1, 2. 1) Xikonijto ika seki tajtolmej tein kichiuak se takat akin iaxka katka se uvajtal. 2) ¿Keniuj nejin tetapouilis kinextia kualtakayot uan ueyi teiknelilis?

SE TAKAT kipiaya se uvajtal. Se tonal kisak tel kualkan kintemoto tekitinij. Kiniluij kanachi kintaxtauiskia, uan takamej kinekkej. Satepan, takat kiitak ke kipolouayaok okachi tekitinij. Yejua ika nejon tonal miakpa kintemoto oksekin. Uan nochin kiniluij ke kuali kintaxtauiskia. Keman tamik tonaltekit, kinsentilij nochin takeualmej porin yaya kintaxtauitiya. Maski sekin tekitikaj nochi tonal uan oksekin sayoj se hora, takat nochin kinmakak sayoj se taxtauil. Sayoj ke takamej akin tekitikaj nochi tonal kualankej. Takat kinelnamiktij ke yejuan ijkon motenkaujkej ke kintaxtauiskia. No kiniluij ke yejua uelia kinmakaya itakeualuan tomin tein kinekiskia. Ompa kintajtanij ox kinexikoluiayaj porin yejua kualtakat katka (Mat. 20:1-15).

² Jesús kitetapouij nejin porin kinekia tamachtis se taman tein motelneki ika “teiknelilis de Dios” (xikonixtajtolti  2 Corintios 6:1). Sekin xa kinemiliskej ke takamej akin tekitikaj nochi tonal monekia kintaxtauiskej okachi. Sayoj ke akin iaxka uvajtal kinnextilij ueyi teiknelilis akin amo miak hora tekitikaj. Se motelmachtijkej kijtoj ke tajtol tein itech Biblia mokepa kemej “ueyi teiknelilis” kijtosneki “se taman tein nenkaj temakaj uan tein amo se motanilia” uan tein amo tenamiki se kiselis.

3, 4. ¿Keyej Jiova kinnextilia ueyi teiknelilis nochin taltikpakneminij, uan keniuj kichiuak?

³ Biblia kijtoua ke Jiova ‘techtayokolia’ iueyi teiknelilis (Efes. 3:7). Kemej amo ueli senkis tiktakamatij Jiova itech nochi, amo technamiki maj techikneli, ta technamiki maj timikikan. Tekiuaj Salomón kijtoj: “Amo onkak nion se takat yolmelauak nikan taltikpak akin nochipa kichiua tein kuali uan amo keman tajtakoua” (Ecl. 7:20). Miak xiujmej satepan, tatitanil Pablo kijtoj ke “tinochin timotajtakolmakakke iixpantsinko Yejuatsin uan uejka [tinentinemij] de ne chipaukanemilis ten Dios kimonekiltia” uan ke “tajtakol keme yeskia se patrón ten tetaxtauia sayo ika mikilis” (Rom. 3:23; 6:23a).

⁴ Jiova kinteltasojta nochin taltikpakneminij. Yejua ika kiualtitanik iKonetsin akin sayoj setsin maj toka momikiliki. Nejin yejua tein okachi ika kinextij iueyi teiknelilis (Juan 3:16). Pablo kijtoj ke “Dios konueyipantalij uan konmouiskapouak Cristo Jesús porin ne tajyouilis ten kipanoko Yejuatsin kuak momikiliko” uan ke Jesús toka momikilij porin “Totajtsin Dios techyoliknelij” (tejuan tiktalilijkej cursivas; Heb. 2:9). Kemaj, “Totajtsin Dios techtayokolia yejua ne yek nemilis nachipa porin tipoutinemij iuan Totekotsin Cristo Jesús” (Rom. 6:23b).

5, 6. ¿Toni kiualkui komo tikauaj maj techyekana 1) tajtakol? 2) iueyi teiknelilis Jiova?

⁵ ¿Keyej titajtakouaj uan timomikiliaj? Biblia kijtoua ke ika itajtakol Adán “mikilis kinmapachojtiuala inpan nekes ten motajtakolmakatiualayaj”. Kemej itech tiualeuaj Adán, tinochin titajtakouanij uan timomikiliaj (Rom. 5:12, 14, 17). Maski ijkon, uelis tikchiuaskej maj tajtakol amo techyekana. ¿Keniuj? Keman titakuaujtamatij itech inemilis Cristo tein kitemakak. Ijkon tikauaj maj iueyi teiknelilis Jiova techyekana. Biblia kijtoua: “Kuak kachi moueyinextiko ya in tajtakol, ijkuakon no kachi ok tikyekajsikamatiltikoj ke moueyisouako in ueyi teiknelilis de Dios. Uan ijkon in tajtakol techmapachojtiualaya topan para techuikas tech in mikilis. Pero Dios ika iueyiteiknelilis [...] techpoua ke tiyolchipauke porin titakuautamatinemij iuan Cristo Ikonetsin de Dios, uan no techtayokolijtiyas ne yek nemilis ten amo keman tamis” (Rom. 5:20, 21).

