HURIB di ǁgammi ge ǂgaub ǃoagu ǃgarise ra hā Europab ǃoab ǃgâsab George Younga ra ī hîna. Xaweb ge ǁîba Brasili ǃnâb ge a dī ǀō-aisa aoǁnâ sîsenni xa ra ǂâi. * ǃGâsab Youngi ge ǁîb di ǀasa ǁgaumâis hîna Spanjeb tsî Portugali ǃnâ hâs xa ra ǂâi, ǂgui ǃādi noxoba amaba ǁnâu tama hâ amaga. ǁÎb ge gere ǂâi sīb ra khamib ge ǃgâsab J. F. Rutherfordi ǃhoade nî ǀhaoǀhao tsî 300 000 xa a ǃnāsa ǂhawega nî māǂui di.

ǃGâsab Youngi ge Lisbons ǃnâ 1925ǁî kurib ǃnâ ge sī xaweb ge ǁîba ǃgâi tama mâsiba ge hōǃâ. Nē ǃhūb ge ǂgaeǂgui ra gaoside 1910ǁî kuri ge ǀamǀam tsîs ge Catholic ǂgomsa ǁîs di ǃgâiba ge ǂoaǃnâ. ǃHūb di khoen ge ge ǃnora xawe î ge ǂkhîoǃnâsiba khoen ǁaegu ge kai.

ǃGâsab Youngi J. F. Rutherfordi nî mā ǃhoadi ǃgao ra ǂhomisen hînab ge ǁnā ǃhūb di ǂhanuba ǁnāsa ge mâǃoa tsoatsoa. Britse sekretaris tsî Foreign Bible Societis tsîn ge ǃgâsab Younga ge mîba ǁîb nî mâǃoahesa. Xaweb ge ǃgâsab Younga ǁkhoaǂgaose ge aiǃgû mâǃoaheb gere xawe. ǁÎb ge Camões ǀgapigab skoli ai nē ǃhoadi ǃgao ge ǂgansen tsî ge mā-amhe.

Tsîs ge Meib 13 sa ge hā ǃgâsab J.F.Rutherfordi ǃhoade nî māse. Kaise da ge nēsa ǃoa gere mûǂui. Plakardan tsî ǂhôa ǂkhanin tsîn ge mā-e nî ǃhoas di xoaǂamsa ge ūhâ i “How to Live on the Earth Forever” di hâsa. Tsî gu ge mâǃoa-aoga nēs xa gu ge ǁnâu o, o ǃhaese ǂhôan ǂkhanib ǃnâ “ǂHumi kēbo-aogu” xan ge khoena nî ǂanbasen di hâ ǃâba ge xoa. Nē mâǃoa-aon ge skoli tawa sī tsî ǃgâsab Rutherfordi ǃhoas ǃoagun xoa hâ xūna ūhâ ǂkhanina sī gere māǂui.

Xaweb ge skola ǃhoas ǃgao 2 000 xa a ǃnāsa khoen xa ge ǀoa hâ i. ǀNîn hîna ge ǁnâun gere xūn xa ǃgâibahe în ge ǂui rase ǀgapigaba xu gere ǃgâ tsîn ge ǀnîna ǁnāpa saali ǂganaga ge hâ i xūn ai ǀgapise ge ǂnôa i în ǃgâise ǁnâu ǁkhā.

Hoa xūn ge ǃgâise ge ǃgû tama hâ i. Mâǃoa-aon ge ǃau tsî ǂnû-ai ǃnaode gere khôa. Xaweb ge ǃgâsab Rutherforda ge ǃao tama hâ i tsî tafels ai ge ǂoa îb ǁnâuhe ǁkhā. ǁÎb ge ǃhoa toa o, on ge 1 200 khoena ǁîn ǀondi tsî ǁan ǃkhaidi tsîna ge xoamâi în Elobmîs ai ǃgaoǃgaosa ǂkhanina mā-e. Sao ra tsēs ai î ge O Século ǂhôa ǂkhaniba ǃgâsab Rutherfordi ǃhoas xa ge xoa.

Septemberi 1925ǁî kurib ǃnâ î ge Portuguese gowab ǃnâ The Watch Tower ǂkhaniba ge hâ i  Portugali ǃnâ. (ǀNai î ge Portuguese gowab hîna Brasili ǃnâ hâb ǃnâ The Watch Tower ǂkhaniba ge hâ i.) ǁNā ǁaeb ǃnâb ge Virgílio Ferguson di ǀon hâ ǃgâsab hîna ge Brasili ǃnâ hâ îba ǀapena gere dī îb Portugala ǃoa doe tsî aoǁnâ sîsenni ǀkha sī hui. ǁÎb ge ǁaeroba ǃkharu hâse ǃgâsab Youngi ǀkha Brasili ǁnâub beros tawa gere sîsen. Virgíliob tsî ǁîb taras Lizzis tsîn ge ǃgâsab Youngi ǀkha sī ge ǀhao. ǃGâsab Fergusoni ge ǃgâi ǁaeb ǃnâ ge sī ǃgâsab Youngi ge ǀnî hâ ǂkharide ǃoa gere ī amaga îb sī aoǁnâ, nēs ge Soviet Unions tsîna ge ǃkhōǂgā hâ i.

