“MATISA! Mati du ra ǂkhai nētsē?”

Hoa da ge nē tawede ǀgauba sîsen-ū tsâ hâ. ǀNîsi du ge ǃomdi tsîna ra sîsen-ū khoe-e tawedesa. ǃKhaisa xu ǃkhais tsî ǃhaodi ǃoagus tsîna î ge tawede mîde ǀnîsi ra ǀkhara xawe tawede ǀgaub ge hoaba a ǀgui. Khoe-ets ga tawede tama ga ra io, o î ge nēsa ra ǁgau ǀnamǀnamsa tama du hâ ǃkhaisa tsî a ǂūoǃnâsa.

Xawe hoa khoe taman ge nau khoena ra tawede na. ǀNîn ge ǀnîsi ra tao tamas ka io ra ǃgôaǁnâsen. ǀNîn ge khoen hîna ǀnî hâ ǃhaos, ǃhaoǃnâsi khaoǃhūb tsî ǀhûhâsib tsîna xu ra hâna tawedes xa a ǃgombahe. Xawe ǀgui tawede mîs tsîn ge khoe-e a tsâǀkhā ǁkhā.

Dîsen re: ‘Khoe-e tawedesa tae-e a dīǀoaǀoa ǁkhā? Tsî Elobmîsa tae-e a ǁkhāǁkhā te ǁkhā khoe-e tawedes xa?’

Apostel Petrub ge Korneliuba ǀhaohâb ǃnâ a ǁkhoreǁhare o, ob ge ge mî ‘Elob ge khoe-i lkhā-e ū tama hâ’ di. (ǃNǃkh. 10:34) Egab ge Petruba ge xoa ‘xawen nî hoana ǃhobasen ǃkhaisab’ ge Eloba ra ǂhâba di. (2Pet. 3:9) Nē mîde da ge amaba ra ǁkhāǁkhāsen khoe-i ǃoa a ǁnaeǁgau ǁkhā. Xaweb ge Petruba Xristeǁîna ge ǂkhâǃnâ în: “Mâ-i hoa-e ǃgôa. ǃGâsasiba ǀnam.” (1Pet. 2:17) Nēsa ǂkhâǃnâ da tide î da hoa khoena tawede ǁîn ǃhaos tsî ǃhaoǃnâsi khaoǃhūba kō tamase? Nēs ge ǁîna ǃgôasib tsî ǀnammi tsîna nî ǁgau.

Paulub ge ǀhaohâb ǃnâ hâ ǃgâsana ge ǂkhâǃnâ în: ‘ǃKhōǃoagu, Xristub ge ǁkhāti sada . . . ǃkhōǃoa khami.’ (Rom. 15:7) Paulub ge ǃgâsan hîna ge ǁîba ‘ǁkhaeǂgaos’ ase ība îna gere ǃgaoǃgâ. Nētsēs tsînan ge ǃgâsana ǀgaiǀgaihesa ǂhâ hâ Satanni Elob khoena ra mâǃoa amaga.​—Kol. 4:11; J.ǂHa. 12:12, 17.

Elobmîs aiǁgaudi ge ra ǁgau tawedes khoena ǁkhoreǁharesase ǀgui tsâ kai tama hâsa.

ǁAeb ge hā o îb Elob ǀgôaba Marias ǁhās ǃnâ ǂgā-e ob ge Jehovaba ǁîb ǀhomǃgāba ge sî îb Marias ǀkha sī ǃhoa. ‘Tawede si ta ra sas ǀkhomma go hōsa!’ dib ge ǀhomǃgāba ge tsoatsoa, “ǃKhūb [Jehovab, NW] ge hâǀkhā si” hâ. Marias ge ge “ǃhuri” ǀhomǃgāb tae-i ǃaroma ǁîs ǀkha ra ǃhoa ǃkhais ǃgao. Nēsab ge mû o, ob ge ǀhomǃgāba ge mî: “Tā ǃao, Mariase, ǀkhomas go Elob tawa hō xuige.” ǁÎb ge ge ǁguiǃā Elob ǂâis a ǃkhaisa îb Mesiaba ǁîs xa ǃnaehe. Marias ge ge ǃeream: “ǃKhūb [Jehovab, NW] di ǃgāta ge tita; mîts go khami a-i īǀkhā te; ob ge ǀhomǃgāba ǁîsa xu ge bē.”​—Luk. 1:26-38.

Jehovab xa ge sîhe ǀhomǃgāb ge kai aiǂhanuba ge ūhâ i ǀoasa kurusa ūhâ tama khoes ǀkha sī ǃhoasa. ǁÎb ge Mariasa aibe ge tawede. Nē aiǁgausa xu ǁkhāǁkhāsen ǁkhā î da a? Khoena da ge nî tawede tsî nî ǂkhâǃnâ. ǀOro mîdi ǀkha da ge khoena a hui ǁkhā tsî ǁîn ǂgomǃgâsiba nî omkhâi ǁîn Jehovab khoen di ǃâba ra kuruǂui ǃkhais ǃgao.