⁶ Maski titajtakouanijok, amo moneki tikauaskej maj techyekana tajtakol. Yejua ika, keman tikchiuaj teisa tein amo kuali, tiktajtaniaj Jiova maj techtapojpolui. Pablo kijtoj: “Amo namechyekantiyas ok ne tanauatil de Moisés. Ta, namechyekantiyas ne iueyiteiknelilis de Dios. Ika ya nojon in tajtakol amo uelis ok namechmapachojtiyas ok” (Rom. 6:14). Komo tikauaj maj iueyi teiknelilis Jiova techyekana, ¿toni tein kuali  tikseliskej? Pablo kijtoj ke tikixtopeuaskej “amokuali nemilis uan [...] tanejnekilisme ten ualeutok iuan in taltikpakuani san” uan tinemiskej ika “kuali taixejekolis”, tikpiaskej “yolmelaukanemilis” uan “[tikmouistiliskej] Totajtsin Dios nikan taltikpak” (tejuan tiktalilijkej cursivas; Tito 2:11, 12).

7, 8. ¿Toni kijtosneki keman moijtoua ke Jiova techtayokolia “nochi tataman uelilis”? (Xikonita taixkopimej ipeujyan tamachtilis.)

⁷ Tatitanil Pedro kijtoj: “Xikinpaleuijtiyakan in taneltokani ika nochi tataman uelilis ten Dios namechtayokolij ya” (tejuan tiktalilijkej cursivas; 1 Ped. 4:10). ¿Toni kijtosneki keman kijtoua ke Jiova techtayokolia “nochi tataman uelilis”? Kijtosneki ke maski tikpiaskej tein yeski kuejmol, yejuatsin techmaka nochi tein techpaleuis maj titaxikokan (1 Ped. 1:6).

⁸ Kemej tikitaj, Jiova technextilia iueyi teiknelilis ika miak taman. Tatitanil Juan kijkuiloj: “Tinochi tikselijtinenke ya nochi tataman tapaleuilis [...]. Uan Totajtsin Dios technenepantalilia [okachi] ok iteiknelilis” (Juan 1:16). Kemej Jiova technextilia iteiknelilis ika miak taman, tikseliaj miak tatiochiualismej. Maj tikitakan seki nejon tatiochiualismej.

9. 1) ¿Keniuj techpaleuia iueyi teiknelilis Dios? 2) ¿Keniuj tiknextiaj ke timotasojkamatij?

⁹ Jiova techtapojpoluia. Ika iueyi teiknelilis, Jiova techtapojpoluia, sayoj ke moneki timoyolnonotsaskej uan timochikauaskej amo tikchiuaskej tein amo kuali (xikonixtajtolti 1 Juan 1:8, 9). Pablo kinmelauilij tokniuan taixpejpenalmej akin nemiaj itech itonaluan keniuj Jiova tetapojpoluia. Yejua kijtoj: “Dios techkixtij ya [...] kampa ne sayo mochiutok chikaualis den tajtakol ten kualkui tayouayanilot. Uan no Yejuatsin techpanoltij ya kampa iuelilispan de Itasojkonetsin para ma techyekantinemi in Cristo Jesús. Uan Cristo techmakixtij [...] kuak mimilauik iesyotsin. Ika ya nojon Totajtsin Dios techtapojpoluij de nochi totajtakoluan” (Col. 1:13, 14). Komo tiktasojkamatij tein Dios toka kichiuak, tiknextiskej ika totaueyichiualis. Uan kemej yejuatsin techtapojpoluia, uelis tikseliskej okseki miak tatiochiualismej.

10. ¿Keniuj techpaleuia iueyi teiknelilis Dios?

¹⁰ Ueli kuali timouikaj iuan Dios. Kemej titajtakouanij, peua tikixnamikij Dios keman tiyolij. Maski ijkon, tatitanil Pablo kijtoj: “Tech ne tonalme kuak tiktauelitstinemiaj ok Dios, ijkuakon Totajtsin Dios kichiuak ke ma moyoltali touan uan ke tejuan ma tiyolseutinemikan iuantsin [...] kuak momikilij Ikonetsin” (Rom. 5:10). Ika inemilis Jesús tein kitemakak, ueli timotokiaj iuan Dios. Sayoj ke ¿keniuj mouika nejin ika iueyi teiknelilis Dios? Pablo kimelauak keman kiniluij tokniuan taixpejpenalmej: “Totajtsin  Dios techpouas ke tiyolchipauke [...], kuak titakuautamatij iuan Cristo Jesús. Uan ijkon tikpixtinemij ne yolseuilis iuan Dios [...]. Uan ika por Cristo, Yejuatsin Dios techseliltij ya iteiknelilistsin ten axkan tikpixtinemij” (Rom. 5:1, 2). Se tel ueyi tatiochiualis maj ueli kuali timouikakan iuan Jiova.

