkan moneki tiktayekanaltiskej tiktekitiliskej Jiova (xikonixtajtolti Mateo 6:19-21).

14. ¿Toni uelis kiixtaliskej kichiuaskej telpochmej uan ichpochmej?

 ¹⁴ ¿Keniuj uelis okachi techyolpaktis tiktekitiliskej Jiova? Se taman, komo tikixtaliaj tikchiuaskej seki taman itech itekiyo Dios. Komo titelpoch oso tiichpoch, xiknemili keniuj uelis tikuis monemilis itech itekiyo Jiova. Xa uelis tikixtalis tikchiuas se taman tekit kampa tikuis miak tonalmej. Itech toamaixuan uelis tikajsis toni tataman tekit uelis se kichiuas. * No uelis timonojnotsas iniuan tokniuan akin miak xiujmejya kichiuanij nejon tataman tekimej. Komo tikixtalia tiktekitilis Jiova, timomachtis miak taman tein mitspaleuis keman tinemis itech Xochital.

15. ¿Toni okseki taman uelis tikixtaliskej tikchiuaskej?

¹⁵ Tinochin uelis tikixtaliskej tikchiuaskej seki taman tein techpaleuis maj okachi kuali tikchiuakan itekiyo Dios. Kemej neskayot, uelis tikixtaliskej timomachtiskej okseki taman kemej titanojnotsaskej. No uelis tiknemiliskej keniuj okachi kuali tikchiuaskej tein tayolmajxitia Biblia. Uan no uelis timochikauaskej okachi kuali titaixtajtoltiskej sentaixpan, tiktemakaskej kuali tanankililmej uan okachi kuali tikpanoltiskej tamachtilismej itech nechikol. Maj tikelnamikikan ke keman tikixtaliaj tikchiuaskej seki taman itech itekiyo Dios techpaleuis maj tiktekitilikan ika okachi yolpakilis uan techpaleuis keman tinemiskej itech Xochital.

16. ¿Keniuj tikmatij ke tiktekitiliskej Jiova yejua tein okachi kuali?

¹⁶ Komo axkan tikchiuaj tein moneki tein techpaleuis keman tinemiskej itech Xochital, ¿timopolouilijtokej se okachi kuali nemilis? Amo. Tiktekitiliskej Jiova yejua tein okachi kuali tein uelis tikchiuaskej. Amo tiktekitiliaj porin aksa techchikaujkauia oso sayoj porin tiknekij timakisaskej keman ejkos tamilis. Tiktekitiliskej  Dios uan kuali iuan timouikaskej techpaleuia maj okachi kuali tinemikan uan maj okachi tiyolpakikan. Ijkon techchijchiuak Jiova. Inetasojtalis uan itaixyekanalis yejua tein okachi kuali tein uelis tikpiaskej (xikonixtajtolti Salmo 63:1-3). Komo tikueyichiuaj Jiova ika nochi toyolo okachi tiyolpakiskej. Akin kitekitilianij Jiova miak xiujmejya kimatij ke okachi kuali tinemij keman tiktekitiliaj yejuatsin (Sal. 1:1-3; Is. 58:13, 14).

17. Xikonmelaua ox itech Xochital uelis timoixpetaniskej uan timoseuiskej.

¹⁷ ¿Uelis timoixpetaniskej uan timoseuiskej itech Xochital? Kemaj, ta Jiova techchijchiuak kemej tiknejnekiskej tiyolpakiskej itech tonemilis. Uan yejuatsin motenkaua ke techmakas tein tiknejnekij (Sal. 145:16; Ecl. 2:24). Sayoj ke maj tikelnamikikan ke okachi techyolpaktia tein tikchiuaj keman tiktayekanaltiaj tokuali uikalis iuan Jiova. Ika nejin tikitaj ke itech Xochital uelis timoseuiskej uan timoixpetaniskej, sayoj ke okachi tiktayekanaltiskej tiktekitiliskej Jiova. Yejua ika, maj ijkon tikchiuakan axkan uan maj titanemilikan itech nochi tein kuali tein Jiova techmaka porin tiktekitiliaj (Mat. 6:33, TNM).

18. ¿Keniuj tiknextiaj ke tikchiujtokej tein moneki tein techpaleuis keman tinemiskej itech Xochital?

¹⁸ Itech Xochital, nemilis okachi kuali yeski ke tein ueli tiknemiliaj. Maj tiknextikan ke tiknekij ompa tiyetoskej keman axkan tikchiuaj tein moneki. ¿Keniuj? Keman tiknextiaj kualneskayomej tein Jiova techmachtia uan keman titanojnotsaj ika yolpakilis. Maj tiyolpakikan tiktekitiliskej Jiova ika nochi tochikaualis. Tikyekmatij ke itech Xochital yejuatsin kichiuas nochi tein motenkauani. Yejua ika maj axkan tinemikan kemej yeskia ompa timoajsiskiajya.