1, 2. ¿Toni netajtanilmej timochiuiliaj keman tikixtajtoltiaj Mateo 24:14?

JESÚS kijtoj ke itech itamian tonalmej noyampa moteixmatiltiskia tein kuali tein kichiuas iTekiuajyo Dios (Mat. 24:14). Axkan, tiitaixpantijkauan Jiova techixmatij noyampa taltikpak porin titanojnotsaj. Sekin kiuelitaj tein tikteixmatiltiaj. Oksekin amo kiuelitaj, maski ijkon, techpoujkaitaj porin tikchiuaj nejin tekit. ¿Uelis tikijtoskej ke sayoj tiitaixpantijkauan Jiova tikchiuaj tekit tein Jesús kijtoj? ¿Keniuj tikyekmatij?

² Itech miakej taneltokalismej kijtouaj ke kiteixmatiltijtokej tein Jesús tamachtij. Kinemiliaj ke se tanojnotsas kijtosneki se kitemakas se tanojnots itech tiopan, itech televisión oso itech Internet. Sekin kinemiliaj ke tanojnotsaj keman kintapouiaj oksekin keniuj kinpaleuij itech ininnemilis kiixmatiskej Jesús. Uan oksekin kinemiliaj ke tanojnotsaj keman  kinpaleuiaj akin tajyouijtokej oso tapaleuiaj kemej tapajtianij oso tamachtianij. Sayoj ke ¿ijkon Jesús kiniluij imomachtijkauan ke monekia tanojnotsaskej?

3. ¿Toni naui taman moneki kichiuaskej itatojtokakauan Jesús ijkon kemej kijtoua Mateo 28:19, 20?

³ ¿Kinekia Jesús maj imomachtijkauan kichianij maj taltikpakneminij kintemouanij? Amo, porin satepan ke moajokuik kiniluij miakej itatojtokakauan: “Xiyakan nochi tech in senmanauak uan xikinnextilikan nochi in taltikpakuani ma yejuan no ma mochiuakan nomomachtijkauan. Uan xikinauijtinemikan [...]. Uan xikinmachtikan de ke ma tatakamatikan nochi ika in tanextililisme ten namechnajnauatiaj” (Mat. 28:19, 20). Kemej tikitaj, imomachtijkauan Jesús moneki kinpaleuiskej oksekin maj no mochiuakan itatojtokakauan, moneki kinauiskej uan moneki kinmachtiskej. Sayoj ke yekinika moneki yaskej kintemotiuij. Se motelmachtijkej kijtoj ke sejse taneltokakej moneki yas kampa yetokej taltikpakneminij, maski nejon kijtosnekis ke kipanauis se ojti oso se ueyi at (Mat. 10:7; Luc. 10:3).

4. ¿Toni moneki se kichiuas tein ika se kinpaleuis oksekin maj mochiuakan itatojtokakauan Cristo?

⁴ ¿Kichiaya Jesús maj imomachtijkauan ininselti tanojnotsanij? ¿Oso kinekia maj ixyeto keniuj sentanojnotsaskiaj? Melauak ke se itatojtokakauj Cristo amo ueli iselti kinnojnotsa taltikpakneminij “nochi tech in senmanauak”. Yejua ika itatojtokakauan monekia sentanojnotsaskej. Yejua nejon kijtosnekia Jesús keman kiniluij itatitaniluan: “Ijkon keme nantakitskiani ika pescados, no ijkon Nejuatsin namechchiuas ke nankintemoske tagayot” (xikonixtajtolti Mateo 4:18-22). Amo kijtosnekia ke sejse imomachtijkauj yeskia kemej se takat akin iselti amichkitskia uan kichia maj amichimej ininselti motsikotij, ta Jesús ininka tajtouaya amichkitskianij akin kinkitskiaj amichimej ika matat. Keman ijkon kinkitskiaj amichimej moneki maj miakej tekitikan chikauak uan maj mosenpaleuikan (Luc. 5:1-11).

5. ¿Toni naui netajtanilmej moneki tiknankiliskej, uan keyej?

⁵ Komo tiknekij tikmatiskej akonimej kiteixmatiltijtokej kuali tanauatilmej ika iTekiuajyo Dios, moneki tiknankiliskej nejin netajtanilmej:

• ¿Toni moneki kiteixmatiltiskej itatojtokakauan Cristo?

• ¿Toni moneki kinolinis maj tanojnotsakan?

• ¿Keniuj moneki tanojnotsaskej?

• ¿Hasta kani moneki ajsis tanojnotsalis, uan kanachi moneki uejkauas?

Tanankililmej techpaleuiskej maj tikmatikan akonimej kichiujtokej nejin tekit tein uelis kinmakixtis taltikpakneminij. Uan nejin techyolchikauas maj tiksentokakan titanojnotsakan (1 Tim. 4:16).