11. ¿Keniuj tokniuan taixpejpenalmej kinualkuij okseki ichkamej itech melaujkayot?

¹¹ Uelis timoajsiskej timelaujkej iixpan Dios. Tanauatijkej Daniel kijkuiloj ke itech itamian tonalmej taixpejpenalmej kinualkuiskiaj “miakej itech melaujkayot” (xikonixtajtolti Daniel 12:3). ¿Keniuj tokniuan taixpejpenalmej kichiuaj nejin? Yejuan kinmatiltiaj tel miakej akin pouij iniuan ‘okseki ichkamej’ tein kuali tein kichiuas iTekiuajyo Dios uan kinmachtiaj itanauatiluan Jiova (Juan 10:16). Ijkon kinpaleuiaj nejin taltikpakneminij maj Dios kinita ke melaujkej. Nejin sayoj ueli mochiua porin Jiova kinextia iueyi teiknelilis. Pablo kimelauak: “Totajtsin Dios [...] techpouak ke tiyolchipauke sayo porin techueyiyoliknelij. Uan ijkon Dios kichiuak porin Totekotsin Cristo Jesús kixtauak ya nochi totajtakoluan uan techmakixtij ya” (Rom. 3:23, 24).

12. ¿Keniuj mouikaj iueyi teiknelilis Dios uan netataujtil?

¹² Uelis timotokiskej iuan Dios ika netataujtil. Kemej Dios technextilia ueyi teiknelilis, ueli tiktataujtiaj. Pablo kijtoua ke yejuatsin tokotsyetok itech itrono oso “ichikaukauelilispan” kampa “tikajsij ne iteiknelilis” uan techyoleua maj timotokikan “ika ueyi yolchikaualis” (Heb. 4:16a). Itechkopa Jesús  ueli tiktataujtiaj Jiova keman yeski. Nejin se ueyi tatiochiualis. Pablo kijtoua: “Tikpiaj ueyi yolchikaualis para ijkon timotokiske inauaktsinko Totajtsin Dios ika ne totakuautamatilis ten tikpiaj tech Cristo” (Efes. 3:12).

13. ¿Keniuj techpaleuia iueyi teiknelilis Jiova keman moneki?

¹³ Ueli tikseliaj nepaleuil keman moneki. Pablo techyolchikauak maj tiktataujtikan Jiova keman yeski, porin “ompa tikajsij ne iteiknelilis uan ne itapaleuilis para timopaleuiske tech ne momento kuak moneki” (Heb. 4:16b). Nochipa keman tikpiaj se kuejmol, ueli tiktajtaniaj Jiova maj techpaleui. Maski amo technamiki, yejuatsin technankilia. Miakpa techpaleuia inintechkopa tokniuan itech nechikol. Kemej yejuatsin technankilia keman tiktataujtiaj, ueli “tikijtojtinemij ka yolchikaualis ijkuin: Totekotsin Yejuatsin nechpaleuijtinemi. lka ya nojon amo nimoyolmoutis tenika tensa uelis nechchiuilis in tagayot” (Heb. 13:6).

14. ¿Toni okse nepaleuil tikseliaj porin Jiova technextilia iueyi teiknelilis?

¹⁴ Ueli tikseliaj yolseuilis. Okse ueyi tatiochiualis tein tikseliaj porin Jiova technextilia ueyi teiknelilis yejua yolseuilis tein techmaka keman timotayokoltiaj (Sal. 51:17). Keman tokniuan akin nemiaj Tesalónica kintajyouiltiayaj, Pablo kinijkuilouilij: “Totajtsin Dios, Yejuatsin techneltasojtak uan techmakak ne yolseuilis ten amo keman tamis. Uan no Yejuatsin techmaktilij ya se kuali takuautamatilis sayo porin Yejuatsin techyoliknelij. Uan tiknekij ke Totekotsin Jesucristo uan Totajtsin Dios ke ma Yejuatsin namechyolchikautiu uan ma namechmaka chikaualis” (2 Tes. 2:16, 17). ¿Melauj ke techyolseuia tikmatiskej ke Jiova techtasojta uan ke iueyi teiknelilis kiolinia maj techyekpia?

15. ¿Toni tikchiaj tikseliskej porin Dios technextilij ueyi teiknelilis?