Armis ge ǂhanuga ǁnā ǃhūb ǃnâ a hau o, on ge mâǃoa-aona ge ǀgai. ǃGâsab Fergusoni ge ǁîb ǁkhāsib hoab ǀkha ge dītsâ ǁîb ǃgâsan tsî ǁîn ǁaxasigu tsîna ǁkhaubasa. ǁÎb ge mā-amsa gere ôa îb ǁîb omsa ǀhaodi ǃgao sîsen-ū. Oktoberi 1927ǁî kurib ǃnâb ge nē mā-amsa ge hō.

Nē ǁaeb ǃnân ge 450 khoena Portugali ǃnâ The Watch Tower ǂkhaniba gere ǂhâba. ǂKhanigu tsî ǂkhanidi tsîn ǃnâ-ū î ge amaba, Angolab, Azoresi, Cape Verdeb, East Timori, Goab, Madeirab tsî Mosambieki kōse ge khoraǂuisen.

1920ǁÎ kurib ǃnâ i ge ǃgamǃgamsen hâ ǃhana-aob Manuel da Silva Jordão di ǀon hâba Lisbona ǃoa ge hā. ǁÎb ge Brasili ǃnâb hâ hîna ǃgâsab Youngi di ǃhoasa ge ǁnâu. Tsî amaba ge mûǂan tsî ǁkhoaǂgaoxase ǃgâsab Fergusona aoǁnâ sîsen-e khoraǂuis ǃnâ gere hui ǂgao. Nēsa dīs ǃgaob ge ǃgâsab Manuela ge aimâba-ao kai. Elobmîs ai ǃgaoǃgaosa ǂkhanin gere ǀgoraǂuihe amaga î ge Lisbons ǃnâ ǀhaohâba ge kai.

1934ǁÎ kurib ǃnâ i ge ǃgâsab Fergusoni tsî ǁîb taras tsîna Brasila ǃoa ge oa. Xawe ra ge ǂgui khoena amab xa ge ǁkhāǁkhā. Europab ǃnâ ge hâ i torogu ǂam-ai î ge Portugals ǃnâ ge hâ i ǃgâsana gagasise ge aiǃgû. ǁAerob ǀgaiba i ge nē ǃgâsana gere ǂkhabu xawe 1947ǁî kurib ǃnâ ǁkhawa ge ǀgai John Cooke di ǀon hâ sîsabeb ge sī o. ǁNāsa xu î ge aoǁnâ-aon ǃgôaba kais ǀguisa gere dī. ǂHanub ge 1962ǁî kurib ǃnâ Jehovab di ǀHûǀguitimî-aon di sîsen-e a ǂkhā xawes ge ǁnāsa ge ǃaroma î-i aoǁnâ-aon di ǃgôaba ǀarosen. Jehovab di ǀHûǀguitimî-aon ge 1974ǁî kuri a mûǂanhes khaoǃgâ î ge 13 000 xa a ǃnāsa aoǁnâ-aona ǃhūb ǂhawase ge hâ i.

Nēstē î ge 50 000 xa a ǃnāsa Gaosib aoǁnâ-aona Portugali tsî ǁîb ǂnamipe hâ ǂharidi ǃnâ hâ, nēs ge Azores tsî Madeiras tsîna ǃkhōǂgā hâ. ǁNā aoǁnâ-aon ǁaegu î ge 1925ǁî kurib ǃnâ ge ǃgâsab Rutherfordi di ǃhoasa a ǁnâu khoen ǀgôan tsîna hâ.

Jehovaba da ge ra gangan nē ǀkhaegu ǃaroma tsî ǁnā ǃgâsan hîna ge ǂgomǂgomsase ǁîba gere ǃoaban tsîna. Tsî ǁîgu hîna ǃûi-aogu ase ǁîgu ǃgâsana gere huiga ‘ǀhûhâsib ǃgāgu ase Xristub di daoǁgaus ǃnāga.’—Rom. 15:15, 16.—ǃKharu ge ǃnaeǃkhaidi ǂkhanin ǁgâub Portugala xu.