6. ¿Keniuj tikyekmatij ke itaixpantijkauan Jiova kiteixmatiltiaj tein Jesús tanauatij?

⁶ (Xikonixtajtolti Lucas 4:43, TNM.) Jesús kiteixmatiltij “kuali tanauatilmej ika itekiuajyo Dios”. Uan kineki maj imomachtijkauan no kiteixmatiltikan. ¿Katiyejua taneltokalis kinmatiltijtok taltikpakneminij nejon kuali tanauatilmej? Sayoj itaixpantijkauan Jiova. Nejin kimatij hasta sekin akin amo kinyolpaktia tein tikchiuaj. Kemej neskayot, maj tikitakan tein se takat akin katka misionero uan tiopixkat kiluij se itaixpantijkauj Jiova. Yejua kitapouij ke nemik itech miak uejueyi altepemej uan ke itech sejse ueyi altepet kintajtaniaya itaixpantijkauan Jiova toni kiteixmatiltiayaj. Takat kijtoj: “Nochin tel amo tamatij porin nechnankiliayaj sayoj se taman: ‘Kuali tanauatilmej ika iTekiuajyo Dios’”. Tein nejin takat kijtoj kinextia ke amo melauak ke amo titamatij, ta kinextia ke amo tixexeliujtokej porin yekmelauj tiitatojtokakauan Cristo (1 Cor. 1:10). ITekiuajyo Dios no yejua tein okachi ika tajtoua nejin amaix. Itokay ajsitok yejua Tanejmachtijkej. Kiteixmatiltijtok iTekiuajyo Jiova. Mokixtia itech 254 tataman tajtolmej, uan sejse tapoual moamakixtia kemej 59 millones. Tanejmachtijkej yejua amaix tein okachi momoyaua noyampa taltikpak.

7. ¿Keyej tikijtouaj ke akin taixyekanaj itech taneltokalismej kampa kijtouaj kitojtokaj Cristo amo kiteixmatiltiaj tein moneki?

⁷ Akin taixyekanaj itech taneltokalismej kampa kijtouaj kitojtokaj Cristo amo kiteixmatiltiaj kuali tanauatilmej ika iTekiuajyo Dios. Uan komo ika tajtouaj Tekiuajyot, miakej kijtouaj ke se taman tein tikpiaj itech toyolo (Luc. 17:21). Amo tamachtiaj ke Tekiuajyot se taixyekanalis tein moajsi iluikak nion ke Jesús Tekiuaj itech nejon taixyekanalis. Yejuan ika tajtouaj Jesús itech Navidad oso itech Semana Santa. Amo tamachtiaj ke iTekiuajyo Dios kiyektalis kuejmolmej tein onkak nikan taltikpak uan ke amo uejkaua kiixpolos tein amo kuali tein mochiujtok (Apoc. 19:11-21). Senkis moita ke amo kimatij tein Jesús kichiuas kemej Tekiuaj itech iTekiuajyo Dios. Uan kemej amo kiajsikamatij toni kiteixmatiltij Jesús, amo no kiajsikamatij keyej moneki kiteixmatiltiskej.

8. ¿Toni moneki amo techolinis maj titanojnotsakan?

⁸ Imomachtijkauan Jesús amo tanojnotsaj porin kinekij kitaniskej tomin oso kichijchiuaskej uejueyi kalmej. Jesús kinnauatij imomachtijkauan: “Ijkon keme Dios namechtayokolij ya nijin chikaualis, no ijkon xiktekitiltikan uan amo teyi xikintopaluikan” (Mat. 10:8). Nejin kijtosneki ke tanojnotsalis amo se tekit tein ika se kitani tomin (2 Cor. 2:17). Imomachtijkauan Jesús amo moneki tajtaniskej maj kintaxtauikan porin tanojnotsaj (xikonixtajtolti Hechos 20:33-35). Maski kuali moajsikamati tein Jesús tanauatij, itech tel miak taneltokalismej okachi kitayekanaltiaj tajtaniskej tomin uan ijkon kisentokas onkas tekit itech inintiopan uan ika kintaxtauiskej akin kinixyekanaj uan oksekin akin kintekitiliaj. Yejua ika miakej taixyekananij itech nejin taneltokalismej tel tominpiaj (Apoc. 17:4, 5).

9. ¿Keniuj kinextiaj itaixpantijkauan Jiova ke tanojnotsaj porin kinolinia tein moneki?