¹⁵ Ueli tikchiaj tinemiskej nochipaya. Kemej titajtakouanij, komo Jiova amo techpaleuiskia amo ueliskia tikchiaskej tikseliskej tein kuali satepan (xikonixtajtolti Salmo 49:7, 8). Sayoj ke yejuatsin techiluia ke uelis tikchiaskej se taman tein tel kualtsin. ¿Toni? Jesús kijtoj: “Yejuatsin itanejnekilis ke nochi naken nechitaske Nejuatsin uan takuautamatiske nouantsin [...,] kiseliske ne nemilis nachipa” (Juan 6:40). Kemej tikitaj, kemej Jiova technextilia ueyi teiknelilis ueli tikchiaj tinemiskej nochipaya. Pablo kijtoj: “Totajtsin Dios kinnextiliko ya nochi in taltikpakuani de niueyiteiknelilis, uan ika nijin teiknelilis uelis kinmakixtis nochi in taltikpakuani” (Tito 2:11).

16. ¿Keniuj seki tokniuan itech yekinika siglo kiitayaj iueyi teiknelilis Dios?

¹⁶ Kemej tikitakejya, kemej Jiova technextilia ueyi teiknelilis tikseliaj miak tatiochiualismej. Sayoj ke moneki amo tiknemiliskej ke uelis titajtakoskej porin Jiova technextilia ueyi teiknelilis. Seki tokniuan itech yekinika siglo “ika ne teiknelilis [mopaleuiayaj okachi] ok yejuan ma nentinemikan tech in tajtakolnemilis” (Jud. 4). Nesi ke nejin tokniuan kinemiliayaj ke ueliskia tajtakoskej uan kichiaskej maj Jiova nochipa kintapojpoluiani. Hasta kitemojkej kichiuaskej  maj okseki tokniuan no tajtakouanij. Axkan, akin yeski akin kichiua nejon kinextia ke senkis amo kipoujkaita iueyi teiknelilis Dios (Heb. 10:29).

17. ¿Toni tayolmajxitij Pedro?

¹⁷ Axkan, Satanás kinkajkayauani seki tokniuan maj kinemilikan ke uelis tajtakoskej uan amo teyi panos porin Jiova kiniknelis. Melauak ke Jiova kineki kintapojpoluis tajtakouanij akin moyolnonotsaj. Sayoj ke no kichia maj timochikauakan timoijkuaniliskej totanejnekilis tein amo kuali. Yejuatsin kichiuak maj tatitanil Pedro tayolmajxitiani: “Ximoyektachilijtiyakan para ma amo [namechuikakan] ne tamouiskapoloani tech in takajkayaualis. Porin komo ijkon mochiuas, ijkuakon nankipoloaj ya namotakuautamatilis. Ta, nikneki ximoyolmajxitijtiyakan ika iteiknelilis de Totekotsin Jesucristo uan kachi ok xikixmatiyakan Totemakixtijkatsin” (2 Ped. 3:17, 18).

18. ¿Toni moneki tikchiuaskej porin Jiova technextilij ueyi teiknelilis?

¹⁸ Komo tiktasojkamatij iueyi teiknelilis Jiova, moneki tikuiskej tein yejuatsin techmaka uan ika tikueyichiuaskej uan tikinpaleuiskej oksekin. ¿Keniuj uelis tikchiuaskej? Pablo kijtoj ke “Totajtsin Dios techyoliknelijtinemi uan techmajmaktilijtinemi tataman iuelilisuan”. Kijtoj ke komo Dios techmakatok “uelilis para titapaleuijtinemiske, ijkuakon ma tikinpaleuijtiyakan in tagayot”. Uan no kijtoj: “Keme Dios techmaktilij ya ne uelilis de titamachtijtinemiske ika in Tajtoltsin de Dios, ijkuakon ma titamachtijtinemikan ika nochi tochikaualis. Uan keme Dios techmaktilij ya ne uelilis de titeyolmajxitijtiyaske, ijkuakon ma tikinyolmajxitijtinemikan in tokniuan”. Satepan kijtoj: “Keme Dios techtayokolij ya ne uelilis de titeyolikneliske, ijkuakon ma tikinyoliknelijtinemikan in pueblojuani ika ueyi yolpakilis” (Rom. 12:6-8). ¿Toni kijtosneki nochi nejin? Ke kemej Jiova technextilia ueyi teiknelilis, moneki timochikauaskej nochipa titanojnotsaskej, tikinmachtiskej oksekin ika Biblia, tikinyolchikauaskej tokniuan uan tikintapojpoluiskej akin techyolxokoliaj.

19. ¿Toni tikitaskej itech okse tamachtilis?

¹⁹ Kemej Jiova techmakani miak tatiochiualismej porin technextilia ueyi teiknelilis, moneki timochikauaskej “[titanojnotsaskej] ika in yankuik Tajtoltsin ten kualkui ne teiknelilis de Dios” (Hech. 20:24). Itech okse tamachtilis tikitaskej keniuj tikchiuaskej.