Paulub ge ǂgui ǃgâsana ǂKhari Asiab tsî Europab tsîn ǃnâ ge ǂan i. ǁÎb sîǂkhanidi ǃnâb ge ǀō-aisa tawede de ge ǃkhōǂgā hâ i. Nēsa da ge Romeǁîn  16ǁî danaǃâs ǃnâ ra mû. Paulub ge ǂgui Xristeǁî ǃgâsana ge tawede. ǁÎb ge Febes ǃoa “sada ǃgâsas” di ge mî tsî ǃgâsana ge ǂkhâǃnâ în “ǁîsa . . . . ǃKhūb ǃnâ ǃkhōǃoa . . . . ǃanuna anu hâ khami, tsî du nî ǁîsa hui ǃkhaisa.” Paulub ge Akwilab tsî Prisilas tsîna ge tawede tsî ge mî “ti ǀhaoǃoaba-aora Xristub Jesub ǃnâ tawede.” ǁÎb ge ǀnîn hîna nētsē ǂansa taman tsîna ge tawede. “Tawede Epenetub, ti ǀnamǀnamsab” tsî “tawede Trifenas tsî Trifosas tsîra, ǃKhūb ǃnâ ge sîsen ra.” Paulub ge amabes ǃnâ ǁîb ǃgâsana gere tawede.​—Rom. 16:1-16.

ǂÂi re, matin ge nē ǃgâsana gere ǃgâiaǂgao ǀgausa tawedehen ge ǃkhais ǃgao, ǃamku ǀgaub ǃnâ. ǁÎn ǀnammi ǁîn ǁaegus tsî Pauluban ge ūba hâ îb ge ge ǀgai. Tsî nē tawede de gere ǁnâu Xristeǁîn tsîn ge ge ǂkhâǃnâhe în ǂgoms ǃnâ mâǀgai. Ama as ge tawede gus ge khoexaǃnâ ǃgâiǃgâibasensa ra ǁgau tsî koagus ge ǀhōsasisa ra ǀgai kai tsî Elob ǃoaba-aona ra ǀguiǃnâxa kai.

Paulub ge Puteoli di ǀon hâ ǃās tawa a sī tsî Romes ǃoa gere ī o, on ge ǁnāpa hâ Xristeǁîna ǁîba ge khoreǁhare. ǁÎnab ge mû o, “ob ge Eloba gangan tsî ge ǃgâiǂâixa.” (ǃNǃkh. 28:13-15) ǀNî ǁaeb ai da ge ǀnoms ǀguisa a dī ǁkhā khoe-e da ga ra tawede o. ǁNās ge khoe-e a ǂkhâǃnâ ǁkhā ǀnîsi î ga ǃgâise tsâ tama ga ra io.

Apostel Jakobub ge ǀgaisa ǁnamasa ge mā. ǀNî Xristeǁîn ge gere ǀai dī ǃhūbaib ǀkha ǀhōsagusisa ūhâs ǃnâ-ū. (Jak. 4:4) Xawe ǃgaoǃgâ re Jakobub ge ǁîb sîǂkhanisa a tsoatsoa ǀgausa:

“Jakobuta, Elob tsî ǃKhūb Jesub Xristub di ǃgāta, disiǀgamǀa ǃhaodi ǀgaruǀgarusib ǃnâ hâdi ǃoa: ǃGâiaǂgao re!” (Jak. 1:1) ǁÎb khomai-aon ge ǁîb ǁnamasa supuse ge ǃkhōǃoa ǁîb ra tawede ǀgauban ge a mû o. ǃGamǃgamsenxa ǀgaub ǃnâ tawedes ge daoba ra ǁkhowa-am î da khoen ǀkha ǃhoa ǁkhā ǂhâǂhâsa xūn xas tsîna.

Khoena nî tsâǀkhā tawedes ge nî ǃnubu i tsî khoexaǃnâ ǀnamma nî ǁgau. Nēsa da ge khoen mû tama hâ xawes tsîna nî dī. (Mat. 22:39) ǀNî ǃgâsas ge Irelandi ǃnâ ǀhaos nî tsoatsoas aiǃâ ǀgui ǀhû-ommi tawa ge sī. ǂGâs ra hînab ge ǀnî ǃgâsaba ǀnom rase ge mî: “Matisa? Kaise î ge a ǃgâi mû dusa.” ǁNāpaxūs ge ǃgâsasa sī ge ǂnû.

Wekhegu ǃkharu hâses ge ǁnā ǃgâsaba ǃoa ge ī tsî ge mî ǁaerobas ge oms ai kaise ǃgâi tama mâsiba ge ūhâ i. “ǁNā ǃuia ta ge kaise ǁgaise gere tsâ” dis ge ra mî “nēs xa ǃaromahe hâse ta ge ǀhû-omma ǃoa ge ī ǂgao tama hâ i. ǂGui xūn ǀhaos tawa ge mîhena ta ge ǂâi hō tama hâ xawe ǁnā ǃgâsab di tawedes ǀguisa. Nēs ge ǁkhoreǁharesase ge tsâ kai te. Nē ǃgâsaba ta ge kai aios di ra mî.”

ǁNā ǃgâsab ge ǁîb tawedes ge tsâǀkhā te ǀgauba a ǀū. “ǁÎs ge ǁnā mîdi ge tsâǀkhāsi ǀgauba a mîba te o” dib ge ǃgâsaba ra mî. O ta ge kaise ge ǂkhî ǁgūtsâ ta ge o. Nēs ge ǃgâise ge tsâ kai te.”

Salomob ge ge xoa: “Sa pereba aoǂui ǁgammi ai, ots ge ǀoasa tsēdi khaoǃgâ ǁîba nîra hō.” (Aoǁn. 11:1) Sida tawede di ǃnâ khoexaǃnâ ǀgauba ǁgaus ǃnâ-ū da ge nau khoen tsî sida tsîna aitsama ra khoakhoasen. Tā da ge tawedes di ǀgaiba nî ǃgôaǁnâ.