 ⁹ ¿Tajtanij tomin itaixpantijkauan Jiova itech Kalmej kampa Mosentiliaj oso keman kipiaj uejueyi nechikolmej? Amo. Tekit tein kichiuaj moixtaua ika tomin tein taltikpakneminij kitemakaj ika nochi ininyolo (2 Cor. 9:7). Maski amo kintaxtauiaj porin tamachtiaj tein kijtoua Biblia, itech xiuit tein tipanokej, horas tein tanojnotskej ajsik 1,930 millones uan sejse metsti kitemakakej panoua nueve millones nemachtilmej ika Biblia. Ika miak pakilis kitekitiltiaj inintomin uan kichiuaj nejin tekit. Se motelmachtijkej kijtoj ke tekit tein okachi kichiuaj itaixpantijkauan Jiova yejua tanojnotsaskej uan tamachtiskej. Uan kijtoj ke amo kintaxtauiaj akin kinixyekanaj. Komo ijkon, ¿keyej titanojnotsaj? Porin tiktasojtaj Jiova uan taltikpakneminij. Ika nejin mochiua tein kijtoua Salmo 110:3 (xikonixtajtolti).

10. ¿Keniuj tanojnotskej Jesús uan imomachtijkauan?

¹⁰ ¿Keniuj tanojnotskej Jesús uan imomachtijkauan? Yayaj noyampa kampa moajsiaj taltikpakneminij. Kemej neskayot, tanojnotsayaj itech ojmej uan tanamakaloyamej. Uan no yayaj kajkalpan (Mat. 10:11; Luc. 8:1; Hech. 5:42; 20:20). Keman tanojnotsayaj kajkalpan, tapaleuij maj kinnojnotsanij tataman taltikpakneminij.

11, 12. ¿Keniuj kiitaj tanojnotsalis itaixpantijkauan Jiova uan okseki taneltokalismej?

¹¹ ¿Uan toni kichiuaj akin pouij itech taneltokalismej  kampa kijtouaj kitojtokaj Cristo? ¿Kiteixmatiltiaj iTekiuajyo Dios kemej kichiuak Jesús? Miakej kiitaj ke okachi kuali maj kintaxtauikan taixyekananij maj kitemakakan tanojnotsmej. Sayoj ke taixyekananij amo tanojnotsaj porin kinekij kinpaleuiskej oksekin maj mochiuakan itatojtokakauan Jesús, ijkon kemej yejua kichiuaya. Sayoj kitemouaj maj akin pouij itech inintaneltokalis amo kisakan. Kemansa kinyolchikauanij akin pouij itech inintaneltokalis maj tanojnotsakan. Kemej neskayot, itech xiuit 2001, papa Juan Pablo II kijtoj itech se amat ke católicos monekia tanojnotsaskej kemej tatitanil Pablo, akin kijtoj: “Semi niteikneltij [...] komo amo niktetapouia in yankuik Tajtoltsin de Dios”. Papa no kijtoj ke amo monekia tanojnotsaskej sayoj seki “taixmatinij”, ta nochin akin pouij itech nejon taneltokalis. Sayoj ke semi amo miakej kitakamatkej.

¹² Sayoj itaixpantijkauan Jiova kiteixmatiltiaj ke Jesús peuak taixyekana kemej Tekiuaj itech xiuit 1914. Yejuan kiitaj ke okachi moneki tanojnotsaskej, ijkon kemej tanauatij Jesús (Mar. 13:10). Se amatajkuilol tein ika tajtoua taneltokalismej kijtoj ke itaixpantijkauan Jiova okachi kitayekanaltiaj tanojnotsalis. Kijtoj ke yejuan mochikauaj kinpaleuiskej akin amo kipiaj tein kikuaskej, akin ininselti oso akin mokokouaj, sayoj ke amo kielkauaj ke tekit tein okachi tayekantok yejua kiteixmatiltiskej ke amo uejkaua ixpoliuis tein amo kuali uan keniuj uelis se momakixtis. Uan ijkon tikchiuaj. Tiitaixpantijkauan Jiova tiksentokaj tikteixmatiltiaj nejin uan tikchiuaj ijkon kemej Jesús uan imomachtijkauan kichiujkej.

13. ¿Hasta kani moneki ajsis tanojnotsalis?

¹³ Jesús kijtoj ke imomachtijkauan kiteixmatiltiskiaj iTekiuajyo Dios “tech nochi senmanauak”. Yejua kinnauatij maj kinpaleuikan “nochi in taltikpakuani” maj mochiuakan imomachtijkauan (Mat. 24:14; 28:19, 20). Nejin kijtosneki ke tanojnotsalis moneki mochiuas itech nochi taltikpak (xikonita kampa kijtoua “Tein okachi momelaua”).

14, 15. ¿Keyej ueli tikijtouaj ke ika tein kichiujtokej itaixpantijkauan Jiova itech tanojnotsalis mochiua tein Jesús kijtoj? (Xikonita taixkopimej ipeujyan tamachtilis.)

