Akin kuali tekiti kichiua tein yeski tekit. Kiuelita tekitis para moixpanoltis uan no kinpaleuis oksekin, maski miakej amo kiuelitaj tekit tein kichiua.

Maski amo tiknekiskej, mojmostaj tinochin moneki tikchiuaskej miak taman. Uan no, semi tapaleuia komo kuali titekitij, porin miakej amo kiuelitaj chikauak tekitiskej (Eclesiastés 3:13).

“Keman kuali nikchiua se tekit, niyolpaki uan kuali nimomachilia. Yejua ika, okachi nechyolpaktia nitekitis. Uan no keman tikchiua se kuali tekit, kuali moka tajtouaj” (Reyon).

BIBLIA KIJTOUA: “Nochi tekit tein chikauak tapaleuia” (Proverbios 14:23).

Nejin tayolmajxitilismej mitspaleuiskej xikita tekit kemej moneki.

Ximomachti kuali titekitis. Keman tikchiujtos se tekit, amo xikchiujtok okse taman, kemej keman tikchiujtos motarea, titachipaujtos kalijtik oso titekititos. Komo kuali tikchiua se tekit, xiktemo keniuj okachi kuali tikchiuas oso okachi ijsiujka. Komo okachi kuali tikchiua, okachi tiyolpakis.

BIBLIA KIJTOUA: “¿Tikitani se takat akin kuali kichiua itekiuj? Moajsis ininixpan tekiuanij, amo ininixpan takamej akin amo ueyichiuanimej” (Proverbios 22:29).

Ininka xitanemili oksekin. Miakpa keman tikchiua tein moneki, no kinpaleuia oksekin. Xiknemili, komo nochipa tikchiua tekimej tein mitsnauatiaj ompa kalijtik, semi tikinpaleuis mochankauan.

BIBLIA KIJTOUA: “Okachi se yolpaki keman se kitemaka ke ijkuak temakaj” (Hechos 20:35).

Ximochikaua okachi titekitis. Amo sayoj xikchiua tein mitsiluiskej, ta xikchiua okachi. Ijkon amo mitsiluijtoskej toni moneki tikchiuas. Xa monekis titekitis okachi, sayoj ke, amo porin mitsiluiskej ta porin tejuan tikneki (Mateo 5:41).

BIBLIA KIJTOUA: “Amo nikneki xikchiua porin nimitsnauatia, ta porin yekmelauj tikneki” (Filemón 14).

Xitekiti ika taixejekolis. Kuali tikchiuaskej totekiuj amo kijtosneki ke nochipa moneki titekititoskej. Kuali yetok maj se tekiti, sayoj ke, no moneki timoseuiskej.

BIBLIA KIJTOUA: “Okachi kuali maj se moseui ke chikauak se motekitiltis uan se kitojtokas ejekat” (Eclesiastés 4:6).