¹⁴ Kemej tikitakejya, Jesús kijtoj ke iTekiuajyo Dios moteixmatiltiskia noyampa taltikpak. ¿Keyej ueli tikijtouaj ke ika tein kichiujtokej itaixpantijkauan Jiova itech tanojnotsalis mochiua tein Jesús kijtoj? Itech ueyi altepet Estados Unidos, taneltokalismej kampa kijtouaj kitojtokaj Cristo kipiaj kemej 600,000 taixyekananij. Sayoj ke itech nejon altepet, kemej 1,200,000 itaixpantijkauan Jiova kiteixmatiltijtokej tein Jesús tamachtij. Uan itech nochi taltikpak moajsij kemej 400,000 tiopixkamej católicos, sayoj ke panoua 8 millones itaixpantijkauan Jiova tanojnotsaj itech 240 uejueyi altepemej. Senkis moita ke itaixpantijkauan Jiova tanojnotsaj noyampa taltikpak. Uan nejin kiueyitalia Jiova (Sal. 34:1; 51:15).

¹⁵ Tiitaixpantijkauan Jiova tikixtalijtokej tikinnojnotsaskej nochin taltikpakneminij akin tiueliskej achto ke ejkos tamilis. Yejua ika tiktajtolkepanij uan tikixtianij tel miak millones libros, revistas,  tratados uan tayoleualismej itech panoua 700 tataman tajtolmej. Uan amo keman tiknamakaj. Xiuit tein tipanokej tikixtijkej 4,500 millones amaixmej tein kimelauaj tein kijtoua Biblia. No tikixtianij Traducción del Nuevo Mundo de las Santas Escrituras panoua 200 millones itech panoua 130 tataman tajtolmej. Uan kampa timoteixmatiltiaj itech Internet moajsi tamachtilis itech panoua 750 tataman tajtolmej. Sayoj tiitaixpantijkauan Jiova tikchiujtokej se tekit tein se kitelmoujkaita.

16. ¿Keyej tikmatij ke itaixpantijkauan Jiova kipiaj iespíritu Dios?

¹⁶ ¿Kanachi uejkauas tanojnotsalis? Jesús kijtoj ke kisentokaskia mochiujtos hasta keman ejkoskia tamilis. Tiitaixpantijkauan Jiova tiksentokanij titanojnotsanij itech itamian tonalmej porin tikpiaj iyektikatsin espíritu Dios (Hech. 1:8; 1 Ped. 4:14). Sekin akin pouij itech okseki taneltokalismej kijtouaj ke no kipiaj iespíritu Dios. Sayoj ke ¿ueli kichiuaj tein kichiujtokej itaixpantijkauan Jiova itech nejin itamian tonalmej? Sekin kiyejyekouanij tanojnotsaskej kemej tejuan, sayoj ke amo uelinij. Oksekin tanojnotsaj, sayoj ke sayoj seki xiujmej. Uan oksekin youij kajkalpan, sayoj ke amo ika tajtouaj iTekiuajyo Dios. Moita ke yejuan amo kichiujtokej tekit tein Jesús kipeualtij.

17, 18. 1) ¿Keniuj tikyekmatij ke sayoj itaixpantijkauan Jiova kiteixmatiltiaj iTekiuajyo Dios? 2) ¿Keniuj ueli tikchiuaj nejin tekit?

¹⁷ Ika amo miak tajtolmej, ¿akonimej kiteixmatiltijtokej axkan iTekiuajyo Dios? Sayoj itaixpantijkauan Jiova. ¿Keniuj tikyekmatij nejon? Yekinika, porin tikteixmatiltijtokej tein moneki: iTekiuajyo Dios. Ojpatika, porin tikchiujtokej kemej moneki, tejuan tiyouij tikintemotij taltikpakneminij. Expatika, porin techolinia tein moneki: netasojtalis tein tikpialiaj Jiova uan taltikpakneminij. Naujpatika, porin tekit tein tikchiujtokej tel uejka ajsi, porin tikinnojnotsaj akin kayomej itech nochi tataman altepemej uan tajtouaj nochi tataman tajtolmej. Uan makuiltika, porin tiksentokaskej titanojnotsaskej hasta keman ejkos tamilis.

¹⁸ Semi kualtsin tikitaskej nochi tein itekitikauan Jiova kichiujtokej tein kinpaleuia maj kiteixmatiltikan iTekiuajyo Dios itech itamian tonalmej. ¿Keniuj ueli tikchiuaj? Tatitanil Pablo kijtoj ke Dios totech tekiti uan techpaleuia maj tiknekikan uan maj tiuelikan tikchiuakan (Filip. 2:13). Yejua ika tiktajtaniaj Jiova maj kisentoka techmaka chikaualis tein techpaleuis maj tiksentokakan titanojnotsakan nochi tein tiueliskej (2 Tim. 4:5).